Hechos 18
18
Pablo bꞌadꞌa Corintodꞌe
1Maʉ̃ tẽã Pablora Atena pʉwʉrʉdꞌeba wãsia Corinto pʉwʉrʉedꞌa. 2Maĩnu ũdusia judío Aquila abadata Ponto druadꞌebemata, zhi kĩma Priscila ũme Italia druadꞌeba eewa zepe panasia. Mawũã zesidꞌa rey Claudioba jarasi baera judíorã jõma ãĩ wãmarẽã Romanebara. Pablora wãsia maʉ̃rãma. 3Izha obarita opanʉ baera ãzhi bawara bꞌepe ãba kꞌãrẽ oduanesia. Ãzhara obꞌeasia ne eba de obadata. 4Maʉ̃nerã de zhi jʉrebada maẽ ewari ẽnaʉ̃badaza bedꞌea bꞌʉta Jesúsdꞌebemata ĩjãbigayidꞌe bꞌasia judíorãã, griegorãã.
5Sila, Timoteo Macedonianeba zebʉdadꞌera Pablora jipa bedꞌeata jara bꞌesia, judíorãã jara bꞌasia Jesúra zhãrã Ẽdrʉbita. 6Mawũãmina maʉ̃rãbara ũrĩãmaba mitia bedꞌea jirpaneĩ wua jʉ̃ bꞌʉta niãwe mawũãsia: Kꞌãwũã bꞌedꞌeba Daizezebara pua kꞌawua okuaya. Mʉrã bedꞌea ne ẽbaya. Idꞌidꞌeuba mʉãrã Jesúsdꞌebema jaradꞌe wãña judíorã ẽãta bꞌea.
7De zhi jʉrebada maẽbara miã ũrãgꞌadꞌe wãsia Justo abada dedꞌa Daizeze wawia bꞌʉ maẽ, maʉ̃ dera nʉmasia de zhi jʉrebada kꞌaita. 8De zhi jʉrebada maẽ Crispo nokꞌoba Nokꞌo Jesúsdꞌebema ĩjãsia izhi dedꞌa bꞌe jõmaʉ̃ bawarauba. Corinto bidꞌarãba ũrĩbʉdadꞌera bioba ĩjã buru kꞌoe nʉmeãsia. 9Ewari abꞌa Nokꞌo Jesúsbara Pabloa kꞌãĩmokꞌaradꞌe kĩrãkꞌa diamase mawũãsia: Perarãrũã, awuarabʉrʉ bedꞌearua, chupearãrũã. 10Mʉrã bʉ ũme bꞌʉba bʉra miõba bĩ ẽã o ẽã. Mʉãrã mʉnebema ĩjãnaĩta bio erubꞌʉa naʉ̃ pʉwʉrʉdꞌe. 11Aramaʉ̃ne mama bꞌesia año abꞌa jedꞌekꞌo seis, maʉ̃nerã jarakꞌa bꞌasia Daizeze bedꞌeata.
12Maʉ̃ne Galión Acaya druadꞌe nokꞌota bꞌʉdꞌe judíorã krĩcha abꞌarika zekuasia Pablo bĩ ẽã odꞌaita, aramaʉ̃ne nokꞌorãma ededꞌape, 13mawũãsidꞌa: Naʉ̃ba Daizeze wawiadꞌaita zhãrãã jara bꞌʉra jãpe bꞌʉa Roma leydꞌebara.
14Mawũãnaĩ Pablo bedꞌeaidꞌera Galiónbara judíorãã mawũãsia: Bia ẽbasibʉrʉ o bedꞌea zroma basibʉrʉ, sãwũã oi bꞌʉdꞌe obʉrʉta mʉã marã judíorã bedꞌeara ũrĩkꞌausia. 15Mawũãmina bari bedꞌea baera, trʉ̃ baera, mazhi ũrãgꞌa baera, mazhabʉrʉ araa oudua. Mʉrã bedꞌea araa obarita kꞌobꞌa krĩña ẽã maʉ̃nebemanerã.
16Mawũãpe jʉrekuabisia nokꞌorã maẽbara. 17Aramaʉ̃ta griegorã jõmaʉ̃ba Sóstene de zhi jʉrebada maẽ nokꞌota jirtopota jirachisidꞌa nokꞌorã kĩrãbita. Mawũãmina Galiónbara araa akʉ ẽbasia.
18Pablora mama ewari bio bꞌape mebẽrãã wãta jarape barcodꞌe wãsia Siria druaedꞌa, maʉ̃nerã ãba wãsidꞌa Priscila zhi kĩma Aquila ũme. Wãĩ nawedꞌa Cencrea pʉwʉrʉdꞌe Pablora budꞌa wẽbisia, aribꞌaedꞌaba Daizezeita kꞌãrẽ oita jaradꞌata. 19Éfeso pʉwʉrʉidꞌu jũẽbʉrʉdꞌera Pablobara mama ãzhira ãĩ tʉsia. Aramaʉ̃ne de zhi jʉrebada maẽ edꞌa wãpe Jesúsdꞌebemata jara bedꞌeasia judíorãã. 20Maʉ̃rã zuburia bedꞌeasidꞌa ãzhi bawara ewari dããrã bꞌemarẽã, mawũãmina izhira bꞌe ẽbasia. 21Awuarabʉrʉ ãzhaa wãta jarape mawũãsia: Mʉrã edꞌa bꞌaibara Jerusalénne fiesta odꞌaidꞌe. Mawũãmina mʉrã wakusa marãma zeya Daizezeba krĩñabʉrʉ.
Mawũãpe barcodꞌe wãsia Éfesodꞌebara.
22Cesarea pʉwʉrʉedꞌa jũẽbʉrʉdꞌera, Jerusalénʉẽna wãrĩzesia mebẽrã saludꞌaita. Mobebʉrʉ edꞌaa wãsia Antioquía pʉwʉrʉedꞌa. 23Mama ewari dããrã bꞌape wãbʉrʉta pʉrrʉasia Galacia druadꞌe, Frigia druadꞌe, soidꞌu bꞌeamarẽã jara wãsia Jesúsdꞌebema ĩjã bꞌe jõmaʉ̃ã.
Apoloba Jesúsdꞌebema jaradꞌa Éfesodꞌe
24Maʉ̃ẽna Éfeso pʉwʉrʉedꞌa zesia judío Apolo abadata Alejandría pʉwʉrʉdꞌebemata. Izhira bi-ia bedꞌea bꞌasia, bia kꞌawua bꞌasia Daizeze bedꞌea zhi bꞌʉmata. 25Nokꞌo Jesúsdꞌebema maʉ̃ã kꞌawabisidꞌa. Mawũẽ Nokꞌo Jesúsdꞌebema bꞌʉsridꞌa bia jara bꞌasia bari kꞌawua bꞌasimina buru kꞌoeidꞌebemata Juanba jara bꞌadꞌata. 26Izhira wãnigua bedꞌea nʉmesia de zhi jʉrebada maẽ. Maʉ̃ta Priscilaba, Aquilaba ũrĩbʉdadꞌera jãpe ededꞌape bia jarasidꞌa Jesúsdꞌebema Daizezedꞌeta. 27Izhita Acaya druaedꞌa wã krĩñabʉrʉdꞌera mebẽrãbara bʉ wãĩrã biga abʉdata Jesúsdꞌebema ĩjã bꞌema bedꞌeata bꞌʉpe diabuesidꞌa bia edadꞌamarẽã. Maĩnu jũẽbʉrʉdꞌera kꞌãbãẽã kꞌarebasia Jesúsdꞌebema Daizezeba izhi biaba ĩjãbi bꞌʉta ĩjãnapeadꞌata. 28Jesúsdꞌebema ĩjãna ẽãneba jõmaʉ̃ daidꞌu zarea bedꞌeasia judíorãã, zhi bꞌʉmaneba kꞌawuabiga nʉmasia Jesúra zhãrã Ẽdrʉbita.
Aktualisht i përzgjedhur:
Hechos 18: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.