Kejadian 18
18
Allah en Abraham emalik ap mesik wogeigoluk wene weregei wene
1Nenaik ’gain Onuk Logo a’ge ebe Abraham orogolema e Allah agan edipmu aphwami o Mamre a’ge wene mo’gulogumu eba inaga. O ai erlige re, o aganhan enat Abraham o sum owi werikmu ’godukmu hweriogo welat, 2#Ibr. 13:2a’gul lekholuk il yethesi ’gal e, aphwami enebe henagan orogolema edik oruakma yerentesi. Asogo yerentesirik, enebe wogenebigoluk lagarik, odogorlu pam hurotluk e, 3-4disogo mo’gulentesi,
“Narilak, an nowi pam sum owi werikmu yema set hwalu erlakma en ’bekhit lo mia o. We, set hwalogup en e, e edipmu yema huremis o. Asogo oruakhwe, an ik wai laiktik en honoyuk petne emethenebik o. 5An en, his henanni oroguptik e, ’bekhit lagup en e, henebaget logon serik o. An his heneragam a’ge nowi pam ’gu egep ai re, modok hau do’goksogoat werak nebegep ai o,” oluk mo’gulentesi. Asogo mo’gulentesimu, is en e,
“Hebabut op en woknenebigenma set hwalul ai paget hau wathebige o,” oluk mo’guligisa.
6Asogo hau werigisema, at Abraham perleneat owi pam sum owi werikmu ano ’gwegeitik e, Sara disogo mo’gulesi,
“Tepung op a’ge sum mesigat yagarak a’ge wa’guntik e, helaluesogo roti duk-duk a’ge logon werarin o,” oluk mo’gulesi. 7Asogo mo’gulotluk, pungtak wam sapi odoksogo oruakma lagarik e, sapi emalik esei a’bik a’ge holuk pulogo wik-wok e, eragam a’ge at iabuk tiso a’ge en perleneat soruagoluk wogosu waga. 8Asogo wogosu wagama, arat serigisema re, Abraham en susu a’bosu ogola a’ge emin, o’borl pam esei larlu ago a’ge emin, sapi emalik serigisa a’ge emin, woluk e, ap ebano so’burentesi. Asogo wogentesimu no’gukhwe, Abraham e edipmu welat is enebaget lerentasu laga.
9Pobuk is ap ’bok ebano en e, Abraham disogo mo’guligisa,
“Hat hugwe Sara ebe ’geba oruak,” oluk mo’gulegisema, at Abraham en e,
“At ebe o sum owi werikmu oruak o,” oluk mo’gulentesi.
10 #
Rom. 9:9
Asogo mo’gulentesimu, ap is a’ge mesik en e,
“An dugwi sogoen pololisoam weleiktik en de, pobuk hene’bek weik o. Asogo wagoam, eriayat hugwe Sara emalik ap dorua o,” oluk mo’gulesi.
Asogo osokhwe re, at hwe Sara ebe is ap ’bok ono’borlma o sum owi werik a’ge ano ’godukmu hweriogo welat esa’go hwelak welaga. 11Is Abraham ugwe Sara emin modok sebal egesarik, at hwe Sara emep wago a’ge ano ’garok egeitik emalik mep odoktoluk ogola om mia. 12#1Pet. 3:6Asogo egesarik welegesa ai en e, at hwe Sara ogola en eida tagalat e, disogo egei,
“An arat sebal egirik nagap arat ’bulong egeimu re, nogun emin e, elit nogou no? Nogun ogo re, ebe arat sebal agamayat de, nogorlok o,” oluk egei.
13Asogo egeimu, at Nenaik ’gain Onuk Logo a’ge en Abraham hin disogo wokhesi,
“Hwe Sara en e, nebe narluema re, nemalik elit doru no? Mia o, epesirik eida tegei ai nopaget. 14#Luk. 1:37An Henaik ’gain Onuk Logo a’ge en, mesik tu a’ge mia ago no? Tu nagat o. Dugwi sogoen weleiktik en pobuk hene’bek weik o, oluk naduk mo’gulhentegis ano ’gela’ge, weigat o. Wagoam e, Sara emalik ap dorua o,” oluk mo’gulesi. 15Asogo mo’gulesimu, at hwe Sara ogorlok en e,
“An eida tu erlak o,” oluk elabe tegei. Asogo elabe tegeimu, at Nenaik ’gain Onuk Logo a’ge en e,
“Hat naduk demat eida tigen epegi,” oluk mo’gulesi.
Abraham en e, aphwami Sodom wiak tigisa a’ge erlagapsogo ukpoluk delonobuagoluk Allah mo’gulesi wene
16Asogo arat oluk e, is ap ’bok a’ge enebe henagan eriano louwogoluk togumu Abraham en peragenebaigoluk wogonoboluk laga. Laga legesarik e, o Sodom enil yethoma ’bekhitmu legesa. 17Legesarik, at Nenaik ’gain Onuk Logo a’ge Allah en e,
“An en pobuk tik a’ge ai Abraham en elabe tisoma no yo. 18At en dogo’gwe a’ge ena’gul onuk lok emarik enanni a’bik welema erlak no? Ye, at pegilsogo re, aphwami ’gwiangma a’ge ’berlegat ena’gul onuk lo’bok an en obap enebaik erlak no? 19At en e, eiyagai emin, at en dogo’gwe a’ge emin, an en wene is weragenebegi a’ge ano tenak welat hegitsogo togulom a’ge enesa’go worogu lemagoluk pulogo edikpegi epegi. Is en asogo ’berlegat tua holuk, an en Abraham wene werak pegi a’ge ai ebe modok wogentaik o,” oluk epesi.
