Kejadian 19
19
Aphwami Sodom a’ge wiak togu legesa wene
1Is ap malaikat enebe ’biren Abraham en enemin sarlok tigisarik utsogo laga legesarik e, o Sodom hup ’gwi legesa. ’Gwi legesa ’gal e, at Lot ebe o kotama ’guogoluk ’gogumu ’goduk emde ’belakma hweriogo welat, is ap ano il entesirik e, is wogenebigoluk siaksogo inotluk onorogolema wagarik odogorlu pam hurotluk e, 2disogo mo’gulentesi,
“Nuelak, an nowi pam set hwaloguptik en lagup o. An nowi pam nemin nogogulat, honoyuk petne emerogup o. Hubet lo henagai holuk, hubet siaksogoat lagup o,” oluk mo’gulentesimu, is en e,
“Nare wa, nis o kota seli’gwe yemayat nogul o,” oluk mo’guligisa.
3Asogo mo’gulegisema, at Lot en,
“Set hwalogup o,” oluk iak asogo ningsogoat mo’gulentesimu re, at owi pam emin ’gwigisa. ’Gwigisarik, at Lot en so’boru roti a’ge werariselat, op a’ge logon seriselat, tegeirik elitsogo wogentesimu re, is ap ebano ne’gesa.
4Asogo a’geat de, ap ’bok ebano nogo owan u erlakma en oruakma, ap enarlue a’ge emin, souwe a’ge emin, o kota eba a’ge enebe ’berlegat wegesarik o ano wali’gogo welegesa. 5#Hak. 19:22-24Asogo welat, eniak loksogoat Lot ebam wene disogo hin wegesa,
“Ap hat howi pam nogouwogoluk wegesa a’ge ebano, enebe ’geba oruak. Is nis nenemin hwami tenontogwi ’gela’ge tuagoluk enebe woknentemin o,” oluk mo’guligisa.
6Asogo mo’gulegisema, at Lot owi pam en libotluk, ’goduk lerak pesirik, 7aphwami Sodom a’ge ebano disogo mo’gulentesi,
“Narilak, his asogo wiak modok togup erlak o. 8Henesa’go opsogo hwelit. An en a’ge nogulani salesik ap oborogwi eneperlak a’ge enebe ’biren ya his wokhontoma, his en is disogo yusogo elit tagonobo a’geat de, is ap ’bok ai, an en is tenentarok wolom ’gela’geat welegi ai en e, his en is disogo yusogo logon tu modok mia o,” oluk mo’gulentesi.
9Asogo mo’gulentesi a’geat de, is aphwami Sodom a’ge ebano en Lot disogo mo’guligisa,
“Hebe lak! Hat hebe ap ’bok a’ge en,
His disogo tit, asogo tit, oluk mo’gulnonto no? ’Gwelakhiarok oruakhwe ya pamat lak o! Lagun erlak holuk, nis en ap ’bok enebe ’biren eria wei nak tenagonobogulat, hat nak e, modok wiaksogo tenakhobul o,” oluk mo’guligisa. Asogo mo’guligisarik e, Lot ebe perlikho hwikholuk e, enebe horoksogo hopha ’goluk ’berla ’goduk moluk tuogoluk tigisa. 10Asogo tigisa a’geat de, ap ’bok enebe ’biren eriano ene’gik ’belingholuk Lot lisogo ogola ’gwelebak poluk e, ’goduk larigisa. 11#2Raj. 6:18Asogo lerak poluk, is aphwami o selimu welegesa a’ge ebano ’berlegat enil modok wiagap enebesimu re, ebela ano ene’gik dapak heratigisa a’ge re, ’gane ’gela’geat nalaga.
Lot o Sodom ukpoluk laga wene
12-13Is ap ’bok enebe ’biren eriano en Lot disogo mo’guligisa,
“Nenaik ’gain Onuk Logo a’ge en aphwami o kota Sodom yema a’ge enebabut modok wiak togwi ano esa’go hwelegeirik, nis en aphwami o kota yema a’ge modok wollo’gen dagalogo erlagap pou wagoluk yo’go nenebesimu wegerik arat erlagap pul ai en e, hat heiyagai ap emin, hwami emin, hiemallak emin, huelak harilak emin, o kota yema mesik oruak holuk e, wogonoboluk lagun en yo’go wege o,” oluk mo’guligisa.
14Asogo mo’gulegisema, at Lot ano siaksogo ap at ogulani enebe ’biren eriano enemin lo’bolak welegesa a’ge ene’bek lagarik disogo mo’gulentesi,
“Nenaik ’gain Onuk Logo a’ge en aphwami o kota yema a’ge modok erlagap pouwa ai en e, perlene hweiye libomogoluk hentau wegi o,” oluk mo’gulentesi a’geat de, Lot iak esei magayaksogo oso oluk epegesa. 15Asogo opogwiam wagama, loruk o’gwe hubet siaksogo is ap malaikat enebe ’biren eriano en e, Lot disogo mo’guligisa,
“Hogulani enebe ’biren eria emin, hugwe emin, aphwami o kota yema a’ge erlagap enebasulat wathonobuano oluk e, yema en hweiye perleneat lit o,” oluk eneme’gen ’balenebigisa. 16#2Pet. 2:7Asogo ’balenebigisa a’geat de, at Lot alo’gwe ebi wiak welaga. Asogo oruakma at Nenaik ’gain Onuk Logo a’ge Lot ede agama, is ap ’bok enebe ’biren eriano en, Lot ebe emin, ogulani enebe ’biren eriano emin, ugwe emin, ene’gik lisogo lebigonoboluk o kotama ebano en wogonoboluk legesa. 17Asogo libegesarik, is malaikat enebe ’biren eriano mesik en disogo mo’gulentesi,
“Henebe delhwerlagup en perleneat lit o. Lagalat e, henil hono’borl akhit yethau wagalat, o do’go horok eba mo ogulat, togup modok erlak o. Henebe warorogupno oluk e, o dom pam walek ebayat hweiye lit o,” oluk mo’gulentesi.
18Asogo mo’gulentesi a’geat de, at Lot en disogo mo’gulesi,
“Eik e, nue. O dom pam eba hweiye louwagoluk mo’gulnentagun o. Nebit o. 19Hat nebe hede en demat delnebigen a’geat de, o dom pam eba walegatma re, nebe eba owan lo erlakma aphwami Allah en erlagap pouwa ai a’ge ne’berlik lagalat watnebi louwano. 20Yethemin, nonologotma horogat o kota wei a’ge mesik oruak ai yethemin. An hweiye eba elit louwagoluk peraknebemin o,” oluk mo’gulesi.
21Asogo mo’gulesimu, at malaikat ano en e,
“Op o, aphwami o kota weimu a’ge ai an en wollo’gen dagalogo warenebik erlak o. 22An en hat o eba owan lo erlak oruakhwe, disogo yusogo tik erlak ai en, perlene lak o,” oluk mo’gulesi. At Lot en,
“O kota ai weiyat,” oluk egei ai en o kota ai onuk Zoar tualigisa.
Allah en aphwami Sodom Gomora a’ge wollo’gen dagalogo warenebegei wene
23At Lot o Zoar lai laga ’gal e, o mo arat ligaga. 24#Mat. 10:15; 11:23,24; Luk. 10:12; 17:29; 2Pet. 2:6; Yud. 1:7Erianoat Allah en moru odouk a’ge hwedali al ’gela’ge e’ben wiak a’ge onuk belerang emin-emin nasu a’ge o Sodom Gomora ’belakpou waga. 25Asogo ’belakpou wagama, o kota ’biren eria arat wiagap pasulat, o do’go ’berlegat emin, di agan yu agan emin, e’gela herle’gela emin, wiagap pasulat, aphwami enebe perlengsogo warenebiselat, tegei. 26#Luk. 17:32Asogo a’geat de, at Lot ugwe ano il togolik o’borl akhit yethau wagama re, mayu ’gela’ge hedinsogo modok mo egei.
27Asogo tegeimu, hubet o’gwe at Abraham o hau ’gela’ge Nenaik ’gain Onuk Logo a’ge orogolema modok mo egeimu erianoat pungtak laga. 28Asogo lagarik, il o Sodom Gomora hegit o do’go ’berlegat yethesi ’gal e, o lei pogwiam hobu a’bik ligago ai ’gela’ge ligagoma il yethesi. 29Allah en o do’go kota at Lot welagama ebano asogo modogat erlagap pesi ai o. Asogo erlagap pasulat, Allah en Abraham ebam eberegeitik pegilsogo re, Lot delegeimu hweiye laga ai o.
Aphwami o Moab a’ge emin, Amon a’ge emin, ene’balak edipmu en dagetil wegesa wene
30At Lot o Zoar eba wolom ogorlok agama re, ogulani enebe ’biren eriano eneminat o dom pam eba legesarik owikmu welegesa. 31Asogo welat, agalogo naduk a’ge en ot disogo mo’gulesi,
“Nis nenaik arat sebal aga. Ye, nis nenemalik mesik dakhorlo a’ge ap wogonobua’ge o yema modok erlak o. 32A’ge re, nis nenemalik mesik dakhorlouwogoluk nenaik a’ge nenemin nogul en e, at ede erlak emagoluk mesik tuok o,” oluk mo’gulesi. 33Asogo mo’gulesirik, o hup agoam erianoat enaik anggur a’bosu nouwagoluk wogigisa. Asogo wogigisarik, agalogo naduk a’ge emin nogogisa a’geat de, aik modok ede erlak agarikmu no oluk e, agalogo emin nogogisa a’ge ano eperlagat welaga.
34Asogo tigisarik, loruk o’gwe agalogo naduk a’ge ano en e, ot disogo mo’gulesi,
“Yogodak hup an nenaik emin nogoige a’ge re, yogodak hup e, hat hemin nogogup en e, at ede erlak emagoluk mesik tuok o. Asogo tulmu re, pobuk nis ne’biregat nenemalik dakhorlul o,” oluk egei. 35Asogo mo’gulesirik, o hup erianoat, at Lot ede erlak emagoluk tigisarik, agalogo pobuk a’ge emin nogogisa. Asogo nogogisa a’geat de, at Lot ede erlak agarikmu no oluk e, agalogo emin nogogisa a’ge ano eperlagat welaga. 36Asogo oruakhwe, Lot ogulani ano onu’gwarek enaik a’ge emin nogogisa ai pam e’biregat enemalik onogola aga. 37Asogo onogola agama, agalogo naduk a’ge ano emalik ap deregeitik onuk Moab tualegei. At e, aphwami ena’gul onuk Moab a’ge yogodak oruak a’ge ai ene’ba dagaga ai o. 38Ye, at Lot agalogo pobuk a’ge ano en ogo emalik abat deregei. Deregeimu re, onuk Ben-Ami tualegei. At ai aphwami ena’gul onuk Amon a’ge ene’ba dagaga ai o.
Zvasarudzwa nguva ino
Kejadian 19: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda