MATHIU 8
8
Pasal Khat Jisun A mandam
(Mrk. 1:40-45; Luk. 5:12-16)
1A man tangbung tenna a hong chum han, mitamin ama an lui jui. 2Hale enru, pangpharpa tuiritong khat alui honga chubei han buk a ti; “Puma na najotpe inko, kei hi na na mandamtor.”
3Han, Jisun ama ha a shitda a ti, “Kein ka jot nang thiangtaro,” hava lai tak han pangphar ritongpa ha a luithiangjui. 4Hale Jisun ama jiang a ti, “Enro, tu jiang khat om ri maro; tak-ha chero, thiampu jiang hong kandoro, hale Mousi chong pek nuk juia pek rang phur ha pero; anmani jiang shakhi khat chang na rang ani.”
Rom Ral mi Ulian Suak A mandam
(Luk. 7:1-10)
5Atun, Jisun Kapernam a lut pha, ralmi riakhat neipu han ama jiang lam na a nei. 6Ahongti, “Puma ka suak khat hi a pangher khat athi a, khodengthei tak a inna ajalla a om,”
7Jisun ama jiang a ti, “Kein hong ka ta ama ha mandam kati.”
8Ral mi riakhat neipun a hong shanga a ti; “Puma ka inna ni hong rang hi ka rahui nima,” tak-ha na chong bejak han ka suakpa dam nati. 9Hiva jarra kei om ranakneingai thuoi a om khat ka ni; kei thuai han nom ralmi an la om, hale kein hiva mingai jiang chero ka ti le an che, a dang khat jiang hongro ka ti le an hong; hale ka suakpa jiang hivahi thoro, ka ti le an tho.
10Jisun hivahi a jet a a ngak banna a nukjuingai jiang a hong ti; “Kein a thianga nang ni jiang kati, kein hiva mi ang hin takngai a nei mi Israel sunga la mu making.” 11Hale kein nang ni jiang kati, “Nisuatiang le taitaktiang mitamtak hong nanti u, Abraham, Isak, Jakob le vanrengram han ongsuam nanti.” 12Tak-ha rengram neipu naingai ha ko, a jing na mun tual tiang han deng juan nanti; hava han chap le harialna na mun ni nati. 13Han, Jisun ralmi riakhat neipu jiang a ti, “Chetaro, na takngai na nuk juia nang jiang dam ha ni rase, hava phat tak han a suakpa natha a dam jui.”
Jisun Mitamtak A mandam
(Mrk. 1:29-34; Luk. 4:38-41)
14Atun Jisun Pitar inn na a honga, Pitar a tarpining a tunna a jal ha a man alui mu. 15Hale a man a kut a sitpea, a tun ha a dam jui ha suale a man a thuia an sepa a tho pe jui.
16Nitak a hong ni pha han sat mak thavang in a choingai ha mitamin ama jiang an hong tuang hale a man sat mak thavangngai ha chong khat jak a a notchei a natngai ham alui mandam. 17Hivahi tashanthei Isaia in alui ri ha tung na ranga ani. “A man keini kan tor mak na hale natna kan nei rakip ana lui choipe.”
Dan Oja ning Jisu A jui jot
(Luk. 9:57-62)
18Atun Jisun mitam akola an om ha a mu a varaltiang an che na ranga man chong alui pek. 19Hava suale dan oja khat in a honga ama jiang a ti “Oja na che na rakip hin kein nom na juirong,”
20Hale Jisun ama jiang a ti “Melangngai om khur an nei, hale chunga vatengai in rabu an nei tak-ha Mi Pasalnai rang ko a lu siakna rang mun om mak.”
21A thiamruoi khat in ama jiang a ti, “Puma kein ka Pa ruok ha man chebak kati.”
22Tak-ha Jisun ama jiang a ti, “Kanuk na juiro,” hile a thi ngai ning anmani a thi ngai ha ruak kan re nanti.
Jisun Rua Le Phaivuo A manbang
(Mrk. 4:35-41; Luk. 8:22-25)
23Atun a man rokuang sunga a lut a a thiamruoingain ham an lui jui. 24Hale jet lui thai lui a tuipuilian han rua le phaivuolian a honga tui kan nok ha ning rokuang ha akhude, tak-ha ama ko alui jal. 25Hava suale a thiamruoingain an honga ankei thuia anti Puma na sanro, keini thirang kan ni.
26Tak-ha a man anmani jiang a ti, “Ijarra mo nan chit, o takngai torlui ngai,” han a man a thuia phaivuo le tuipuilian ha akhapjui, hale a dai riai jui,
27Hale mingain an ngakreia an hong ti, “Phaivuo le tuipuilian innom a chong an jui hi ko imimo ani?”
Jisun Satmak Thavang Choi Anni A mandam
(Mrk. 5:1-20; Luk. 8:26-39)
28A ma ning varal tianga om Gadara ram ma a hong pha han thantang tenna a hong suak seitan in a choi miring anni le an kantong anmani ha chit rang om tak anni jarra tu khat innom hava lam ma luichetor ma u. 29Hale jet lui thai lui a an hong khek anti, “Jisu Pathian Pasalnai nang le keini hi imo kan suak, a phat animak ma keini hi man pong kati tia nang na hong mo?”
30Anmani le aviar kanlakdet le vok tamngai rup khat an chak an lui om jui. 31Seitan in ama jiang chong lam na an nei a anti nang in keini hi na na notchei inko vok rupngai jiang keini che ranga na jot pero.
32Hale a man anmani jiang a ti, “Cheru,” han anmani ning, an hong suak vokngai jiang an lut jui, hale jet lui thai lui a vok rupngai ha an kansuklet lamsuk tiang an hong tanna tuipuiliana an chulla an thi jui.
33Hava suale a selngain an tanna, khuo sunga an lut i suak rakip le seitan in a choi mingai ruia an lui ri jui. 34Hale enru, khuopum ma Jisu ha mu na ranga an hong suak jui, han ama ha an mu pha an ram ha a makpe na ranga chong lam na an lui nei.
Aktualisht i përzgjedhur:
MATHIU 8: AIMOLBSI
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.