मत्ती 4
4
शेतानो दोरच़ी यीशु मसीहू परीक्षा
(मरकु 1:12-13; लूको 4:1-13)
1दंङ दुह मुक्का पवित्र आत्मा यीशुबि सुनसान ठाहरीरिंङ रेंज़ा इलि ताकि शेतानो दोरच़ी दुह परखेक्सी जूंस। 2दुह निह्नजा ध्याड़ा ए, निह्नजा रात छले ज़ेह मेह बंङज़िरी, दंङ दोबि योंहष लेहती। 3दंङ शेतान दोऊ कछंङ अंज़े दोबि कुतोह, “अगर कांह परमेश्वरो योह शुनाह ता दिह रघटेतिंङ रोटी बणेक्पिमी हुकुम रांऊ।”
4यीशुज़ि जवाब रन्दो, “पवित्र शास्त्रा रिंङ च़ेहसी तोह, ‘मीह रोटीरंङ ए माह पर दुह परमेश्वरो दोरच़ी कुहषी हर इच्च़ा बचन मनेके श्रींङे बंङज़ोतो।’”
5दंङ शेतान यीशुबि पवित्र यरूशलेम शहरंङ रेंज़ा इलि दंङ यहुदी मंदिरो पुंज़ंङ खड़े लहतो, 6दंङ दोई यीशुबि कुतोह, “अगर कांह परमेश्वरो योह शुनाह ता, केनाबि देरच़ी योंखा छङें साबित लोह; कनिंङ घाह माह लेह्पोतो छना कुचे पवित्र शास्त्रारिंङ कनु पाहठी दिह च़ेहसी तोह, ‘परमेश्वरे एनोह स्वर्गदूतातिंङ हुकुम रमोतो, कि
दोच़ी कांह सोठेके च़रपोर;
ताकि कांह कोंज़ारिंङ रघटे ठोकर लेहपि माह जूंस।’”
7यीशुज़ि दोबि कुहतो, “पवित्र शास्त्र दिह ला कुट्रा कि, मीहतिंङ एनोह प्रभु परमेश्वरो छ़ोत लेहपच़ी माह जूंस।” 8दंङ शेतान दोबि रंगी गोऊ टोईच़ी रेंज़ा शिली दंङ भत्ते संसारो राज ए टंगा-ढबाह कंङाते। 9दंङ दोरंङ साते कुहतो, “अगर केई गिह्बी फ्यग लोहन, ता गेह दि भत्ते कनिंङ रेह च़रपोग।” 10दंङ यीशुज़ि दोबि कुहते, “ए शेतान, दोखा अच्च़ा इला, छना कुचे पवित्र शास्त्रा रिंङ च़ेहसी तोह: केई प्रभु केनोह परमेश्वर बि फ्यग लोहू, दंङ दोऊ ए अराधना लोहू।” 11दंङ शेतान यीशु कछंङ ज़ि अच्च़ा इलि, दंङ स्वर्गदूतारे अंज़े दोऊ सेवा टहल लहज़ी लेहतिरे।
यीशु शिक्षाऊ शुरूआत
(मरकु 1:14-15; लूको 4:14-15; यहून्न 4:43-45)
12अपेहल यीशुज़ि दिह थशातो कि यूहन्ना बन्दी शुहचे इलज़ा, दंङ दुह यहुदिया प्रदेश केट्रा वापिस गलील प्रदेशो हखा अच्च़ा इलि। 13दंङ नासरत नगर केट्रा कफरनहूम नगरंङ बंङज़ी लेहती, अंऊ गलील झीलो मुखंङ तोहई, अंऊर जबूलून ए नप्तलिउ खानदान बंङज़ी तोईरे। 14ताकि छि यशायाह भविष्यवक्ताए कुहषी तोह दुहए पूरे शुहबी जूंस:
15“केहरे अंऊ जबूलून ए नप्तलिउ खानदानो अधिकारो इलाकांङ बंङज़ातोई यरदन बेंड़ीऊ नोसी,
गलील प्रदेश अंऊर महस ऊई जातिऊ मीहरे तोतोर।
16परमेश्वराबि माहञेंहच़ा हंञरिंङ बंङज़ा ऊईजाति तिंङ इच्च़ा मोह्ड़े छंङी तंङफोतो।
दिह छंङी दोतिंङ मुक्तिऊ अम कंबोतो अरी परमेश्वराबि माह ञेंच़ातोर दंङ हमेशाओ सिमी अमरिंङ तोतोर।”
17दुह मुक्का ज़ि यीशुज़ि प्रचार लाहज़िए दिह कुट्री शुरू लहरी, “केनातु पापो दोरच़ी सेहम किर्ज़ुंई छना कुचे स्वर्गो राज्य कछंङ पिचे अंजा।”
तुई कि चेलारे बुलाच़ी
(मरकु 1:16-20)
18गलीलो झीलो मुखंङ जोतर दोई झुह्ट न्वाकु यानि शमौनाबि अरी पतरस कहलाच़ा, दंङ दोऊ न्वा अन्द्रियासबि झीलंङ जाल केहट्री तंङाहते; छना कुचे दोरे म्हच चुमज़ारे तोईरे। 19यीशुज़ि दोतिंङ कुहतो, “गिऊ थले अतंई दंङ गिऊ चेला बणेक्तुंई, गेह केतिंङ कमोग कि मीहतिंङ छना गिऊ चेला बणाएपोंई।” 20दोच़ी दोहथल दोपहल एनोह कम ब्याड़ा लहज़ा दंङ दोऊ चेला बणेक्पिमी थल्जी दोऊ थले जोज़ि लेहतिरे।
21दोरच़ी तुंखा इलजे, यीशुज़ि झुह्ट ऊहई न्वाकु जब्दीऊ योहरे याकूब ए यूहन्ना तंङातोह। दोरे एनोह बाह रंङ साते किशतीऊ टोईच़ी बंङज़ा एनोह जाल ठीक लहच़ी लेहकी तोईरे। दोई दोतिंङ ला बुलाएती। 22दोरे दोथरे किशती ए एनोह बाहबि केहट्रा यीशु चेला बणेक्पिमी थल्जी दोऊ थले जोज़ि लेहतिरे।
यीशु टेहची तिंङ ठीक लहज़ी
(मरकु 1:35-39; लूको 4:42-44)
23यीशु भत्ते गलील प्रदेशो इलज़ा दोतु यहुदी सभा घरबारंङ शिक्षा रंड्रा, परमेश्वर ओ राज्यो पाहठी रूठे खबर प्रचार लेह, दंङ मीहतु भत्ते पाहठी बीमारी ए कमज़ोरी ठीक लोहवा लहरी। 24दंङ भत्ते सीरिया प्रदेशंङ अंऊ गलीलो उत्तर दिशाऊ हखा तोहई दोऊ जश फेलेके इलि; दंङ मीहच़ी भत्ते नत्पातिंङ अरी शताह-शताह तरीको बीमारी ए दुखंङ तोईरे ए, अतु अंद्रेग मांजी आत्मारे तोईरे, दंङ मिर्गीऊ घ्राहकातिंङ ए अधरंगो नत्पातिंङ, दोऊ कछंङ हतिरे दंङ दोई दोरे ठीक लहरी। 25गलील प्रदेशो ए दिकापुलिस इलाको, यरूशलेम शहरो, यहुदिया प्रदेश ए यरदन बेंड़ीऊ नुरेऊ भत्ते भीड़ दोऊ थल शुहचे इलि।
Zvasarudzwa nguva ino
मत्ती 4: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.