لوقا ۱۷
۱۷
عیسا البأقی گبأن
1 ایتأ روج عیسا خو شأگردأنَ بٚفرمأسته: «گونأیأنٚ وسوسه همیشٚک نٚهأ، امّا وای به حألٚ او کسی کی مردومٚ وسوسه بوکونه. 2 اونی رِه بِیتره کی ایتأ پیله‌دأنه سنگَ خو گردن دٚوٚده و دریأ میأن تأوٚدأ بٚبه کی بأعیث بٚبه ایتأ جٚه اَ زأکأن لغزش بوخورد. 3 پس شیمی کردکأرأنَ بٚپأیید!
«اگه تی برأر گونأ بوکود، اونَ تِنبیه بوکون و اگه توبه بوکود، اونَ بٚبٚخش. 4 حتّا اگه ایتأ روجٚ میأن تٚرَه هفت وأر بٚدی بوکوده و هر وأر تی ورجأ وأگردسته و پٚشیمأنٚ بوسته، اونَ بٚبٚخش!»
5 روسولأن خودایَ بوگفتد: «اَمی ایمأنَ زیأدٚ کون.»
6 عیسا بٚفرمأسته: «اگه ایتأ کوجه‌دأنه ایمأن، خردٚلٚ دأنه اَندر بٚدأرید، تأنید اَ توت دأرَ فرمأن بدید کی خو جأ سٚر بٚکنده بٚبه، دریأ میأن بکأشته بٚبه و اَ دأر شیمی فرمأنٚ جَا ایطأعت کونه.
7 «او وخت کی خیدمتکأر، شوخم زِئن یا گوسوٚندأنٚ چرأنئنٚ جَا وأگرده بٚخأنه، آیا اونی اربأب گه "بیأ بینیشین و ایچی بوخور"؟ 8 نه، اونَ گه می شأمَ آمأدَه کون و می جَا پذیرأیی بوکون و می رأفأ بئیس تأ من بوخورٚم و وأخٚوٚرم، بأزون تو بوخور وأخور بوکون. 9 خو خیدمتکأرٚ جَا تشکرٚم نوکونه، چونکی خو وظیفه‌یَ انجأم دِهه. 10 اونی وأسی او وخت کی می فرمأنأنَ جَا ایطأعت کونید تِشویق و تعریف رأفأ نئیسید، چونکی فقد شیمی وِظیفه‌یَ انجأم بدأیید.»
قدردأنٚ سأمری
11 عیسا اورشلیمٚ رأ دورون، مرزٚ جلیل و سأمره میأن، 12 ایتأ دیهأتَ بودورون بوشؤ، نأخٚوٚرکی ده‌تأ جوذأمی اونی اَمرأ کٚس‌بٚکس بوخوردٚد. جوذأمیأن جٚه دؤر بئیسأد، 13 ایجگره بٚزِده: «اَی عیسا، اَی اوستأد، اَمٚرَه رحم بوکون!»
14 عیسا اوشأنَ فأندرسته و بٚفرمأسته: «کأهینأن ورجأ بیشید و شٚمٚره نیشأن بدید.» هو او وخت کی شؤئؤندوبود، جوذأم اوشأنی جأنٚ جَا پأکَ بوسته.
15 ایتأ جٚه اوشأن او وخت کی بیدِه شفأ بیأفته، هو حأل میأن ایجگره اَمرأ خودایَ شوکر بوکوده، عیسا ورجأ وأگردسته. 16 اونی پأ جیر زیمینَ رو بٚکفته و او لوطفی رِه کی اونَ بوکوده، اونی جَا قدردأنی بوکوده. اون ایتأ سأمری بو.
17 عیسا بٚفرمأسته: «مگه من ده نفرٚ شفأ نٚدأم، پس او نُه نفر کؤیَه ایسأده؟ 18 آیا جغرز اَ غریبه هیکس نئیسأبو کی خودا جَا قدردأنی بوکونه؟»
19 پس او مردأکَ بٚفرمأسته: «ویریز و بوشو! تی ایمأن تٚرَه شفأ بٚدأ!»
خودا پأدیشأیی اَمؤن
20 ایتأ روج ای عیده جٚه فریسیأن عیسا جَا وأورسئده: «خودا پأدیشأیی اَکِی شورو بِه؟»
عیسا اوشأنَ جوأب بٚدأ: «خودا پأدیشأیی، نیشأنه‌یأنی کی بشأ دِئنٚ اَمرأ، شورو نیبه. 21 و نٚگده کی جٚه زیمینٚ اَ کنأره یا اویتأ کنأره شورو بوبوسته، چونکی خودا پأدیشأیی شیمی میأن نٚهأ.»
22 بأزین، اَ مأجیرأ وأسی خو شأگردأنَ بٚفرمأسته: «ایتأ زمأت فأرٚسِه کی آروزو دأرید حتّا ایتأ روج می اَمرأ بیبید، امّا شیمی اَ آروزو انجأم نیبه. 23 شٚمٚره خٚوٚر فأرٚسِه کی من وأگردستٚم و فٚلأن جأ ایسأم. هیوخت قوبیل نوکونید و می دونبألسر نٚگردید. 24 هطؤ کی ایتأ برق آسمأن جَا دتأوٚه و آسمأنَ جٚه اَ طرف تأ او طرفٚ روشنَ کونه، اینسأنٚ پٚسرٚ اَمؤنٚم اَطؤیی ایسه. 25 امّا پیشتر لأزیم ایسه کی ویشتر زحمت بیدینٚم و اَ مردوم مٚرَه کنأر نٚهٚده.
26 «اینسأنٚ پٚسرٚ اَمؤنٚ زمأت هچین نوحٚ زمأتأنٚ مأنه.» 27 مردوم خوشگوذرأنی و میهمأنی و عروسی جشنٚ رِه موشغول بود کی او روج نوح، کشتی دورون بوشؤ. بأزون سیل رأ دکفته همٚتأنَ جٚه بین ببرد.
28 «او وخت، دونیأ هچین لوطٚ زمأتٚ مأنستَن بِه کی مردوم خوشأنٚ روجٚ کأرأنَ موشغول بود؛ بوخور وأخور کودأندوبود؛ بیهین بوفروش کودأندوبود؛ کشت و کأر و چأکون وأکون کودیدی. 29 تأ او صُبٚ روج کی لوط جٚه سدوم شهر بیرون بأمؤ و آتٚش و گوگرد آسمأن جَا دٚوأرٚسته و همّه چی‌یَ جٚه بین ببرده. 30 دوروسته، اینسأنٚ پٚسرٚ اَمؤنٚم اَطؤیی ایسه.
31 «او روج، اونی کی خأنه پوشتٚ‌بأمٚ جؤر ایسأ، خو مأل و مینألٚ اوسأدٚنٚ وأسی وأنگرده خأنه دورون و اونی کی زیمینٚ سٚر ایسأ وأنگرده بٚخأنه. 32 خأطر بأوٚرید کی لوطٚ زنٚ سٚر چی بأمؤ! 33 هر کی بٚخأیٚه خو جأنَ بٚدأره، جٚه دٚس دِهه امّا هر کی خو جأنَ جٚه دٚس بٚده، اونَ نیجأت دِهه. 34 هو شب، دو نفر ایتأ تختٚ سٚر بوخوفته بٚبٚد، اینفر ببرده بِه و اویتأ مأنه. 35 دوتأ زنأی کی کس‌کسٚ ورجأ گندم کوبستنٚ رِه موشغول بٚبٚد، ایتأ ببرده بِه و اویتأ مأنه. 36 دوتأ مردأی کی زیمینٚ سٚر کأر کودأندرد، ایتأ ببرده بِه و اویتأ مأنه.»
37 شأگردأن عیسا جَا وأورسئده: «خوداوندا، اوشأن کؤیَه ببرده بٚده؟»
عیسا بٚفرمأسته: «او جأیأنی کی لأشه بمأنه، لاشخورأن هویه جمَ بٚده!»
Zvasarudzwa nguva ino
لوقا ۱۷: GLK_NT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 Transform Iran