Kejadian 27
27
Ishak en omlogo Yakub Allah en obap taga lemagoluk mo’gulesi wene
1Agauwa mesik erlige re, Ishak arat sebal agarik il modok hik egeimu welat, omlogo Esau naduk a’ge ano worlhasuam wagama re, disogo mo’gulesi,
“Nomlogo yo,” oluk mo’gulesimu, at Esau en e,
“I? Naik,” oluk mo’gulesimu, 2at Ishak en e,
“An nebe modok arat sebal egirik nelaluk wolom a’ge ’gela’ge erlak ai en e, hil niasu legen o. 3Holuk e, hesegen horuaba’ge horloluk e, ’baik e’gelema a’ge mesik watnesi lak o. 4Watnorogunmu re, an nagai en op nasu ’gela’geat opsogo sakho woknosu manup o. Woknosu wagoam an noluk e, nebe warom erlakma en nelaluk welat yayat Allah en obaphebise lemagoluk wene nogola a’ge mesik mo’gulheik o,” oluk mo’gulesi.
5Wene Ishak en Esau mo’gulesi ano, hwe Ribka esa’go hwelegeirik, Esau ’baik seligoluk e’gelema lasukhwe re, 6Yakub disogo mo’gulesi,
“Yogodak yayat haik en e, Esau disogo mo’gulosokhwe nesa’go hwelegis o.
7-8’Baik mesigat nak holuk mesik wesi laguntik e, opsogo sakho woknosu manup o. Woknosu wagoam an noluk e, an nebe warom erlak nelaluk welat yayat Allah en obaphebise lemagoluk wene nogola a’ge mesik Allah ilemat mo’gulheik o, oluk mo’gulosokhwe nesa’go hwelegis o,” oluk mo’gulesirik, mesik disogo mo’gulesi,
“Nomlogo, wene an en mo’gulheik a’ge aiyat hesa’go hologuntik e, hegitsogoat tip o. 9Hat e, nis en a’ge wam domba owi pam laguntik e, an en haik agai a’ge serik en e, wam kambing emalik modok esei a’bik a’ge ’biren pulogo re, woknosu manup o. 10Arat sorumu re, haik nouwagoluk wogesi lagun o. Wogesi lagunmu noluk e, at ebe owan warom erlak welat, Allah en obaphebise lemagoluk wene ogola a’ge mo’gulhemagoluk, lak o,” oluk mo’gulesi. 11Asogo mo’gulesimu, at Yakub en ia disogo mo’gulesi,
“Nia. Esau ebe re, omutaruk a’bik. Ye, an e, nebe nomutaruk erlak a’geat de, no’gosogo oluk egen. 12Naik en nebe e’gik paknioluk e,
Hiak eseiyat lalnobu wegen o, oluk,
Allah en obap nobuagoluk wene ogola a’ge mo’gulnum erlakma en e, hweim nobua hwi a,” oluk mo’gulesi. 13Asogo mo’gulesimu, ia en e,
“’Gesogo tik, oluk hede perik togun o. Nomlogo yo. Hweim hebasu holuk, wene ’berlek e, an nomu enat tik o. An en wam kambing eba wai lak o, oluk mo’gulheikmu re, aiyat tip o,” oluk mo’gulesi. 14Asogo mo’gulesimu, at Yakub en wam kambing ebano wai lagarik ia wogosu agama re, at Ishak agai a’ge modok seregei. 15Seregeitik, Esau osum op modok a’ge o pam pesi a’ge wesirik Yakub ebam ’buktak pesi. 16’Buktak pesirik, kambing agap no’gorlak a’ge ano at Yakub e’gik pam emin, um pam emin, omutaruk erlak o’gwe eriano hettak pesi. 17Asogo hettak pesirik, ip-opsogo seregei a’ge ebano emin, so’boru roti worogo pesi a’ge emin, Yakub wogesi.
18Arat asogo wogesimu re, at Yakub en woluk aik e’bek lagarik e, disogo mo’gulesi,
“Naik,” oluk mo’gulesimu, at en e,
“I? Hat sa. Esau a? Yakub a,” oluk mo’gulesi.
19Asogo mo’gulesimu, at en e,
“An homlogo Esau naduk a’ge anoat o. Hat en,
Allah en obaphebise lemagoluk mo’gulnorogun en e, ’baik hat en,
Sakho woknosu manup o, oluk e’gen a’ge ano an arat wesi legirik sik-sak woluk wegi a’ge nagun en e, hebe huremin o,” oluk mo’gulesi.
20Asogo mo’gulesimu, at Ishak en e,
“Nomlogo yo, perleneat hilmu agama ai nogorlok o,” oluk mo’gulesimu, at en e,
“Nenaik Allah ’gain Onuk Logo a’ge hat erliktaga legen ano en nilmu pesimu o,” oluk mo’gulesi.
21Asogo mo’gulesimu, at Ishak en Yakub disogo mo’gulesi,
“Hat Esau demat a? Erlak a. Ne’gik pakhiaik en e, ne’bek horoksogo ya hegilha suk o,” oluk mo’gulesi. 22Asogo mo’gulesimu, at Yakub Ishak e’bek horoksogo hegilhau wagama re, e’gik pakhasulat, disogo mo’gulesi,
“Hat hiak e, Yakub hiak ’gela’ge a’geat de, he’gik nak e, Esau e’gik ’gela’ge o,” oluk mo’gulesi. 23Asogo mo’gulesirik, at Yakub e’gik pam omutaruk a’bik ano Esau omutaruk ’gela’ge welaga ai en,
“Hat nebit,” oluk mo’gulom mia aga a’geat de, Yakub Allah en obap taga lemagoluk wene mo’guleigoluk 24wene naduk hin wokhesi,
“Hat Esau demat a? Erlak a,” oluk hin wokhesimu, at Yakub en e,
“An demat Esau at o,” oluk mo’gulesi.
25Asogo mo’gulesimu, at Ishak en e,
“’Baiksogo a’ge ai woknosoam, an noluk e, Allah en obaphebise lemagoluk mo’gulheik o,” oluk mo’gulesimu, at Yakub en e, wam a’bik sotluk waga a’ge ebano emin, ik anggur a’bosu logon emin, nouwagoluk wogesi. 26Wogesimu, disogo mo’gulesi,
“Nomlogo yo, hebe ne’bek horoksogo ya ’gela’ge hegilhau woroguntik e, hau hemde motok-motok watnebin o,” oluk mo’gulesi. 27#Ibr. 11:20Asogo mo’gulesimu, at Yakub en hau emde motok-motok werigoluk ebe horoksogo hegilhai lasumu re, sum Esau osum e’ben enak a’ge ’balegeirik e,
“Allah en obaphebise lemak o,” oluk disogo mo’gulesi,
“Nomlogo, he’ben e, o lei Allah en obaptegei a’ge e’ben ’gela’ge modok op o. 28Allah en e, lil ’bogorl pam a’ge ’belaphosu agalat, hiabuk o’gwe muli-muli modok wokheselat, so’boru gandum a’ge emin, ik anggur e’gen a’bosu emin, modok a’bik ’bulogo wokheselat, taga lemak o. 29#Kej. 12:3Aphwami ena’gul onuk lo’bok ’berlegat hat heragam a’ge emarik e, hat heragam welemak o. Ye, hue hari ’berlegat hat en tenentarok wolomup o. Hat hia en dogo’gwe a’ge en e, ondogorlu pam hurotluk erlikhobogu lemak o. Ye, aphwami logon en, hat hweim hobogwi holuk, Allah en is ai ogo ’berlegat hweim onobuayat o. Ye, hat obap hobua holuk, is ai ogo Allah en obap onobuayat o,” oluk mo’gulesi.
At Esau en, “Allah en obap nebise lemagoluk, mo’gulnemin,” oluk Ishak mo’gulesi wene
30Ishak en e,
“Allah en obaphebise lemak o,” oluk Yakub perleneat mo’gulesimu, lagama re, ue Esau ’baik selil nese lagarik waga. 31At Esau ogo re, ’baik opsogoat sakho woluk aik e’bek wagarik e, disogo mo’gulesi,
“Naik, hat en e, Allah en obaphebise lemak, oluk mo’gulnorogun en e, ’baiksogo yu nagun en huremin o,” oluk mo’gulesiat.
32Asogo mo’gulesimu, at Ishak en e,
“Hat sa,” oluk hin wokhesimu, at Esau en e,
“Hat homlogo naduk a’ge Esau anoat o,” oluk mo’gulesi.
33Asogo mo’gulesimu, at Ishak ogorlok agarik uak erlik ’bo pesirik disogo mo’gulesi,
“Eige! Pageat ’baik wesi lagarik sakho woknosu aga ai sa en. Woknosu agama hat owan wom erlak oruakhwe arat ne’gi. Arat ne’girik, wene an nogola a’ge Allah en obap taga lemagoluk arat mo’gulegismu at modok arat eiye aga o,” oluk mo’gulesi.
34Asogo mo’gulesimu, esa’go hwelegeirik ede wiak agarik e, nge modok a’bik iak loksogo eselat disogo mo’gulesi,
“Naik, Allah en obaphobuak, oluk an mesik mo’gulneminat o,” oluk mo’gulesi.
35Asogo mo’gulesimu, at Ishak en e,
“Hot naduk wagarik lalnobu agama hegi o. An wene nogola a’ge Allah en obaphebise lemak, oluk mo’gulheik epegi a’ge at hot naduk mo’gulegismu ai o,” oluk mo’gulesi.
36 #
Kej. 25:29-34
Asogo mo’gulesimu, at Esau en e,
“Onuk Yakub ai hegitsogo tualagama hegi o. Naduk an nebe naduk dogo a’ge ano ne’gikmu en delogo hwerlesirik e, pobuk Allah en an obap nebisolom a’ge arat eiye aga hegi o,” oluk mo’gulesirik, disogoat mo’gulesi,
“Wene hogola a’ge Allah en an obap nebise lemagoluk mo’gulnum a’ge mesik erlak no,” oluk mo’gulesi.
37Asogo mo’gulesimu, at Ishak en e, disogo mo’gulesi,
“Eige! An en e, at ebe hue ’gela’ge takpasulat, at ue ari ’berlegat enebe at eragam a’ge tagenebasulat, tegis o. Asogo tagonoboluk, so’boru gandum a’ge emin, ik anggur e’gen a’bosu emin, at arat wogegistikmu o. Pobuk hat wokhum a’ge mesik modok erlak o, nomlogo,” oluk mo’gulesi.
38 #
Ibr. 12:17
Asogo mo’gulesi a’ge re, at Esau mo u erlakma en ’gonu oso modogat disogo egei,
“Wene hogola a’ge Allah en obap enebiselom a’ge mesigat aiyat a? Mesik oruak holuk, an mesik mo’gulnumat o, naik,” oluk mo’gulesirik nge modok a’bigat tegei.
39 #
Ibr. 11:20
Asogo mo’gulese lagama, pobuk at Ishak en e, disogo mo’gulesi,
“Hat hebaget e, lil ’bogorl pam en, ’bu aga lema no yo. Ye, hiabuk o’gwe ’gwiang moli op agoma no yo.
40 #
Kej. 36:8; 2Raj. 8:20 Hat e, he’garok ai pamat aphwami warenebiso a’geat wolorogun o. Welat e, hebe hot eragam a’ge oroguntik ogo re, pobuk nebit oluk homi peberik poluk hematekma orogun o,” oluk mo’gulesi. 41Asogo mo’gulesimu, aik en wene ogola a’ge Allah en ot obap pasu lemagoluk mo’gulesi ai en ot apserisogo yethesi. Apserisogo yethesirik, ogola en disogo epesi,
“Naik ebe perleneat waremma re, arat warago holuk, werakma weleiktik, not Yakub ebe werik,” oluk ede epesi.
Yakub hweiye Laban e’bek louwagoluk mo’guligisa wene
42At Ribka Esau en tu a’ge ano, aphwami mu a’ge en ogumu esa’go hwelegeirik e, is nin muon en Yakub worlhai louwagoluk mo’gulentesimu, worlhogwiam wagama re, disogo mo’gulesi,
“Wene mo’gulheik a’ge yu hesa’go hwelip o. Hue Esau ede modok wiak agarik o’go hat hebe wathebigoluk weim obok ogola oruak o. 43Holuk e, an en mo’gulheik a’ge ai niak hologoat tip o. Hebe perleneat an nue Laban owi pam o Haran lu o. 44-45An neiyagai henebe ’birenat ’berleksogo erlak om ai nebit o. Hat hue tigen ai paget olot het aga a’ge ai erlak agalat, meme eselat, tisokhwe aphwami en wokhoboluk wemagoluk peragonobou weikmu re, worogun en e, lodu nak Laban e’bek laguntik welemin o,” oluk mo’gulesi.
46At Ribka en Yakub asogo mo’gulesirik, Ishak disogo mo’gulesi,
“An e, Esau ugwami aphwami o’borl o’gwe onuk Het a’ge onogulani wogenebegei a’ge eba nil ’gwelagontoluk e, modok nebit ago yo. At Yakub asogoat hwami Het a’ge wogenebiso holuk, an nebe nelaluk wolom e, nebit o,” oluk mo’gulesi.
Zvasarudzwa nguva ino
Kejadian 27: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda