Hechos 15
15
Zhi jʉredꞌapeadꞌa Jerusalénne
1Maʉ̃nerã ʉ̃kʉrʉ Judea druadꞌeba zebʉdabara mebẽrã judíorã ẽãta ũrãgꞌa mawũãsidꞌa: Moisédꞌeba nʉmʉ kĩrãkꞌa zhũmakĩrã kꞌakua eta kꞌõ ẽbʉrʉ marã ẽdrʉ bꞌe ẽã. 2Maʉ̃ kꞌarea Pablo Bernabé ũme kꞌaikꞌaiasidꞌa ãzhi bawara. Mawũẽ Pablo Bernabé ũme mebẽrã ʉ̃kʉrʉ bawara Jerusalénʉẽna wãrĩzebisidꞌa Jesúsba zokꞌakuadꞌama, nokꞌorã mebẽrãnema, aramaʉ̃ne bedꞌeadꞌamarẽã maʉ̃nebemane.
3Ãzhita mebẽrãba mawũã wãbibʉdadꞌera Fenicia druadꞌe Samaria druadꞌe jara berabꞌarisidꞌa judíorã ẽãba Jesúsdꞌebema ĩjãnapeadꞌata, maʉ̃neba kꞌãbãẽã sobiasidꞌa mebẽrã jõma.
4Jerusalénʉẽna jũẽbʉdadꞌera bia edasidꞌa mebẽrãba, Jesúsba zokꞌakuadꞌaba, nokꞌorã mebẽrãneba. Aramaʉ̃ne jõma jarasidꞌa Daizezeba kꞌãrẽ odꞌata ãzhi bawara. 5Mawũãmina ʉ̃kʉrʉ fariseorãnebemaba Jesúsdꞌebema ĩjãnapeadꞌata piradrʉdꞌape mawũãsidꞌa: Judíorã ẽãta bꞌera zhũmakĩrã kꞌakua eta kꞌõĩbara, jaradꞌaibara aribꞌaedꞌamarẽã ũrãgꞌa Moisédꞌeta.
6Mawũãnaĩ Jesúsba zokꞌakuadꞌata, nokꞌorã mebẽrãneta zhi jʉresidꞌa bedꞌeadꞌaita maʉ̃nebemane. 7Dããrã bedꞌeabʉdadꞌe Pedrota piradrʉpe mawũãsia: Mebẽrã, sãwũã dããrã bata marãbara kꞌawua bꞌea, mʉrã Daizezebara jʉrʉsia judíorã ẽãba mʉ idꞌeba Jesúsdꞌebema bedꞌea biata ũrĩnape ĩjãnamarẽã. 8Daizezebara jõmaʉ̃ sota ũdukꞌawua bꞌʉba mawũã ĩjãnaĩrã bigata kꞌawuabibʉrʉba Jawurebiata dedꞌekasia dazhirãã diadꞌa kĩrãkꞌa. 9Aramaʉ̃nerã awuara eda ẽbasia dazhirãta miã jarirãta, ĩjãbʉdaba kꞌazhirua ne ẽã osia ãzhi sora. 10Mawũẽ ¿Daizezera kꞌãrẽã bĩ ẽãbidꞌaipe, Jesúsdꞌebema ĩjã bꞌea kꞌãrẽã aribꞌaebidꞌaipe miã dazhirã zhibarirã bꞌeadꞌaba miã dazhirãba aribꞌae bꞌedꞌa ẽãrã? 11Awuarabʉrʉ dazhirãbara ĩjã bꞌea Nokꞌo Jesúsba sozuburiabʉrʉba dazhirã ẽdrʉdꞌata ãzhi kĩrãkꞌa.
12Pedroba mawũãĩ kꞌabanata kꞌobꞌera jõma chupeasidꞌa. Mobe ũrĩsidꞌa Bernabéba Pabloba jarabʉdata ũdudꞌakꞌa zromata Daizezeba ãzhidꞌeba odꞌata judíorã ẽãne edꞌa. 13Ãzhi chupeadꞌai Jacoboba mawũãsia: Mebẽrã, mʉ bedꞌeata ũrĩũdua. 14Simónbara jarabʉrʉa Daizezeba jẽdeubara sãwũã edabʉrʉta judíorã ẽãta bꞌera, aramaʉ̃ne ãzhira izhidꞌe babigaita. 15Aramaʉ̃nerã Daizezeba bedꞌeata jarabibarirãba jaradꞌapeadꞌa kĩrãkꞌa bꞌʉa, maʉ̃ zhi bꞌʉmata mawũã bꞌʉa:
16Naʉ̃ tẽã mʉrã wakusa zepe David reyta bꞌʉdꞌebemata edꞌa bꞌae nʉmʉta araa oya, mawũã araa obʉrʉba edꞌa bꞌae nʉmʉta wakusa piradrʉbiya.
17Aramaʉ̃ne wuaabemaba jʉrʉdꞌamarẽã mʉta Nokꞌota, judíorã ẽãba jõmaʉ̃ba jʉrʉdꞌamarẽã mʉã jʉrʉkuadꞌata bꞌebara.
18Mʉta Nokꞌoba maʉ̃ta jarabʉrʉa, mʉãrã maʉ̃ jõma kꞌawuabibʉrʉa ewari dããrã wedꞌauba. (Amós 9:11-12)
19Maʉ̃neba mʉã jaraya, judíorã ẽãta idu bꞌʉ ẽã jirpanarãũdua Daizezedꞌebema ĩjãbʉdata. 20Awuarabʉrʉ ãzhiitara jara bꞌʉdꞌaibara kꞌãrẽ zhi zromarãne erubꞌeiita ne beadꞌata kꞌodꞌa ẽbamarẽã, kĩma ẽãta erukꞌãĩna ẽbamarẽã, ne ojũẽbꞌari bea kꞌodꞌa ẽbamarẽã, ne wata kꞌodꞌa ẽbamarẽã. 21Maʉ̃nebema ũrãgꞌa Moisédꞌera pʉwʉrʉza jara panʉã de zhi jʉrebadata nʉme maẽ, mama le panʉã ewari ẽnaʉ̃badaza.
22Mobebʉrʉ Jesúsba zokꞌakuadꞌama, nokꞌorã mebẽrãnema, mebẽrã jõmaʉ̃ma bia zesia ʉ̃kʉrʉ jʉrʉdꞌape zokꞌadꞌaita Antioquíaedꞌa Pablo bawara Bernabé bawara: Aramaʉ̃ne jʉrʉsidꞌa Juda abꞌaʉta Barsabáta, Silata, maʉ̃rãta zhi zromata panasia mebẽrãne edꞌa. 23Bedꞌeata maʉ̃rãba ededꞌamarẽã mawũã bꞌʉsidꞌa:
Dai Jesúsba zokꞌakuadꞌaba, Nokꞌorã mebẽrãneba, mebẽrãba, marã dai mebẽrã judíorã ẽãta Antioquía pʉwʉrʉdꞌe, Siria druadꞌe, Cilicia druadꞌe bꞌea: Diabuebʉda saludota. 24Daibara ũrĩsidꞌa ʉ̃kʉrʉ daidꞌebemata marãma wãnapeadꞌata, maʉ̃rã daiba wãbidꞌa ẽbasia, maʉ̃rãbara bedꞌeaba marã idu bꞌʉ ẽã jirpanʉba kꞌawua ẽã krĩchabi jirpanʉã, jara jirpanʉã zhũmakĩrã kꞌakua eta kꞌõmarẽã, jara jirpanʉã aribꞌaedꞌamarẽã Moisé ũrãgꞌata. 25Mawũẽ krĩcha abꞌarika zekuape daima bia zesia mebẽrãta jʉrʉdꞌape marãma zokꞌakuadꞌaita dazhirãba Bernabé Pablo kʉãgꞌade bawara. 26Bernabébara Pablobara bebudꞌe jara panʉã dazhirã Nokꞌo Jesucristodꞌebemata. 27Aramaʉ̃ne daibara zokꞌabʉda Judata Silata, ãzhabidꞌa bedꞌeara marãã kꞌawuabidꞌaya abꞌaʉta. 28Jawurebiama, daima bia zesia ne ãmaña jaradꞌa ẽbaita naʉ̃ta aribꞌaeita baradꞌebara: 29Kꞌãrẽ zhi zromarãne erubꞌeiita ne beabadata kꞌorãũdua, ne wata kꞌorãũdua, ne ojũẽbꞌari bea kꞌorãũdua, kĩma ẽãta erukꞌãĩrãũdua. Marãba maʉ̃ta aribꞌaedꞌara bia nʉmeãña. Bia bꞌeaudua.
30Aramaʉ̃ne zokꞌakuadꞌapeadꞌara edꞌaa wãsidꞌa Antioquíaedꞌa. Mobe mebẽrãta ãba jʉredꞌape diasidꞌa kꞌartara. 31Ledꞌape sobiasidꞌa aramaʉ̃ne adu-a bꞌeabibʉdaba. 32Judara Silara Daizezeba bedꞌeata jarabibarirãta panʉba soidꞌu bꞌeamarẽã mebẽrã ũrãgꞌasidꞌa bedꞌeata bioba. 33Mama ewari ʉ̃kʉrʉ berabꞌaribʉdadꞌera mebẽrãbara adu-a buegasidꞌa jẽrũya wãbibʉdata jarirã ãzhi zokꞌakuadꞌama. 34Mawũãmina Silama biga basia mama bꞌeita. 35Pablora Bernabéra ari Antioquíadꞌe panʉba Nokꞌo Daizeze bedꞌeata, Jesúsdꞌebema bedꞌea biata jara panasia awʉrʉrã bio bawarauba.
Pabloba ãĩ tʉdꞌa Bernabé
36Ewari ʉ̃kʉrʉ babʉrʉdꞌe Pablobara Bernabéa mawũãsia: Jẽrũya mebẽrãta akʉkuadꞌe wãnaña, pʉwʉrʉza Nokꞌo Daizeze bedꞌeata dazha jaradꞌapeadꞌa maẽ wãnaña kꞌawuadꞌaita sãwũã bꞌeta.
37Bernabébara ãzhi bawara ede krĩñasia Juan abꞌaʉta Marcota. 38Mawũãmina ãzhi bawara edeira Pabloma biga ẽbasia Panfilia druadꞌe ãzhita ãĩ tʉdꞌaba, aramaʉ̃ne ãzhi bawara wã ẽbadꞌaba miã ũrãgꞌadꞌe. 39Aramaʉ̃ne ãzhirãĩnu krĩcha abꞌarika zedꞌa ẽãba zhiya zhi tʉsidꞌa. Bernabébara Marco edebʉrʉta barcodꞌe wãsia dodꞌu Chipreidꞌu. 40Waya Pablobara Silata jʉrʉ edape wãbʉrʉdꞌera, izhi biaba ãzhi akʉmarẽã mebẽrãbara chãbꞌarisidꞌa Daizezea Nokꞌoa. 41Aramaʉ̃ne Siria druadꞌe, Cilicia druadꞌe berabꞌarisia soidꞌu bꞌeamarẽã ũrãgꞌa mebẽrãta.
Aktualisht i përzgjedhur:
Hechos 15: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.