Génesis 27
27
Jacobonö bä fö̦ö e mölamaö
lä feyaano wei tä a̦
1Isaacö a wa̦lobadao däjä, a jubäböa waiquilayono wei ja, bei ijilubö bada Esau a nacalema.
—U̦asi, ¿cafä wa tawä? —a cuma.
—Camiyä cä ya —bei ijilubö a cuma.
2—Bei, U̦asi. Ya wa̦lobada malä waiquii. Bämacö nofimaö mlaaö a lä cuimadi. 3¿Ö̦jö tawä? Afä wana wa fa showaläfälönö, fa̦dofä nafinö, shälacawäfä cäcönö, a lamö da juu. Yalo ya wabä. 4Showadi ode ya täbä lä waö wei, wa tä daö malä waiquile. Wa bä yalo fa löböblalönö, wale da dobäliyo. Ya nomano mlai ja, Yai Bada nija bäfä bayelimaö balöo bufibä —a nowa tama.
5Isaacönö bei ijilubö Esau e yömölaö däjä, Lebeca a yömöca daoma. A wa̦ ji̦lilema cudeenö, bä fö̦ö e naiqui taö ja, ulifi jamö Esau a ayono wei ja, 6bei ijilubö Jacobo nija a wa̦no wäyäö feyaama.
—Faafänö a̦iyofä Esau a yömölaö lä cufe —a cuma—. Ya wa̦ ji̦lilema. 7Abinaja a cuu lä cufe. “Bei, U̦asi”, a cuma. “Yalo wa fa niyablalönö, wa bä fa löböblalönö, wale da dobäliyo. Ode ya täbä wabä. Ya nomano mlai ja, Jeobaa nija bäfä bayelimaö balöo bufibä”, a cuma. Faafänö, einaja Esau a nowa taö a lä cufe —Lebeca a cuma—. 8¿Ö̦jö tawä, U̦asi? Bäfä lä shömaö wei tä ja, wale a̦ da julä. 9Yalo bä lä ji̦colole jamö, a da jufälö. Iba bolacabö oshe wa cöbö liyäjäwä fa dälönö, ya bä löbömabä. Showadi faafänö ode täbä lä waö wei, ya etä daö malä waiquile. 10Ö̦jö däjä, faafä nija, yalo wa ebä ca̦i fa icuicunö, a iyabä. A bufi mlaono mlai ja, cafä Yai Bada nija wa shino yai bayelimaö bufibä —Jacobo nija bä nöö e cuma.
11Ö̦jö ma cui, abinaja Jacobo a cuma, bä nöö Lebeca e nija.
—Cuwi, Nabe. A̦iwä a co̦i malä cui, camiyä ya si cobejewä dicowä. 12Fayänö wale jo̦sisaö bäquei fa cui. Wale jo̦sisaö ja, a nö nia shino waiblamou dablamou. Ö̦jö däjä, Yai Bada nija wale bayeliblamaö bufii mlai ja, wale nö nia shino yai bleaamaö bufii dicoo —a cuma.
13Abinaja bä nöö e cuma.
—Ma. Cafä wa nö bleaamabä mlai, camiyä wale nö yai bleaamabä. Camiyä ya wa̦nö wa tä malä taö wei. Inaja buo. Wale a̦ jua fe da yadilä. Wa aa fa showadalunö, iba yalo bolacabö cäcöbö da däboima —e cuma.
14Einaja bä nöö enö a nowa fa tanö, a alayoma. Yalo cäcöbö fa dälänö, bä nöö e nija cäcöbö fa jöböbajalonö, bä löbömalema. Bä fö̦ö enö täbä ode waö bufi shino lä doblao wei täbä tablalema.
15Ö̦jö däjä, cama Lebeca e yafi jamö, bei ijilubö Esau camishi ecö dodijidawä cuoma yalo, ecö dälema. Ecö fa dälönö, bei ijilubö bada ecö ja, bei fääshä Jacobo a lä cui, a lucämalema. 16Yalo cäcöbö lä shäleno wei si bänö, bei imicö ma cui, bei olafi ma cui, bei a ca̦i besiblalema. 17Inaja a fa tablalönö, bä fö̦ö yalo ebä lä löböblaleno wei bä ja, laamama ji̦bä yädäa fa showamacönö, Jacobo nija ebä bluca jöböa showaquema. 18Ebä fa jöböcönö, bä fö̦ö nijamö bä ca̦i joleblaliyoma.
—Bei. Fabe —e cuyoluma.
—Aö. U̦asi, ¿wedi bei wa jo̦wa? —bä fö̦ö e cuma.
19—Esau ya jo̦wa —Jacobo a jole cuma, bä fö̦ö e nija—. Ijilufä bada ya. Camiyä nija wa lä cuno wei, ya tä tablaö waiquilayou lä cufe. Bei, Fabe. A da döbäblalu. Ya bä lä niyalalöfe bä ja, wa iyabä. Ö̦jö däjä, Yai Bada nija wale bayelimaö bufii showadaobä —a cuma.
20A cuma ma cui, abinaja Isaacönö bei ijilubö a nowa tama.
—U̦asi. ¿Wedinaja wa fa cuaanö, bei wa yalo li niyablaö jaödalayou cufe? —a nowa tama.
Abinaja a cuma.
—Jeobaa wa lä bufiblaö wei a lä cuinö, ö̦jönö wale fa bayeliblalönö, wale li doblamabou lä cufe —a cuma.
21Ö̦jö däjä, abinaja Isaacö a cuma, Jacobo nija.
—U̦asi, a da ajedoima, bäfä jo̦sisabä. “Ei ijiluyä Esau a waiquiwä”, ya bufi cubä —a cuma.
22Inaja a cuma yalo, bä fö̦ö nija Jacobo a ajedea fa showaicunö, bä fö̦ö enö a jo̦sisama.
—Cuwi. Bei wa wa̦ lä cui, jai Jacobo wa wa̦ ji̦limamou cuwä dicowä. Ö̦jö ma cui, bei wa imicö lä cui, jai Esau wa imicö malä cule —a cuma.
23A nö ö̦jöböanomi. Esau imicö co̦i lä culenaja, imicö co̦i jo̦sisamou cuwä mö feduoma yalo, a nö ö̦jöböanomi. A nö ö̦jöböaö fa mlacunö, Jeobaa nija a nia bayelimaö showadaoma.
24—¿Bejedi lä? —a cuu co̦oma—. ¿Ijiluyä Esau bei wa?
—Ö̦jö lä ya —a jole cuma.
25Ö̦jö däjä, abinaja bä fö̦ö e cuma.
—Fäyämö bä da jöböba. Iba ijiluyä wanö, yalo wa lä niyablaleno wei bä ja, ya fa iyalönö, Jeobaa nija bäfä bayelimaö showadaobä —a cuma.
Inaja a fa cunö, yalo bä fa jöböcönö, a iyalayoma. Nashiwä e toubä ca̦i yädäa fa showamacönö, e toubä coama.
26Ö̦jö däjä, abinaja bä fö̦ö Isaacö e cuma.
—U̦asi. A da ajedoima, wale fa̦locabä —a cuma.
27Inaja a fa cunö, bä fö̦ö e nija a fa ajedeblalunö, cäcöbö fa̦locayoma. A fa̦locobolanö, bä fö̦ö enö bei ijilubö camishi ecö ni u̦cuculema. Bei ijilubö Esau ecö ni u̦cucamou lä culenaja, cäcö ni u̦cucamou cuoma yalo, Jeobaa nija a bayelimaö showao bufima. Abinaja a cuma.
—¡Bejedi lä! Ficali dodijidawä täca ni u̦cucamou lä culenaja, inaja ijiluyä camishi ecö ni u̦cucamou cuwä mö feduwä. ¡Jeobaa nija täca yai lä bayeliblamou wei täca ni u̦cucamou lä culenaja showawä!
28’U̦asi —a cuma—. Yai Bada tä nija, showadi wa bayeliblamobä. Jemau jemau bä fa shömanö, niifä bä cauu liyäjäobä. Showadi wa dobäö ja, wa ficalibö ca nö nijio dodijiobä. Afä niifä bä ma cui, uba nashiwä wa toubä lä coaö wei toubä ma cui, showadi Yai Bada tänö afä täbä blucablamaö dodijiobä.
29’Wa fa bayeliblalönö, bluca täbä lä bälöblai, cafä nija bä nosiemamobä —a cuma—. Afä bä mashi ma cui, cafänö wa bä nosiemabä. Bä bälöjou lä yaiblai, cafä nija showadi bä möfe boobä. Naafä bä ijilubö ma cui, wa ebä möfe ca̦i bomabobä. Wa nö bleaamaö bufi lä doblao wejei bä lä cui, inaja showawä Jeobaanö cama bä nia ca̦i taamaö mö feduo. Wa bayeliblamaö bufi lä doblao wejei bä lä cui, inaja showawä, ö̦jö bä ma cui, Jeobaanö bä ca̦i nia bayeliblaö cuo —a cuma.
Esau a wa̦ nö lä
bleaano wei tä a̦
30Jeobaa nija, Isaacönö Jacobo a bayeliblamaö fa waiquilonö, Jacobo a faa co̦layofälöma. A faa co̦layofälöno wei ja, bei a̦iyobö Esau a lamö lä juno wei, e co̦blou nodilayoma. 31Bä fö̦ö enö yalo bä a̦fa lä yubono wei ebä ode löböblaö fa nomöjölonö, bä fö̦ö nija bä ca̦i waloquema. Yalo bä ca̦i fa waloicunö, abinaja bä fö̦ö e nowa tama.
—Bei, Fabe. Ijilufä ya lä cuinö, ya bä lä niyalalöfe bä ja, wa iyabä, a da döbäblalu. Jeobaa nija wale bayelimaö bufibä.
32—¿Cafä wedi bei wa wa̦? —bä fö̦ö Isaacö a cuma.
—Esau ya jo̦wa —a cuma—. Ijilufä bada ya.
33Ö̦jö däjä, Isaacö a bufi jalujublolanö, i̦cali a blösö blösömoma.
—¿Wedi bei a lamö li fa junö, yalo a ja, wale li dobäa balöleyoluu cufe? Cafä wa co̦o showaono mlai ja, ya bä yalo waa waiquilema. Ö̦jö ya bayeliblamaö fa waiquilonö, a bayelimamou waiquia lä cule —a cuma.
34Bä fö̦ö e a̦ fa ji̦lilänö, a wa̦ nö beblalou fe balojooma. A bufi jo̦lijolanö, bä fö̦ö e nija abinaja a cuma.
—¡Fabe! ¡Jeobaa nija wale ca̦i bayelimaö da bufi! Camiyä ma cui, wale ca̦i bayelimaö bufii mö feduo da showadao, Fabe! —a cuma.
35Inaja a cuma ma cui, abinaja bä fö̦ö e cuma.
—Fääshäfänö wale mölaa fa feyamaliyonö, cafä bäfä nia yai bayelimaö lä bufino wei tä lä cui, tä läa waiquilema —bä fö̦ö e cuma.
36Abinaja Esau a jushuo ca̦i cuma.
—¡Jacobo a wa̦fa malä tamole! Showadi a malä jolemou wei. Fei däjä bolacabö a läa cublou waiquia lä cule. Camiyä bada ya lä cui nija, afä wa täbä tamabobä ya ma cui, ö̦jö täbä ja, a läa waiquialiyoma. Fei däjä, Jeobaa nija wale nia bayelimaö lä bufii wei tä ma cui ja, a jo̦wa läa co̦aliyou lä cufe. Jeobaa nija, camiyä ma cui wale bayelimaö bufii nomöjöobä, ¿fei däjä bei tä cuami waiquiwä daanö? —a cuma.
37Abinaja Isaacönö bä ijilubö bada a nowa tama.
—¿Wedinaja tawä? Cama nija wa nosiemamobä, ya bada tablamaö waiquilayoma. A nosie juabeje, cama ya ebä mashi bluca jöböa waiquiquema. Dodijidawä a iyabä, nii bä ma cui, uba nashiwä toubä ma cui, ö̦jö ya ebä a̦fa bluca wäa waiquiquema. Cafä bäfä bayeliblabä, ¿wedi jamö ya tä a̦fa li wäaö nomöjöobä, U̦asi? —a nowa tama.
38—¡Fabe! Täbä lä bayeliblamou wei, ¿ö̦jö tä a̦ shino daanö? Camiyä ma cui, wale ca̦i bayelimaö mö feduobä, tä a̦fa da wäba —a cuu ja, Esau a ö̦cölayoma.
39Ö̦jö däjä, tä nia obi lä cublou wei tä a̦fa wäabä, bä fö̦ö Isaacö e a̦ fama.
—Tä ulifi ishabina lä mlale ja, wa nia bälöo blajao. Jemau jemau bänö bä nii cauu lä liyäjaö wei jamö, wa nia ajedoimi. 40Ishou tänö showadi wa nia shino yabäcäo. Fääshäfä nija wa nosiemamobä wa ma cui, ya̦cumö, wa bälöo sheleleblou däjä, tä nia dodijidablou —a cuma.
Lebecanö Jacobo
a lä yömölaleno wei tä a̦
41Bei. Esau bä fö̦ö e a̦ lä fano wei däjä, Jeobaa nija bä fääshä e shino bayeliblamou ayalayoma yalo, Jacobo a nofi wa̦lilema. Abinaja Esau a bufi cuablaloma. “Fei däjä fayä a bufi dao lä mlaaimadi däjä, a bufi mlaqueno wei ja, fääshäyä Jacobo a lä cui, ya demi tamabou ja yamocu”, a bufi cuma. 42Ö̦jö ma cui, Lebeca nija, bei ijilubö jaba a lä cui a wa̦ nö fa wäbojolonö, bei fääshä Jacobo e nacamalema. Abinaja e cuyoluma.
—Bei. A̦iyofä Esau a bufi ononoblobä, wa nia jo̦wa shäö. 43Bei, U̦asi. Wale a̦ da julä, ö̦jö lä. Alana tä ulifi jamö, a̦iwä Labano nijamö, a docua cua da showadaalu. 44Showafä nija wa bälödio däjä, a̦iyofä a nia lä ishoblalou wei, a bufi oquei co̦o juobä. 45A̦iyofä a wa̦yoa oquea balölayono wei ja, wa tä taö lä läono wei, tä nowa tabou mladaliyono wei ja, bäfä co̦amaö weicätä. ¿Ö̦jö tawä? Wafäcö shäyou dicoo ja, ¿wedi tabä bäfäcö nomöa li däbou bolacaa showadaquei? —a cuma.
46Ö̦jö däjä, Isaacö nija abinaja Lebeca a cuma.
—Esau bei suwäbö cäcöbö nija, ö̦jö idida cäcöbö suwä lä cui nija, ya bufi uomou waiquiwä. Ö̦jö cäcöbö lä culenaja a suwä cuwä, Jacobonö a däaö mö feduo dicoo ja, ya bufi nö doblobimi —a cuma.
Aktualisht i përzgjedhur:
Génesis 27: GUU
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©2012, All Rights Reserved