Genesi 38
38
Judha ni Tamari
(Matewu 1:2-3)
1Gikhati gile, Judha a di khuga avbo va nga bani varomo vandriyaye, a hongola aya vbanya ga moyo wa tigoni ga Adhulamo, lina laye nya gupwani khu Hira 2Judha nari ndrangani mule, a di wona nyamahegyane moyo nya Mukhanani, lina laye nya gupwani khu Suwa. A di mu dzega a khala mwangadzi waye, a gu tshangana naye. 3Uye a di khura mimba a velega gyanana nya gikhwathana, a gi riya lina nya gupwani khigyo Eri. 4Mwangadzi waye a di engedza gambe gu khura mimba a velega gyanana nya gikhwathana a gi riya khuye khu Onani. 5A di khura gambe mimba a gu velega gyanana nya gikhwathana a nga gi riya khuye khu Sela. Uye a di gu vbanya Kezibhe gikhati a velegedwego Sela.
6Judha a di dzegela nyamayi Eri, mwanaye nya matiwula. Lina la nyamayi va di pwani khu Tamari. 7Aholu Eri, matiwula ya Judha, a diri ni mavbanyelo ma vivbidego mahoni ga Pfhumu Nungungulu. Khavbo avbo, Nungungulu a di mu bayisa afa.
8Judha a di embela Onani, khuye: “Bela nyumbani ga ndriyago u hambela mwangadzi waye, gasi gu wusa livelego la ndriyago.” 9Aholu Onani a di dziti nya gukhuye sanana sakone kha si na mu lumba. Khu guralo, gikhati a tshanganago ni mwangadzi wa ndriyaye a di vbaladzela vbavbandze mbewu yaye, khu gufela gumba velegela sanana ndriyaye. 10Magirelo yaya kha ma tsakisa Pfhumu Nungungulu. A di mu bayisa nuye a gufa.
11Khu guralo, Judha a di embela ngadzamwane waye Tamari, khuye: “Dzi vegise kha nga noni ndrangani ga babe wago, kala gyanana gyangu sela gi dandra. Judha a di thava gukhuye Sela a ngafa nuye kha nga vandriyaye. Gukhugela avbovbo Tamari a di bwelela gaya gwawe aya khala iyo.”
12Na gu vbindride matshigu nya gulaphe, nyamahegyane wa Suwa, ngadza Judha a difa. Na gu enedzide matshigu nya gulile mwangadzi waye, Judha a di hongola tigoni gwa Timina gumogo ni pari yaye Hira wa Adhulamo, guya wona thumo wa vagayi nya mawoya nya dzinvuta.
13Vathu va diya embela Tamari, khavo: “Nasale wago womo ndzilani, a ngu gwela Timina, a ta gaya dzinvuta dzaye.” 14Tamari a di tshula guambala nya wumalile, a gu fenengela hungoni, a dzi fumbela nyamba tidwa khu muthu, aya khala nyangwani ga Enayimi, ndzilani nya guye Timina, kholu a di gu dziti nya gukhuye namu waye Sela dandride, aholu Judha a di si gu mu ningi a khala mwangadzi waye.
15Judha na mu wonide a di khuye mwendro nyamayi nya liphuphulu, kholu a nga bani a fenengede khovbeni.
16Judha a di hidzimela ga nyamayi aya mu embela, khuye: “Dzumela nyi ta lala nago!” “A di si dziti gukhuye khu ngadzamwane waye.”
Nyamayi a di hakha, khuye: “Ginani u na nyi ningago khu gu lala ni eni?” 17Uye a di hakha, khuye: “Nyi na gu rumela phongo mweyo ya tshambini gwangu.” Tamari a di khuye: “Nyi ngu dzumela, wa gu nyi ninga gifungo nya gu bani nyi phara kala litshigu u na nyi rumelago giphongwana gyogyo.”
18Uye a di mu wudzisa, khuye: “Ginani nyi na gu pharisago?” Tamari a di hakha, khuye: “Nyi ninge gifungo gyago, ni karara wago ni ndronga u pharidego mandzani.” Judha a di mu ninga, a gu lala naye; a mu khurisa mimba. 19Na khugide a di hongola aya tshula gifenengelo hungoni, a gu ambala gambe dzingandzu dzaye nya wumalile.
20Judha a di rumela phongo khu mandzani ga pari yaye Hira wa Adhulamo, gasi guya dzegisa sombo saye ga nyamayi wule. Aholu uye kha ya mu mana. 21A di wudzisa ga vathu va tigoni mule, khuye: “Nyamayi nya liphuphulu a talago gu manega nyangwani gwa Enayimi, bambe nya ndzila, womo evbini?”
Vathu va di mu hakha, khavo: “Gima gu si gu manegi nyamayi nya liphuphulu avba.”
22Na bwelede ga Judha a diya, khuye: “Kha nya mu mana, gudiga nya isoso, vathu va tigoni mule va di nyi embela khavo gima hi si gu woni nyamayi nya liphuphulu wulanga wule.”
23Khu guralo, Judha a di hakha, khuye: “A na khale ni esi a gu naso, gasi hi si thegi dzitshoni eni nyi nga mu rumelago phongo ni uwe u ngamba ya mu mana.”
24Gipimo nya migima miraru, va di ta embela Judha, khavo: “Ngadzamwane wago Tamari bhayide, olu khuride mimba.” Judha a di hakha, khuye: “Mu duseni vbavbandze aya vbiswa na nga gu vbanya!”
25Na va gu mu dusa, nyamayi a di ruma guya embela nasale waye, khuye: “Khu lisine, mimba nyi gu nayo khya mwama a gu mune wa sombo sesi!” Tamari a di engedza a ganela, khuye: “Nyi ngu gu lomba u khedzisa gwadi gifungo gegi ni karara ni ndronga yakone, u wona gukhuwe sa gu lumba mani.”
26Judha na wone gukhuye sombo saye, a di ganela, khuye: “Nyamayi yoyu a ngu nyi pala khu gululama. Kholu eni kha nya mu ninga gyanana gyangu Sela.” Gima kha nga engedza gambe gu lala naye.
27Gikhati a nga bani a vbweta guhefemula va di tugula gukhavo gu diri ni mavbaha ndrani gwaye. 28Nari vbakari nya guhefemule, gimbe gyanana gi di dusa libogo, singalagadzi a di dzega ngodzi nya gufuvile a hunga gibogwanani ga gyanana gegi, a ganela, khuye: “Oyu khuye a thangidego guduga.” 29Aholu, avbo gyanana gi bweledzidego libogo, ndruye wakone a di duga. Khavbo avbo, singalagadzi a di ganela, khuye: “U gunyude kharini u duga?” Khavbo avbo, gi di riywa lina nya gupwani khu Peresi. 30Khu gu hegisa a dita duga ndriyaye na hungidwe ngodzi nya gufuvile gibogwanani, igyo gi riywa lina nya gupwani khu Zera.
Aktualisht i përzgjedhur:
Genesi 38: BGE2014
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
A Bíblia em Gitonga © Bible Society in Mozambique, 2014.