Kejadian 21
21
Ishak dagaga wene
1At Nenaik ’gain Onuk Logo a’ge en Abraham ebam wene weregei hegitsogoat, hwe Sara op a’ge mesik disogo wogesi. 2#Ibr. 11:11At Abraham ebe sebal agarikmu en de, Allah en,
“Homlogo ai pam dagema,” oluk wene weragebesi pam, hwe Sara emalik ogola agarik e, emalik ap dakhwerlesi. 3Dakhwerlesimu, Abraham en e, omlogo ano onuk Ishak tualegei. 4#Kej. 17:12; Per. 7:8Tualegeirik, ene’gik siragen welegesarik en, agauwa 8 pam Allah en,
“Disogo tip,” oluk mo’gulesi hegitsogoat agap e’gerlimu a’ge ’balegei. 5Abraham ebe umur 100 tahun pam omlogo Ishak deregei ai o. 6Asogo dagagama, at Sara en e, disogo egei,
“Allah en an nogola nagai en eida tuagoluk taknebesi o. Aphwami logon wene yu enesa’go holua a’ge enebe lo’bok an neminat nonogola nenagai hul o,” oluk egei. 7Asogo egeitik mesik disogo egei,
“Naduk e, aphwami sa ’gela’ge en Abraham mo’guleselat,
Sara en emalik dakhorloluk agamu hwenarua o, oluk mo’gulesellep. Erlagat o. A’geat de, at Abraham ebe sebal pam omlogo ap mesik dagegis ai o,” oluk egei.
8Emalik ano arat lok etil-etil arlue agama re, agamu ’baluogoluk Abraham ogola agai pam seni mesik seregei.
Hwe Hagar emalik Ismael emin mukho lebigenebegesa wene
9Asogo tigisarik e, agauwa mesik erlige, nemi Abraham omlogo hwe Hagar owi Mesir a’ge omlogo ano emin, Ishak hwe Sara omlogo ano emin, enemin enannisogo ing togu legesa. 10#Gal. 4:29,30Asogo ing togumu, hwe Sara en il entesirik e, Abraham disogo mo’gulesi,
“Hat hemining a’ge an nomlogo Ishak horlouwa a’ge ai, hwe neneragam a’ge omlogo ai emin eiye ema no oluk e, hwe ai omlogo emin mukho lebigenebemin o,” oluk mo’gulesi. 11Asogo mo’gulesi a’geat de, at Ismael ogo, at Abraham omlogoatma no oluk e,
“Wene ai wiak egei,” oluk ogola en epesi. 12#Rom. 9:7; Ibr. 11:18Asogo epesimu, at Allah en e, Abraham disogo mo’gulesi,
“An en e, hat en dogo’gwe a’ge enebe a’bik ema o, oluk wene werakhebegi ano re, at Ishak en dogo’gwe a’ge en a’bik ema ai en, hwe Hagar omlogo emin paget no’gosogo tik, oluk wenemennei eberogun o. We, hwe Sara en egei aiyat iak hologo tip o. 13Ai ’gela’geat, at Hagar emalik ai hat homlogoat ai en, at ai e’balak ena’gul onuk lok emagoluk, an en at e’balak a’bik wogentaigat o,” oluk mo’gulesi.
