Hechos 14
14
Jesúsdꞌebema jaradꞌapeadꞌa Iconione
1Iconio pʉwʉrʉdꞌera Pablora Bernabéra ãba edꞌa wãsidꞌa de zhi jʉrebadata judíorãne maẽ. Mobe bedꞌeabʉdadꞌera Jesúsdꞌebema kꞌabanaba ĩjãsidꞌa judíorãba, griegorãba. 2Mawũãmina judíorã zhi ĩjãna ẽãbara judíorã ẽãta krĩcha ãrĩsidꞌa mebẽrã ʉ̃rʉ̃. 3Mawũẽ Pablora Bernabéra mama ewari dããrã panebʉdata Daizezeta krĩcha wãnigua bedꞌea panesia, maʉ̃nerã Daizezebara kꞌawuabiga nʉmasia bedꞌeara izhi biaba jarabiga nʉmʉkꞌãrĩta, mawũẽ obiga nʉmasia ũdudꞌakꞌata. 4Zhãrã pʉwʉrʉdꞌebema dra nʉmasia: Ʉ̃kʉrʉ nʉmasia judíorã bawara, ʉ̃kʉrʉ nʉmasia Jesúsba zokꞌakuadꞌa bawara. 5Maʉ̃nerã judíorãta, judíorã ẽãta nokꞌorã bawara bedꞌea ausidꞌa Pablora Bernabéra zuburia odꞌaita mongꞌaraba tabꞌaridꞌaita. 6Ãzhara maʉ̃ta kꞌawuadꞌape merũ wãsidꞌa Listra pʉwʉrʉedꞌa, Derbe pʉwʉrʉedꞌa, maʉ̃ pʉwʉrʉra Licaonia druadꞌebema. Aramaʉ̃ne wãsidꞌa drua arakꞌaita tabꞌe maẽbidꞌa. 7Maʉ̃za jarasidꞌa Jesúsdꞌebema bedꞌea biara.
Pablo mongꞌaraba tabꞌaridꞌapeadꞌa Listradꞌe
8Ũmakĩrãta Listra pʉwʉrʉdꞌebemata jewedꞌa bꞌʉta todꞌata wã bꞌe ẽã bꞌʉta tebakꞌa basia. 9Maʉ̃bara ũrĩsia Pablo bedꞌea nʉmʉta, maʉ̃ne Pabloba akʉbʉrʉdꞌera ũdusia soidꞌu kꞌobꞌʉta izhi bꞌeira. 10Mawũẽ nemi jĩgua mawũãsia: Piradrʉrua, jipa edau nʉmedua. Mawũãĩ izhira pinandrʉpe tebadꞌewasia.
11Zhãrãbara Pabloba mawũã obʉrʉta ũdudꞌai, Licaoniadꞌebema bedꞌeadꞌe nemi jĩgua mawũãsidꞌa: Zhi zromarãta beubari zadꞌe udꞌubꞌaebʉda dazhirãma.
12Zhi zromane erubꞌe trʉ̃ne Bernabéra trʉ̃gasidꞌa Júpiter, Pablora trʉ̃gasidꞌa Mercurio, Pablora mawũã trʉ̃gasidꞌa jara edeba bedꞌeata. 13Júpiter dera pʉwʉrʉ kĩrãbita nʉmasia, sacerdote Júpiterdꞌebara tororãta neponorãta wesia puerta maẽ. Mobe kꞌabana bawarauba ãzhira zhi zromane edabʉrʉta ne bea krĩñasia. 14Jesúsba zokꞌakuadꞌaba Bernabéba, Pabloba maʉ̃ta ũrĩnaĩ ãzhi wuata kꞌõẽtadꞌape kꞌabanane edꞌa tupurepe nemi jĩgua, 15mawũãsidꞌa: ¿Kꞌãrẽã kꞌãwũã obꞌe? Daira beubarita panʉã marã kĩrãkꞌa. Daibara marãã jara panʉã kꞌãʉ̃ seri ẽãta ãmanape Daizeze zokꞌai bꞌʉta pẽwãnamarẽã, izha osia bãjãta, druata, pusata, ne jõma maʉ̃ne nʉmʉta. 16Zhikꞌarewedꞌara izhara zhãrã jõma idaribi bꞌasia ãzha krĩñane bꞌeamarẽã. 17Izhidꞌebema kꞌawuabiga ẽã nʉmʉkꞌãrĩ ẽãba biata obꞌʉa. Aramaʉ̃ne dazhirãĩta bãjãneba kue zebi bꞌʉa, ewarita zebi bꞌʉa ne zaudꞌamarẽã, aramaʉ̃ne maʉ̃ba sobia bꞌabiga bꞌʉa dazhirã sora.
18Maʉ̃ta jarasidꞌamina kenabꞌaribi bꞌedꞌa ẽbasia kꞌabanaba ãzhiita ne beaita kꞌobꞌera.
19Maʉ̃ne judíorãta ʉ̃kʉrʉ zesidꞌa Antioquíadꞌeba Iconioneba, maʉ̃rãbara kꞌabanata krĩcha ãrĩsidꞌa. Aramaʉ̃ne mongꞌaraba tabꞌari jidasidꞌa Pablora, mobe pʉwʉrʉdꞌebara ãĩ ertasidꞌa beusita krĩchadꞌape. 20Mawũãmina Jesúsdꞌebema ĩjã bꞌeba bʉredrʉ bꞌedꞌe piradrʉpe edꞌa wãsia pʉwʉrʉdꞌe. Nrũẽma Bernabé ũme wãsia Derbe pʉwʉrʉedꞌa.
21Bedꞌea biata Derbe pʉwʉrʉdꞌe jarabʉdaba Jesúsdꞌebema bioba ĩjãbʉdadꞌe jẽrũya wãsidꞌa Listra pʉwʉrʉedꞌa, Iconio pʉwʉrʉedꞌa, Antioquía pʉwʉrʉedꞌa. 22Maʉ̃zara wãnigua bꞌeamarẽã jarasidꞌa Jesúsdꞌebema ĩjã bꞌea, aramaʉ̃ne soidꞌu bꞌeamarẽã ũrãgꞌa mawũãsidꞌa: Ne biodꞌe zuburiai bara dazhi edꞌa wãĩrã Daizezeta Nokꞌota bꞌʉ maẽ. 23Pʉwʉrʉza mebẽrã bꞌe maẽ nokꞌorãta bꞌʉsidꞌa. Nekꞌo ẽã zhiwidꞌi tabꞌape Jesúsdꞌebema ĩjã bꞌera Daizezea chãbꞌarisidꞌa izhidꞌebemata ĩjãnapeadꞌaba.
Jẽrũya zedꞌapeadꞌa Antioquíaedꞌa
24Pisidia druadꞌe berabꞌari zesidꞌa Panfilia druaedꞌa. 25Daizeze bedꞌeara jarasidꞌa Perge pʉwʉrʉdꞌe, mobe edꞌaa wãsidꞌa Atalia pʉwʉrʉedꞌa. 26Mamaʉ̃ba barcodꞌe wãsidꞌa Antioquía pʉwʉrʉedꞌa, mama chãbꞌaridꞌapeadꞌa basia ãzhira Daizezeba izhi biaba kꞌarebamarẽã, maʉ̃nebemata mawũã aribꞌaesidꞌa. 27Jũẽnape mebẽrã ãba jʉredꞌape jarasidꞌa Daizezeba ne bia zroma odꞌata ãzhi bawara, aramaʉ̃ne sãwũã ewa nʉminapʉta Jesúsdꞌebema ĩjãnamarẽã judíorã ẽãba. 28Mama ewari bio panesia Jesúsdꞌebema ĩjã bꞌe bawara.
Aktualisht i përzgjedhur:
Hechos 14: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.