Tobia 12
12
Rafaeli tregon kush është
1Pasi përfundoi dasma, Tobiti thirri Tobinë, birin e vet, e i tha: «Bir, tani jepi shpërblimin njeriut që erdhi me ty. Jepi edhe më shumë se shpërblimi». 2Tobia e pyeti: «Atë, sa t'i jap si shpërblim? Nuk do të më bëhej dëm sikur t'i jepja gjysmën e pronave që solla me vete. 3Ai më solli shëndoshë, gruan ma shëroi, mbarti edhe argjendin me mua, edhe ty të shëroi. Ç'shpërblim t'i jap?». 4Tobiti iu përgjigj: «E drejtë është, bir, të marrë gjysmën e gjithçkaje që solli». 5Ai e thirri e i tha: «Merr si shpërblim gjysmën e gjithçkaje që solle e shko me shëndet».
6Atëherë i shtiruri i thirri të dy e u tha: «Bekoni Perëndinë dhe kumtojeni para të gjithë të gjallëve për të gjitha të mirat që ju ka dhënë. Bekojeni dhe këndojini emrit të tij. Tregojuani të gjithë popujve veprat e Perëndisë, me nderimin që i takon, e mos ngurroni ta kumtoni. 7Të fshehtat e mbretit është mirë të mbahen të fshehura, por veprat e Perëndisë duhen zbuluar e shpallur. Bëni të mirën dhe nuk do t'ju gjejë e keqja. 8Lutja e sinqertë është e mirë dhe më e mirë është bamirësia me drejtësi se pasuria me padrejtësi. Më mirë jepni lëmoshë, se të mblidhni thesare ari. 9Se lëmosha shpëton nga vdekja dhe pastron çdo mëkat. Ata që bëjnë lëmoshë do të ngihen me jetë. 10Ata që mëkatojnë e bëjnë padrejtësi bëhen armiqtë e shpirtit të vet. 11Do t'ju tregoj të vërtetën e nuk do t'ju fsheh asnjë fjalë. Siç ju tregova më parë, të fshehtat e mbretit është mirë të mbahen të fshehura, por veprat e Perëndisë duhen zbuluar me nderim. 12Tani, kur po luteshe me Sarën, unë çoja lutjen tuaj si përkujtim para lavdisë së Zotit. Njësoj edhe kur varrosje të vdekurit. 13Atëherë kur nuk ngurrove të çoheshe nga tryeza për të varrosur të vdekurin, unë isha dërguar për të të sprovuar. 14Njëkohësisht, Perëndia më dërgoi të të shëroja ty dhe Sarën, nusen tënde. 15Unë jam Rafaeli, njëri prej shtatë engjëjve që rrinë gati e hyjnë në praninë e lavdisë së Zotit».
16Që të dy u tronditën e ranë me fytyrë përdhe të trembur. 17Por ai u tha: «Mos u trembni, paqja qoftë me ju! Bekoni Perëndinë në amshim. 18Kur isha me ju, nuk isha me nismën time, por për të përmbushur vullnetin e Perëndisë. Bekojeni atë të gjitha ditët e jetës suaj dhe atij këndojini. 19Edhe pse po më shikonit, unë nuk po haja asgjë, por ashtu ju dukej. 20Tani bekoni Zotin mbi tokë dhe kumtoni Perëndinë. Ja, unë po ngjitem tek ai që më dërgoi. Shkruajini gjithë këto që ju ndodhën». Pastaj u ngjit. 21Ata u ngritën, por nuk mund ta shihnin. 22Bekuan edhe Perëndinë, i kënduan dhe e falënderuan për veprat e tij të mëdha, kur u ishte shfaqur engjëlli i Perëndisë.
Aktualisht i përzgjedhur:
Tobia 12: AL1
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Shoqëria Biblike Ndërkonfesionale e Shqipërisë 2020
© Interconfessional Bible Society of Albania 2020