Yohani 2
2
O Pararamoday i Kana
1Nanoya, sakatolo a romi'ad i, ira ko pararamoday i Kana no Kalili. Ira itira ko ina ni Yis. 2Matahidang ci Yis ato nisawawaan Ningra a papikapot i pararamoday. 3Ma^minto ko fadisoso' a ^pah saka, pasowal i ci Yisan ko ina Ningra, <<Awaayto ko ^pah nangra,>> han ningra.
4Pasowal sa ci Yis i cingraan, <<Inaaw, aka patado Takowanan a papidmak to maan. Caho ka raod ko pidmakan Ako,>> han Ningra.
5Pasowal sa ko ina ningra i matayalay a tamdaw, <<Ano o maan ko sowal Ningra i tamowanan i, do^do han,>> han ningra.
6Ira itira ko ^nem a fokloh a koreng. O lalosidan no Yutaya a tamdaw konini to sapikorac a misalisin. Ma^deng ccay so'ot kongsen ko pinaro no ccay a koreng. 7Pasowal ci Yis i cangraan, <<Tomesen a miparo to nanom kora koreng,>> han Ningra. Saka, tangasaen nangra i ngoyos noya koreng ko nipitomes to nanom. 8Pasowal sa ci Yis i cangraan, <<Dada, hacolen a patayra i citodongay to tahka,>> han Ningra. Saka, patayra hanto nangra. 9Tanamen no citodongay to tahka koya nipala^pahan a nanom. Caay ka fana' cingra to nika nai cowaay konini. (Deng oya miradomay a matayalay a tamdaw ko mafana'ay.) Orasaka, tahidang hanto no citodongay to tahka ko fa^lohay a niparamodan a fa'inay 10a pasowal, <<I 'ayaway ko no tao a pasadak to nga'ayay a fadisoso' a ^pah. Yo marnecto ko tamdamdaw a komaen i, itiya a pasadak to afsa'ay. 'Arawhani, aninito ko miso a pasadak to nga'ayay a fadisoso' a ^pah,>> han ningra.
11I Kana no Kalili a midmak ci Yis tonini a sa'ayaway a kafahka'an a dmak. Itira a pahapinang Cingra to nika tadamaan Ningra. Saka, paso'lin sato ko nisawawaan Ningra i Cingraan.
12Nanoya, malahaklong ci Yis ato ina ato salikaka ato nisawawaan Ningra a tayra i Kapirnaum. Itira saho cangra to pinapina a romi'ad.
O Pikorac ni Yis to Fangcalay Pita'ongan
(Matay 21.12-13; Maroko 11.15-17; Luka 19.45-46)
13Maraodto ko Pita'lifan a Lisin no Yutaya a tamdaw. Saka, tayra ci Yis i Yirusalim. 14Ma'araw Ningra i potal no Fangcalay Pita'ongan ko pacakayay to kolong to siri to topi ato mifalicay to payso a tamdaw a maro' i cokoi nangra. 15Sanga' sato ci Yis to ka^red a sasti'. Laplapen Ningra cangra a ma^min a pasadak nai Fangcalay Pita'ongan, halosiri ato kolong. Warwaren Ningra ko payci noya mifalicay. Walinen Ningra ko cokoi nangra. 16<<Alaen konini a ma^min a pasadak! Aka palapatiyamen ko Fangcalay Pita'ongan no Wama Ako!>> han Ningra koya pacakayay to topi a tamdaw. 17Maharateng no nisawawaan Ningra ko, <<Kawasaw! Matiya o malikatay a namal ko nika rafraf no faloco' ako a malalok to saki Fangcalay Pita'ongan Iso,>> yasanay a matilid i Fangcalay Cudad.
18Pasowal sa ko kakrikridan no Yutaya a tamdaw i ci Yisan, <<Mihaen Kiso to dmak i, o maan ko sapatiri' Iso i tamiyanan to nika citodong Iso tonini a dmak saw?>> han nangra.
19Paca'of sa ci Yis, <<Plengen konini a Fangcalay Pita'ongan, ta liyawen Ako a patireng to tolo a romi'ad,>> han Ningra.
20Sowal sa koya kakrikridan no Yutaya a tamdaw, <<Spat a polo' ira ko ^nem no mihcaan a mipatireng tonini a Fangcalay Pita'ongan i, ma^deng Kiso to tolo a romi'ad a mipatireng saw?>> han nangra.
21Nikawrira, o tireng ni Yis ko nisowalan Ningra a Fangcalay Pita'ongan. 22Orasaka, yo lomowadto ci Yis a ma'orip nai patay i, maharatengto no nisawawaan konini a sowal ni Yis. Saka, paso'lin sato cangra to Fangcalay Cudad ato nano sowal ni Yis.
Mafana' ci Yis to Faloco' no Tamdamdaw
23Yo misalisin to Pita'lifan a Lisin i, i tiraho i Yirusalim ci Yis. Ma'araw no 'alomanay a tamdaw ko kafahka'an a dmak Ningra. Saka, paso'lin sato cangra ci Yisan. 24Nikawrira, caay paso'lin ci Yis to faloco' nangra. Nawhani mafana' Cingra to faloco' no polong no tamdaw. 25Malomaan ko pipasowal no nima to pakayniay i pinangan no tamdaw saan ci Yis. Nawhani mafana' ci Yis to i faloco'ay no tamdaw.
Zvasarudzwa nguva ino
Yohani 2: AMIS2019
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© The Bible Society in Taiwan, 2019