मत्ती 3
3
यूहन्ना बपतिस्मा रंड्रा
(मरकु 1:1-8; लूको 3:1-17)
1दुह मुक्कारिंङ यूहन्ना बपतिस्मा रंड्रा यहुदिया प्रदेशो सुनसान ठाहरीरिंङ दिह प्रचार लहज़ी लेहकी तोहई: 2“केनातु पापो दोरच़ी सेहम किर्ज़ुंई दंङ परमेश्वरो कछंङ अतंई छना कुचे स्वर्गो राज कछंङ पिचे अंजा।” 3दिह दुए शुह अतु पाहठी यशायाह भविष्यवक्ता ज़ि कुहषी तहरे:
“सुनसान ठाहरीरिंङ इच्च़ा मीहू हऊषेपि सग थापि लेहकी तोह कि, प्रभु स्वागतो थल्जी केनातु सेहम तेयार लंहि दंङ केनाहतिंङ सुधारेतुंई।”
4यूहन्ना ऊंठो च़मो बणाएष्री खमज़ेर लेहच़ाते दंङ एनोह उम रिंङ च़मो छ़िर लेज़ा बंङज़ते, दंङ टिट ए बंणो यमा ज़ोवा लाहते। 5यहुदिया प्रदेशो, दंङ यरदन ए यरूशलेम शहरो महसे मीहरे यूहन्ना ओ प्रचार रेड्रिमी थल्जी अच़ा अतिरे। 6अपेहल दोच़ी एनोह पाप मनेके च़रति दंङ यूहन्नाज़ि दोतिंङ यरदन बेंडीरिंङ बपतिस्मा रेह च़रति।
7अपेहल यूहन्नाज़ि महस फरीसी ए सदूकी मीहतिंङ बपतिस्मा लेहप्च़िमी थल्जी एनोह कछंङ अपि तंङातो, दंङ दोई कुहतो, “हे विष ज़डे ओमड्रातु ठ्रोह मांजी मीहरे, केतिंङ अच़ि कंजाते कि परमेश्वरो अंजा रोह्षज़ि पोहकतुंई? 8दिऊ थल्जी केनातु व्यवहार दोरच़ी दिह साबित लांही केहच़ी पापो दोरच़ी सेहम यह्च़ी चरच़ातंई; दंङ परमेश्वरो कछंङ अच़ा अन्दंई। 9दंङ दिह थाह सोचेक्तुंई कि केरे दिह कुट्रा सज़ाओ दोरच़ी बचेके योंई कि ञेंहतु बाह-मेमे अब्राहम शुह। गेह केतंङ साते कुट्रातग कि परमेश्वर दिह रघटेतु दोरच़ी लाह अब्राहमो थल्जी औलाद पैदा लेह तरपोतो।
10दिऊ थल्जी हेंतेग केहरे परमेश्वरो न्याय ओ थल्जी तेयार बंङज़ोंई छना कुचे मकुड़ी बुटो जड़ ट्रिकट्रिमी थल्जी तेयार तोह, अंहउसंङ, अंहउसंङ बुट रूठे फल माह हपतो, दुह ट्रिके मेहरिंङ केचे केओतो।
11गेह केतिंङ ती ज़ि बपतिस्मा रंड्रातग अच़ि एनोह पापो दोरच़ी सेहम यहच़ातोर दंङ परमेश्वरो कछंङ अपातोर। गिऊ थल दुह अंजा शुह, अंऊ गिह्बी ला महस शक्तिशाली तोह, गेह दोऊ बूठ कुर्चिमी जोगे ला माह तोग। दंङ दुह केतिंङ पवित्र आत्मा रंङ बपतिस्मा रमतो। 12दोऊ पेषिंङ दोऊ गुहड़िंङ तोह, दंङ दोई एनोह रीह रूठे रंङ साफ लोहतो, दंङ एनोह छ्वाह ता कोठलीरिङ ठ्रोहका लोहतो, दंङ भूसा बि दुह मेहरिंङ छंङमोतो अतु मेह सियोतो ए माह।”
युह्न्नो दोरच़ी यीशु बपतिस्मा
(मरकु 1:9-11; लूको 3:21-22)
13दुह मुक्का यीशु गलील प्रदेशंङज़ि यरदन बेंड़ीऊ हखा यूहन्नाओ दोरच़ी बपतिस्मा लेहप्च़िमी थल्जी अन्दे। 14पर यूहन्ना दि कुचे दोबि रोकेकचि लेहकी तोहई, “गिह्बी ताह कांह दोरच़ी बपतिस्मा लेहपच़ी जूंशी तोह, पर काह गिऊ कछंङ बपतिस्मा लेहपच़ी अंज़े तोतोन।”
15यीशुज़ि दोबि जुबाब रन्दो, “हेंतेग ता ध्यांए शुहबी रांऊ, झांह लेह हेंज़ी दुह भत्ते धिर लोहन अंऊ परमेश्वरे जुंज़ातो।” दंङ यहून्ना दोऊ गप्पा मनेके इलि। 16दंङ यीशु बपतिस्मा लेहपच़ा दोहथरे तिरिंङ ज़ि हुंज़ा धक्तेक्का अति, दंङ दोऊ थल्जी सर्ग अल्सा इलि, दंङ दोई परमेश्वरो आत्मा कबूतरो ठ्रोह तहकसी एनोह टोईच़ी अपि तंङतो। 17दंङ स्वर्गंङज़ि परमेश्वरो सग अति: “दिह गिऊ प्यारे योह शुह अतंङ साते गेह महस खुश तोतोग।”
Zvasarudzwa nguva ino
मत्ती 3: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.