Yoane 8
8
Mangye wa bɨ Kónɨ́ Afɔn Achwurɨ ə
[1Ŋwɔn tsum a tíʼ nkwɛ́n ngɛ́n a ndá zɨ, lá Yeso a kɔ́ʼ ngɛn atú ntáʼ Olif ə. 2A tənjwi a nye njwi za ɨ zɔ́ŋtɨ́nɨ́, Yeso a bə́n nɨ ndzum ngɛn a Ndáŋwi zɨ Ngwi ə. Ɨbɛn bɨtsum yén wəmbo, ɨ shiʼtɨ ntsi nkarɨsɨ ayi, a shiʼtɨ ntsi a ɨshe ntiʼ mbiʼnɨ ndǐʼ bo ghe. 3Bɨdiʼ bɨ Nyɔngɔŋ bo bɨ bə Farisao tíntɨ́ a mangye ngyen nɨ wɛrə wa bɨ kónɨ́ afɔn achwurɨ, ntɛgɨ ayi a ɨshi bo bɨtsum ə. 4Bo sóŋ a mbó Yeso ngə́, “Ndiʼ Aŋwaʼnɨ, bɨ chwá a mangye nɨzɔ́ʼ wen nɨ ɨshe a mbó afɔn achwurɨ ə. 5A mu Nyɔngɔŋ ɨwɨgɨnə Mǒse a sóŋ ngə́ bɨ tsi nɨ ɨ zagɨ tumtɨ abə́ŋ a mangye tso zen ɨ zhwitə. Adzaŋ za a tsinɨ lá, o soŋ azo ngə́ ke le?” 6Bo sóŋ a məzen lá a mbentɨ Yeso, taŋ ɨ tiʼ kaŋ ayi ɛ. Lá Yeso a kfúʼnɨ́ ɨ ŋwaʼnɨ nɨ shwi abó ɨyi a tɨshe. 7Adzaŋ za bo tɛ́mnɨ́ ɨwu mbítə́ ayi nɨ ɨbítɨ lá, Yeso a bíʼ ayi atɨ́ ɨ soŋ a mbó bo ngə́, “Ŋwɔn nɨ bən wa a láʼnə mbvurɨ ɨbvu tɨ ghɨ, á fom ntsambyi ntum a mangye wen nɨ ngɔʼ ə.” 8Yeso a bə́ nkwiʼ nkfúʼnɨ́ ɨ ŋwaʼnɨ nɨ shwi abó ɨyi a tɨshe. 9Mbáʼ bo zúʼnɨ́ a məzen lá, bo shɛ́mnɨ́, ɨ mɔ́ʼɔ́ mɔ́ʼɔ́, mbiʼnɨ a nye ndəmə a tɨtərɨ bo bɨtsum ə. Yeso a tíʼ ngɔ́ŋ adiʼ wa zɨzɨ nɨ mangye wa a tɛm wə mbyi ɛ. 10Yeso a bíʼtɨ́ ayi, mbitɨ wəmbo ngə́, “Mangye, bo me? Njingə tsɛʼ táʼ ŋwɔn a se tsi ɨghan a sóŋə́ ngə́ o vwo ɨsáʼ le?”
11Mangye wa a chwɨ́gɨ́ ngə́, “Kə́ tsɛʼ táʼ ghe, a Tə̧.”
Yeso a sóŋ wəmbo ngə́, “Tsɛʼ me, ma sa kɨ soŋ ngə́ o vwo ɨsáʼ ə; ghɛn agho, nkoʼ ɨbvu kwiʼ ngɨə.”]#8:11 Ɨŋwaʼnɨ tsɨ lvuŋ tsɨ ghaʼnɨ abɔʼnɨ ɨŋwaʼnɨ tsa bɨ fómnɨ́ ntsa mbyi mbənkɨ se nɨ akum a nɨgham zen chyɛ (8:1-11); tsə mɔʼɔ tsi nɨ nɛrə mbáʼ o tsanə Yoa 21:24; tsə mɔʼɔ tsi nɨ nɛrə mbáʼ o tsanə Alu 21:38; táʼ a tsi nɨ nɛrə mbáʼ o tsanə a Yoa 7:36.
Yeso a nɨ Nkaʼ wu Atuəshe
12Yeso a bə́ nkwiʼ ngám a mbó bə Farisao ngə́, “Ma nɨ nkaʼ wu atuəshe ə. Ŋwɔn tsum wa a zɔŋnɨ aghan, a mɨ tsi nɨ nkaʼ ntsi ntən, ɨ láʼ keʼ a mu ndzumnɨ yiŋə.”
13Bə Farisao sóŋ wəmbo ngə́, “O nɨ atɛmə-ndzě a mbó atuəmbəm azo gho mboŋ ə; anu za o sóŋnə́ lá ka a tsi ayi nɨ ɨlɨŋ tse ghe.”
14Yeso a chwɨ́gɨ́ ngə́, “Ngáŋ, be a kwɛ mbe ngə́ ma nɨ atɛmə-ndzě a mbó atuəmbəm azan, muŋ anu za ma sóŋnə́ a nɨ nkənu, mbɨ́ʼ ngə́ ma zhi adiʼ za ma lonɨ ɨwu nkɨ nji a za ma ghɛnə ɨwu ə. Ka nɨ zhi awən adiʼ za ma lonɨ ɨwu kə za ma ghɛnə ɨwu ə. 15Nɨ sǎʼ ɨbɛn ndzɔ̌ŋ adzaŋ za ŋwɔn mɨsɔŋ a ntsu a sáʼnə́ ghe; ka ma soŋə aghan ngə́ ŋwɔn tsɛrə a vwo ɨsáʼ ə. 16Lá be ma kwɛ nkɨ sáʼ ɨ sáʼnɨ, ma sáʼ nɨ nkənu, mbɨ́ʼ ngə́ ka ma sáʼ aghan me me; a sáʼ bɨgɨ Tarɨ, zɨ wa a tságɨ́nɨ́ aghə. 17Bɨ ŋwaʼnɨ a mu Nyɔngɔŋ ɨwən ngə́ be bətɛmə-ndzě be bi bɨbá, lá be ngə́ anu za bo sóŋnə́ a nɨ nkənu ə. 18Ma nɨ atɛmə-ndzě a nkfu me, Tarɨ, zɨ wa a tságɨ́nɨ́ aghan a kɨ mbe atɛmə-ndzě ɨghə.”
19Bo bítɨ́ ayi ngə́, “Ta ɨgho a mé le?”
Yeso a chwɨ́gɨ́ ngə́, “Ka nɨ zhi awən aghan, nkeʼ a Ta ɨghan kɨ njiɛ. Nɨ be zhi aghan, muŋ nɨ kɨ nji a Ta ɨghə.”
20Yeso a ghám mɨgham məmen lá a nkfu za a kɨ́nə́ ndǐʼ ɨbɛn a mu Ndáŋwi zɨ Ngwi, ntɛm a mbyɛn kwasɨ ndá wa a bénɨ́ nɨlɛnɨ nɨ nkáb lá. Lá ŋwɔn tsɛrə a sé ayi chwa, mbɨ́ʼ ngə́ nkfu wɛrə ɨ bvúrɨ́nə tɨ kuʼə.
Nɨ Chi keʼ Ghɛn Adiʼ wa Ma Ghɛnə ghe
21Yeso a kwíʼ nkwátɨ́ ɨ soŋ a mbó bo ngə́, “Ma mɨ ghɛn aghə, nɨ mɨ lɔn aghə, lá ɨ kfo mbɨ́ʼ ngə́ nɨ ghěn nɨ mbyi a ngɨ ɨbvu ə. Adiʼ za ma ghɛnə, nɨ chi keʼ ɨwu yiŋə.”
22Ma lan, bɨsáʼ bɨ ɨlaʼ bɨ bə Yuda tíʼ mbítɨ́ a tɨtərɨ bo nɨbo ngə́, “A mɨ zhwitɨ atuəmbəm azhi, mbáʼ a soŋnɨ ngə́, ‹Adiʼ za ma ghɛnə nɨ chi keʼ ɨwu yen lá le›?”
23Yeso a chwɨ́gɨ́ a mbó bo ngə́, “Nɨ nɨ ɨbɛn bɨ atuəshe a ntɨ́ŋ ɨghə, lá ma lo be atɨ́ ə. Nɨ lo atuəshe wiŋ ə, lá ka ma lo aghan lá atuəshe wiŋ ə. 24Nə nɨ anu za a ghɨ́nɨ́ ma soŋ a mbó bən ngə́ nɨ mɨ kfo a mu mɨbvu ɨmən lá. Nɨ mɨ kfokɨ a mu mɨbvu ɨmən mbáʼ be nɨ tú nɨŋ mɨntəm ɨmən ɨwu ngə́, ‹Ma nɨ Wɛrə wa ma nɨ Wɛrə ghe›.”
25Bo bítɨ́ ayi ngə́, “O lá ɨwa le?”
Yeso a chwɨ́gɨ́ ngə́, “Tsɛʼ za ma soŋnə a mbó bən nchwuʼnɨ a mbiʼnə#8:25 Tsɛʼ za ma soŋnə a mbó bən nchwuʼnɨ a mbiʼnə lá; kə Ma lánə́ ngámə́ a mbó bən lá mbɨ́ʼ ake le? lá. 26Ma tsi nɨ ɨnu tsɨ ghaʼtɨ a sóŋə́ mbɨ́ʼ awɨŋ ə, abɔʼnɨ tsɨ ghaʼnɨ a sáʼ bən ɨ soŋ ngə́ nɨ vwo ɨsáʼ ə. Lá wɛrə wa a tságɨ́nɨ́ aghan, a sóŋə́ tsɛʼ nkənu, ma tiʼə nkə́ sóŋə́ tsɛʼ za ma zuʼnɨ wəmbo a mbó mbyi tsum ə.”
27Bo sé zuʼ nkɨ nji ngə́ a kə́ ngamə a mbó bo lá mbɨ́ʼ a Tarɨ ə. 28Ma lan, Yeso a tíʼ sóŋ a mbó bo ngə́, “Nkfu za nɨ ghɨnɨ kɔ́ʼsɨ́ a Mɔn Ŋwɔn atɨ́, nɨ mɨ zhi ngə́ ‹Ma nɨ Wɛrə wa ma nɨ Wɛrə›; ɨ kɨ zhi ngə́ ka ma ngɨə aghan anu zə tsɛrə nɨ ɨmə mɨtən, lá ɨ sóŋə́ tsɛʼ za Tarɨ a tɨ́gɨ́tɨ́nɨ́ aghan a ngamə ghe. 29A nkwiʼtə, zɨ wa a tságɨ́nɨ́ aghan a tsi bɨgɨ zɨə; a se aghan me me nyɛʼtɨ, mbɨ́ʼ ngə́, nkfu tsum ma ghɨə a za a bɔŋnə a wɛrə ghe.”
30Bə ghaʼnɨ ba bɨ zúʼnɨ́ a soŋ ɨnu tsiŋ nɨ́ŋ mɨntəm ɨma wə ɨnye ə.
Nkənu ghɨ Kyɛtɨ Mɨnkɨ mɨ Abuʼ a Ɨnye Bɨŋ ə
31Ma lan, Yeso a tíʼ soŋ a mbó ba bɨ nɨ́ŋnɨ́ mɨntəm ɨma a nye zɨ lá ngə́, “Be nɨ ngěn nɨ mbyi ndzúʼnɨ́ ɨnu tsa ma diʼnə, muŋ, tsɛʼ a nkənu nɨ lá bɨyɛʼ ɨbə. 32Nɨ ghɨ zhi nkənu, á nkənu tiʼ nkɨ nkyɛtɨ mɨnkɨ mɨ abuʼ a ɨnye bɨŋ ə.”
33Bo chwɨ́gɨ́ wəmbo ngə́, “Bɨgɨ nɨ ɨbɛn bɨ ɨlə̌ Abraʼm, a nkwiʼtə, bɨgɨ láʼnə nkeʼ ɨbuʼ a mbó ŋwɔn tsɛrə be. A tiʼ ntsa lá ɨ nə́ o soŋ ngə́ bɨ ghɨ kyɛtɨ mɨnkɨ mɨ abuʼ a ɨnye bɨgɨ le?”
