Hechos 16
16
Timoteo wãna Pablo kꞌaidꞌu Sila kꞌaidꞌu
1Aramaʉ̃ne ãzhira jũẽsidꞌa Derbe pʉwʉrʉedꞌa, Listra pʉwʉrʉedꞌa. Mama Jesúsdꞌebema ĩjã bꞌʉta Timoteo abadata bꞌasia wũẽrã judío wauta, maʉ̃ wũẽrã Jesúsdꞌebema ĩjã bꞌasia. Timoteo zezera griego basia. 2Timoteora bia jara panasia mebẽrã bꞌebara Listradꞌe, Iconione. 3Pablobara maʉ̃ izhi ũme wãĩta krĩñape kꞌakua eta kꞌõsia, judíorã maʉ̃ ẽjũãne bꞌeta bĩ ẽã krĩchadꞌa ẽbamarẽã mawũã osia, jõmaʉ̃ba kꞌawua bꞌeasia zhi zezera griegota. 4Pʉwʉrʉza berabꞌari wãne jara wãbʉdata Jesúsba zokꞌakuadꞌata, nokꞌorã mebẽrãneta Jerusalénne bꞌeta krĩcha abꞌarika zedꞌadꞌebemata jara wãsidꞌa aribꞌaedꞌamarẽã. 5Aramaʉ̃ne mebẽrã soidꞌu duane wãba eaba wãsia ewariza.
Macedonia bidꞌata ũdudꞌa
6Frigia druadꞌe, Galacia druadꞌe berabꞌari wãnerã, Jawurebiaba idaribiga ẽbasia Daizeze bedꞌeata jaradꞌaira Asia druadꞌe. 7Aramaʉ̃ne Misia druaidꞌu jũẽbʉdadꞌera wãnaĩ basia Bitinia druaedꞌa, mawũãmina Jawurebiaba idaribi ẽbasia. 8Mawũẽ Misiadꞌe berabꞌari edꞌaa wãsidꞌa Troa pʉwʉrʉedꞌa. 9Diamase Pablobara kꞌãĩmokꞌaradꞌe kĩrãkꞌa ũdubʉrʉta ũmakĩrã Macedonia bidꞌata edau nʉmʉba zuburia bedꞌea mawũãsia: Ya kĩrãrã Macedonia druaedꞌa zepe kꞌarebarua daira. 10Kꞌãĩmokꞌaradꞌe kĩrãkꞌa mawũã ũdui, aramaʉ̃ta kĩrãrã wãnaĩne basia Macedonia druaedꞌa, aramaʉ̃ne wãrãne kꞌawuasidꞌa daira Daizezeba trʉ̃bʉrʉta maʉ̃rãã jaradꞌamarẽã Jesúsdꞌebema bedꞌea biata.
Cárceldꞌe panʉsidꞌa Filipodꞌe
11Troa pʉwʉrʉdꞌe barcodꞌe bꞌaridꞌape daira jipa zesia dodꞌu Samotraciaidꞌu, nrũẽma zesidꞌa Neápoli pʉwʉrʉedꞌa. 12Mamaʉ̃ba wãsidꞌa Filipo pʉwʉrʉedꞌa, maʉ̃ pʉwʉrʉta wagꞌaua Macedonia druadꞌera, mama bꞌea Roma bidꞌarãta. Maʉ̃ pʉwʉrʉdꞌera daira duanasia ewari ʉ̃kʉrʉ. 13Ẽnaʉ̃bada ewade daira pʉwʉrʉdꞌebara ãĩ wãsidꞌa doedꞌaa, daibara krĩchasidꞌa mama zhiwidꞌibadata bꞌʉta. Daira jewedꞌa duanepe Jesúsdꞌebemata jarasidꞌa wũẽrãrã zhi jʉre duanuã. 14Mawũẽ wũẽrã Lidia abadata wua granate nendobarita, Tiatira pʉwʉrʉdꞌebemaba Daizeze ibia jara bꞌʉba ũrĩ kꞌobꞌasia. Daizezebara izhi sora ewasia bia ũrĩmarẽã Pabloba jara kꞌobꞌʉta. 15Aramaʉ̃ne zhi mebẽrã bawara buru kꞌoepe daia zuburia bedꞌea mawũãsia: Marãma mʉã Nokꞌo Jesúsdꞌebemata wãrĩnu ĩjãbʉrʉ mʉ dedꞌa audua.
Aramaʉ̃ne daira duanebisia.
16Ewari abꞌa daira zhiwidꞌibadaidꞌu wãne daibara nezokꞌa ãwũẽrãta daucha zesia jaidꞌeba ne arimaẽ jarabarita. Maʉ̃bara izhi nokꞌorãã plata bio ganabi bꞌasia ne arimaẽ jara bꞌʉba. 17Maʉ̃ wũẽrãta Pablo kꞌaidꞌu, dai kꞌaidꞌu taidꞌera baridua nemi jĩgua mawũã bꞌasia: Ũmakĩrãrã naʉ̃rã nezokꞌarãta Daizeze Ʉ̃trebemaneã, naʉ̃rãbara marãã jara panʉã ẽdrʉdꞌaidꞌebemata.
18Maʉ̃ kꞌaudꞌa bꞌasia ewari bio. Mawũẽ Pablora bĩ ẽãpe pʉrʉwape jaia mawũãsia: Mʉã bʉaa jaraya, Jesucristo trʉ̃neba ãĩ wãrũã kꞌãʉ̃ wũẽrãnebara.
Mawũãĩ ãĩ wãsia aramaʉ̃ta.
19Mawũãmina maʉ̃ta izhi nokꞌorãba ũdudꞌai, mawũã ãzhi plata ganabi bꞌʉta ãĩ wãbʉrʉdꞌeba jidasidꞌa Pablora Silara. Mobe pʉwʉrʉ ẽsadra wesidꞌa nokꞌorã kĩrãbita. 20Aramaʉ̃ne nokꞌorã bedꞌea araa obadama wedꞌape mawũãsidꞌa: Ũmakĩrãrã naʉ̃rã judíorãta panʉbara bĩ ẽã okua jirpanʉã zhãrã dazhirãta. 21Jaradia jirpanʉã dazhirãba ĩjãna ẽbai bꞌʉta, miã odꞌa ẽbai bꞌʉta dazhirã Roma bidꞌarã baera.
22Mawũãnaĩ zhãrã bʉredrʉbʉdara ãzhi ʉ̃rʉ̃ totosia. Nokꞌorã bedꞌea araa obadabara wua wẽũkuabidꞌape jarasidꞌa tawedꞌamarẽã bakuruba. 23Bio tawebidꞌape cárceldꞌe panʉbʉdata cárceldꞌe bꞌeta akʉbaria jarasidꞌa biodꞌe kĩrãkuitamarẽã. 24Mawũãnaĩ maʉ̃bara cárceldꞌe eidꞌu panʉbʉrʉta jẽrũ pẽũkua nʉmʉsia sepodꞌe. 25Mawũãmina ewari ẽsadra Pablo Sila ũme zhiwidꞌi panʉta, Daizezea trʉ̃ã panasia. Maʉ̃ta cárceldꞌe bꞌebara ũrĩ nʉmeãsia. 26Maʉ̃ne aritiaudꞌe abꞌaedꞌa zesia ẽjũã ureta, mawũẽ cárcel abꞌaedꞌa uresia. Audre ẽãne ewakua totosia puerta jõma, cadena jõmaʉ̃neta ẽnadrʉsia. 27Cárceldꞌe bꞌeta akʉbarita ʉ̃rʉ̃mabʉrʉdꞌera, puerta cárceldꞌebema ewa nʉmeta ũdui kuchota ẽsia izhikusa zhi beaita, krĩchabʉrʉba cárceldꞌe bꞌera merũ pirapota. 28Maʉ̃ne Pablobara nemi jĩgua mawũãsia: Bʉzhikusa bia ẽãta orãrũã, dai jõma za kꞌopanʉã.
29Mawũãĩ izhara widꞌisia ĩbĩrãta, mobe ĩñabasia edꞌa wãẽbape pidꞌidꞌia sãkꞌokꞌodꞌe kꞌobꞌesia Pablo jẽrũ kꞌaita, Sila jẽrũ kꞌaita. 30Mobe ãzhira ãĩ wepe mawũãsia: ¿Mʉãrã kꞌãrẽta oibarape ẽdrʉira?
31Mawũãĩ ãzhara mawũãsidꞌa: Ĩjãrũã Nokꞌo Jesucristodꞌebemata, mawũãrã ẽdrʉya bʉta bʉzhi dedꞌabema bawara.
32Aramaʉ̃ne Nokꞌo Jesúsdꞌebemata izhaa jarasidꞌa, izhi dedꞌa bꞌeabidꞌa jõmaʉ̃ã jarasidꞌa. 33Maʉ̃ diamase izhara sʉgʉkuasia tawedꞌapeadꞌaba zhara kꞌõgꞌozoadꞌata. Mobe aramaʉ̃ta buru kꞌoesia izhidꞌerã jõmaʉ̃ bawara. 34Mobe izhi dedꞌaa edekuape ne dedꞌekasia. Aramaʉ̃ne jõma izhi dedꞌabema bawara sobiasia ĩjãbʉrʉba Daizezedꞌebemata.
35Ʉ̃nadrʉbʉrʉdꞌera nokꞌorã bedꞌea araa obadabara soldaorãta zokꞌasidꞌa mawũãnamarẽã: Ũmakĩrãrã kꞌãʉ̃rã ẽnekuadua.
36Cárceldꞌe bꞌeta akʉbaribara maʉ̃ta Pabloa kꞌawuabibʉrʉta mawũãsia: Nokꞌorã bedꞌea araa obadabara jarabuesidꞌa marã ẽnetamarẽã. Mawũẽ marã adu-a wãũdua.
37Mawũãĩ Pablobara mawũãsia: Daira jõmaʉ̃ daidꞌu tawesidꞌa mawũã odꞌaidꞌe bꞌʉ ẽãta, aramaʉ̃ne daira Roma bidꞌata panʉta cárceldꞌe edꞌa bꞌʉsidꞌa. ¿Maʉ̃ta daira ẽnabʉdakꞌa chupea? Kꞌãwũã ẽã, awuarabʉrʉ ãzhita zedꞌaibara dai ãĩ bꞌʉita.
38Soldaorãbara maʉ̃ bedꞌeata nokꞌorã bedꞌea araa obadarãã kꞌawuabisidꞌa. Maʉ̃rã perasidꞌa mawũã Roma bidꞌarãta ũrĩkꞌawadꞌai. 39Mawũẽ wãnape jarasidꞌa ãzhira wãẽãsita. Mobe ãĩ panʉbʉdata jarasidꞌa wãnamarẽã pʉwʉrʉdꞌebara. 40Mawũẽ cárceldꞌebara wãbʉdata deidꞌu wãsidꞌa Lidia dedꞌa. Aramaʉ̃ne mebẽrã bawara zhi ũdukuape soidꞌu bꞌeamarẽã ũrãgꞌadꞌape wãsidꞌa.
Aktualisht i përzgjedhur:
Hechos 16: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.