Hechos 22
22
1Mʉ ʉrerã, marã mʉ zeze kĩrãkꞌa bꞌea, mʉ marã kĩrãbita mʉzhikusa zhi kꞌareba bedꞌeaita ũrĩũdua.
2Hebreo bedꞌeadꞌe bedꞌeabʉrʉta ũrĩnaĩ wuaabʉrʉ chupeasidꞌa. Mawũẽ izhara mawũãsia: 3Wãrãnebai mʉrã judíota tosia Tarso pʉwʉrʉdꞌe, maʉ̃ pʉwʉrʉra Cilicia druadꞌebema. Mawũãmina mʉrã warisia nama Jerusalén pʉwʉrʉdꞌe. Mʉãrã ũrãgꞌara kꞌawasia Gamalieldꞌeba, sãwũã kꞌawai bꞌʉdꞌe kꞌawasia Moisé ũrãgꞌa dazhirã zhibarirã bꞌeadꞌadꞌeta. Aramaʉ̃ne Daizezedꞌebema aribꞌae bꞌasia idꞌi ewade jõma marã bꞌe kĩrãkꞌa. 4Mʉãrã pẽwã bꞌasia Jesúsdꞌebema ĩjã bꞌera beaita, jidakuape cárceldꞌe chãbꞌariita zhũmakĩrãrãta wũẽrãrãta. 5Sacerdote wagꞌaubara kꞌawua bꞌʉa mʉ maʉ̃ kꞌaudꞌa bꞌadꞌara, kꞌawua bꞌea nokꞌorã jõmaʉ̃ba, ãzhara mʉãã kꞌarta diasidꞌa Jesúsdꞌebema ĩjã bꞌera mʉãrã jidasia bꞌʉta dazhirã ʉrerãta bꞌera. Mawũẽ mʉrã Damascoedꞌa wãsia mama bꞌesidꞌa Jerusalén pʉwʉrʉedꞌa jidakua weita, aramaʉ̃ne pua kꞌawua odꞌamarẽã.
Pabloba jaradꞌa Jesúsdꞌebema ĩjãnata
6Mawũãmina mʉ wãne Damasco kꞌaita babʉrʉdꞌe, ʉ̃matipa aritiaudꞌe mʉta pʉrra abꞌaedꞌa urua tẽũsia bãjãneba. 7Mʉta udꞌa bꞌaebʉrʉdꞌera nemita ũrĩbʉrʉta mʉãã mawũãsia: Saulo, Saulo, ¿bʉa mʉrã kꞌãrẽã pẽwã bꞌʉ? 8Mawũãĩ mʉãrã panaʉ̃ mawũãsia: ¿Bʉra kꞌaipe Nokꞌó? Mʉã mawũãĩ mawũãsia: Mʉrã Jesús Nazaredꞌebema, maʉ̃ta bʉa pẽwã bꞌʉa. 9Mʉ bawara kꞌobꞌebara ʉ̃nata wãrãne ũdubʉdaba perasidꞌa, mawũãmina mʉãã bedꞌea kꞌobꞌʉ nemirã ũrĩna ẽbasia. 10Mʉãrã mawũãsia: ¿Mʉãrã kꞌãrẽta oipe Nokꞌó? Mʉã mawũãĩ Nokꞌobara mawũãsia: Piradrʉpe Damascoedꞌa wãrũã, mama jõma jaradꞌaya bʉa kꞌãrẽ oita. 11Mʉrã daʉbꞌerreasia mʉma mawũã urua tẽʉ̃naba, mawũẽ mʉrã Damascoedꞌa zesia juwuadꞌeba edebʉdaba mʉ bawara kꞌobꞌeba.
12Mama bꞌasia ũmakĩrã Ananía abadata, maʉ̃bara aribꞌae bꞌasia Moisé ũrãgꞌata. Izhira jõmaʉ̃ba bia jara panasia judíorã mama bꞌebara. 13Maʉ̃ta mʉma zepe mʉta orrape mawũãsia: Mebea Saulo, bʉra ne ũdu bꞌidꞌa. Maʉ̃ daucha mʉrã wakusa ne ũdubʉrʉba mʉãrã izhira akʉsia. 14Mawũẽ izhara mawũãsia: Dazhirã zhibarirã bꞌeadꞌa Zhibariba bʉra jʉrʉsia izha kꞌãrẽ krĩñata bʉa kꞌawuamarẽã, aramaʉ̃ne akʉmarẽã Jesús biata, izhi nemita ũrĩmarẽã izhi idꞌeba. 15Izhidꞌebemata bʉara zhãrã jõmaʉ̃ã jaraya bʉa ũdudꞌata bʉa ũrĩnata. 16Mawũẽ ¿bʉra kꞌãrẽã pi kꞌobꞌaipe? Piradrʉrua, buru kꞌoedua, bʉra kꞌazhiruata biodꞌebara bedꞌea ne ẽã bꞌʉmarẽã izhaa jaradua.
Pablo zokꞌadꞌa judíorã ẽãma
17Mʉrã jẽrũya Jerusalén pʉwʉrʉedꞌa zepe Daizeze dedꞌa ewara maẽ zhiwidꞌi nʉmʉne ne ũdusia kꞌãĩmokꞌaradꞌe kĩrãkꞌa. 18Maʉ̃nerã mʉã Nokꞌo Jesústa ũdubʉrʉdꞌera mʉãã mawũãsia: Jerusalénnebara ĩñabasia ãĩ wãrũã, namarã ĩjãna ẽbaya bʉa jarabʉrʉra mʉnebemata. 19Mawũãĩ mʉãrã mawũãsia: Nokꞌó, ãzhara kꞌawua bꞌea mʉãrã de zhi jʉrebadata nʉme maẽ sãwũã cárceldꞌe bꞌʉkua bꞌadꞌata ukua bꞌadꞌata bʉdꞌebemata ĩjã bꞌera. 20Esteban bʉdꞌebema jarabarita beasidꞌadꞌera mʉsidꞌa mama kꞌobꞌadꞌaba mʉma biga basia izhi beabʉdara, zrʉgadꞌa ẽbamarẽã mʉã akʉsia izhi bea kꞌobꞌe wuara. 21Mʉã mawũãĩ mawũãsia: Wãrũã, mʉã bʉra wawara zokꞌaya judíorã ẽãma.
Pablo ubii badꞌa soldaorã nokꞌota wagꞌauba
22Pablo bedꞌeara mamabai ũrĩsidꞌa. Aramaʉ̃ne nemi jĩgua mawũãsidꞌa: Druadꞌebara kꞌãʉ̃ nebabirua, kꞌãʉ̃ bꞌaidꞌe bꞌʉ ẽã.
23Aramaʉ̃ne ãzhira kĩrũ jʉra bꞌikua wua ãzha ãnebꞌari bꞌera niãwe, nejarra ewaradꞌe jãmapo jirpanʉba, 24soldaorã nokꞌota wagꞌaubara soldaorã tabꞌʉ maẽ edꞌa ededꞌamarẽã jarape udꞌamarẽã jarasia bedꞌeamarẽã, aramaʉ̃ne kꞌawuaita kꞌãrẽã mawũã kĩrũ jʉra bꞌikua nʉmeta izhi ʉ̃rʉ̃. 25Mawũãmina udꞌaita jʉ̃bʉdadꞌera Pablobara soldaorã nokꞌota mama kꞌobꞌʉa mawũãsia: ¿Roma bidꞌara marãã ubi panʉka sãwũã oita jaradꞌa ẽwedꞌara?
26Soldaorã nokꞌoba maʉ̃ta ũrĩbʉrʉdꞌera wãpe soldaorã nokꞌota wagꞌaua mawũãsia: ¿Bʉara sãwũã oipe? Ũmakĩrã jarira Romanebema.
27Mawũãĩ soldaorã nokꞌota wagꞌaubara orrape mawũãsia: Mʉãã jaradua ¿bʉra Romanebemakꞌa?
Mawũãĩ izhara mawũãsia: Ããjã.
28Mawũãĩ soldaorã nokꞌota wagꞌaubara mawũãsia: Mʉã plata bio diabʉrʉba mʉrã Roma bidꞌata bꞌesia.
Mawũãĩ Pablobara mawũãsia: Mʉrã todꞌadꞌeba maʉ̃ã.
29Aramaʉ̃ne izhi uita kꞌobꞌeadꞌabara idaribisidꞌa. Soldaorã nokꞌota wagꞌaubara mawũã Roma bidꞌata kꞌawuape izhisidꞌa perasia jʉ̃bidꞌaba.
Pablo kꞌobꞌadꞌa nokꞌorã kĩrãbita
30Nrũẽma soldaorã nokꞌota wagꞌaubara bia kꞌawua krĩñasia judíorãbara kꞌãrẽã jirpanʉta, mawũẽ cadena ẽnabisia. Mobe zebidꞌamarẽã jarasia nokꞌorã sacerdoterãta, nokꞌorã wagꞌaurã bawara. Mobe Pablo ãĩ edape kꞌobꞌʉsia ãzhi kĩrãbita.
Aktualisht i përzgjedhur:
Hechos 22: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.