MATHIE 5
5
Yankan bhwe Jezwi tɔ ábhóbhó tho
1Lóka Jezwi wu ápasá lókɔn, ńpha no ábhóbhó bɛn tho, ló ńchethé. Mɛ́n yíchwɛmán bha gɛ 2ánnie wo yí, ló ántɔ sa:
Áphɔkhwálé bhwe khóo
(Ɔ́n wú Lwik 6.20-23)
3– Áphɔkhwálé gɛ néphan khɛ́n wo nbrɛn wo yɛn salé
wo li gbremán,
átɛsalé Átho Bhringbi khúbhɛ́ bha lí wo ékɛ!
4Áphɔkhwálé gɛ néphan abha ábhwephé hrómɛn,
átɛsalé Yankan bha khwá wo thɛ́n lé!
5Áphɔkhwálé gɛ néphan atɛ́ pɛ́tɛ,
átɛsalé áyíta bha lí wo ékɛ,
sa lósi Yankan khɔ tɔ lóbhwe tre a!
6Áphɔkhwálé gɛ néphan khɛ́n wo mɛpɔ́bhá hrómɛn,
etɛ́ khékhremɛn tɛ́ Yankan yí apɔ,
átɛsalé Yankan bha sé wo lóyí símɛ́n cɛ́ɛ́!
7Áphɔkhwálé gɛ néphan awú néphan nánkhɛ nfɛkhu,
átɛsalé Yankan bha wú wo lɔ nfɛkhu!
8Áphɔkhwálé gɛ néphan wo thɛ́n hrómɛn chan,
átɛsalé wo bhá wú Yankan!
9Áphɔkhwálé gɛ néphan atɛ́ thɛ́nkhwálé bhá
wo le wo jɔn ɔ́nmɔn thethé,
átɛsalé Yankan bha che wo mɛ́n miɔn!
10Áphɔkhwálé gɛ néphan wo élri gbre,
Yankan thɛ́npɔ́ yí wo etɛ́ hɛ́nthé,
átɛsalé Átho Bhringbi khúbhɛ́ li wo ékɛ!
11Áphɔkhwálé gɛ hɔ́n, kasé mɛn hɛ́nthé, néphan etá hɔ́n, wo élri hɔ́n gbre, khɛ́n wo echí bhwe yábhɛ yábhɛ khúnbrɛn há hɔ́n tho. 12Tɛmɛ ɔ́n ní phɔhá, ló áphɔ lɔ okhwá hɔ́n lé, átɛsalé ápɛnsɔ́n khóo bɛn tre átho lóne ébo hɔ́n. Bhwetɔ́trémán athwasi bha ɔn, wo lɔ lósi yábhɛ brɛ okhɔ lri wo gbre nɔn ali lókɔn.
Ńniɛ le áyéfí
(Ɔ́n wú Mák 9.50; Ɔ́n wú Lwik 14.34-35)
13– Hɔ́n nɔn ɔ́n ni áthéjinɛ́n niɛ. Khɛ́n kasé lóyí ániman abha lóhrómɛn ália ɔn, kalósi ógɛ khɔ́ tɛ́ khɛ́n ácu niman npɔ e? Óle gɛ bhó tɛ́ yíɛkɛ, hɔ́n pán ohɔ́n sakhwa ngbophro, ló néphan cha lótho.
14Hɔ́n nɔn ɔ́n ni áthéjinɛ́n yéfí. Ákhúbhɛ́ khɛ́n olɛ tre ábhóbhó tho lé gɛ hrɔman. 15Óle tɔ́ khanniɛn tré segbeyí thé, khɛ́n ohɔ́n tré khanniɛnyá tho, ló áfí sé néphan khúnbrɛn abha khúthé. 16Lósi yábhɛ hɔ́n yéfí gɛ khɔ́ fí néphan hɛ́nmɛn é, ochɛ́sé wo wú hɔ́n yíbhwátɛ́, ló wo lri hɔ́n The abha tho hwa.
Áyí olie ábidí phɔ
17– Ɔ́n ne bhú salé mɛn ma mɛɛ́n phu Moyízi bidí le bhwetɔ́trémán yí alie ɔ́nmɔn nɔ. Mɛn nɛn ma sa mɛɛ́n phu nɔ, khɛ́n mɛn chɛ́ oyɛ́n lóthé bɛn nbrɛn. 18Mímí mɛɛ́n kranmán hɔ́n: kasé átho le áthé ɔ́nmɔn ka hɛn, obha le hɔ́n ábidí phɛ́n bhrií le lóbhwe chɛ́chɛ́ bhrií brɛ phu lɔ. Obha le tɛ́ nɛn kábrɛ kábrɛ ábha di lóka, áyí khúnbrɛn bhwe bha phú. 19Lóhɛ́nthé, lephan khɛ́n abha le ji ábidí, ńmrií átɛ lɔ, khɛ́n ábha lie néphan lɔ okhrɛ lóbidí, mɛ́n lephan lókɔn ɔn, ánman jrɛn yípɔ bhri Átho Bhringbi khúbhɛ́. Khɛ́n lephan ábha ji ábidí, khɛ́n ábha lie néphan lɔ otɛ́ lóyábhɛ brɛ, mɛ́n lephan lókɔn ɔn, ánman ní lephan khóo Átho Bhringbi khúbhɛ́. 20Mɛɛ́n kranmán hɔ́n gbée salé: Yankan yí énɛn, kasé ɔ́n ne ji lóbhwe yɔ́n brɛn bidíyɛ́nmán le Fariziɛnnɛ́n ɔ́nmɔn ékɛ etɛ́, ɔ́n ma le ká Átho Bhringbi khúbhɛ́.
Áyí olie ńthɛ́nyandó phɔ
21– Ɔ́n ye wo tɔ se lo jisɛmánhɔn sa: “Ɛle wɛ́n lephan, lephan ábha wɛ́n lephan ɔn, óbha hɔ́n-ɛn lo kwabhɔ́wo hɛ́nmɛn.” 22Lókhɛ́n mɛn-ɛ, mɛɛ́n kranmán hɔ́n lée: lephan khɛ́n ábha do thɛ́nyan sé mɛ́n hɔnsɛ́n, óbha hɔ́n-ɛn ló kwabhɔ́wo hɛ́nmɛn; lephan ábha che mɛ́n hɔnsɛ́n: “Gbwɛwo!” óbha hɔ́n-ɛn ló Kwabhɔ́mán khónkhó hɛ́nmɛn, lephan ábha tá mɛ́n hɔnsɛ́n lée: “Fanwo!” áyɔn sa ohɔ́n-ɛn ló ágbrelí tɛn hromɛn. 23Lóhɛ́nthé kasé ɛbho hɛ nphaha yí ɛbhá Yankan nphaha túprán hɛ́nmɛn, lókhɛ́n lóne ádi hɛ mwanhɛ́n salé hɛ hɔnsɛ́n tre hɛ bhwe lé, 24tɛmɛ ɛyɔ́ hɛ nphaha tré nphaha túprán hɛ́nmɛn, ló ɛlo gɛ hɛ hɔnsɛ́n ɔ́nmɔn nrwɛn, lómánji khɛ́n ɛbha bhó hɛ nphaha yí sé Yankan.
25Kasé lephan bɛn bhɔlikɔn se hɛ, khɛ́n ɔ́n grɛ hɔ́n eló ákwabhɔ́ gɔn, lóka ɔ́n ma sitó hɔ́n élo ɔn, ɛphrɛ gɛ ɔ́nmɔn nrwɛn gbraa, kasé ɛle tɛ nɛn, ánman hɔ́n hɛ sé kwabhɔ́wo, ló kwabhɔ́wo bha hɔ́n hɛ sé ngbumán-óthe, ló wo bhá hɔ́n hɛ ká khúthé. 26Mímí mɛɛ́n kranmán hɛ: ápɛn khúnbrɛn abha hɛ phɔ, kasé ɛle sɔn phu, ɛbha lé chán khúthéká gɔn thándi.
Áyí olie ágbakhrelí phɔ
27– Ɔ́n ye wo tɔ sa: “Ɛle bhɔ́ phɛ́n.” 28Lókhɛ́n mɛn-ɛ, mɛɛ́n kranmán hɔ́n lée: sɛ tɛɛ mɛ́n jɔ mia bha nɔ́n-ɛn mɛ mɛ́n thɛ́n hrómɛn, átɛsa áphɛ́n nɔn ńmɔ. 29Lóhɛ́nthé, kasé hɛ liémɔn mɛbhí nɔn echɛ́ hɛ hálé ńne hrómɛn, tɛmɛ ɛfi yɛn, ló ɛbhó fɔ́nká njɛ-áan: áyɔn sa hɛ phɔ nánmí phɛ́nta bɛn oféne brɛn ló a, hɛ phɔ nánmí khúnbrɛn bha símɛ́n, khɛ́n óbha hɔ́n hɛ fɔ́nká ágbrelí tɛn hromɛn. 30Lóhɛ́nthé kasé hɛ liémɔn mɔ́n nɔn echɛ́ hɛ hálé ńne hrómɛn, tɛmɛ ɛjan yɛn, ló ɛhɔ́n fɔ́nká njɛ-áan: áyɔn sa hɛ phɔ nánmí phɛ́nta bɛn oféne brɛn ló a, hɛ phɔ nánmí khúnbrɛn bha símɛ́n, khɛ́n óbha hɔ́n hɛ fɔ́nká ágbrelí tɛn hromɛn.
Áyí olie ájánli bhwetɔ́ phɔ
(Ɔ́n wú Mat 19.9; Ɔ́n wú Mák 10.11-12; Ɔ́n wú Lwik 16.18)
31– Wo cu tɔ salé: “Kasé sɛ éjanlí mɛ́n bhia, áyɔn salé antɛ́ ájánli hrɔ́ sé nkɛ.” 32Lókhɛ́n mɛn-ɛ, mɛɛ́n kranmán hɔ́n lée: kasé sɛ tɛɛ mɛ́n bhia le che sɛ nankhɛ khɛ́n ńjanli nkɛ, mɛ́n nɔn anchɛ́ nkɛ bhɔ́ phɛ́n, kasé bhie lókɔn cu ephɛ́n sɛ nánkhɛ. Ló sɛ aphɛn bhie ojanli ɔn, sɛ lókɔn, mɛ́n lɔ anmɔ́ phɛ́n.
Áyí olie ábhwe óbhɔlí phɔ tɔ
33– Ɔ́n ye wo cu tɔ se lo jisɛmánhɔn sa: “Ábhwe ɛbhɔli phɔ tɔtre ɔn, ɛlé samɛ́n lóphɔ. Khɛ́n ábhwe ɛbhɔli phɔ tɔtre Hwánthe hɛ́nmɛn ɔn, tɛmɛ ɛtɛ́ lóyí osímɛ́n.” 34Lókhɛ́n mɛn-ɛ, mɛɛ́n kranmán hɔ́n lée: ɔ́n ne bhɔli bhrɔ́ɔ́: ɔ́n ne khɔ́ átho hɛ́n hrómɛn bhɔli, lóne li Yankan Bhringbi yákhru, 35saji ɔ́n ne khɔ́ áyíta hɛ́n hrómɛn lɔ bhɔli, lóne li áyákhru atre Yankan ntathé, ɔ́n ne khɔ́ Jeruzalɛ́mɛn hɛ́n hrómɛn lɔ bhɔli, lóne li Bhringbi khóo khúbhɛ́. 36Ɛle khɔ́ hɛ hɛ́nthé hrómɛn lɔ bhɔli, lósi akhɔ tɛ ɔn, hɛ nbrɛn ɛbha lé gɛ tɛ́ hɛ hɛ́nyro míbrɛ jrɛn phópho le ńmro ɔ́nmɔn. 37Hɔ́n bhwe khɛ́n ɔ́n ma tɔ nɔn ali: “Ee” le “Hóo” ɔ́nmɔn, lée ábhwe nankhɛ ócu tɔ káne ɔn, áchán logbo yé.
