Genesi 39
39
Mahungu ya Josefa ni ngadza Potifari
1Josefa a di yiswa tigoni ga Egipito. Moyo nya Mugipiti a ranwago gupwani khu Potifari, a nga bani ari muthangeli nya vaghadhi va mufumeli Faro, a di renga Josefa ga va na Ismayeli.
2 # Wona gambe: Mith 7:9. Pfhumu Nungungulu a diri ni Josefa, a di mu gira a katega ga mithumo yaye tatshavbo, a gu hakhwa gwadi nyumbani ga mune waye nya Mugipiti. 3Mune waye a di wona nya gukhuye Pfhumu Nungungulu womo ga Josefa, gambe a ngu kategisa mithumo yatshavbo ya mandzani gwaye. 4Josefa a di mana wuhigo mahoni ga mune waye, a nga mu vegago kha nga gyandza gyaye; a di mu vega kha nga muthangeli nya ndranga yaye yatshavbo, a mu gira muphari nya silo saye satshavbo. 5Gukhugela litshigu a nga mu vega kha nga muthangeli nya ndranga yaye ni silo saye satshavbo, Pfhumu Nungungulu a di kategisa ndranga ya Mugipiti, khu kotani ga Josefa; gikategiso gi di thapela ga silo saye satshavbo esi sa ndrangani ni esi sa marembweni. 6Khavbo avbo, a di vega mandzani ga Josefa satshavbo a nga bani ari naso, a di si dzi garadzi gambe khu gimbe gilo, vbavbandze basi nya guhodze.
Josefa a diri wa gumbura ni giemo nya gukhadzisege.
Josefa a ngu lingwa a modwa
7Gu di girega khu hwane nya satshavbo sesi, mwangadzi wa mune waye a di wona Josefa khu monyo nya gu mu dogorele, a mu embela, khuye: “Delu hi ta lala gumogo.” 8Josefa a di bomba, a mu embela, khuye: “Uwe u ngu dziti gukhuwe, mune wangu kha nyi henguli gilo ndrangani gwaye, ni gukhuwe vegide mandzani gwangu sigiro saye satshavbo.” 9“Mwalo mumbe nya guvbindre eni ndrangani momu, gambe uye kha nyi himbedzeli gimbe gilo vbavbandze ga uwe basi, kholu uwe u mwangadzi waye. Nyi ngu dzi kodza kharini eni gu gira gihoso nya gikhongolo nya kharato, nyi ghohela Nungungulu, na?” 10Ambari ulo nyamayi a nga bani a gu simama gu ganela matshigu yatshavbo, Josefa gima kha nga dzumela gu lala naye ambari gu hidzimela vbafuvbi gwaye.
11Aholu litshigu limwedo, kha nga giolovedzo gyaye, a di bela nyumbani gasi guya thuma mithumo yaye nari mwalo mumbe muthu vbafuvbi, 12nyamayi a di mu mola khu gifenengelo, na gukhuye: “Delu hi ta lala gumogo.” Aholu Josefa a di tshutumuga a tutuma a duga nyumbani a mu tshiya ni guambala mandzani.
13Avbo nyamayi a nga wonago gukhuye Josefa tshutumugide a mu tshiya ni guambala mandzani, 14a di womba dzihuwa a rana vathu va ndrangani, khuye: “Wonani! Mwama wangu a hi resede Muhebheru afela guta hi hembulula! A di hidzimela gwangu a vbweta gu nyi pfinya, nyi vbulugide kholu nyi nga womba dzihuwa nyi rana khu tshivba. 15Avbo a nyi pwidego na nyi gu gulumela khu tshivba nyi lomba guphaswa, uye a di tutuma, a nyi tshiya ni guambala gwaye, a tutuma a duga vbavbandze.”
16A di vegedza guambala gwa Josefa kala mune waye a gu wuya. 17A di ta engedza gambe gu ganela kharato, khuye: “Khumbi yeyi nya Muhebheru u yi residego avba yi di hidzimela gwangu yi vbweta gu nyi pfinya. 18Aholu gikhati nyi nga wombago dzihuwa, a di tutuma a duga vbavbandze a diga guambala gwaye.”
19Mune wa Josefa, na pwide esi si nga ganedwa khu mwangadzi waye, a nga khuye: “Wona esi si giridwego khu khumbi yago,” a di goroga ngudzu. 20Mune wa Josefa a di ruma gu a modwa a khothedwa pasoni, umo si nga bani si khothedwe sibotshwa sa mufumeli.
Uye a di khala pasoni. 21#Wona gambe: Mith 7:9. Aholu Pfhumu Nungungulu a diri ni Josefa, a di mu gira a godwa, a mana wuhigo mahoni ga muthangeli nya lipaso. 22Muthangeli nya lipaso a di mu vega gu khala muthangeli nya vakhedziseli nya sibotshwa satshavbo si nga bani si romo pasoni; satshavbo si nga bani si girwa pasoni si di thangedwa khu Josefa. 23Muthangeli nya lipaso, a di si dzi garadzi khu gu khedzisela esi si nga bani a pharisidwe Josefa, kholu Pfhumu Nungungulu a diri ni uye; Pfhumu a di gira gukhuye silo ni mithumo yatshavbo ya Josefa yi mu dugela gwadi.
Aktualisht i përzgjedhur:
Genesi 39: BGE2014
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
A Bíblia em Gitonga © Bible Society in Mozambique, 2014.