Matteyo 4
4
Esusuyo Sitan Yesu
Mk 1:12-13; Lk 4:1-13
1Attati Oloyiri ol Olibo rihoro Yesu itwa mur ette etisyahani al anya’to Sitan kemyo inyi. 2Oferu#4:2 OferuObeŋ Yesu oŋiyo nyo ottifya nya inyi awahan ono Hollum iko agolon honyi. inyi oŋitek atomwana aŋwan iko arwejin atomwana aŋwan ette inyi niama. 3Bwo fe ottu esuswani ette jaran jihonyi, Kuyya ira iye Lonyi Hollum iloito amorwoi huna heterahi aŋirya. 4Ati itarraŋ Yesu ojo, Igyoroni jo,
“Obeŋ tulo isu ta aŋirya hama, ati isu adi inyi ta nekyanita daŋ huno Hollum.”
5Attati etisyahani iyaro inyi itwa miji Yerusalem. Ititoŋok inyi Yesu ihide haji imojit eneitok, 6ette jaran, Kuyya ira iye Lonyi Hollum itakwahai ahwan hoi tene, nyo igyoroni jo,
“Ifak adi Hollum anjelohyen honyi irrirryari iye.”
Bwo fe igyoroni jo,
“Itarrauni adi isi iye ta ahas hosi jo oŋida iye ibeŋ isyak eju hoi imorwoi.”
7Attati Yesu jaran jihonyi, igyoroni bwo fe jo,
“Oŋida ibeŋ iye ikemyo Hobu hoi Hollum.”
8Iyaro etisyahani inyi ihide doŋe on ohodo’to bebe ette itahutana inyi olobyehyen daŋ hutta fau iko akwatan hosi. 9Bwo ojo jihonyi, Esyo adi ni jihoi erre huna daŋ kuyya irigoŋ iye ifau itahabuyere nani. 10Attati Yesu jaran jihonyi, Ilo addi Sitan nyo igyoroni jojo,
“Oŋida iye itahabuyo Hobu hoi Hollum bwo igyama jihonyi hama.”
11Tania obusak etisyahani inyi, teyya ofwonni anjelohyen ilwahyere inyi.
Etteryo Yesu Ettiyenio Honyi
Mk 1:14-15; Lk 4:14-15
12Itaniŋu Yesu jo ifitani Yoane libabus ette inyi leten ifau Galilea. 13Obusak inyi Nasaret ette manya Kapernaum on owon’to iger hari, lifau Sebuluna iko Nafatali. 14Jyo oŋida itasiru nekyana inya ikyanari eyani sayyo Isaya ojo,
15-16“Itoŋoi laati hutto fau Sebuluna iko Nafatali idumele
Ette isi igonyuna afaŋan on obolo’to.
Isi laati hul amanyai aŋati hari tole ono Yordano,
Bwo fe paganohyen hutto Galilea.
Afaŋ afaŋan ania many jyo hya hul itoŋoi
Jyo amaji an ara’to ihwa abali ono naye.”
17Ta asaa ania ittittoyo Yesu ette jaran, Ilyaha olobye ono Hollum.
Eloŋuna Yesu Ayafohok Aŋwan
Mk 1:16-20; Lk 5:1-11
18To obo oloŋ hadaha Yesu ilotifor hari Galilea ette inyi igonyuna illarak arrihai, Simone al anya’to Petro iko illanyi Andrea. Ibirotyai isi aboyo hosi ihari nyo arai isi ahayafohok. 19Ojo inyi jihosi, Ifwanna ihalu hoŋ, ehanak adi ni itai ahellilloŋok wati. 20Teyya teyya ette isi busana aboyo hosi ette jifaru inyi. 21Holo inyi kai alamarai ette inyi igonyuna omuk illarak arrihai, Yakobo iko illanyi Yoane lonyirok Sebedeyo. Owoni fe isi itogol iko monyosi Sebedeyo bwo ihuhumye isi aboyo hosi, ette Yesu loŋuna isi. 22Teyya obusani isi atogol iko monyosi ette jifaru Yesu.
Ettiyenio Yesu Aati Arryai
Lk 6:17-19
23Adaha inyi itwa misihi daŋ huno Galilea ittiyeniere ihasik imojiti hosi asayyo huno olobye Hollum. Itaŋida bwo fe inyi arrohojita daŋ iko eŋwati huno laati. 24Itaniŋuni laati hutto misihi daŋ huno Sirya eram honyi ette isi iyaŋuno jihonyi laati daŋ hul oŋwai’to iko eŋwati gele gele, iko omuk hul odyahai hwattek hosi. Iyaŋunie isi bwo fe hul owoni’to iko ajohin hun orrohoji’to, hul isitaji’to, iko hul ogolyori hwattek hosi. Ette inyi itaŋida isi daŋ. 25Ijifarai eluluŋ wati inyi arryai hutto Galilea iko hutto Dekapolis. Ofwonni isi bwo fe to Yerusalem, Yudea, iko hutto ŋati hari Yordano tole.
Zvasarudzwa nguva ino
Matteyo 4: LOT1969
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This text was originally published by the British and Foreign Bible Society in 1969.