Kejadian 28
28
1Pobuk, at Ishak en Yakub worlhesirik Allah en obap taga lemagoluk disogo mo’gulesi,
“Hat hwami o Kanaan a’ge logon wogonobogun erlak o. 2Hebe heba Betuel eiyagai onowi pam o Mesopotamia eba laguntik, hami Laban ogulani a’ge mesik wa’gun en lu o. 3Laguntik, hwe wasumu, Allah di a’ge yu a’ge tu a’ge nak ano en obap hebiselat, hat aphwami ena’gul onuk esanat ene’ba orogun en hat en dogo’gwe a’ge en dogo’gwe he’balak a’bik emagoluk takhebasulat, tuak o. 4#Kej. 17:4-8Allah en hat hebe obap hebiselat, hat en dogo’gwe a’ge obabenebiselat, Abraham obap pesi ai ’gela’ge, tuak o. Ye, Allah en ’gwiang hat ap ’bok a’ge ’gela’ge welegenma yema Abraham wogesi a’ge ai hat eiye wolomup o,” oluk mo’gulesi. 5Asogo mo’gulesirik, Yakub ebe ami Laban, Yakub emin, Esau emin, enia Ribka ue, Betuel omlogo, o Aram a’ge ano e’bek perakpesi.
Esau ugwe pobuk mesik hwerlesi wene
6Aphwami en e,
“Ishak en, Allah en Yakub obap pasu lemagoluk mo’guleselat e,
Hwami o Kanaan a’ge wa’gun o. We, o Mesopotamia a’ge nak womup o, oluk mo’gulesirik e, perakpesimu o,” oluk aphwami mu a’ge en ogumu Esau esa’go hwelegei. 7Asogo hwelegeirik, at Yakub aik ia eniak hologo re, o Mesopotamia arat laga, oluk aluk agayat. 8Aluk agarik, ogola en e,
“An naik en e, hwami o Kanaan a’ge yema ebit oruak hegi,” oluk pobi tegei. 9Asogo pobi tegei ai en, at Esau ugwami logon oruakhweat de, Ismael Abraham omlogo ano e’bek lagarik, ugwe mesik Ismael agalogo a’ge onuk Mahalat ap Nebayot e’berlik a’ge ai wesi.
At Yakub o Betel en abi hesi wene
10At Yakub o Bersyeba ukpoluk, o Haran laigoluk laga. 11Laga re, o mo arat ’gorok egeimu, ebela ede ’burlmu eba lagarik e, ebayat nogogei. Nogeigoluk a’gul helep pam lekho nogogei. 12#Yoh. 1:51Asogo nogo osoma, abi re, yel’berla ’gwiang pam en ologun ’bogorl pam dalogo ’berlarak oruakma re, malaikat ’bogorl pam en yo’go no’gwi a’ge ’bu agalat, ligagalat, togumu il hesi. 13#Kej. 13:14,15Abi asogo hasumu, at eragam Nenaik ’gain Onuk Logo a’ge inagarik disogo mo’gulesi,
“Abraham emin, Ishak emin, enaik Nonuk Logo erliknobogwi a’ge Allah ano re, anat o. An en ’gwiang hat hebe ’bourak welegenma yema hat hebe emin, hat en dogo’gwe a’ge emin, wokhentaik o. 14#Kej. 12:3; 22:18Hat en dogo’gwe a’ge re, ’gwiang aling ’gwiangma modok a’bik welago ai ’gela’ge ema o. Asogo emarik, o o’gut etleba akhit en, yema akhit en, erabu akhit en, orogobu akhit en is modok wiyaletil laga lema o. Wiyaletil lagalat, hat hebe emin, hat en dogo’gwe a’ge emin, henemin pegilsogo aphwami ena’gul onuk lo’bok ’berlegat an en obap enebise leik o. 15Wene yu hede eberak modok wolomup o. An en tenhiarok welat, lethiasu leik o. Hat ’geba lagun holuk, an en pobuk togolik o ’gwiang yu pamat hobou weik ani o. An wene werakhebegi a’ge ai ebe ’berlegat emagoluk, an en hat ’goboksogo ukhobo erlakma en tenhiarok modok weleik o,” oluk mo’gulesimu abi hesi.
16Asogo mo’gulosoma abi hesirik, at Yakub elaluk agarik e, disogo egei,
“Naik ’gain Onuk Logo a’ge ebe yema welago a’geat de, an neperlak welegi a’ge yogodak en naluk aga o,” oluk egei. 17Asogo egeitik, ogorlok modok agarik e, disogo mo’gulesi,
“Ya re, Allah owi pam en ebela ’bogorl pam en ’bu agalat, ligagalat, togwi a’ge emde ’belak oruakma hegi ai, nogorlok o,” oluk erliktegei.
18Asogo erliktegeirik, loruk o’gwe huberat e, Yakub ebe inagarik, helep a’gul lekho pesi a’ge ano wesirik e, enede we’gerlogo eberak welemagoluk edikpesi. Asogo pesirik, ebatne minyak e zaitun e’gen a’bosu a’ge herlilogo Allah paget ebesi. 19Asogo ebesirik, o eba naduk e, onuk Lus welaga a’ge pobuk onuk Betel tualegei. 20Asogo tualegeirik, Allah onuk ho’buk disogo ’balegei,
“An lasu legi a’ge yu, naik ’gain Honuk Logo a’ge en senniarok welat letniasulat, so’boru emin, nosum emin, woknosoam, 21pobuk togolik naik owi pam opsogo weiktik, hat Allah an naik orogun o. 22Ye, di a’ge yu a’ge naik Honuk Logo a’ge en woknorogun a’ge ai ne’gik wenakho 10 pam lau wagoam, mesik hat hu’gwarek wokhese leik o. Ye, helep edikpegi yu, naik Honuk Logo a’ge paget erlikhobogu lemagoluk, enede we’gerlogo eberak welemagoluk hebegi o,” oluk ho’buk ’balegei.
Zvasarudzwa nguva ino
Kejadian 28: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda