Kejadian 29
29
Yakub Laban owi pam arat laga wene
1At Yakub ano lasu lagarik, o Kanaan abel mo porlu ago hegit laga. 2Lasulat, o leimu ik omugwe pelak a’ge mesik oruakma il hesi. Ik ai helep lok a’ge en emde lasogo pegesema re, wam kambing emin, domba emin, emin oluktak no’gwi a’ge, ik ai a’ge wogogwiam no’gumu no oluk e, oluk henagan ik pabulogo ye’gelak eragam eba ’boutak welaga. 3Is wam kambing emin, domba emin, ai arat odoksogo wagai holuk, is wam o’gonogwi a’ge en ik ai emde helep ’goduk lerak a’ge ano lekhalogo wokholuk ik wogogwiam, wam kambing emin, domba emin, ebano arat no’gwi holuk ik ai pobuk helep ’goduk emde larogu legesa a’ge.
4Asogo is ap domba ’gwelakharok welegesa a’ge ebano eba oruakma, at Yakub en e, disogo mo’gulentesi,
“Narilak, his honowi ’geba a’ge,” oluk hin wogentesimu, is en e,
“Nonowi o Haran a’ge o,” oluk mo’guligisa.
5Asogo mo’gulegisema, at Yakub en e,
“At Laban ap Nahor eba ano henaluk a?” oluk hin wogentesimu, is en e,
“Nenaluk o,” oluk mo’guligisa.
6Asogo mo’gulegisema, at en e,
“At yogodak e, ebe no’gosogo oruak,” oluk hin wogentesimu, is en e,
“Ebe op oruak o,” oluk mo’guligisarik e,
“Yethemin, at agalogo onuk Rahel en wam kambing emin, domba emin, aik ena’ge oluksogo woluk wago ai o,” oluk mo’guligisa.
7Asogo mo’gulegisema, at Yakub en e,
“Wam kambing emin, domba emin, owi pam ’gwelabu a’ge re, o mo owan oruak a’ge re, ik wogoum erlakma en e’gela nasukhwe ukpegeptik welegep ai nopaget,” oluk mo’gulentesi.
8Asogo mo’gulentesimu, is en e,
“Nis e, wam kambing emin, domba emin, ’berlegat oluksogo odoktu agaiam en de, ik helep pam lerak a’ge yu lekhalogo wokhogwi holuk en ik wogogumu oluk e, welege o,” oluk mo’guligisa.
9At Yakub weneane asogo emin ogumu, at hwele Rahel ano aik uam kambing emin, domba emin, oluksogo ene’bek wogonoboluk waga. 10Asogo wagoam, at Yakub en, hwele Rahel uam oluksogo woluk wagoma il yethesirik e, ik omugwe pelakma ano lagarik, helep ik ’goduk lerak a’ge ano lekhalogo wokhai lagarik e, wam ebano ik na’gogo wogentesi. 11Asogo wogentesimu, at Yakub ede heselegeimu re, hwele Rahel hau emde motok weregeitik, ebaget nge a’bik tegei. 12Nge tegeirik, Rahel disogo mo’gulesi,
“An e, hat haik erei Ribka emalik o,” oluk mo’gulesi. Asogo mo’gulesimu at Rahel ano wene mo’gulesi a’ge ano aik mo’guleigoluk owi pam pungtak laga. 13Lagarik, disogo mo’gulesi,
“Homlogo Yakub wagarik asogo oruak o,” oluk mo’gulesi lagama, esa’go hwelegeirik, emin sarlok tuogoluk pungtak waga. Wagarik e’birek sarlok tigisarik e, olukhwema parliksogo hau emde motok-motok weregeitik e, owi pam woluk lagama, at Yakub en wene ’beli’gogo Laban mo’gulesimu, 14at Laban en e,
“Wene ai modok demat e’gen o. Hat hebe nis nene’genma a’geat o,” oluk mo’gulesi. Asogo mo’gulesimu, at Yakub eba dugwi mesigat emin modok welegesa.
At Yakub hwami Rahel emin, Lea emin, wogenebigoluk yabuk taga laga wene
15Agauwa mesik erlige re, at Laban en Yakub disogo mo’gulesi,
“Hat hebe an nue nari a’geatma re, yabuk weat taga leigoluk epagun no yo. We, hat he’gik o’go no’gwe wokhum hagai o,” oluk mo’gulesi. 16At Laban ogulani enebe ’biren welegesa. Agalogo naduk a’ge re, onuk Lea, ye, e’berlik a’ge onuk e, Rahel. 17Lea il orogole re, obat o. A’geat de, Rahel nak de, ebe emin, orogole emin, modok obat.
18Holuk e, at Yakub ede en Rahel modok agai epesirik e, Laban disogo mo’gulesi,
“Naik, hagalogo Rahel an homlogo woknorogun holuk e, an hat hiabuk 7 tahun taga leik o,” oluk mo’gulesi.
19Mo’gulesimu, at Laban en e,
“An en Rahel is akhen a’ge wogonto nebit o. Harat wokhummu op o. Holuk, neminat yema wolomok o,” oluk mo’gulesi. 20Asogo mo’gulesimu at Yakub hwele Rahel ede en yabuk 7 tahun pam taga laga a’geat de, ogola en e,
“Agauwa, we, weiyat tu ’gal tegis o,” oluk epesi.
21Asogo yabuk tegeirik, Laban disogo mo’gulesi,
“Yabuk 7 tahun arat tegis. Holuk, naik. Hagalogo wokheik e’gen ano waik en woknorogun o,” oluk mo’gulesi.
22Asogo mo’gulesimu re, at Laban en agalogo Yakub wogeselat seni serigoluk, aphwami o kota eba a’ge ’berlegat yo’go enebesi. 23Asogo wogesi a’geat de, o hup o’gwe agalogo Rahel wogeigoluk takma re, Lea de, wogesimu emin nogogisa. 24Asogo wogesirik, at eragam a’ge hwele onuk Zilpa Lea eragam a’ge emagoluk wogesiat. 25Loruk o’gwe en, at Yakub il Lea yethesirik e, ogola en e,
“Laban agalogo Lea woknesimu hegi o,” oluk aluk agarik Laban e’bek lagarik e, disogo mo’gulesi,
“An homlogo asogo lalnebigen ai nopaget. An e, hagalogo Rahel woknorogun oluk yabuk utheselegi ebano re. Homlogo nopaget lalnebigen,” oluk mo’gulesi. 26Asogo mo’gulesimu, at Laban en e,
“Nis o yema togwi re, enebablak owan wogonto erlak oruakhwe, onosi naduk wogontogwi erlak o. 27Holuk e, hat yabuk an nebaget pobuk nin 7 tahun tagalom hagai epegen holuk e, seni hwe wokheige a’ge yu paget agauwa sabiren no’gulomultik en, nagalogo Rahel wokheik en e, mo ip o,”
28oluk mo’gulesimu, at Yakub en,
“Op o,” oluk egeimu, seni ano arat noluk en, at Laban en Rahel ano wogesiat. 29Wogesirik, eragam a’ge hwele onuk Bilha Rahel eragam a’ge emagoluk wogesi. 30Rahel asogo wogesimu, Yakub emin nogogisayat. Asogo nogogisarik, Yakub ugwe Lea erabel pam ’gela’ge welat, Rahel nak ede hwedik welaga. Asogo welat, yabuk 7 tahun at taga laga.
Yakub eiyagai dagenebegei wene
31At Nenaik ’gain Onuk Logo a’ge en, Yakub ugwe Lea erabel pam ’gela’ge welat, Rahel nak e, ede hwedik ’gela’ge oruakma il hesirik,
“Lea emalik dagenebise lemak o. Asogo a’geat de, Rahel emalik dagenebiso erlak modok abeli welemak o,” oluk egei. 32Asogo egeimu, at Lea emalik ogola agarik, emalik ap deregei. Asogo deregeitik disogo egei,
“Naik ’gain Onuk Logo a’ge en an wiak welegi a’ge il niesirik nemalik woknesimu dakhwerlegi ai pam nogun ede niouwa o,” oluk egeitik, emalik ai onuk Ruben tualegei. 33Ye, pobuk Lea emalik ogola agarik e, emalik abat dakhwerlesi. Dakhwerlesirik, disogo egei,
“Naik ’gain Onuk Logo a’ge en, an nogun en ebitsogo erabel pam taknebasu ai esa’go hwelegeirik, nemalik abat woknesi o,” oluk egeitik emalik ai onuk Simeon tualegei. 34Ye, pobuk Lea emalik ogola agarik, emalik abat dakhwerlesirik disogo egei,
“An yogodak nemalik ap nak henagan dakhwerlegi ai en, nogun emin opsogo wolomul o,” oluk egeitik emalik ano onuk Lewi tualegei. 35Ye, pobuk Lea emalik ogola agarik e, emalik abat deregei. Dakhwerlesirik, disogo egei,
“An pobuk nemalik dakhwerlegi yu pam e, naik ’gain Onuk Logo a’ge erliktik o,” oluk egeitik, emalik ai onuk Yehuda tualegei. Asogo dagenebegeitik, pobuk emalik mesik dagonobu erlagat welaga.
Zvasarudzwa nguva ino
Kejadian 29: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda