MATHIE 4
4
Logbo su Jezwi wu
(Ɔ́n wú Mák 1.12-13; Ɔ́n wú Lwik 4.1-13)
1Lómánji, Nánnánmi do Jezwi ɔ́nmɔn lo ánánkhuthé, lóne nɔn logbo su nkɛ wu. 2Lónian mɛn khɛ́n Jezwi jimɛ́n ńcrɔ́n cí ágrebhɛ le ńmréci cí ágrebhɛ ɔn, lótɛ áko ehɔ́n-ɛn. 3Logbo tigbɛli, ló nkɛ ékrɛnmɛn sa:
– Kasé ɛli Yankan Mi, tɛmɛ ɛchɛ́ ńmú lókɔn ojrɛn kpánhɔn.
4Ló Jezwi krɛnmɛn sa:
– Yankan hrɔ́ étɔlé: “Léli kpánhɔn míbrɛ nɔn áchɛ́ lephan bhá mɛpɔ́, khɛ́n ábhwe khúnbrɛn tɛɛ áchán Yankan míthé thándi.”
5Ló logbo do-e ɔ́nmɔn lo Jeruzalɛ́mɛn ali ákhúbhɛ́ créncré, ńhɔn nkɛ ya Yankan-nkhú mɛ́n piénpié tho, 6ló ńkránman nkɛ sa:
– Kasé ɛli Yankan Mi, tɛmɛ ɛyó diathé;
átɛsa Yankan hrɔ́ étɔlé: “Hɛ hɛ́nthé,
Yankan bha sé mɛ́n mranchɛ́mán mɔ́nsi,
wo bhá hɔ́n hɛ pɛ wo mɔ́n mɛn
ló ábhú brɛ bha lé dɔn hɛ nta.”
7Ló Jezwi kranman nkɛ sa:
– Yankan hrɔ́ cu étɔlé: “Ɛle sú hɛ Hwánthe Yankan wú.”
8Logbo cu do-e ɔ́nmɔn lo ábhóbhó piénpié bɛn tho, ńkhwɛn áthéji bhringbi yí le lónguhá yí khúnbrɛn ɔ́nmɔn nie nkɛ; 9ló ńkránman nkɛ sa:
– Kasé ɛbhɔlé mɛn hɛ́nmɛn, khɛ́n ɛ́la mɛn, mɛn mán khwɛ́n lóyí khúnbrɛn lókɔn sé hɛ.
10Ló Jezwi kranman nkɛ sa:
– Abhɔsɛ́mɔ́n, féne mɛn hɛ́nmɛn! Átɛsa Yankan hrɔ́ étɔlé: “Tɛmɛ ɛla hɛ Hwánthe Yankan, ló ɛkhwɛn mɛ́n míbrɛ hɛ́nmɛn nɛn.”
11Lómánji, logbo yɔ Jezwi ka, Yankan-mranchɛ́mán bha gɛ, ló wo ékhwɛn nkɛ hɛ́nmɛn nɛn.
Jezwi bhɔ mɛ́n júmán hɛ́n Galile gotho
(Ɔ́n wú Mák 1.14-15; Ɔ́n wú Lwik 4.14-15)
12Lóka Jezwi ye salé wo ka Jan khúthé, lótɛ ńmósi no Galile gotho. 13Ńnɛn dɛn chre Nazarɛ́thi, khɛ́n ńno chre Kapɛnaúmɛn khúbhɛ́ atre Galile duphé mɛ́n abha Zabulɔn le Nɛfutali ɔ́nmɔn gotho. 14Lóyí si akhɔ tɛ é, ló ochɛ́sé bhwetɔ́tréwo Ezayi bhwe atɔ osímɛ́n sa:
15“Zabulɔn khúbhɛ́nɛ́n,
Nɛfutali khúbhɛ́nɛ́n,
agbali gwe njɛ abha Judɛn ndubhɛ dúji,
Galile khɛ́n ali ási néphan aleli Jwifunɛ́n khwa!
16Aféchwe lókɔn khɛ́n abha dubhlékhu hromɛn,
bha wú áyéfí khóo bɛn!
Ló néphan akhwa lóne gotho
ákhú nánphɔ hromɛn ɔn,
áyéfí bha thándi sé wo wú!”
17Lóka lókɔn hromɛn nɔn Jezwi bhɔhɛ́n étɔ Yankan bhwe, ló ántɔ sa:
– Ɔ́n jrɛn hɔ́n yítɛ́, lée Átho Bhringbi khúbhɛ́ gbali phɔ!
Jezwi che dukúmán bhwelí
(Ɔ́n wú Mák 1.16-20; Ɔ́n wú Lwik 5.1-11)
18Lóka Jezwi khɔ Galile duphé jɛ́ njɛ nɛ́nsi élo, lótɛ ńwu dukúmán mɔn, Simɔn (óche Piɛ) le mɛ́n hɔnsɛ́n Andre ɔ́nmɔn ekú sawá duphé hrómɛn, 19ló Jezwi kranman nkɔn sa:
– Ɔ́n ma gɛ mɛn thá, ló mɛn chɛ́ ɔ́n kú néphan du.
20Lóyámɛ́n, wo yɔ wo sawá khwalé, ló wo gɛ nkɛ ɔ́nmɔn lo.
21Lóka ńno hɛ́nmɛn, ńgɛ hɔnsɛ́n mɔn dɔnbɛn: Jakhi le Jan ɔn, ali Zebede miɔn. Wo le wo the Zebede ɔ́nmɔn wo bha hran mɛn wo égrɛ wo sawá. Jezwi che wo, 22lóyámɛ́n, wo yɔ wo hran le wo the ɔ́nmɔn khwa, ló wo gɛ nkɛ thá.
23Jezwi jekhali Galile si khúnbrɛn. Ńnie yí nkhɔ hɛ́nbhúrɛ si abha lóne gotho. Ńtɔ Ábhwe Bhwábhwá ali Yankan Bhringbi khúbhɛ́ bhwe, ló ńtɛ néphan álɔ́ ehɔ́n, le wo khɛ́n álɛ́nɛ yábhɛ yábhɛ bha wo phɔ, phɔ jan. 24Wo tɔ mɛ́n bhwe do Siri gotho khúnbrɛn, ló wo khwɛn néphan bha se: wo khúnbrɛn khɛ́n álɔ́ dɔndɔn bha wo phɔ, wo khúnbrɛn khɛ́n wo elí gbre, wo khɛ́n nánnánmi phromɛn phromɛn bha wo phɔ le wo khɛ́n ńfúkpo le wrɛkɛ́ ɔ́nmɔn bha wo phɔ, ló Jezwi tɛ wo phɔ jan. 25Ápasá búdúbúdú gɛ thá. Wo chan Galile, Ákhúbhɛ́ Áwɔ́ gotho, Jeruzalɛ́mɛn, Jude le ágotho abha Judɛn ndubhɛ dúji ɔ́nmɔn.
Zvasarudzwa nguva ino
MATHIE 4: ENT96
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ebrié New Testament © Bible Society of Côte D'Ivoire, 1996.