14Asogo mo’gulesimu, loruk o’gwe hubetsogoat sialogo at Abraham en e, so’boru emin, ige’be wam agap a’ge hele’gik a’ge pam ne’gak a’ge emin, ebela pam nouwagoluk hwe Hagar wogesirik, omlogo ano yaro’gwik poluk,
“Lak o,” oluk perakpesi. Asogo perakpesimu, o eba ukpoluk e, o leimu onuk Bersyeba eba laga. 15Lasulat e, ik ebela pam no a’ge ano deng egeimu, omlogo ano e lekho ebano poluk e, 16omlogo pesimu eriano en hwerli dagansogo 100 meter ’gela’ge lagarik hweriogo welat, ogola en e, disogo epesi,
“An nomlogo nilem waragokhwe re, nede modok wiak wolom emano, naik o,” oluk nge edemu duk-duksogo tegei. 17Asogo nge tegeimu Allah en Ismael iak esa’go hwelegeirik, malaikat Allah en yo’go ’belagonobou wago a’ge mesik ’bogorl pam en, hwe Hagar disogo mo’gulesi,
“Hwe Hagar, hat hede wiak aga ai, nopaget. Homlogo iak Allah esa’go hwelegeimu re, hede perik togun o. 18Hat hebe homlogo e’bek laguntik e, homlogo ebe wa’guntik iak o’gonip o. An en at en dogo’gwe a’ge re, ena’gul onuk logapsogo paik o,” oluk mo’gulesi. 19Asogo mo’gulesimu, at Allah en e, hwe Hagar il hiktak ’gela’ge welaga a’ge ano dektak pesimu re, ik omugwe mesik oruakma yethesi. Yethesirik, ige’be wam agap a’ge hele’gik a’ge ano pam ik na’gwi lagarik e, omlogo nouwagoluk wogosu aga. 20Asogo tigisarikmu re, Allah en Ismael ebe tenak modok welaga. Asogo tenak welaga ai pam, nemi ano ebe arat arlue agarik, o lei onuk Paran eba welat, tue ’baik weriso a’ge ogolim modok op aga. 21Asogo oruakma, at ia en e, hwe o Mesir a’ge mesik wogesi. 22#Kej. 26:26Agauwa mesik pam at ap Abimelekh emin, at osi segen eiye a’ge onue onuk Pikhol ano emin, e’birek en, Abraham oruakma wegesarik disogo mo’gulegisa,
“Hat Allah he’birek welat, di tu yu tu taga legen a’geat hiogu lege o. 23Ye, asogoatma re, hat en an nemin, an neiyagai emin, is en dogo a’ge en wiyalak a’ge emin, eniagesei lalhobogumu no oluk, nis nenede op pam hat takhobogwi ’gela’ge, hat en nis asogoat taknenebasulat, ye, hat o yema nenemin welat, aphwami obabenebasulat, tagalom a’ge demat omogoluk, yogodak Allah il pam ya ho’buk ’balogo mo’gulnentemin o,” oluk mo’gulegisa.
24Asogo mo’gulegisema, at Abraham en e,
“Egep ai ’gela’geat togu lomok o,” oluk ho’buk ’balegei.
25Ho’buk ’balegeirik, pobuk Abimelekh eragam a’ge en Abraham ik na’gogumu ’gwiang sebelhwerlegesa ano, ede en e,
“Eige,” epasulat, Abimelekh mo’gulosoam e, 26at Abimelekh en,
“Disogo tegei o, oluk perleneat mo’gulnoum a’ge welegenma re. Wene yu an neperlagatma re, yogoak nagat hwelegis ai. Ta en tegeimu en de, e’gen o?” oluk mo’gulesimu, at 27Abraham en domba emin, sapi emin, wokho at Abimelekh wogesimu, e’birek en,
“Nis asogoat togu lomok o,” oluk wene ologun ’balogo ’balegisa. 28Wene ologun ’belak poluk, at Abraham en uam domba holou ebe 7 hwerli en momu polik pasuam e, 29at Abimelekh en Abraham hin wokhasulat,
“Domba holou ebe 7 pulogo pegen ai nopaget tigen o?” oluk hin wesi.
30Mo’gulesimu, at Abraham en disogo mo’gulesi,
“Domba ia enebe 7 en polik pegi ai wik-wok,
Ik na’gogumu ’gwiang pelak a’ge yu, at enat palegei o, oluk, hede eberak wolorogun en tegismu re, wemin o,” oluk mo’gulesi.
31Ye, wene ’balogumu ano re, emin wene asogo ho’buk ’balegisema re,
“O ai onuk Bersyeba yat o,” oluk ogu legesa.
32Is e’birek o Bersyeba eba welat, wene arat ologun ’balogo ’belakpegesarik, at Abimelekh, at osi segen eiye a’ge onue ap Pikhol ano e’birek ap Filistin a’ge onowi pam eba togolik legesa. 33Ye, at Abraham ano o Bersyeba ebano e onuk tamariska owi yogo poluk welat,
“’Gain Honuk Logo a’ge Hotok Modok Welegen a’ge Allah o,” oluk onuk logo pasu laga. 34Asogo takpoluk, at Abraham ano aphwami Filistin oruakma nagat welaga.
Zvasarudzwa nguva ino
Kejadian 21: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda