Genesi 41
41
Josefe a ngu tshamusela ndroro ya Faro
1Na guvbindride myaga mivili, Faro a di lora; a di emide bambe nya tsongo wa Nilo. 2Khu Nilo gu di duga livbandre na mivili migadzi nya dzimombe nya gumbure, nya guene na dzi gu hava mwasi mu dzitshavani; 3hwane nya edzi, gu di duga yimbe livbandre na mivili migadzi nya dzimombe nya gunyenyeze, nya guwondre, dzi ya ema vbafuvbi ni edzi nya guhegule, bambe nya tsongo. 4Dzimombe dzile nya gunyenyeze, nya guwondre, dzi di midza edzi nya livbandre na dzimbili dzimombe nya gumbure ni guena. Khavbo avbo, Faro a di khendzuga.
5A di lala gambe a gu lora ndroro nya wuvili; livbandre na sivili sivbila nya sikhongolo nya gumbure, si di duga khavbo nya tshava ya mweyo; 6khu hwane, gu di duga gambe simbe livbandre na sivili sivbila nya guwondre na si wunide khu guhahudwa khu phuvbo nya guvbise ya Khugadambo. 7Sivbila nya guwondre, si di midza esi nya livbandre na sivili nya sikhongolo nya gutale. Khavbo avbo, Faro a di khendzuga; a diri ndroro.
8 # Wona gambe: Dhan 2:2. Ni dzimindru, na gu garadzega hefemuloni gwaye, Faro a di ruma gu ranisa dzinyanga dzatshavbo, ni vanyaguti vatshavbo va Egipito a ta va embeledzela dzindroro. Aholu mwalo a nga dzi kodzago gu mu ninga tshamuselo.
9Khavbo avbo, muthangeli nya vatheledzeli nya sikombe vbamezatunu a di ganela ga Faro, khuye: “Muhuno nyi ngu dundruga gihoso nyi giridego. 10Tshigu mwedo Faro, a nga gorogago khu kotani nya sithumi saye, a di ruma gukhuye si khothedwe nyumbani ga muthangeli nya dzighadhi, a diri eni gumogo ni muthangeli nya vagiri nya mikati. 11Ha vavili hi di lora ni wutshigu wowo. Dzindroro dzathu dzi di hambanide, mweyo ni mweyo, yi diri ni tshamuselo waye. 12Gumogo ni ethu, li di romo nilo lidzaha limwedo nya Muhebheru, githumi gya muthangeli nya dzighadhi. Avbo ethu hi nga mu embelago dzindroro dzathu, uye a di hi ninga tshamuselo nya ndroro ya moyo ni moyo. 13Satshavbo si di dugelela kha nga idzo a nga hi tshamuselago khidzo. Eni nyi di wuyiswa nyaluphye thumoni gwangu, gasi oyu mumbe, a di songwa khu gu hungwa a tshwedziswa.”
Josefa mahoni ga Faro
14Khavbo avbo, Faro a di rumela guya rana Josefa, va dzegela guya mu dusa pasoni. Uye a di vila giledzu, a ambala dzimbe dzingandzu aya dzi bikela ga Faro.
15Faro a di embela Josefe, khuye: “Nyi loride ndroro nya gu, mwalo a dzi kodzago gu nyi ninga tshamuselo. Aholu nyi pwide gupwani uwe u ngu kodza gutshamusela dzindroro.”
16Josefa a di phindrula ga Faro, khuye: “Khandri eni, aholu Nungungulu khuye a na ningago tshamuselo nya lisine ga Faro.”
17Khavbo avbo, Faro a di ganela kharati, a embela Josefa, khuye: “Ndroroni gwangu eni nyi diri bambe nya tsongo wa Nilo.” 18Nyi di wona na gu duga khu tsongoni, livbandre na mivili migadzi nya dzimombe nya gumbure, nya guene na dzi gu hava mwasi mu dzitshavani. 19Khu hwane, gu di handzamedza gu duga gambe dzimbe livbandre na dzimbili dzimombe nya migadzi nya guwondre, nya gunyenyeze ngudzu, nya gutshale khu sikongolo. Gima nyi di si gu woni dzimombe nya guwondre kharato omu tigoni gwatshavbo gwa Egipito. 20Dzimombe nya guwondre ni gu nyenyeza, dzi di midza dzile nya livbandre na dzimbili nya guene. 21Na dzi midzide, kha dza nga wonega gukhwatshi dzi hodzide gilo, dzi di simama gunyenyeza kha nga guhegulani. Khavbo avbo, eni nyi di khendzuga.
22Khu hwane nya ugo, nyi di lora gambe na nyi gu wona livbandre na sivili sivbila nya gutale ni gumbura na si gu duga khu ga tshava ya mweyo; 23aholu gu di landrela, gu duga simbe livbandre na sivili sivbila nya guwondre, nya guwune khu guhahudwa khu phuvbo ya Khugadambo. 24Aholu sivbila sesi nya guwondre, si di midza sile nya livbandre na sivili sivbila nya sikhongolo. Nyi embede silo sesi dzinyanga, aholu mwalo ni moyo a nga dzi kodzago gu nyi tshamusela.
25Khavbo avbo, Josefa a di ganela ga Faro, khuye: “Ndroro ya Faro mweyo basi. Nungungulu tiviside ga Faro esi a vbwetago gu gira.” 26Livbandre na dzimbili dzimombe nya migadzi nya gumbure, gu tshamusela livbandre na mivili myaga; livbandre na sivili sivbila nya sikhongolo, gu tshamusela livbandre na mivili myaga; ndroro mweyo basi. 27Livbandre na dzimbili dzimombe nya migadzi nya guwondre na dzi nyenyezide dzi nga landrelago gu duga, gu tshamusela livbandre na mivili myaga; ni livbandre na sivili sivbila nya guwondre nya guhahudwe khu phuvbo nya guvbise ya Khugadambo, gu tshamusela livbandre na mivili myaga. Gu na bani guri ni livbandre na mivili myaga nya ndzala.
28Aya khu mahungu nyi ganedego ga Faro, esi Nungungulu a tiviside ga Faro iso a vbwetago gu gira. 29Lisine, yi na vboha livbandre na mivili myaga nya gufume ngudzu tigoni gwatshavbo gwa Egipito. 30Aholu khu hwane gu na handzamedza yimbe livbandre na mivili myaga nya ndzala. Talo watshavbo nya gufume, wu na vbela tigoni gwatshavbo gwa Egipito, ndzala yi na tshanisa tigoni. 31Tigoni gima kha va na dundruga gambe gikhati nya gufume, khu kotani nya ndzala yi na handzamedzago, kholu yi na bani yiri yikhongolo ngudzu. 32Gu wuyedzela guvili ndroro ya mweyo, gu yeyedza gupwani si hungidwe gikungoni gwa Nungungulu, somo vbafuvbi nya gugirege.
33Olu Faro, gu vbwetega u hathe mwama moyo nya mapimo ni guti, u mu pharisa ndronga nya gugimbidzise litigo latshavbo la Egipito. 34Faro a na gire iso, a rumela dzindruna dzaye tigoni gwatshavbo, a vege nayo nya khupo nya gipandre nya livbandre nya mihandro yatshavbo ya Egipito, ndrani nya livbandre na mivili myaga yeyi nya gufume. 35Dzi na wungeledzedwe dzimbewu dzatshavbo dzi tshalago ndrani nya myaga yatshavbo yeyi nya gufume yitago. Gu na wungeledzedwe dzimbewu mu si sangalani nya mufumo wa Faro, madhoropani kha nga dzimbuva nya guhodze. 36“Khu guralo, sisangala soso nya guhodze, si na khala wulanga nya guvbanyele avbo litigo latshavbo ndrani nya livbandre na mivili myaga yile nya ndzala yi na fenengedzago Egipito, gasi litigo li si mbembi khu ndzala.”
Josefa a ngu dandriswa gu khala mwamangulu wa Egipito
37Magana yaya, ma di tsakisa Faro ni madhota yaye yatshavbo. 38Faro a di embela madhota yaye, khuye: “Ina hi na mu mana mumbe mwama nya nga oyu nya gutale khu liphuvbo la Nungungulu, gani?”
39Khu hwane, Faro a di embela Josefa, khuye: “Kha nga olu Nungungulu a hi tivisidego satshavbo sesi, mwalo mumbe muthu nya mapimo ni guti kha nga uwe. 40#Wona gambe: Mith 7:10. Uwe kamwe khuwe u na khalago muthangeli nya ndranga yangu. Vathu vangu vatshavbo va na thangedwa khu uwe, eni basi khu vbagikhalotunu nya wufumu, kheni nyi na gu bani nyiri khongolo guvbindra uwe.” 41Faro a di embela gambe Josefa, khuye: “Wona gukhuwe nyi ngu gu thangisa mbeli nya litigo latshavbo la Egipito.” 42#Wona gambe: Dhan 5:29. Khavbo avbo, Faro a di tshula phera ya nyalani gwaye a yi ambagisa nyalani ga Josefa, a ruma gukhuye va mu ambagise dzingandzu nya wuzundzo, a mu ambagisa thamoni karara nya ndralama. 43A di mu ruma gubela ga likareta laye nya wuvili, na va gu kulungela mbeli gwaye, khavo: “Nogani mbeli gwaye.” A di vegwa kharati kha nga muthangeli nya litigo latshavbo la Egipito.
44Faro a di embela Josefa, khuye: “Eni kheni Faro, nyamba rumwa khuwe, mwalo muthu a na khusedzago mandza mwendro ngondro tigoni gwatshavbo gwa Egipito.” 45Faro a di riya Josefe lina nya gupwani khu Zafinati-Paneya a gu mu ninga Asenati, nyamahegyane wa Potifera, muphasi nya mhamba wa Oni, gu khala mwangadzi waye. Josefa a di khuga a dzuwulugela litigo latshavbo la Egipito, a li wona.
46Josefa a diri ni magumararu myaga nya guvelegwe gikhati a hongodego ga Faro, mufumeli wa Egipito. Na khugide mbeli ga Faro, Josefa a di gimbila tigoni gwatshavbo gwa Egipito. 47Ndrani nya livbandre na mivili myaga yile nya gufume, litigo li di ninga mihandro nya gutale ngudzu. 48Josefa a di wungedzela mihandro nya livbandre na mivili myaga yile nya gufume ngudzu, a yi vega madhoropani; ga lidhoropa ni lidhoropa, va di wungedzela mihandro ya marembweni ya vbafuvbi ni lidhoropa lolo. 49Josefa a di wungedzela tirigu yi tala kha nga mafu nya fungo wa Phwani, khu tengo nya wungi ngudzu va nga padwago ni gu wu pima, kholu wu di vbindra pimo.
50Na gu si vbohi ndzala, gu di velegwa sanana sivili sa Josefa nya guvelegwe khu Asenati, nyamahegyane wa Potifera, muphasi nya mhamba wa Oni. 51Gyanana nya matiwula Josefa a di gi riya lina khuye khu Manasi, kholu a di khuye: “Nungungulu a nyi giride nyi divala sitshaniso sangu satshavbo ni ndranga yatshavbo ya babe wangu.”
52Oyu nya wuvili, a di mu riya lina khuye khu Efrayimi, kholu a di khuye: “Nungungulu giride nyi ninga mihandro tigoni nya gutshaniseke gwangu.”
53Na yi vbindride livbandre na mivili myaga yile nya gufume gu nga manegago tigoni ga Egipito, 54#Wona gambe: Mit 7:11. gu di vboha livbandre na mivili myaga yile nya ndzala, kha nga idzo a nga bani na ganede khidzo Josefe. Gu di manega ndzala mayigoni gwatshavbo, aholu tigoni ga Egipito, gu di romo guhodza. 55#Wona gambe: Job 2:5. Gikhati ndzala yi nga phela gupwala tigoni ga Egipito, vathu va diya lila ga Faro va lomba guhodza; aholu Faro a di hakha Vagipiti, khuye: “Indrani ga Josefa, girani satshavbo esi a na gu mi embelago.”
56Ndzala yi di enedza litigo latshavbo, Josefa a di tula sisangala satshavbo a rengisela sivbila Vagipiti. Aholu ndzala yi di simama tigoni ga Egipito. 57Va dita vathu khu mayigoni gwatshavbo va ta renga sivbila ga Josefa, kholu ndzala yi diri yikhongolo tigoni gwatshavbo.
Aktualisht i përzgjedhur:
Genesi 41: BGE2014
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
A Bíblia em Gitonga © Bible Society in Mozambique, 2014.