Matteyo 3
3
Nettittoyo ono Yoane Batista
Mk 1:1-8; Lk 3:1-9, 15-17; Yn 1:19-28
1To oŋitek hunia ottu Yoane Batista ittittoyere laati imur Yudea ojo, 2Iloitoto atajya hatai, nyo ilyaha olobye ono Hollum attuna. 3Nyo Yoane inyi alya linya ikyanari eyani sayyo Isaya ojo,
“Iloŋo obo atulo to mur,
Ette jaran, Ihuhumana nekoi Hobu,
Itabisana ekota honyi ’tor.”
4Iyyafak Yoane aboŋo an ihuhumi to nofir konnikonni iko etodit an ara amuhunyo lihuluk honyi. Oŋiyo bwo fe inyi nebeyo iko nesyo huttotwa mur. 5Adahatye laati daŋ hutto miji Yerusalem iko hulo Yudea jihonyi. Ofwonni bwo fe laati hutto misihi daŋ hun onyihai’to Yordano jihonyi. 6Ibatisyo inyi ihari Yordano laati hul iruhi eyyata hosi.
7Ofwonni laati arryai hulo Farisei iko hulo Saducehyen jihonyi ifwotuniere batisimo ette inyi jaran jihosi jo, Irata tai ihwa amunok, ?ŋai ojo jihatai ofuhoti ajore ono hottu’to? 8Oŋida ehanita hatai itahutani jo iloitoto tai ahode atajya hatai. 9Hejatta ta ahwattek hatai jo, Ara Abramo hohonyi hohoi, nyo eramak ni itai jo, oremik Hollum ’yeuna lonyirok Abramo jyo amorwoi huna. 10Ihwania ihanani atolu ihadde ’yanio. Oyefuni adi ayyanio daŋ hun obeŋi’to oŋijuni aŋer hun oyiji ette rwoŋonia lihima.
11Ebatisyo ni itai ahode ta aari nyo iloitoto tai atajya hatai. Ati lya al ottu’to lihalu hoŋ ogol inyi agalik ani, tania abeŋ ni asiru eyaro amuha honyi. Ibatisyo adi inyi itai ta Oloyiri ol Olibo iko ta neema. 12Owon ajani lihani honyi italiboryere ema honyi ette fyehina limugu honyi, ati oswahini adi acono lihima an obeŋ’to oremik dunyari.
Batisimo ono Yesu
Mk 1:9-11; Lk 3:21-22
13Tania ottu Yesu to Galilea ette leten jyo Yoane ol owon’to lihari Yordano jo oŋida Yoane ibatis inyi. 14Ati iha Yoane ette jaran, Oŋida dwo iye ibatis ani, ?ati ittu iye jihoŋ nyo? 15Ette Yesu itarraŋ jihonyi ojo, Ihanie so, nyo osiru jihohoi ihaniere efahita daŋ huno Hollum. Ette inyi ihanio. 16Odyoto Yesu kwak ’totwa hari al ifwotu inyi batisimo, ette edou bwanya jihonyi bwo fe igonyu inyi Oloyiri olo Hollum isuru t’edou ihwa awolo ette wotya ihide hou honyi. 17Ette nekyana ’tuna t’edou on ojo, “Lonyi hoŋ olo, al amuno ni bebe.”
Zvasarudzwa nguva ino
Matteyo 3: LOT1969
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This text was originally published by the British and Foreign Bible Society in 1969.