Áyí olie áswan phɔ
(Ɔ́n wú Lwik 6.29-30)
38– Ɔ́n ye wo cu tɔ salé: “Ńmɛbhí le ńmɛbhí, ńnɔ́ le ńnɔ́!” 39Lókhɛ́n mɛn-ɛ, mɛɛ́n kranmán hɔ́n lée, kasé lephan tɛ hɔ́n yíléle, ɔ́n ne gɛ ɔ́nmɔn swan. Kasé lephan jan hɛ ngbaphrá áliémɔn mánkhán, tɛmɛ ɛsa ámránkhu mánkhán lɔ tré anjan ngbaphrá. 40Kasé lephan bɛn énɛn aphɛ́ bhwe há hɛ tho ló anmó hɛ ntráliɛ́ tho ɔn, tɛmɛ ɛyɔ́ anhɔ́n hɛ khókhóthu lɔ káne. 41Kasé athemánhɔn hromɛn, lephan bɛn esí hɛ ha salé ɛhɔ́n nɔnkwá lo yɛli di khilomɛ́trɛn brɛ, tɛmɛ ɛgɛ ɔ́nmɔn tɛ́ khilomɛ́trɛn mɔn. 42Kasé lephan esá hɛ yí, tɛmɛ ɛse. Kasé lephan bha égɛ hɛ pɛ́n yí, ɛlé tɔlé ɛle se.
Ápɔ́ ópɛ sé mɛsamán
(Ɔ́n wú Lwik 6.27-28,32-36)
43– Ɔ́n ye wo cu tɔ salé: “Tɛmɛ ɛpɔ́ hɛ jɔ, ló ɛsa hɛ mɛsawo mɛ.” 44Lókhɛ́n mɛn-ɛ, mɛɛ́n kranmán hɔ́n lée: ɔ́n pɔ́ hɔ́n mɛsamán, ló ɔ́n na Yankan sé néphan khɛ́n élri hɔ́n gbre, 45ochɛ́sé ɔ́n ni hɔ́n The abha tho mɛ́n miɔn. Átɛsalé anchɛ́ mɛ́n nyóka lé hɛ́n abhúrɛmán le yíbhwátɛ́mán ɔ́nmɔn tho, ló anchɛ́ ńdu chántho khwálé, ló áhɛ́n yíbhwátɛ́mán le yíléletɛ́mán ɔ́nmɔn tho. 46Kasé hɔ́n epɔ́ néphan pán ápɔ́ hɔ́n, ébí pɛnsɔ́n yábhɛ nɔn hɔ́n énɛn Yankan yé ɛ? La-nphodómán bhwá nbrɛn lɔ tɛ́ lóyí yábhɛ brɛ! 47Kasé hɔ́n hɔnsɛ́nhɔn pán nɔn ɔ́n mɔ́ yí, ló ébí yábhɛ nɔn hɔ́n etɛ́ ká njɛ ɛ? Néphan khɛ́n ale yɛn Yankan bhwá nbrɛn lɔ tɛ́ lóyí yábhɛ brɛ! 48Tɛmɛ ɔ́n ní néphan ayɔn dianthé, sa lósi hɔ́n The abha tho khɔ li lephan ayɔn dianthé.
Zvasarudzwa nguva ino
MATHIE 5: ENT96
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ebrié New Testament © Bible Society of Côte D'Ivoire, 1996.