20Ede asogo epesirik e, Nenaik ’gain Onuk Logo a’ge en Abraham disogo mo’gulesi,
“Is aphwami o Sodom, Gomora a’ge wiak lok togwi oluk mo’gulnogwi o. 21Ai en, wene enebam pegesa a’ge an nesa’go hwelegis ai demat a? Erlakma ya, oluk an eba laiktik wene ai edip ’bele’gi laigoluk o,” oluk mo’gulesi.
22Asogo mo’gulesirik, is ap ’bok enebe ’biren eriano o Sodom, Gomora lagaihwe at Nenaik ’gain Onuk Logo a’ge at Abraham emin mo egei. 23Asogo mo egeimu emin welat, at Abraham ebe Nenaik ’gain Onuk Logo a’ge e’bek horoksogo wagarik e, disogo mo’gulesi,
“Hat en e, aphwami wiak togwi a’ge modok erlagap pasulat, is logon wiak tu erlak a’ge eneminat wene enebam poluk erlagap paigoluk no a? 24O kota etleba aphwami enebe 50 pam wiak tu erlak a’ge logon oruak holuk, hat en aphwami o kota etleba a’ge modogat erlagap pagun a? Is aphwami enebe 50 a’ge eria enelaluk welemagoluk, hat en aphwami eba wiak tigisa a’ge ai erlagapsogo ukpo mia no? 25Hat en aphwami wiak tigisa a’ge ai wene enebam poluk warenebiselat aphwami wiak tu erlak a’ge ai eneminat waronobu ebelerakma re, is wiak tigisa a’ge enemin waronobogun no yo. Hat ’gwiangma a’ge ’berlegat wene enebam pasulat, no’gorliselat, taga legen ai wiak u no? Hegitsogo nagat taga legen ani o,” oluk mo’gulesi.
26Asogo mo’gulesimu, at Nenaik ’gain Onuk Logo a’ge en e,
“Aphwami enebe 50 ai wiak tu erlak a’ge o Sodom demat oruakma entaik holuk, is pegilsogo re, aphwami o kota eba a’ge ’berlegat wiak togwi a’ge ai erlagapsogo ukpaik o,” oluk mo’gulesi.
27Asogo mo’gulesimu at Abraham en mesik pobuk disogo mo’gulesi,
“Naik, an yu re, nebe aphwami a’ge di wene yu wene u mia a’ge nogorlok erlagat wene yu ologun pam mesik eminat mo’gulheik yu re, wene yaknorogun o, naik. 28Aphwami wiak tu erlak a’ge oruak egi ai, enebe 50 pam nak oruak puk, we, 45 nak oruak hwi a, epasu legi o. Holuk e, aphwami enebe huaben nak erlak aga ai en aphwami o kota eba a’ge ’berlegat erlagap po epegen a?” oluk mo’gulesi.
Asogo mo’gulesimu, Nenaik ’gain Onuk Logo a’ge en e,
“O etleba enebe 45 wiak tu erlak a’ge entaik holuk, aphwami o kota eba a’ge enebe modok erlagap paik erlak o,” oluk mo’gulesi. 29Asogo mo’gulesimu, at Abraham en mesik disogo mo’gulesi,
“Aphwami wiak tu erlak a’ge ai enebe 40 pam oruak holuk e, hat en no’gosogo tagonobo no,” oluk mo’gulese lagama, Nenaik ’gain Onuk Logo a’ge en e,
“Aphwami enebe 40 ai pegilsogo re, an nolot het agalat warenebigoluk epegi a’ge ai mo ik o,” oluk mo’gulesi.
30Asogo mo’gulesimu, at Abraham en e, disogo mo’gulesi,
“Naik, an en pobuk mesik eminat mo’gulheikmu re, hanni nebam pagun o. Aphwami wiak tu erlak a’ge enebe 30 nak oruak holuk e, hat en no’gosogo togun,” oluk mo’gulesimu, Nenaik ’gain Onuk Logo a’ge en e,
“O kota etleba aphwami wiak tu erlak a’ge enebe 30 pam oruakma entaiktik holuk, warenebik egi a’ge ai ukpaik o,” oluk mo’gulesi.
31Asogo mo’gulese lagama, at Abraham en e,
“Naik, an nogorlok erlaksogoat mo’gulhese leik ai re, wene yaknoum erlakma enat erlagapsogo ukpomup o, naik. Aphwami wiak tu erlak a’ge enebe 20 nak oruak holuk, no’gosogo tagenebagun no, naik,” oluk mo’gulesimu, at Nenaik ’gain Onuk Logo a’ge en e,
“Aphwami enebe 20 pam wiak tu erlak a’ge ai demat oruakma entaiktik holuk e, o kota etleba a’ge erlagap paik erlak o,” oluk mo’gulesi.
32Asogo mo’gulesimu, Abraham en e, ologun ’goboksogo disogo mo’gulesi,
“An en wene mesigat nak mesik pobuk mo’gulheigat ai re, holot het nebam pagun o, naik. Aphwami wiak tu erlak a’ge enebe 10 pam oruakma hil entaguntik holuk e, no’gosogo togun epegen, naik,” oluk mo’gulesimu, at Nenaik ’gain Onuk Logo a’ge en e,
“Aphwami wiak tu erlak a’ge enebe 10 ai demat oruak holuk, an en aphwami o kota eba a’ge modok erlagap paik erlak o,” oluk mo’gulesi. 33Asogo arat oluk, at Nenaik ’gain Onuk Logo a’ge lagama, at Abraham togolik owi pam waga.
Zvasarudzwa nguva ino
Kejadian 18: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda