Hechos 8
8
Sauloba zuburia odꞌa mebẽrãta
1Sauloma biga basia Esteban beabʉdara. Abꞌaʉ ewade mebẽrã bĩ ẽã osidꞌa Jerusalénne bꞌeta. Mawũẽ Jesúsba zokꞌakuadꞌa wãna ẽãnerã ãzhira jõma jãrãzoa wãsidꞌa Judea druadꞌe, Samaria druadꞌe. 2Ũmakĩrãrã ʉ̃kʉrʉ Daizezedꞌebemaba Esteban joudꞌe edesidꞌa. Kꞌãbãẽã jẽgasidꞌa izhi kꞌarea. 3Maʉ̃nerã Saulobara mebẽrã bĩ ẽã okua nʉmasia. Deza deidꞌu wãpe jidakua nʉmasia zhũmakĩrãrãta, wũẽrãrãta, aramaʉ̃ne edebiga nʉmasia cárceldꞌe edꞌa.
Bedꞌea biata jaradꞌapeadꞌa Samariadꞌe
4Mawũãmina jãrãzoa wãnabara baridu maẽ jara wãsidꞌa Jesúsdꞌe bedꞌea biara. 5Felipera Samaria pʉwʉrʉedꞌa wãpe jarakꞌasia Jesúra zhãrã Ẽdrʉbita. 6Zhãrãbara bʉredrʉ bia ũrĩ bꞌeasia Felipeba ne jarabʉrʉra, ũrĩ akʉ bꞌeasia ũdudꞌakꞌata okua nʉmʉrã. 7Bioba jai abꞌedꞌebara jaira bꞌia ãĩ wã nʉmasia. Kꞌakua pira ẽã kꞌaya bꞌera, wã bꞌe ẽã bꞌera bꞌe tupudꞌeasia. 8Mawũẽ kꞌãbãẽã sobia nʉmeãsia maʉ̃ pʉwʉrʉdꞌera.
9Maʉ̃ne bꞌasia Simón abadata, naara maʉ̃bara jaidꞌeba kꞌãrẽ obꞌasia maʉ̃ pʉwʉrʉdꞌera. Aramaʉ̃ne zhãrã Samariadꞌebema sewakuasia izhira zhi zroma abꞌʉba. 10Maʉ̃ bedꞌeara jõmaʉ̃ba bia ũrĩ bꞌeasia, mawũẽ zuburia bꞌeba bara bꞌeba mawũã bazhidꞌa: Naʉ̃ zareara Daizezedꞌea.
11Izhi bedꞌeara bia ũrĩ bꞌeasia jaidꞌeba kꞌãrẽ obꞌʉba sewakuasi baera ewari bio. 12Mawũãmina bedꞌea biata Daizezeta Nokꞌodꞌebemata Jesucristodꞌebemata Felipeba jarabʉrʉra ĩjãnape buru kꞌoesidꞌa zhũmakĩrãrãta, wũẽrãrãta. 13Izhi Simónbidꞌa ĩjãpe buru kꞌoepe ewariza bꞌasia Felipe ũme. Ũdudꞌakꞌa zromata ototobʉrʉta ũdubʉrʉdꞌera bia akʉ bꞌasia.
14Jesúsba zokꞌakuadꞌata Jerusalénne bꞌebara ũrĩsidꞌa mawũã Samariadꞌe Daizeze bedꞌea ĩjãbʉdata, mawũẽ maĩĩnu zokꞌasidꞌa Pedrota Juanta. 15Maʉ̃rã zedꞌape ãzhibari zhiwidꞌisidꞌa jidadꞌamarẽã Jawurebiata. 16Wadꞌi ãzhidꞌe edꞌa ze ẽbasia miã iabꞌaʉdꞌe, awuarabʉrʉ bari buru kꞌoepe bꞌeasia Jesús trʉ̃neba. 17Mawũẽ juwua ʉ̃rʉ̃ bꞌʉkuabʉdaba jidasidꞌa Jawurebiara.
18Maʉ̃ta Simónba ũdui, mawũã Jesúsba zokꞌakuadꞌaba juwua ʉ̃rʉ̃ bꞌʉkua Jawurebia diabʉdaba edaita plata dedꞌeka, 19mawũãsia: Mʉããbidꞌa diaudua kꞌãʉ̃ zareata, mʉã juwuata ʉ̃rʉ̃ bꞌʉbʉrʉbara jidamarẽã Jawurebiata.
20Mawũãĩ Pedroba mawũãsia: Bʉ platara bʉzhi ũme tebʉdꞌe wãña, zareata Daizezeba bari dia bꞌʉta plataba edabadata krĩchabʉrʉdꞌeba. 21Bʉra naʉ̃ kꞌaudꞌa nʉmaĩnebema ẽã, bʉ sora jipa nʉmʉ ẽbaera Daizeze kĩrãbitara. 22Maʉ̃ba bʉre bia ẽãrã ãmape zuburia bedꞌearua Daizezea, baʉcha bedꞌea ne ẽã bꞌʉya mawũã krĩchabʉrʉta sodꞌeba. 23Daiba kꞌãrẽ opanʉneba bʉra bĩ ẽã bꞌʉa, mawũẽ bia ẽãba kꞌabꞌari bꞌʉta mʉãrã kꞌawua kꞌobꞌʉa.
