Maatiyee 16
16
Farɩsɩ ñɩma nɛ Saduki ñɩma pɔzɩ Yesu se ɛla hama lakasɩ nasɩyɩ nɛ pana
(Mrk 8.11-13; Luk 12.54-56)
1Yesu talɩ Magaadaɣ peeɖe lɛ, Farɩsɩ ñɩma nɛ Saduki ñɩma powolo pañɩ ɛ-nɔɔ cɔlɔ tɔm. Pɔpɔzɩ-ɩ se ɛla ɛsɔdaa hama lakasɩ nasɩyɩ nɛ pana. 2Peeɖe ecosi-wɛ se: [«Wɩsɩ kɔŋ se sɩɖʋʋ lɛ, ɩtɔŋ se: ‹Alɩwaatʋ wɛɣ camɩyɛ, mbʋ́ pʋyɔɔ yɔ, ɛsɔdaa sɛwa.› 3Tanaŋ cu lɛ, ɩtɔŋ se: ‹Sɔnɔ tɛʋ nɩɣ, mbʋ́ pʋyɔɔ yɔ, ɛsɔdaa sɛwa nɛ pʋwɛɛ yulee.› Ɩsɩm ɛsɔdaa wɛtʋ tɔbʋʋ lɩzʋʋ, ɛlɛ́, ɩɩpɩzɩɣ se ɩlɩzɩ mbʋ́ Ɛsɔ lakɩ mɩ-hɛkʋ taa lɛɛlɛɛyɔ yɔ pʋbʋ ñɩŋgʋ.] 4Lɛɛlɛɛyɔ ɛyáa kɛ azaɣ́a, peyeki Ɛsɔ nɛ poluŋuu wondu nɛ ɖoŋ lɛɛŋ tɛɛ. Pañɩnɩɣ se pala ɛsɔdaa hama lakasɩ nasɩyɩ nɛ pana. Ɛlɛ́, paakaɣ yʋsaɣ nakɛyɛ naʋ nɛ pɩtasɩnɩ náyʋ Yoonaasɩ ñɩŋga.»
Pʋwayɩ lɛ, Yesu ɖɛɛ eyebi-wɛ.
Yesu tiyiyaa ɩɩnɩɣ natʋyʋ taa
(Mrk 8.14-21)
5Nakʋyʋ wiye Yesu nɛ ɛ-tɔmkpɛlɩkɩyaa pɛtɛzaɣ teŋgu wayɩ nɛ paba sɔɔ tindine yɔɔ. 6Peeɖe ɛpaɣ-wɛ se: «Ɩɖɔkɩ mɩ-tɩ ɖeu nɛ Farɩsɩ ñɩma nɛ Saduki ñɩma pɔ-sɔsɔɔna.» 7Ɛlɛ́, papazɩ ɖama yɔɔdɩnaʋ se: «Yaa ɖɩtakpaɣ tindine yɔɔ ɛkalɩɣ-ɖʋ ḿbʋ́?» 8Yesu nɩ ḿbʋ́ lɛ, ɛpɔzɩ-wɛ se: «Lidaʋ ñɩɩɩ tɩnaa mɩ! Pɩlabɩ ɛzɩma nɛ ɩyɔɔdʋʋnɩ ɖama se ɩtakpaɣ tindine? 9Pɩlabɩ ɛzɩma halɩ nɛ sɔnɔ ɩɩnɩɣ? Ɩɩtasɩɣ tɔzʋʋ tindine hɔɔlasɩ kagbaanzɩ nzɩ́ pacalɩnɩ ɛyáa kutokiŋ kagbaanzɩ nɛ ɖɔkɩŋ weyi pɩkazaa nɛ ɩkpaɣ yɔ pʋ-yɔɔ yaa we? 10Nɛ tindine hɔɔlasɩ lʋbɛ nzɩ́ pacalɩnɩ ɛyáa kutokiŋ naanza nɛ ɖɔkɩŋ weyi pɩkazaa nɛ ɩkpaɣ yɔ, ɩɩtɔzʋʋ pʋ-yɔɔ ɖɔɖɔ yaa we? 11Pɩlabɩ ɛzɩma halɩ nɛ sɔnɔ ɩtatɩɩnɩda se pɩtɛkɛ tindine tɔm mɔyɔɔdaɣnɩ-mɩ? Meheyi-mɩ se ɩɖɔkɩ mɩ-tɩ nɛ Farɩsɩ ñɩma nɛ Saduki ñɩma pɔ-sɔsɔɔna.» 12Peeɖe panɩwa se pɩtɛkɛ sɔsɔɔna wena palakɩnɩ tindine yɔ, ana eheyaɣ-wɛ se pɔ́ɖɔ́kɩ pa-tɩ nɛ yɛ. Ɛlɛ́, mbʋ́ Farɩsɩ ñɩma nɛ Saduki ñɩma pawɩlaɣ yɔ, eheyaɣ-wɛ se pɔ́ɖɔ́kɩ pa-tɩ nɛ pʋ.