34Yeso a sóŋ a mbó bo ngə́, “Tsɛʼ a nkənu, ma soŋə awɨŋ ə, ŋwɔn tsum wa a ghɨnɨ ɨbvu, a nɨ abuʼ a mbó ɨbvu ə. 35Ka abuʼ a be ayi ŋwɔn ngwəgɨ nɨnkoŋ ə, lá mɔn a nɨ ŋwɔn ngwəgɨ nɨnkoŋ ə. 36Be a be ngə́ Mɔn Mbáŋnɨ́ wa a kyɛtɨ mɨnkɨ mɨ abuʼ a ɨnye gho, o ghɨ tsí nɨ atú azo, tsɛʼ a nkənu ə. 37Ma zhi ngə́ nɨ nɨ ɨbɛn bɨ ɨlə̌ Abraʼm ə. Lá nɨ bvurə ndǒ njwitɨ me, mbɨ́ʼ ngə́ anu za ma diʼnə chi keʼ zɛn adiʼ a mu mɨntəm ɨmɨŋ ə. 38Ma ghamə mbɨ́ʼ anu za ma zɛnɨ a lo a mbó Ta ɨghan, lá nɨ ghɨnə a za Ta ɨwən a soŋnɨ a mbó bɨŋ ə.”
39Bo chwɨ́gɨ́ ayi ngə́, “Ta ɨwɨgɨ a nɨ Abraʼm ə.”
Yeso a chwɨ́gɨ́ awa ngə́, “Nɨ be be lá ngótɨ́ ɨbɔ bɨ Abraʼm muŋ nɨ ghɨ̌ ɨnu tsa Abraʼm a ghɨ́nə́. 40Atsum za ma láʼnə ngɨ́ a nɨ ɨ soŋ nkənu za ma zúʼnɨ́ a mbó Ŋwi, lá nɨ bvurə njwə́ŋtə́ a njwítɨ́ me ghe. Abraʼm a sé anu tso məzen ghɨə! 41Nɨ ghɨ̌ ɨnu tsa ta ɨwən a ghɨ́nə́.”
Bo sóŋ wəmbo ngə́, “Ŋwi zɨmboŋ a nɨ Tarɨ wa a nunɨ zɨzɨ wa bɨgɨ tsinɨ nɨ wɛrə, bɨgɨ kɨ mbe ngótɨ́ ɨbɔ ɨbyi ɛ.”
42Yeso a sóŋ a mbó bo ngə́, “A be be ngə́ Ŋwi a lanɨ mbe Ta ɨwən, muŋ nɨ kɔŋ aghan, mbɨ́ʼ ngə́ ma ló a mbó Ŋwi, tɨtsɔŋnɨ ma tsi ɨghə. Ma sá yen lá nɨ mɨtən ɨmə, lá wɛrə a tságɨ́ aghə. 43Nɨ se ndzúʼə nkə́ njiɛ anu za ma sóŋnə́ lá ngə́ ke le? A be lá ngə́ nɨ chi keʼ wɛmtɨ mɨntəm ɨmən ndzuʼ nkən ɨghə. 44Nɨ nɨ ɨbɔ bɨ ta ɨwɨŋ Dəbɨrɨ, nɨ kə́ ndǒ ndzɔŋ ɨnu tsa ta ɨwən a lɔnə ghe. A bé ngwarɨ ŋwɔn ɨ lɔgɨnɨ a mbiʼnə, a láʼnə nkeʼ nɨ anu zə tse a ngɨə nɨ nkənu tsi, mbɨ́ʼ ngə́ ka nkənu zɨ tsɛrə ɨ tsi ayi wə ɨnye. A chwe ɨnu lá, a ghamnə lá nɨgham na nɨ tsinɨ a mu mbɔm ɨzhi, mbɨ́ʼ ngə́ a nɨ ŋwɔn ɨchwenu nkɨ mbe ta bɨ ɨchwenu ə. 45Lá, mbɨ́ʼ ngə́ ma sǒŋ nkənu, ka nɨ nɨŋ awən mɨntəm ɨmən a nye me ghe. 46Ɨwa ŋwɔn nɨ bən a chi kaŋ aghan ngə́ ma ghɨ ɨbvu le? Be ma soŋ nkənu, nɨ tiʼ nkeʼ mɨntəm ɨmən a nye me nɨŋ lá ngə́ ke le? 47Ŋwɔn wa a lonɨ a mbó Ŋwi a zǔʼ mɨgham mɨ Ŋwi ə. Lá bən, ka nɨ lo awən a mbó Ŋwi, nə nɨ anu za a ghɨnɨ nɨ keʼ a ndzúʼə lá.”
Yeso bo Abraʼm ə
48Bə Yuda bítɨ́ a mbó Yeso ngə́, “A se kuʼnɨ a mbó bɨgɨ a sóŋə́ ngə́ o nɨ ŋwɔn bə Samaria nkɨ ntsi nɨ dzɨŋ a mu ɨnye gho le?”
49Yeso a chwɨ́gɨ́ ngə́, “Ka ma tsi aghan nɨ dzɨŋ ə. Ma kɔ́ʼsə́ a Ta ɨghan atɨ́, nɨ baŋnə ntságə́ aghə. 50Ka ma ndǒ aghan nkɔʼsə atɨ́ a mbó atuəmbəm azə. Lá wu tse a tsi ɨwu wa a lɔnə a zɛrə, a kə́ sáʼə mbyígə́ a bagɨ me ghe. 51Tsɛʼ a nkənu, ma soŋə awɨŋ ə, be ŋwɔn tsɛrə a ndzúʼnɨ́ ɨnu tsa ma diʼnə, a láʼ keʼ kfoə.”
52Bə Yuda sóŋ ngə́, “Tɨtsɔŋnɨ bɨgɨ zhi ɨ shiʼnɨ ngə́ o tsi nɨ dzɨŋ ə! Abraʼm a kfó, ntóm Ŋwi kɨ nkfokə; lá o soŋ ngə́ ŋwɔn tsum wa a zúʼnɨ́nɨ́ ɨnu tsa o diʼnə a láʼ keʼ kfoə. 53Ta ɨwɨgɨ Abraʼm a kfóə; ka o soŋə agho lá ngə́ o nɨ ŋwɔn wu ngwi ntsa Abraʼm ə, kə ndé? Ntóm Ŋwi kɨ́ nkfókə́. O lanɨ ngwiʼtɨ ngə́ o lá ɨwa le?”
54Yeso a chwɨ́gɨ́ ngə́, “Ma lo be tsi lá nɨ nkɔʼsɨ atuəmbəm azan atɨ́, muŋ nkɔʼsə atɨ́ məza ɨ tsi atú adaŋədaŋə ghe. Ŋwɔn wa a kɔ́ʼsɨ́nə́ aghan atɨ́ a nɨ Ta ɨghan — tsɛʼ zɨ wa nɨ soŋnɨ ngə́ a nɨ Ŋwi ɨwɨŋ ə. 55Nɨ láʼnə mbvurɨ ayi tɨ zhyɛ, lá ma zhi ayi ɛ. Be ma soŋ ngə́, ka ma zhi aghə ayi, muŋ ma nɨ ŋwɔn ɨchwenu tso bɨŋ ə. Lá ma zhi ayi, nkə́ ndzúʼnɨ́ nɨgham ɨni ɛ. 56Ta ɨwɨŋ Abraʼm a dórɨ́ ngə́ zɨə ghɨ ze nkfu ngyiŋ ɨzə; wɛrə a zɛ́n a zɛrə, ɨnye ɨzhi bɔŋə.”
57Bo sóŋ wəmbo ngə́, “O wen mbvurɨ be ɨlom mɨghúm mɨntə̧̂ tɨ kuʼ — o zé Abraʼm lə ɨ lye ke le?”
58Yeso a chwɨ́gɨ́ ngə́, “Ma sǒŋ nkənu a mbó bɨŋ ə. Mbɔŋnə á bɨ njwiə Abraʼm, Ma chyɛ.”
59Bo tíʼ sɛ́ʼ mɨngɔʼ a ntúmtɨ́ zɨ nɨ mɛrə, lá Yeso a lwɛ́ʼ atuəmbəm azhi, ntiʼ fu ayi a mu Ndáŋwi zɨ Ngwi ə.
Zvasarudzwa nguva ino
Yoane 8: MNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, CABTAL