Ioane 11
11
Iesu Lasaro la opai voa moravōpe
1Soka heavita aea rare Lasaro eka leipe; are Betania karu, Maria areve moriapo Mareta ita ve karikara reha.#Luk 10:38–39 2Lea Maria are Papuvita la muramura muforoe sa veveti, areve mora la areve tui sa roroapōpe ua reha. Areve milaroa Lasaro eka leipe.#Ion 12:3 3Soka lea uarosu oraka karu la Iesu tai itapi mō ōpe, Papuvita e, mapaia; a haikakare leita lea vita eka lei la eaea. 4A—, Iesu lea la mapi mō ōpe, Lea eka opai etau kao, a—, ipi Ualare ve fari la moravai vei, Ualare ve Atute ve fari la lōfeare lei rovaea leiti vei.
5Soka Iesu are Mareta aea areve morōvu aea Lasaro ita la haikakare lei vovo meiape. 6A—, are lea eka leipe fari la mapi are are sa peiape lea oti voa sare orakoria lōvoa ata pavōpe. 7Lea ve aite voa are areve satiriaraita karu la mō ōpe, Ereita Iudea voa ata patei isai vei. 8Satiriaraita karu arero mō ōpe, Rabai e, Iuda karu aro fave sa toa paeai vei leivota, a faitora lōvoa ata isai roi ei? 9Iesu tava o mō ōpe, Sare farakeka voa ovava ora twelve kao ei? Karu sare soa voa mora sa teraita, a—, are putei safosafoai sore, ipi are mea mearovaeka ve ovava la ofae eavaitore. 10A—, are faita soa voa mora teraita, a—, are putei safosafoa vovea, ipi are ovava voa mei auke eavia.
11Are o lōri moipe, aea aite voa are erero ta mō ōpe, Ereitave moratai Lasaro ivutu iavi la eaea; a—, ara isei arero sukitapai vei. 12Lō mei, satiriaraita karu arero mō ōpe, Papuvita e, are ivutu eaei oria, a—, are rofo ata leiti roi. 13Iesu Lasaro ve opai la laua sukavōpe, a—, ereve haiiri areve laua ve eite are ivutu iavi haiorai vei. 14Soka lea vei Iesu erero o pisiri mō ōpe, Lasaro opaita. 15Ara lōvoa pei auke leitia lea vei ara hailareva ia e vei, ipi ero lei sukaerereai vei. Soka ereita arero tai isai vei. 16Lea mea Tomasi, Popōta la aravōpe lea vita, areve maeapavora satiriaraita karu la mō ōpe, Ereita ta maea lei, are ita isei are ita farehoria opai vei.
17Soka Iesu sa forerōpe lea mea are mapōpe Lasaro la sofa oti voa viopi eaeiape sare orakaraka leipe. 18Betania karikara Ierusalema hōiri eaeiape, maili orakoria feare; 19lea vei Iuda karu rauapo Mareta auka Maria ita tai foreri, ereukaro ereukave milaroa vei maeaforoe lei kokoruka roroaiape.
20Mareta are Iesu sa koti o la mapi, are kei arero sukaeōpe; a—, Maria uvi voa aiseseiape. 21Soka Mareta Iesu la mō ōpe, Papuvita e, a mōvoa pei oria, a—, arave milaroa levi opai lare; 22a—, ara ore a faitora ta Ualare la loki leita lea etau foromai Ualare aro miarai roi. 23Iesu mō ōpe, Ave miloroa ata itoi roi. 24Mareta arero mō ōpe, Ara ore soa sarapaita sare opi itoita soa voa, are ata itoi roi. 25Iesu arero mō ōpe, Lea opi itoita, aeata makuri eite ara meha; araro sukaerereaita lea karu, are ta opi, makuri leiti roi. 26Aea makuri pea araro sukaerereaita lea karu levi opai roi, makuri lei peava roi. A lea o la sukaerereai ei? 27Are arero mō ōpe, Papuvita e, a; arave sukaerereaita haiiri meha a Keriso, Ualare ve Atute, mearovaeka voa koti o oita lea Vita. 28Are lea o mei roroka lei, are isei areve morōvu Maria la isa murufa mō ōpe, Satiriaraita Papuvita foreri laipea; are aro i la isaipea.
29Lea o la mapi Maria utohoa itei, Iesu tai kavōpe. 30Soka lea soa voa Iesu karikara oropai kao, a—, are Mareta sa arero sukaeōpe lea oti voa peiape. 31Lea vei Maria ita fareho uvi voa pepea arero maeaforoe leiape Iuda karu, ere Maria sa utohoa itei maria voa kavōpe la ofae eavōpe lea mea, ere arero aitetaipe, ipi ereve haiiri are sofa oti voa kei fi ari vei.