24Mawũãĩ Simónbara panaʉ̃ mawũãsia: Marãta mʉbari zuburia bedꞌeaudua Daizezea. Marãba mawũã jarabʉdata ze ẽbamarẽã mʉ ʉ̃rʉ̃.
25Ãzhara Jesúsdꞌebemata zhãrãã nebʉrʉdꞌape Daizeze bedꞌeata jaradꞌape wakusa Jerusalénʉẽna wãsidꞌa. Maʉ̃nerã Samariadꞌe pʉwʉrʉ zake tabꞌe maẽ jarasidꞌa Jesúsdꞌe bedꞌea biara.
Felipeba jʉrʉ wãna Etiopíadꞌebemata
26Ángel Daizezedꞌeta Felipea bedꞌeabʉrʉta mawũãsia: Piradrʉpe wãrũã Jerusalénneba wãbada odꞌe Gaza pʉwʉrʉedꞌa, maʉ̃ ora wã bꞌʉa drua drudrua tabꞌʉdꞌe. 27Mawũãĩ izhira piradrʉpe wãsia. Maʉ̃ne ũdusia ũmakĩrã Etiopía druadꞌebemata. Maʉ̃ nokꞌota bꞌʉkꞌãrĩsia Candaceba, Candacera reina basia Etiopíadꞌe. Maʉ̃bara maʉ̃ bꞌʉkꞌãrĩsia ne biata izha erubꞌʉ jõmaʉ̃ ʉ̃rʉ̃. Maʉ̃ta Jerusalén pʉwʉrʉedꞌa zesia Daizeze ibia jaradꞌe. 28Jẽrũya wãta jewedꞌa bꞌasia coche kꞌawayoba erbꞌari ededꞌe. Daizezeba bedꞌeata jarabibari librota le nʉmasia Isaíadꞌeta.
29Maʉ̃ne Jawurebiaba Felipea mawũãsia: Orradua kꞌãʉ̃ cocheta. 30Felipeba orrabʉrʉdꞌera ũrĩsia Daizezeba bedꞌeata jarabibari librota le nʉmʉta Isaíadꞌeta, mawũẽ mawũãsia: ¿Ũrĩ bꞌʉka bʉa le bꞌʉra?
31Mawũãĩ izhara mawũãsia: ¿Mʉã sãwũã ũrĩĩpe iabꞌaʉba sãwũãta mʉãã jara ẽbʉrʉ? Mawũãpe Felipea jarasia ʉ̃tʉ zepe jewedꞌamarẽã izhi ũme. 32Bedꞌeata zhi bꞌʉmata le kꞌobꞌadꞌara mawũã bꞌasia:
Iabꞌa oveja kĩrãkꞌa beadꞌe edesidꞌa. Izhi kꞌara kꞌõbari kĩrãbita oveja chupeabari kĩrãkꞌa chupeasia izhira.
33Zuburia osidꞌa mawũã odꞌa ẽbai bꞌʉdꞌe. Aramaʉ̃nerã izhi ewaridꞌe bꞌedꞌebema, ¿kꞌaiba ma jaraipe? Aramaʉ̃ne naʉ̃ druadꞌe beasidꞌa. (Isaías 53:7-8)
34Nokꞌobara Felipea mawũãsia: Mʉ biata odua mʉãã jaradua: ¿Naʉ̃ kꞌaidꞌebemata jara bꞌʉ Daizezeba bedꞌeata jarabibarita bꞌadꞌabara, izhidꞌebemakꞌa o awʉrʉdꞌebema?
35Mawũãĩ Felipebara maʉ̃ta zhi bꞌʉmaneba bedꞌea biata jarasia Jesúsdꞌebemata. 36Odꞌe wãne jũẽsidꞌa baniãta bꞌʉ maẽ, mawũẽ nokꞌobara mawũãsia: Baniã za bꞌʉa, ¿kꞌãrẽba bꞌe ẽbaipe mʉ buru kꞌoeira?
37Mawũãĩ Felipebara mawũãsia: Soidꞌu ĩjãbʉrʉra buru kꞌoesia bꞌʉa. Mawũãĩ izhara panaʉ̃ mawũãsia: Mʉãrã ĩjãbʉrʉa Jesucristora Daizeze Warrata.
38Mawũãpe nʉmebisia coche kꞌawayoba erbꞌari edera. Mobe ũmewedꞌa eidꞌu wãsidꞌa baniãĩnu, Felipebara aramaʉ̃ne buru kꞌoesia. 39Baniã maẽba wãrĩzebʉdadꞌera Jawurebia Daizezedꞌeba erujʉ̃drʉsia Felipera, mawũẽ nokꞌobara wueta ũdu ẽbasia. Aramaʉ̃ne sobia wãsia odꞌe. 40Maʉ̃ne Felipera Azoto pʉwʉrʉidꞌu basia. Izhi berabꞌari wã maẽ Jesúsdꞌebema bedꞌea biata pʉwʉrʉ jõmaʉ̃ maẽ jarakꞌa wãsia jũẽñeẽna Cesarea pʉwʉrʉidꞌu.
Aktualisht i përzgjedhur:
Hechos 8: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.