Kejadian 22
22
Allah en e, “Homlogo Ishak an nebaget wusogo narlnemin o,” oluk Abraham mo’gulesi wene
1 #
Ibr. 11:17-19
Agauwa pema emin welegesarik en, Allah en Abraham ebabut ’baligoluk,
“Abraham,” oluk worlhesimu, at Abraham en e,
“I? Naik. Nebe welegi o,” oluk mo’gulesimu, 2#2Taw. 3:1Allah en e,
“Homlogo Ishak mesigat dogo hede hwedik a’ge aiyat woluk e, o Moria lak o. Eba lagun holuk, an en duk mesik hwiakheikmu, eba homlogo ai an nebaget wusogo odouk narlnorogun o,” oluk mo’gulesi.
3Asogo mo’gulesimu, loruk o’gwe hubet siaksogo, Abraham en omlogo Allah paget wusogo narloum a’ge paget e ’gelogo wam keledai o’borl pam hetsogo pesi. Asogo pesirik, omlogo emin, eragam a’ge enebe ’biren emin, enemin o Allah en hwiagesimu ano legesa. 4Eba louwogoluk, o agauwa ’biren laga legesarik agauwa mesik pam lagalat, Abraham il yethesi ’gal e, o Allah en,
“Eba lak o,” oluk mo’gulesimu ano walegat oruakma yethesi. 5Asogo yethesirik e, eragam a’ge enebe ’biren eriano disogo mo’gulentesi,
“His ’biren e, wam keledai yu ’gwelakharok ya wolomup o. An nomlogo emin nak Nenaik ’gain Onuk Logo a’ge erlikti lultik e, pobuk togolik hene’bek womul o,” oluk mo’gulentesi.
6Asogo mo’gulentesirik, ’bisok emin, odouk emin, at u’gwarek woluk lasumu re, e ’gelak a’ge Allah paget mesik wusogo narlomul a’ge oluk woluk legesa a’ge ano omlogo Ishak emarlo pam pesirik e, eminat legesa. 7Asogo lagalat, Ishak en e, disogo mo’gulesi,
“Naik,” oluk egeimu, Abraham en e,
“No, nomlogo,” oluk mo’gulesimu, at Ishak en e,
“Nis e, domba emalik Allah paget wusogo narlik obul a’ge ebe erlakhweat de, ’bisok emin, e ’gelak emin, woluk wege yema re, naik,” oluk mo’gulesi. 8Asogo mo’gulesimu, at Abraham en e,
“Allah u’gwarek en domba emalik mesik hwiaknontouwa o,” oluk mo’gulesirik emin ’bekhit legesa.
9 #
Yak. 2:21
Is ano laga legesarik, o Allah en Abraham hwiagesimu ano arat legesarik, Allah paget mesik wusogo narloummu ebale heli’gogo pesirik, o’borl pam e ’berlasogo pesi. Asogo pesirik, omlogo ano e’gik herle wusogo re, e ’berlarak a’ge ano pam ’boutak pesi. 10Arat ’boutak pesirik, ’bisok lit-lat wesirik e, omlogo ebe werigoluk tegei. 11Asogo werigoluk tisoma, malaikat Nenaik ’gain Onuk Logo a’ge en yo’go ’belagonobou wago a’ge mesik iak ’bogorl pam en disogo mo’gulesi,
“Abraham, Abraham,” oluk mo’gulesimu, at Abraham en e,
“I? Naik,” oluk mo’gulesimu, at en e,
12“Hat homlogo ai e’gik tenak poluk disogo yusogo mesik togun no yo,” oluk malaikat en mo’gulesi ai ebe re, Nenaik ’gain Onuk Logo a’ge en mo’guleselat mesik disogo mo’gulesi,
“Hat homlogo mesigaratma re, hedeap po erlakma enat, an wokneigoluk tigen ai en, hat en an nebe hogorlogap nebegentik niak hologo tigen ai en hat hebabut yogodak en an arat naluk aga o,” oluk mo’gulesi.
13Asogo mo’gulesimu, at Abraham il eragam o’gwe yethesi ’gal e, wam domba ierak a’ge mesik iak a’gul pam en, e sagarak a’ge e’gerlakma hetsogo oruakma hesi. Holuk wesirik e, omlogo ebalema weregeitik e, Nenaik ’gain Onuk Logo a’ge paget narlik ebesi. 14Asogo narlik ebesirik e, o eba onuk e, disogo tualegei,
“Nenaik ’gain Onuk Logo a’ge en, aphwami di a’ge yu a’ge erlak en mia oruakma hwiagentasumu o,” oluk onuk tualegei. Asogo tualegeimu, hwerli yogodak en ogo re,
“Nenaik owi duk pam aphwami di a’ge yu a’ge erlak en mia oruakma hwiagentasumu,” oluk ogwiat o.
15Pobuk malaikat Nenaik ’gain Onuk Logo a’ge en yo’go ’belagonobou wago a’ge ano ’bogorl pam en Abraham disogo mo’gulesiat,
16 #
Ibr. 6:13,14 “Nenaik ’gain Onuk Logo a’ge en e,
Hat en homlogo mesigat a’ge hedeap po erlakma enat an wokneigoluk tigen ai en, an nu’gwarek nonuk ho’buk ’balogo wene disogo mo’gulheik. 17#Ibr. 11:12An en pobuk-naduk loksogoat obap hebiselat, hat en dogo’gwe a’ge enebe hwesagal ’bogorl pam a’bik welago ai ’gela’ge emin, ik al ik laut esa’go’gwe welago ai ’gela’ge emin, modok a’bik emagoluk takhebasulat, he’balak en eneselei a’ge mabenap enebasu lemagoluk takhebasulat, tik o.
18 #
Per. 3:25
An en,
Asogo tip, oluk mo’gulhegis a’ge niak hologoat tigen ai en, aphwami ’gwiangma a’ge ena’gul onuk lo’bok ’berlegat, an en hat en dogo’gwe a’ge obap enebise lema ai ’gela’ge, is obap onobuagoluk, ’gonu mo’gulnema o, oluk egei,” oluk malaikat ano en mo’gulesi. 19Asogo toluk, togolik Abraham eragam a’ge enebe ’biren ebano ene’bek wegesarik, eneminat o Bersyeba wegesarik, at Abraham ebe o eba welaga.
Nahor eiyagai wiyalegesa wene
20Pobuk aphwami en Abraham mo’guleselat e,
“Hat hue Nahor ugwe Milka ano emalik ap dogo enebesi ai re, 21naduk ap onuk Us, pobuk e’berlik a’ge onuk e, Bus, pobuk Aram aik onuk Kemuel. 22Ai en e, Kesed, Hazo, Pildas, Yidlaf ai, Betuel at dagenebegei o,” oluk ogukhwe at Abraham esa’go hwelegei. 23Ye, at Betuel ano en e, agalogo hwele Ribka yaat deregei. Is ap enebe 8 ya ano re, hwe Milka enat at ogun Abraham ue Nahor ano ebalema dogo enebesi. 24Ye, Nahor hwe eragam a’ge wogo onuk e, Reuma ano en ogo re, emalik ononuk Tebah, Gaham, Tahas, Maakha yat dagenebegei.
Zvasarudzwa nguva ino
Kejadian 22: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda