Hechos 20
20
Pablo wãna Macedoniaẽna, Greciaedꞌa
1Zhãrã kĩrũ nʉmeãnata taubʉrʉdꞌera Pablobara Jesúsdꞌebema ĩjã bꞌeta trʉ̃pe ũrãgꞌakuasia, mobe burakua mʉrã wã ape wãsia Macedonia druaedꞌa. 2Maʉ̃ druadꞌera pʉrrʉasia, aramaʉ̃ne mebẽrã soidꞌu bꞌeamarẽã ũrãgꞌape zesia Grecia druaedꞌa. 3Mama jedꞌekꞌo ũbea bꞌape barcodꞌe Siria druaedꞌa wãĩne kꞌawuasia judíorãba bĩ ẽã odꞌaita bedꞌea ausidꞌata, mawũẽ jẽrũya wãĩta krĩchasia Macedoniãre. 4Asia druaidꞌu kꞌopayasidꞌa Pirro warra Sópater Berea pʉwʉrʉdꞌebemaba, Aristarco dewara Segundo Tesalónica pʉwʉrʉdꞌebemaba, Gayo Derbe pʉwʉrʉdꞌebemaba, Timoteo, Tíquico, Trófimo Asia druadꞌebemarãba. 5Maʉ̃rãta na wãnape dai jʉ̃ãsidꞌa Troa pʉwʉrʉdꞌe. 6Pan ne oreguea ne ẽã kꞌobada ewarita berabꞌaribʉrʉdꞌera daira Filipo pʉwʉrʉdꞌeba barcodꞌe jizoape ewari juesomane ãzhi bawara zhi ũdukuasia Troa pʉwʉrʉdꞌe, daira mama duanesia ewari siete.
Wãba Pablo jũẽna Troadꞌe
7Semana ewarita nabemata domingodꞌe Jesúsdꞌebema ĩjã bꞌera ãba tabꞌasia Jesús bebu krĩcha pan pewa kꞌodꞌaita, maʉ̃nerã Pablora nrũẽma wãĩ baraba miã ũrãgꞌa nʉmʉne ewari ẽsadra basia. 8Ĩbĩrãta bio kꞌoakꞌoadrʉ nʉmasia kʉdꞌa ʉ̃rʉ̃bemata ʉ̃tʉidꞌu zhi jʉre tabꞌʉ maẽ. 9Kũrãta Eutico abadata kꞌãbãẽã dapea wuedꞌa jewedꞌa bꞌasia, Pablo dããrã bedꞌea nʉmʉba dapeaba kꞌãĩtotosia, mawũẽ kʉdꞌa ʉ̃rʉ̃bemata ũbeaidꞌuba udogꞌota jiraedasidꞌa zhi beumata. 10Aramaʉ̃ta Pablora udꞌubꞌaepe izhi ʉ̃rʉ̃ bꞌarrupe bʉra mawũãsia: Sopuarãũdua, zokꞌai bꞌʉa.
11Pablora wakusa wãrĩzepe Jesús bebu krĩcha pan pewa kꞌodꞌape bedꞌeasia ʉ̃nadrʉyeedꞌa, mobe wãsia. 12Kũrã zokꞌai edebʉdaba kꞌãbãẽã sobiasidꞌa.
Wãnapeadꞌa Troadꞌeba Miletoedꞌa
13Daira na wãta barcodꞌe Asón pʉwʉrʉedꞌa jizoasia Pablo mama bꞌaribidꞌaita, izha mawũã jaradꞌadꞌe drua wã krĩñape. 14Asón pʉwʉrʉdꞌe dai bawara zhi ũdupe barcodꞌe bꞌarisia, aramaʉ̃ne daira zesia Mitilene pʉwʉrʉedꞌa. 15Mamaʉ̃ba jizoabʉrʉdꞌera nrũẽma berabꞌarisidꞌa dodꞌu Quío kĩrãpe. Nrũẽma jũẽsidꞌa odedꞌaze dodꞌu Samoĩnu. Trogiliodꞌe õbꞌaedape nrũẽma jũẽsidꞌa Mileto pʉwʉrʉedꞌa. 16Pablobara krĩchasia Éfeso pʉwʉrʉra jipa berabꞌariita, aramaʉ̃ne dããrã ẽbaita Asia druadꞌe. Ĩñabasia nʉmasia jũẽ bꞌera Pentecosté ewade fiestadꞌe bꞌaita Jerusalénne.
Wãba Pablo bedꞌeadꞌa Miletodꞌe
17Mileto pʉwʉrʉdꞌeba trʉ̃bisia Éfeso pʉwʉrʉdꞌe nokꞌorã mebẽrãne bꞌeta. 18Izhima zebʉdadꞌera mawũãsia: Marãbara kꞌawua bꞌea marãne edꞌa mʉ ewariza sãwũã bꞌʉra mʉ eewa zesi ewadeba Asia druaedꞌa. 19Mʉãrã Nokꞌo Jesúsba jara bꞌʉta ibiadꞌe aribꞌae bꞌʉa, aramaʉ̃ne daubꞌa biodꞌe zuburia nʉmʉã bea krĩña bꞌeba judíorãba. 20Aramaʉ̃ne mʉãrã marã biaitabema idaribi ẽã jarasia jõmaʉ̃ daidꞌu, jarasia dezabidꞌa. 21Judíorãã, judíorã ẽãta bꞌea jarasia kꞌazhiruara ãmape Daizezeta pẽwãnamarẽã, ĩjãnamarẽã dazhirã Nokꞌo Jesucristodꞌebemata. 22Kꞌõbebʉrʉ Jawurebiaba wãbibʉrʉba mʉrã Jerusalén pʉwʉrʉedꞌa wãña kꞌawua ẽãne mʉ maĩnu sãwũã berabꞌariira. 23Mʉã kꞌawua bꞌʉra Jawurebiaba pʉwʉrʉ jõmaʉ̃ne mʉãã jara bꞌʉa mʉrã cárceldꞌe bꞌaita, zuburia bꞌaita. 24Mawũãmina mʉãrã maʉ̃ta krĩcha bꞌʉ ẽã, miã mʉãrã mʉzhita krĩcha bꞌʉ ẽã. Awuarabʉrʉ mʉã oi barata sobia jõbiita bꞌʉa, Nokꞌo Jesúsdꞌeba mʉã jidadꞌata bedꞌea biata jaraita izhi biaba jarabi nʉmʉkꞌãrĩta Daizezeba.
25Mʉãrã kꞌawua bꞌʉa kꞌãwũãnaba mʉã Daizezeta Nokꞌodꞌebemata jara berabꞌari bꞌʉ maẽ marã jõmaʉ̃ba miõba wueta ũdudꞌa ẽbaya mʉ kĩrã. 26Maʉ̃ba mʉã idꞌi ewade marãã jaraya, iabꞌa aduara mʉrã bedꞌea ne ẽbaya. 27Mʉãrã idaribi ẽã jõma jarabʉrʉa ũrãgꞌa Daizezedꞌera. 28Maʉ̃ba mazhikusa kĩrãkuita bꞌeaudua, Jesúsdꞌebema ĩjã bꞌe jõmaʉ̃ kꞌarea kĩrãkuita bꞌeaudua, maʉ̃ kꞌarea marã Jawurebiaba bꞌʉsia jʉredꞌamarẽã mebẽrã Nokꞌo Jesúsdꞌeta, maʉ̃rã izha edadꞌata izhi waba. 29Mʉãrã kꞌawua bꞌʉa mʉ wãna tẽã marã maẽ edꞌa zedꞌaya usa kꞌazhirua kĩrãkꞌa bꞌeta, maʉ̃rãbara mebẽrã ãrĩnaña. 30Marãnebemata sewa nebʉrʉ piradrʉdꞌaya ãzhita pẽwãbidꞌaita Jesúsdꞌebema ĩjã bꞌea. 31Maʉ̃ba kĩrãkuita bꞌeaudua, bude bꞌeaudua mʉãrã año ũbea diamase ewaridꞌe daubꞌadꞌe ũrãgꞌa tau ẽã bꞌadꞌata marã abꞌa abꞌakꞌa.
32Kꞌõbebʉrʉ mebẽrã mʉã marã chãbꞌariya Daizezea, bedꞌeata izhi biaba jarabi nʉmʉkꞌãrĩã chãbꞌariya, izhara zareata erubꞌʉa marã soidꞌu bꞌeabiita, marãã dedꞌekaya izha diaita jaradꞌara izhidꞌeta duanuna jõmaʉ̃ã. 33Mʉãrã plata, miã oro, miã wua miõneta krĩña bꞌʉ ẽã. 34Awuarabʉrʉ marãbara kꞌawua bꞌea mʉã nesidꞌara mʉ bawara bꞌeba nesidꞌara mʉzhi juwuaba abꞌʉa. 35Ne jõmaʉ̃ne mʉã marãã jaradia bꞌʉa mawũã traja kꞌarebai barata kꞌãrẽ nesidꞌa bꞌera. Nokꞌo Jesús bedꞌeata bude baudua mawũãnata: Dazha awʉrʉa kꞌãrẽ diabʉrʉba dazhira audre sobiaya awʉrʉba diabʉrʉta jidai kꞌãñabara.
36Maʉ̃ta jarape Pablo sãkꞌokꞌodꞌe kꞌobꞌepe zhiwidꞌisia ãzhi jõmaʉ̃ bawara. 37Mobebʉrʉ jõma kꞌãbãẽã jẽga kꞌobꞌeba Pablo obʉradꞌape kĩrãma nigasidꞌa. 38Kꞌãbãẽã sopua kꞌobꞌeasia izha jaradꞌaba izhi kĩrã wueta ũdudꞌa ẽãta. Aramaʉ̃ne kꞌopayasidꞌa barcoidꞌu.
Aktualisht i përzgjedhur:
Hechos 20: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.