32A—, Maria Iesu sa peiape lea oti voa foreri, arero eovi, are areve mora ipi voa sukakoka hiopi, arero mō ōpe, Papuvita e, a mōvoa pei oria, a—, arave milaroa levi opai lare. 33Soka Iesu are arero ovororo sisapaiape, aea are ita farehoria kotipe lea Iuda karu ta ere fi ape la eovi, are haiiri fi a’ haiiri ta eae foromai leipe. 34Soka are mō ōpe, E arero leavoa viopaita? Ere arero mō ōpe, Papuvita e, koti ofae eavaia. 35Iesu ovororo sisapi fi ōpe. 36Lōfeare vei Iuda karu o mō moipe, Ofae eavaia, are arero haikakare rovaea kofa. 37A—, karu hea mō ōpe, Mea vita, ofae kuku karu ve ofae la lei ovava leitita vita, are siahu kao ei, areve moraitai la lei levi opai vei?
38Soka Iesu areve haiiri voa ata fi a’, sofa oti voa terōpe. Lea sofa oti eite faveuta aea fave koru rovaea utape la sasauka eaeiape. 39Iesu mō ōpe, Fave aroruka fapaia. Mareta, lea opōpe vita ve uaroa, arero mō ōpe, Papuvita e, are faitora mu ia, ipi are sare orakaraka opi eaea. 40Iesu arero mō ōpe, Ara aro omoi kao ei, a sukaerereai oria, a—, a Ualare ve sosorusosoru la ofae eavai roi? 41Soka ere fave la aroruka fapōpe reha. Iesu areve ofae moravi misilei mō ōpe, Oa e, ara aro maeati ipi a araro mapa vovea. 42Ara ore kofa a araro mapa vovea; etau farakeka ipi mea eakoa toepi soi pepeipeta karu rauapo vei ara o lōfeare moi, araro a sa itapōpe lea la ere sukaerereai vei. 43O lōri mei roroka lei, are i rovaea mō isa moipe, Lasaro e, maria voa foreraia. 44Lea mea lea opōpe vita, areve mai oraka ita mora oraka ita puta tero sa elarukea fasi, aea soso ta muko sa fasi, maria voa lōri forerōpe. Iesu erero mō ōpe, Areve puta feferopea felaukeaia.
45Lea mea Maria ita koti aea Iesu sa leipe etau la ofae eavōpe lea Iuda karu rauapo arero sukaerereōpe reha. 46A—, karu hea Farisea karu tai te Iesu sa leipe lea etau erero omoipe.
Harofave karu Iesu la paeai vei haikaeōpe
(Mataio 26:1–5; Mareko 14:1–2; Luka 22:1–2)
47Soka maso harofave karu aea Farisea karu ere kaunsila karu kokoruka mō ōpe, Ereita lekōru la leiti vei, ipi mea vita siahu ve peise rauapo la lei vovea. 48Ereita arero etau leiti auke ita kiripaita, a—, karu foromai arero sukaerereai roi; lea mea Roma karu koti roi, ereitave Maso Oti aea ereitave toruipi karu ita la fareovai roi. 49A—, ereve karu farakeka aea rare Kaiafasi, lea sisoro voa maso harofave vita leipe, are erero mō ōpe, E etau farakeka aeata ore kao; 50e haiiri ta seseōvaia kao, karu farakeka karikara karu vei opaita, a—, ero lei lareva leita mai reha; a—, toruipi karu foromai la saroroapaita, a—, lōfeare leita mai maealolo. 51Are lea o are haria sa seseōvi omoi kao, a—, are lea sisoro ve maso harofave vita leipe lea vei are peroveta karu feare o moipe, ipi Iesu Iuda toruipi vei opai roi. 52A—, lea toruipi vei haria kasirau, a—, ipi Ualare ve toa fafarapaita lea atutemori la lei kokoruka firu farakeka leiti vei. 53Soka soa lea sare voa, ere arero paeai otiharo la eliape.
54Lōfeare vei Iesu Iuda karu ve aru voa pisirikao mei kasirau; a—, are lōvoa kiripi, furuka merava ve haekao mea voa kei, karikara aea voa, rare Efraimi, are areve satiriaraita karu ita lōvoa pepeiape.
55Soka Iuda karu ve Foapaita Sosoka haekao leipe; aea karikara haroharo ve karu sitavu sitavu Foapaita Sosoka soa ve omopa voa Ierusalema voa everori papatavōpe, ereve maea la maso sa lei ovava leiti vei. 56Papatavi ere Iesu la eli, Maso Uvi voa soi popōvi elore elore o mō ōpe, Eve haiiri leafeare? Are Foapaita Sosoka levi forerai roi ei? 57Maso harofave karu aea Farisea karu ita o haisa moipe, karu aea Iesu sa pavaita oti la ore leitita, a—, are erero omoi vei, ere arero sukaforai vei.
Zvasarudzwa nguva ino
Ioane 11: TQO1983
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Papua New Guinea in 1983.