Genesi 42
42
Liendro la vandruye va Josefa tigoni ga Egipito
1Jakobe, na dzitide gukhuye Egipito va ngu rengisa sivbila, a di embela sanana saye, khuye: “Khu ginani mu khedzisanago khu gyanu?” 2#Wona gambe: Mith 7:12. A di engedza gambe, khuye: “Nyi pwide gupwani tigoni ga Egipito somo sivbila, Indrani iyo mu ya renga, gasi hi mane guvbanya hi si mbembi khu ndzala.”
3Vandruye va Josefa va di phara ndzila va relela khu tengo wawe nya likhumi, gasi guya renga sivbila tigoni ga Egipito. 4Aholu Jakobe kha dzumela gu diga Bhejami, ndruye wa Josefa, a hongola gumogo ni vandriyaye, kholu a di gu pimisa khu monyoni gwaye, khuye: “A nga mana dzimhango.” 5Sanana sa Jakobe si di khuga si hongola guya renga sivbila, si longoloka gumogo ni vambe vathu va nga hongolago navo kholu ndzala yi diri yikhongolo tigoni ga Khanani.
6Josefa a diri mwamangulu wa tigoni mule, khuye gambe a nga bani a rengisela sivbila vathu vatshavbo va tigoni. Avbo va vbohidego vandruye va Josefa, va dita thega vbavbatshi va nogisa dzikhovbe kala vbavbatshi, va khidzima mbeli gwaye. 7Josefa a di wona vandriyaye a vati, aholu a di dzi girisa gukhwatshi kha vati, a ganela navo khu tshivba, khuye: “Mwa guta khu hayi?”
Avo va di hakha, khavo: “Khu tigoni ga Khanani. Ha guta renga guhodza.”
8Josefa a di vati vandriyaye, aholu avo kha va nga mu tugula. 9#Wona gambe: Gen 37:5-10. Khavbo avbo, Josefa a di dundruga dzindroro a nga lorago na dzi gu ganela khu avo, a va embela, khuye: “Enu mu vasoli nya litigo, mu dzude guta sola litigo, gasi guti umo litigo lathu la sa tiyago gwadi.”
10Avo va di hakha, khavo: “Ahihi, pfhumu yangu; sithumi sago si dzude gasi guta renga guhodza. 11Ethu hatshavbothu hi sanana sa babe moyo. Hatshavbo hi vathu nya vadi nya lisine, sithumi sago khandri vasoli.”
12Aholu uye a di va hakha, khuye: “Malipha! Enu mu dzude gasi guta wona gumba tiya nya litigo.”
13Avo va di hakha, khavo: “Ethu sithumi sago hi diri likhumi na vavili vandruye sanana sa babe moyo, hi vbanyago tigoni ga Khanani, Oyu nya nandra ga vatshavbo olu a tshade ni babe wathu, gasi oyu mumbe mwalo gambe.”
14Josefa a di ganela gwawe, khuye: “Khidzo nyi ganedego gukheni enu mu vasoli. 15Nyi na mi linga. Khu womi wa Faro, nyi ngu mi embela gukheni kha mu na nga duga tigoni momu a gumba ta ndriyanu nya nandra. 16Rumelani moyo wanu guya mu dzega enu mu na khala sibotshwa; gu na wonega kharato lisine nya magana yanu. Mwa gumba girani kharalo, nyi ngu sambanya khu womi wa Faro, mu na wonwa kha nga valala.” 17Josefa a di va khothela matshigu mararu pasoni.
18Khu litshigu nya wuraru Josefa a di va embela, khuye: “Girani esi mu na vbanya, kholu eni nyi ngu thava Nungungulu; 19mwa gu bani muri ni mapimo nya yadi nya gululame, tshiyani moyo wanu pasoni, enu vambe mu na bwelela mu yisa guhodza nya guye vbanyisa ndzala dzingamo dzanu. 20Khu hwane, mu na nyi reselani ndriyanu nya nandra; kharato, khavbo ma na gu tadzisegago magana yanu, kha mu na ngafa.” Avo va di dzumela.
21Khavbo avbo, avo va di ganela khu gyawe, khavo: “Khu lisine ha gu tsayiswa khu kotani ya ndriyathu; hi wone khu gu tshaniseka gwaye gikhati a nga bani na gu hi lomba wuhindzi, aholu ethu kha ha nga mu pwela. Khu kotani nya isoso, hi ngu thegedwa khu libango leli.”
