Hechos 19
19
Pablo zedꞌa Éfesodꞌe
1Apolo Corinto pʉwʉrʉdꞌe bꞌʉdꞌera Pablora drua kꞌatuma bara nʉmene berabꞌarikua zesia Éfeso pʉwʉrʉedꞌa. Maʉ̃ne Jesúsdꞌebema ĩjã bꞌeta ũdukuai, 2mawũãsia: ¿Marãbara Jawurebiara jidasidꞌakꞌa Jesúsdꞌebema ĩjãsidꞌadꞌera?
Mawũãĩ mawũãsidꞌa: Daibara ũrĩnakꞌa Jawurebiata bꞌʉra.
3Mawũãnaĩ mawũãsia: ¿Kꞌaiba jarabʉrʉdꞌeba buru kꞌoesidꞌa?
Mawũãĩ ãzhara mawũãsidꞌa: Buru kꞌoesidꞌa Juanba jaradꞌadꞌeba.
4Mawũãnaĩ Pablobara mawũãsia: Juanbara zhãrã buru kꞌoesia buru kꞌoebʉdaba kꞌazhiruara ãmape Daizezeta pẽwãnamarẽã, aramaʉ̃ne zhãrãã jarasia ĩjãnamarẽã izhi tẽã zeidꞌebemata, maʉ̃ Jesústa zhãrã Ẽdrʉbia.
5Maʉ̃ta ũrĩnape buru kꞌoesidꞌa Nokꞌo Jesús trʉ̃neba. 6Maʉ̃ne Pabloba juwua ãzhi ʉ̃rʉ̃ bꞌʉbʉrʉdꞌera ãzhidꞌe zesia Jawurebiara. Mawũẽ bedꞌea awuara bedꞌeasidꞌa, Daizezeba jarabibʉrʉsidꞌa jarasidꞌa. 7Ãzhira jõmaʉ̃ne doce kꞌopanasia zhũmakĩrãrãta.
8De zhi jʉrebada maẽ Pablo edꞌa wãpe wãnigua bedꞌea bꞌʉta jedꞌekꞌo ũbea basia. Ĩjãbigayidꞌe jara bꞌasia Daizezeta Nokꞌodꞌebemata. 9Mawũãmina ʉ̃kʉrʉbara ĩjãna ẽãba Jesús pẽwã bꞌera bĩ ẽã jara jirpanesia kꞌabana kĩrãbita. Mawũẽ Pablora ãzhi maẽbara wãbʉrʉta Jesúsdꞌebema ĩjã bꞌera jʉre edepe ewariza bedꞌea bꞌasia escuelata Tiranno abadadꞌe maẽ. 10Aramaʉ̃ne bꞌasia año ũme, mawũẽ Asia druadꞌe bꞌebara jõmaʉ̃ba judíorãba, griegorãba bedꞌeara ũrĩkꞌawasidꞌa Nokꞌo Jesúsdꞌera. 11Daizezebara ũdudꞌakꞌata okua nʉmasia Pablodꞌeba. 12Pañuelota o wuata Pablo kꞌakuama tʉdꞌape ede jirpanesia kꞌayarãma, aramaʉ̃ne puara ãĩ wã nʉmasia ãzhidꞌebara, jai kꞌazhiruarãsidꞌa ãĩ wã nʉmasia.
13Maʉ̃nerã judíorãnebemata ʉ̃kʉrʉ pʉrrʉa bꞌeasia jaita ãĩ jʉrekua bꞌeta, maʉ̃rãbara Jesús trʉ̃ta zokꞌa krĩñasidꞌa, mawũẽ jai kꞌazhiruarãta zhãrãne edꞌa bꞌea mawũãsidꞌa: ¡Mʉã marãã jaraya, Jesús trʉ̃neba ãĩ wãũdua Pabloba jara bꞌʉdꞌeba!
14Esceva abada warrarãta nʉmasia siete. Escevara judíota sacerdoterã nokꞌo basia, maʉ̃neta maʉ̃ kꞌaudꞌa bꞌeasia. 15Ewari abꞌa jai kꞌazhiruabara mawũãsia: Jesúra mʉã ũdukꞌawua bꞌʉa, Pablora kꞌaita mʉã kꞌawua bꞌʉa. Mawũãmina marã ¿kꞌãrẽ ẽãta duanu ẽka?
16Aramaʉ̃ne ũmakĩrã jai kꞌazhirua abꞌʉra ãzhi ʉ̃rʉ̃ pinandrʉpe poeakuasia. Mawũẽ maʉ̃ dedꞌaubara ẽkꞌadꞌa wãẽbasidꞌa zhara kꞌõgꞌozoa. 17Maʉ̃ta Éfeso pʉwʉrʉdꞌe bꞌebara jõmaʉ̃ba kꞌawuasidꞌa judíorãba, griegorãba, ãzhira jõma perasidꞌa. Aramaʉ̃ne bia jarasidꞌa Nokꞌo Jesúra.
18Bioba Jesúsdꞌebema ĩjãnapeadꞌabara jaradꞌe ze nʉmeãsia bia ẽãta ãzha obꞌeadꞌata. 19Jaidꞌebema kꞌaudꞌa bꞌeadꞌabidꞌa libro jaidꞌebemata wekuadꞌape bakuasidꞌa jõmaʉ̃ kĩrãbita. Maʉ̃ta sõmbe vale bꞌʉta juachabʉdadꞌera kꞌãbãẽã vale bꞌʉta kꞌawuabʉdata ãzhi platadꞌera vale bꞌasia cincuenta mil. 20Aramaʉ̃ne Jesúsdꞌebema ĩjã bꞌera eaba wãba zhi zromata trʉ̃poa wãsia bedꞌeata Nokꞌo Jesúsdꞌera.
21Maʉ̃ tẽã Pablora krĩchasia Jerusalén pʉwʉrʉedꞌa wãĩta pʉrrʉadꞌa tẽã Macedonia druadꞌe, Acaya druadꞌe. Maʉ̃nerã mawũãsia: Mʉrã Jerusalénne bꞌape wãĩ baraya Roma pʉwʉrʉidꞌubidꞌa. 22Aramaʉ̃ne Macedonia druaedꞌa zokꞌakuasia ũme izhi kꞌareba panʉta, maʉ̃rã panasia Timoteota, Erastota. Izhira ewari ʉ̃kʉrʉ bꞌesia Asia druadꞌe.
Kĩrũnapeadꞌa Éfesodꞌe
23Maʉ̃ ewadera kꞌãbãẽã kĩrũsidꞌa Jesúsdꞌebema pẽwã bꞌedꞌebemane. 24Ne platadꞌebemata obarita bꞌasia Demetrio abadata, maʉ̃bara platadꞌebemata de zakerãta o bꞌasia Diana ne zhi zromane erubꞌe de zata. Plata bio ganabiga bꞌasia maʉ̃ obiga duanukꞌãrĩrã. 25Maʉ̃rãta jʉresia abꞌarika maʉ̃ kꞌaudꞌa bꞌe bawara, mobe mawũãsia: Marãbara kꞌawua bꞌea kꞌãwũã naʉ̃ obꞌeba dazhirã bara bꞌeta. 26Mawũãmina marãbara akʉ bꞌea ũrĩ bꞌea Pablobara kꞌasia bꞌʉta, bari Efeso pʉwʉrʉdꞌebai ẽã, awuarabʉrʉ Asia drua jõma abꞌae bodꞌoa, aramaʉ̃ne zhãrã bioa kenabꞌaribibʉrʉta jara nʉmʉã zhi zromarã ẽãta kꞌãrẽ juwuaba obꞌera. 27Bari naʉ̃ dazhirã negociota aduai ẽã, awuarabʉrʉ Diana ne zhi zromane erubꞌe desidꞌa kꞌãrẽ ẽãne nʉmʉnaña. Aramaʉ̃ne zhi zroma ẽãne edadꞌaya zhi zromane erubꞌeta Asia drua jõmaʉ̃ne ẽjũã jõmaʉ̃ne.
28Maʉ̃ta ũrĩnaĩ kꞌãbãẽã kĩrũ nemi jĩgua mawũãsidꞌa: ¡Diana zhi zroma Efesio bidꞌarãnerã!
29Aramaʉ̃ne pʉwʉrʉdꞌebema kꞌawua ẽãkua dogꞌoba zhi jʉrebadaidꞌu piraposia jidadꞌape Gayota Aristarcota, maʉ̃rã Macedonia bidꞌarãta panasia Pablo kꞌaidꞌu. 30Pablora bedꞌeadꞌe wã krĩñasia zhãrã kꞌobꞌea, mawũãmina Jesúsdꞌebema ĩjã bꞌeba buedꞌa ẽbasia. 31Nokꞌorãnebema ʉ̃kʉrʉ Asia druadꞌebemabidꞌa izhi ũme biarãba bedꞌeata jarabuebʉdata zuburia bedꞌeasidꞌa edꞌa wã ẽbamarẽã zhi jʉrebadaidꞌu.
32Maʉ̃ẽna ʉ̃kʉrʉbara ne abꞌaʉta jara bꞌikua nʉmʉnerã, dewaraurãbidꞌa ne awʉrʉta jara bꞌikua nʉmasia zhi kꞌabanabara kꞌawuadꞌa ẽãba kꞌãrẽã zhi jʉredꞌapeadꞌata. 33Kꞌabanane edꞌauba Alejandrota jiraedabʉdata bedꞌeamarẽã edabꞌarisidꞌa judíorãba. Mawũẽ Alejandrobara chupeadꞌamarẽã juwuaba jarape ãzhi kꞌareba bedꞌeai basia zhãrã kꞌobꞌe kĩrãbita. 34Mawũãmina judíota kꞌawuadꞌape jõma hora ũme badea bꞌikua mawũãsidꞌa: ¡Diana zhi zroma Efesio bidꞌarãnerã!
35Maʉ̃ne kꞌarta bꞌʉbari zhi zromaba kꞌabanata chupeabigape mawũãsia: Efesio bidꞌarã, mʉã jaraita ũrĩũdua, ¿kꞌawua duanu ẽka Efesio bidꞌarãneta pʉwʉrʉta tabꞌʉra Diana ne zhi zromane erubꞌe deta akʉbari ẽka, izhira ʉ̃treba zesi ẽka Júpiter zhi zromane erubꞌe zadꞌe? 36Maʉ̃nebema mawũã ẽã abꞌedꞌa ẽbaera marã kĩrãtũmaũdua, kꞌãrẽ orãũdua bia krĩchadꞌa ẽãrã. 37Marãbara naʉ̃rã wesidꞌa dazhirãba zhi zromane erubꞌe dera bĩ ẽã opanʉ ẽãta, mitia jara panʉ ẽãta dazhirãne Diana ne zhi zromane erubꞌera. 38Demetriota kꞌãrẽ obadata izhi ũme bꞌe bawara iabꞌaʉ bawara bedꞌeata erubꞌebʉrʉ nokꞌorã bedꞌea araa obadata kꞌãma bꞌea. Mawũẽ zhiya ji bedꞌeaudua. 39Ne awʉrʉta jaradꞌaibʉrʉ nokꞌorãta ãba tabꞌʉdꞌe krĩcha bꞌedꞌaya. 40Bedꞌeata bꞌaya dazhirãta nokꞌorãba jidadꞌara idꞌi kꞌãwũã nʉme kꞌarea, dazhirãbara jara bꞌedꞌa ẽã kꞌãrẽã kꞌãwũã kĩrũ nʉmerã.
41Maʉ̃ta jarape buegasia ãba tabꞌʉra.
Aktualisht i përzgjedhur:
Hechos 19: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.