لوقا ۱۶
۱۶
دونیأ مأل و مینألٚ دوروست خرج کودن
1 عیسا اَ حیکأیتَ خو شأگردأن رِه وأگویا بوکوده: «ایتأ مأل و مینألدأرٚ مردأی ایتأ موبأشر دأشتی کی تومأمٚ اونی مأل و مینألٚ حیسأب کیتأبَ فأرٚس فوروس کودی امّا اونَ خٚوٚر فأرٚسِه کی او موبأشر اونی اموألٚ جَا دوزدی کونه. 2 پس اونَ دؤخأده و بوگفته: بشتأوستم می اَموألَ حِیف میل کونی! پس هر چی زوتر تی حیسأب کیتأبَ دٚوٚد، چونکی خأیم تٚرَه بیرونَ کونم!
3 «موبأشر خو اَمرأ فیکر بوکوده و بوگفته: "هسأ چی وأ بوکونم؟ او وخت کی جٚه اَ کأر ایخرأجٚ بٚم نه بیل زِئن زور و قوّتَ دأرم و نه می غرور مٚرَه وئأله کی گدأیی بوکونم. 4 بفأمٚستٚم چی وأ بوکونم! وأستی ایتأ کأر بوکونم کی او وخت کی جٚه اَیَه بوشؤم، دوس و ریفِق زیأد بٚدأرم کی مٚرَه بٚدأرٚد."
5 «پس خو اربأبٚ بدهکأرأنَ ایتأ ایتأ دؤخأده و اوشأنی اَمرأ بوگو بشتأو بوکود. اوّلی جَا وأوٚرسِه: "چندر می اربأبَ بدهکأری؟"
6 «جوأب بٚدأ: "صدتأ حلبی روغن زیتون."
«موبأشر بوگفته: "دوروسته. اَن تی عرض حألی ایسه کی ایمضأ بوکودی. پأرَه کون و ایتأ دِه عرضٚ حألٚ میأن بینیویس، پنجأه حلبی!"
7 «جٚه اینفر دِه وأوٚرسِه: "تو چندر بدهکأری؟"
«جوأب بٚدأ: "صد خٚروأر گندم."
«اونَ بوگفته: "تی عرضٚ حألٚ بیگیر و اونی عوض بینیویس هشتأد خٚروأر!"
8 «او پولدأرٚ مردأی، متقلبٚ موبأشرٚ تِشویق بوکوده، چونکی زرنگی بوکوده! رأس‌رأسِی اَ دونیأ آدمأن خوشأنٚ دؤرٚوٚرٚ دونیأ اَمرأ ایرتبأط دأشتنٚ میأن نورٚ زأکأنٚ جَا زرنگتر ایسٚد. 9 شٚمٚره گم کی شیمی دونیأیی مأل و مینألٚ جَا ایستفأده بوکونید کی ریفِقأنی شِمِره بیأفید. بأزون، او وخت کی شیمی زیمینی مأل و مینأل جٚه بین بوشؤ، اَبدی جأجیگأیأنٚ دورون قوبیل بیدی.
10 «اگه کوجه کأرأنٚ میأن خُب کردکأر بوکونید، پیله‌دأنه کأرأنٚ دورونم خُب کردکأر کونید و اگه کوجه‌دأنه کأرأنٚ رِه خُب کردکأر نوکونید، پیله‌دأنه تکلیفأنٚ میأن هم خُب کردکأر نوکونید. 11 پس اگه اَ دونیأ مأل و مینألٚ رِه خُب کردکأر و امأنٚتدأر نیبید، چوطؤ وأستی شٚمٚره آسمأنی رأس‌رأسِی مأل و مینألأنٚ رِه ایعتمأد کودن؟ 12 و اگه اَیتأ اویتأ مألٚ میأن خیأنٚت بوکونید، کیسه کی شیمی مألَ شیمی دٚس بیسپأره؟
13 «هیتأ خیدمتکأر نتأنه دوتأ اربأبَ خیدمت بوکونه، چونکی یا اینفرٚ جَا نیفرت اوسأنه و اویتأیَ دوس دأره و یا اینفرَ سٚرسپرده ایسه و جٚه اویتأ بیزأر به. هطؤیٚم نشأ هم خودا سٚرسپرده بوستن هم پولَ.»
14 فريسيأن او وخت کی اَ گبأنَ بشتأوستٚده اونَ رخشنَ گیفتٚد، چونکی پولدوس بود. 15 عیسا اوشأنَ بٚفرمأسته: «شومأن دوس دأریدی کی خودتأنَ مردومٚ چومٚ ورجأ خورومٚ کأر کونه کس و عأدیل نیشأن بدید، امّا خودا شیمی دیلٚ جَا وأخبدأر ایسه. اونچی‌یَ کی مردوم رِه خٚیلی اَرزِه، خودا چومأنٚ ورجأ زشت ایسه و خُب نأنِه. 16 پیشتر جٚه یوحنا موعیظه‌یأن، موسا تورأت و پیغمبرأنٚ نیویشته‌یأن شیمی رأنمأ بو. امّا هسأ کی یوحنا، خودا پأدیشأیی فأرٚسِئنٚ خوروم خٚوٚرَ بٚدأ، مردوم زور زورِی خأیٚد خوشأنَ او دورونی تأوٚدٚد. 17 امّا اَن اَ مأنی‌یَ نیده کی تورأت خو اَرزٚستٚنَ جٚه دٚس بٚدأ. خٚیلی رأحت ایسه کی آسمأن و زیمین جٚه بین بشه تأ اَنکی ایتأ نوقطه تورأت جَا بٚکفه.
18 «هر کی خو زنأکٚ جَا سیوأ بٚبه و ایتأ دِه زنأکٚ اَمرأ عروسی بوکونه، زٚنأ بوکوده، و هرتأ مردأکٚم کی ایتأ سیوأ بوبوسته زنأکٚ اَمرأ عروسی بوکونه زٚنأ بوکوده.»
مأل و مینألدأرٚ مردأی و فِقِرٚ ایلعأزر
19 عیسا بٚفرمأسته: «ایتأ مأل و مینألدأرٚ مردأی بو کی گیرانقیمتٚ لیوأسأن دوکودی و همٚتأ روجأن خوشگوذرأنی و عیش و نوش اَمرأ سرگرم بو. 20 ایتأ گدأ کی اونی ایسم ایلعأزر بو و اونی جأنٚم زخم و زیلی بویَ، او پولدأرٚ مردأکٚ خأنه دروأزه ورجأ نأئیدی. 21 ایلعأزرٚ رِه آروزو بو کی اونی ایضأفه خورأکی جَا خو شکمَ سِئرَ کونه. حتّا سکأنٚم اَمؤییدی و اونی زخمأنَ وألیشتیدی.
22 «آخرپٚسی او فِقِرٚ مردأی بٚمٚرده و فٚرٚشته‌یأن اونَ ایبرأهیمٚ ورجأ ببردٚد، او جأجیگأ کی خوروم آدمأن ایسأبود. او پولدأرٚ مردأکٚم بٚمٚرد و اونَ بیگیلَ کودٚد. 23 امّا اونی روح بوشؤ مورده‌یأنٚ دونیأ. اویَه، هوطؤیی کی عذأب کشئندوبو، خو سٚرٚ جؤرَ فأندرسته و جٚه دؤر دورأن ایبرأهیمَ بیدِه کی ایلعأزر اونی ورجأ ایسأبو. 24 پس ایجگره بٚزِه: "اَی می پئر ایبرأهیم، مٚرَه رحم بوکون و ایلعأزرٚ اَیَه اوسه کون کی فقد خو اَنگوشتَ آبٚ دورونی بٚزٚنه و می زوأنَ خونٚکَ کونه چونکی اَ شوأله‌یأنٚ میأن سوختأندٚرم!"
25 «امّا ایبرأهیم اونَ بوگفته: "زأی جأن، خأطر بأوٚر کی تو زٚندیگی میأن هر چی خأستی، دأشتی، امّا ایلعأزر جٚه همه چی محروم بو. پس هسأ اون آرأمٚش دأره و تو عذأب دِئندری! 26 جٚه اَن بوگذریم، ایتأ جولف درّه اَمٚرَه جٚه هم سیوأ بوکوده، جوری کی نه اَ طرفٚ آدمأن تأنٚد بأیٚد او طرف، و نه او طرفٚ آدمأن تأنٚد اَ طرف بأیٚد."
27 «پولدأرٚ مردأی بوگفته: "ای می پئر ایبرأهیم، پس تی جَا ایلتیمأس کونم کی اونَ می پئر خأنه اوسه کونی 28 تأ می پنج‌تأ برأرَ جٚه اَ جأجیگأ کی آدم رنج و عذأب دینه وأخبدأرٚ کونه، نوکونه کی اوشأنم مٚردنٚ پٚسی اَیَه بأیٚد!" 29 ایبرأهیم بٚفرمأسته: "موسا و پیغمبرأن هر وأر اوشأنَ جٚه اَ مأجیرأیأن وأخبدأرٚ کودٚد. تی برأرأن تأنٚد اوشأنی گبأنَ دیقت بوکونٚد."
30 «او پولدأرٚ مردأی جوأب بٚدأ: "نه، ای می پئر ایبرأهیم! می برأرأن اوشأنی گبأنَ دیقت نوکونٚد، امّا اگه اینفر مورده‌یأنٚ جَا اوشأنی ورجأ بشه، شکی نأرٚم کی خوشأنی گونأیأنٚ جَا توبه کونٚد."
31 «ایبرأهیم بٚفرمأسته: "اگه موسا و پیغمبرأنٚ گبأنَ دیقت نوکونٚد، حتّا اگه اینفر جٚه موردیأنٚم اوشأنی ورجأ بشه، اونی گبأنٚ دیقت نوکونٚده و رأستٚ رأ جأ، دورَ بٚده."»
Zvasarudzwa nguva ino
لوقا ۱۶: GLK_NT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 Transform Iran