Ioane 12
12
Iesu Betania voa
(Mataio 26:6–13; Mareko 14:3–9)
1Sare six hohoi eaeiape Foapaita Sosoka ve omopa voa; lea soa Iesu Betania voa forerōpe, Lasaro ve oti reha, opi Iesu sa lei itoipe lea vita. 2Meafautu soa ere larietau are vei pisosi, Mareta ta larietau omopa posasea, aea are ita fareho larietau posa voa makea avōpe karu farakeka aea Lasaro reha. 3Lea mea Maria opa‐mavo muramura muforoe lareva kofa ovi, tava rovaea etau, areve pasou usoso kilo hafa feare, aea Iesu ve mora oraka la veveti, areve mora la areve tui sa roroapōpe. Lea uvi lea muramura muforoe sa soōpe.#Luk 7:37–38
4A—, areve satiriaraita karu farakeka aea, Iudasi Isakariota, kivaia lei arero paeai vei miarai vita, mō ōpe, 5Lea muramura muforoe tava silva moni korukoru 300 vei itaea lei miōri, aea areve tava merava karu la aiorai auke loita ipi levea? 6Are o lōri moipe, ipi are merava karu la maeaforoe leipe lea vei kao, a—, ipi are torea vita. Are moni oroa la kiva lei, aea vovoisaiape moni la are parukovi elore vei maravaiape. 7A—, Iesu mō ōpe, Are eapo eaea! Arave viopai sare vei leiti mai are sa everori lei kekese loita meha. 8Merava karu e ita farehoria pepea vovea, a—, ara e ita farehoria soa foromai levi peava roi.#Deut 15:11
9Soka Iuda karu sitavu rovaea are lōvoa peiape fari la mapi, ere eavai vei kotipe, Iesu haria vei kao, a—, Lasaro, opi arero lei itoipe lea vita vei ta reha. 10Lōfeare vei maso harofave karu ere Lasaro ta paeai vei haiiri seseōvaiape; 11ipi Iuda karu rauapo are vei Iesu tai foreri arero sukaereraiape eavia.
Iesu Ierusalema voa pataipe
(Mataio 21:1–11; Mareko 11:1–11; Luka 19:29–44)
12Lea ve aite sare voa sosoka vei kokorukōpe karu sitavu rovaea, Iesu Ierusalema voa pataipe fari la mapōpe. 13Mapi ere la tolo maravi, arero sukaeai vei maria voa foreri i mō isa moiape,
Hosana! Papuvita ve rare ita kotipeta mea vita lareva ita meava!
Israela ve king meha!#Sal 118:25–26
14Iesu asini mere la sukaea, arero forea avōpe; usoso Safu Buka voa uka siseita o feare.
15Siona ve mori e, tore levi leitia.
Ofae eavaia, ave King
asini mere voa forea la kotipea!#Seka 9:9
16Areve satiriaraita karu lea soa voa lea o ve eite ore kao; a—, Iesu la sosorusosoru leipe lea mea, lea o are vei evera ukōpe aea ere arero lōri leipe etau ita la haikaea ore leipe reha.
17Iesu Lasaro la isa sofa oti kiripi maria voa foreri, aea arero opai voa lei itoipe lea mea, karu sitavu are ita fareho pepeiape aea ere sa lea fari la fafarapaiape. 18Lea vei karu sitavu areve omopa voa forerōpe ipi kofa reha, ipi ere are lea siahu ve peise la leipe fari la mapōpe eavia. 19Soka Farisea karu o elore elore mō ōpe, Ofae eavaia, ereita arero ovi aieraita usoso kao; mearovaeka foromai arero aitetei vovo la roroa.
Ierusalema voa
20Sosoka soa voa maso toai vei foreri roroaiape karu voa, karu hea Helene karu. 21Ere Filipi, Galilea soa ve Betesaida karikara karu tai koti, arero lalasi lei mō ōpe, Papuvita e, ela Iesu la ofae eavai vei haikaeai. 22Filipi are Anderea tai koti o mei, aea Anderea auka Filipi ita koti Iesu la omoipe reha.
23Iesu tava o ereukaro mō ōpe, Karu ve Atute la lei sosorusosoru leita ora foreraita meha. 24Okofa ara eukaro o la moi, Uiti ve mere mea iri voa oei opai auke leitita, a—, are eite auke lei lōri eaeava roi; a—, are opaita, a—, are fare rauapo tai roi. 25Areve makuri la haikakare leita lea karu, arero lei veverapai roi; a—, areve makuri la mea mearovaeka voa kaifa leita lea karu, arero ovi pepe lōri peava roi.#Mat 10:39; 16:25; Mak 8:35; Luk 9:24; 17:33 26Karu aea arave tivi karu leitita, a—, are araro aitetaia, aea ara peita lea oti voa, arave tivi karu ta peava roi. Karu aea arave tivi la leitita, a—, arave Oa sa arero maeati roi.
27Faitora arave haiiri eae loita meha. Ara o lea’ moi roi? Mōfeare ei? Oa e, araro mea ora voa fareovaia; lōfeare ei? Kasirau, ara foreri meita ipi kofa mea ora veia. 28Oa e, ave rare la lei sosorusosoru leitia. Lea mea i kauri voa mō isa moipe, Ara arero lei sosorusosoru leipe, aea ara arero lei sosorusosoru ata leiti roi. 29Soka lōvoa pepeiape karu sitavu lea la mapi mō ōpe, Huhururu la auai. Karu hea mō ōpe, Aneru arero o moita reha. 30Iesu tava o mō ōpe, Lea i ara vei isa moia kao, a—, e vei. 31Mea mearovaeka la seseōvaita soa kofa meha; faitora mea mearovaeka ve papuvita la sukavutea maria voa mutapai roi. 32A—, arao, araro mearovaeka arori voa moravaita lea mea, ara karu foromai araro tai aruovai roi. 33Are lea o la moipe arero paea opai ve mai la muiai vei.
34Soka karu sitavu tava o arero mō ōpe, Ela Mose ve Safu voa mōri o ta mapi ore ia, Keriso pepe lōri peava roi. Ipi levea a o mō auai, Karu ve Atute arori voa moravai roi? Mea Karu ve Atute are leisa?#Sal 110:4; Isa 9:7; Esek 37:25; Dan 7:14 35Iesu erero mō ōpe, Ovava e voa soa taheka aeata la eaea. Ovava lei eaeita lea soa voa e mora sa teraia, murumuru sa ero ovi aierai ave. Murumuru voa mora teraita lea karu, are teraipeta lea oti ore kao. 36E ovava ovaita lea mea, ovava la sukaerereaia, e ovava ve atutemori lōri leiti vei.
Iesu lea o mei are erero kiripi, ere soa harua arero ofae eavai kasirau. 37Are siahu ve peise rauapo ereve soso voa leiape, a—, ere sukaerereai kasirau. 38Lea vei Isaia peroveta vita ve lea o la lei okofa leipe; mōfeare,
Papuvita e, elave fari la leisa sukaerereai?
Aea Papuvita sa areve mai pisiri lei leiro muiai?#Isa 53:1
39Lōfeare vei ere sukaerereai kao; ipi Isaia o aeata mō ōpe,
40Are ereve ofae la lei kuku lei,
ereve haiiri ta lei kere lei la roroa,
ere ereve ofae sa eovi,
ereve haiiri sa ore leiti ave,
ere haiiri kerori,
ara ereve eka la lei lareva leiti vei.#Isa 6:10
41Isaia o lōri moipe ipi are Iesu ve sosorusosoru la ofae eovi, are vei laua sukavōpe eavia.
42Karikara lohio karu rauapo arero sukaerereōpe, a—, ere Farisea karu la tore, ere lea vei o pisiri moi kasirau, erero sunako voa sukavutea ere maria karu leiti ave. 43Ipi ere karu sa arita marase o la haikaeai rovaea, Ualare sa maeatita lea la ere haikaeai kofa kao.
44Soka Iesu i mō isa moipe, Araro sukaerereaita lea karu araro haria la sukaerereaia kao, a—, araro itapōpe lea Ualare ta sukaerereaita reha. 45Aea araro ofae eavaita lea karu, araro itapōpe Ualare ta ofae eavaita reha. 46Ara ovava feare mearovaeka voa foreri la mea, ipi araro sukaerereaita karu murumuru voa levi pavai vei. 47Karu aea arave o la mapi, kakeva auke leitita, a—, ara seseōvi tava arero miarai kao; ipi ara mearovaeka la seseōvi tava miarai vei koti kao, a—, mearovaeka la fareōvi makuri leiti vei. 48Araro sukavutea aea arave o la haisukafori mapai auke leita lea karu, arero seseōvi tava miaraita soa ia; ara sa omoita lea o arero seseōvi tava miarai roi soa sarapaita sare voa. 49Ipi ara arave elore siahu sa o moi sore, a—, ara o lekōru la moi vei aea leafeare moi vei, araro itapōpe Oa sa araro satiriarōpe. 50Aea ara ore are sa moita safu o peita makuri reha. Lea vei usoso Oa sa araro satiriaraita lea o feare ara ta lōri moi vovea.
Zvasarudzwa nguva ino
Ioane 12: TQO1983
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Papua New Guinea in 1983.