22 # Wona gambe: Gen 37:21-22. Rubheni a di hakha vandriyaye, khuye: “Eni nyi di gu mi embelani gukheni: Mu nga gireleni guvivba gyanana! Aholu enu kha mwa nyi yingelani. Olu hi ngu livba nandru nya novba waye.”
23Va di si dziti nya gukhavo Josefa a ngu si mana esi va ganelago, kholu a di romo muturokeli vbakari gwawe a nga bani na gutshamusela iso va nga bani va gu ganela.
24Josefa a di ndreya phuvbo aya lila. A di wuya ga vandriyaye a ta ganela navo. A di hatha Simiyoni a ruma gu mu khothela na gu wonwa khu vandriyaye.
Vandruye va Josefa va ngu bwelela tigoni gwawe
25Josefa a di ruma sithumi saye gukhuye si va tadzele dzisaku dzawe khu sivbila; aholu dzitsapawu dza moyo ni moyo va dzi thela mu dzisakuni gwawe, va va ninga gambe dzimbuva nya guhodze khu ndzila. Va di gira satshavbo sesi. 26Avo va di khiledza sivbila vbadziburutunu va hongola.
27Na va vbohide ndrangani nya vaendri, gikhati moyo wawe a tudego saku gasi gu ninga guhodza buru, a di mana dzitsapawu na dzi vegidwe sakuni. 28A di embela vandriyaye, khuye: “Va nyi bweledzede dzitsapawu, dzomo omu sakuni gwangu.”
Va di vbela tshivba va khedzisana khu gyawe, na va tade khu hwanga, va ganela, khavo: “Ginani gambe egi Nungungulu a hi giredego?”
29Na va vbohide ga babe wawe Jakobe, tigoni ga Khanani, va di mu embeledzela satshavbo esi si nga va dugelelago, khavo: 30“Mwama a gu mune nya litigo, a di ganela ni ethu khu wurena; a di hi wona kha nga valala nya vasoli hi yago hiya sola litigo.” 31Ethu hi di mu embela khethu: “Ethu hi vathu nya lisine, gima kha hi wuti thumo nya wusoli; 32Hi diri likhumi na vavili vandruye, sanana sa babe moyo; moyo wathu kha vbanyi gambe, ni oyu wakone nya nandra olu a gu vbanya ni babe wathu tigoni ga Khanani.”
33Mwama nya mune litigo a di hakha, khuye: “Nyi na dziti gukheni mu vathu nya lisine mwa gu tshiyani avba moyo wanu; dzegani esi si vbwetegago gasi guya vbanyisani dzingamo dzanu, mu hongole. 34Nyi wuyeleni ni ndriyanu nya nandra. Khavbo nyi na dzitigo gukheni kha mu ndri vasoli, ni gukheni mu vathu nya lisine. Nyi na mi ningani ndriyanu, nyi mi dzumedzisa mu gimbila tigoni mu rengani esi mu si vbwetago.”
35Gikhati va nga guhulago dzisaku, vatshavbo va di mana dzitsapawu dzawe dzisakuni. Na va wone dzitsapawu, avo ni babe wawe, vatshavbo va di ndrendremela. 36Khavbo avbo, babe wawe Jakobe a di ganela, khuye: “Nyi ngu wona gukheni mu na hegisa khu gu nyi tshiya nyambana sanana sangu! Josefe mwalalegide, Simiyoni mwalalegide nuye. Olu mwa gu vbweta gu nyi dzegela Bhejami! Satshavbo sesi sa gu thegela eni.”
37Rubheni a di embela babe waye, khuye: “Songa sanana sangu sa sivili nya gumba wuya naye; mu vege mandzani gwangu, eni nyi na wuya naye.”
38Jakobe a di hakha, khuye: “Gyanana gyangu kha gi hongoli nanu; kholu ndriyaye mwalo gambe, khuye basi a tshadego. A gu dugedwa khu mhango ndzilani, mu na rini, dzinvi dzangu dzi na relela thowoni na dzi tade khu wuvi nya wukhongolo ngudzu.”
Aktualisht i përzgjedhur:
Genesi 42: BGE2014
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
A Bíblia em Gitonga © Bible Society in Mozambique, 2014.