Pɩyɛ yɔɔdaa se Yesu lɛ Weyi Ɛsɔ Lɩzaa
(Mrk 8.27-30; Luk 9.18-21)
13Pʋwayɩ lɛ, Yesu nɛ ɛ-tɔmkpɛlɩkɩyaa powolo Sezaaree Filiipu hɔɔlʋʋ taa. Pɩkɛdaa lɛ, ɛpɔzɩ-wɛ se: «Ɛyáa tɔŋ se Ɛyʋ Pɩyalʋ ma, ma lɛ anɩ?» 14Pocosi-i se: «Nabɛyɛ tɔŋ se ña lɛ Lɩm Sɔʋ Sɔnzɩ Laɖʋ Yohanɛɛsɩ. Lɛlaa se ña lɛ Elii weyi paaɖaŋaa yɔ nɛ lɛlaa se ña lɛ Yereemii yaa náyaa taa lɛlʋ.» 15Peeɖe ɛpɔzɩ-wɛ se: «Mɩ yɔ, mɩhʋʋ se ma lɛ anɩ?» 16Ɛlɛ́, Siimɔɔ Pɩyɛ cosi-i se: «Ña lɛ Weyi Ɛsɔ Lɩzaa Yɔ. Ña lɛ Ɛsɔ wezuu tʋ Pɩyalʋ.» 17Peeɖe Yesu heyi-i se: «Yoonaasɩ pɩyalʋ Siimɔɔ! Ŋhiɣ ña-tɩ! Mbʋ́ pʋyɔɔ yɔ, pɩtɛkɛ ɛyʋ nɔɔyʋ heyini-ŋ-tʋ. Ɛlɛ́, man-Caa weyi ɛwɛ ɛsɔdaa yɔ, ɛwɩlɩnɩ-ŋ-tʋ. 18Ma lɛ, meheyiɣ-ŋ se: ña mayaɣ se Pɩyɛ. Pɩyɛ ńɖɩ́ ɖɩ-yɔɔ manɖʋʋ mɛ-ŋgbɛyɛ. Sɩm maɣmaɣ ɛɛpɩzɩɣ pɩlabɩ-ɖɩ pʋyʋ. 19Mɔnkɔŋ-ŋ cɛlʋʋ Ɛsɔ Kewiyaɣ nɔnɔɔ ñɩma: mbʋ́ ŋkiziɣ se pataala tataa cɩnɛ yɔ, Ɛsɔ kiziɣ se pataalabɩ-pʋ ɖɔɖɔ, nɛ mbʋ́ ŋtisiɣ se pala tataa cɩnɛ yɔ, etisiɣ se palabɩ-pʋ ɖɔɖɔ.» 20Peeɖe Yesu paɣ́ ɛ-tɔmkpɛlɩkɩyaa se pataala nɛ nɔɔyʋ nɩɩ se ɛnʋ lɛ Weyi Ɛsɔ Lɩzaa Yɔ.
Yesu yɔɔdʋʋ ɛ-sɩm nɛ e-fem pɔ-tɔm yɔ
(Mrk 8.31-9.1; Luk 9.22-27)
21Alɩwaatʋ ńdʋ́ʋ́ Yesu pazɩ ɛ-tɔmkpɛlɩkɩyaa yɔɔdɩnaʋ nɛ ɛkaɖɩ-wɛ se pʋwɛɛ se ewolo Yeruusalɛm nɛ ɛtɔɔ kʋñɔŋ siŋŋ Yuda ñɩma sɔsaa nɛ pɔ-cɔjɔnaa sɔsaa nɛ pa-paɣtʋ wɩlɩyaa pe-nesi taa nɛ pakʋ-ɩ nɛ ɛsɩ nɛ kɩyakɩŋ naadozo wiye lɛ, Ɛsɔ fezi-i.
22Peeɖe Pɩyɛ ya-ɩ nɛ ɛkɛsɩ-ɩ kɩjaʋ nɛ ɛkalɩ-ɩ se: «Kɩpaɣlʋ! Ɛsɔ huuzuu ñɔ-yɔɔ. Nabʋyʋ ɛɛlakɩ-ŋ kaʋ!» 23Ɛlɛ́, ekisini Pɩyɛ yɔɔ nɛ eheyi-i se: «Satanɩ, ɖɛɛ mɔ-yɔɔ! Ŋcaɣ se ŋtuuli-m ma-nʋmɔʋ taa. Mbʋ́ pʋyɔɔ yɔ, ña-lɩmaɣza tɛkɛ Ɛsɔ ñɩna, ɛyáa ñɩna akɛnaa.»
Ɛzɩma pʋwɛɛ se ɖɩtɩŋ Yesu wayɩ?
24Pʋwayɩ lɛ, Yesu heyi ɛ-tɔmkpɛlɩkɩyaa se: «Weyi e-liu wɛɛ se ɛtɩŋɩɣ ma-wayɩ yɔ, pʋwɛɛ se ɛsɔɔ ɛ-maɣmaɣ ɛ-yɔɔ, etisi nɛ ɛtɔɔ kʋñɔŋ siŋŋ#16.24 Etisi nɛ ɛtɔɔ kʋñɔŋ siŋŋ: ɩcɔnɩ Mat 10.38.. 25Mbʋ́ pʋyɔɔ yɔ, weyi ɛñɩnɩɣ se ɛya ɛ-maɣmaɣ ɛ-ñʋʋ yɔ, ɛtɛŋnɩ-kʋ lesuu. Weyi ɛ́lɛ́ sɩkɩ mɔ-yɔɔ yɔ, ehikiɣ wezuu. 26Yee ɛyʋ ehiɣ kedeŋa yɔɔ cɩnɛ ñɩm tɩŋa payɩ nɛ elesi e-wezuu lɛ, pʋwazɩɣ-ɩ we? Ɛbɛ pʋdʋ pɩzɩɣ ɛkpaɣ nɛ ɛlɛɣzɩ ku-lone taa? 27Ɛyʋ Pɩyalʋ nɛ Ɛsɔ tiyiyaa pɛkpɛndɩɣnɩ ɛ-Caa Ɛsɔ koboyaɣ nɛ pɔkɔɔ nɛ ɛhɛyɩ paa weyi mbʋ́ ɛlaba yɔ pʋ-yɔɔ. 28Toovenim lɛ, meheyiɣ-mɩ se: mbá pɛwɛ cɩnɛ yɔ, pa-taa lɛlaa naɣ Ɛyʋ Pɩyalʋ ma alɩwaatʋ ndʋ́ mɔnkɔŋ mɔntɔɔ kewiyaɣ yɔ nɛ pʋcɔ pasɩ.»
Zvasarudzwa nguva ino
Maatiyee 16: KABI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda