Kejadian 17
17
Allah en e, “Enede we’gerlogo enagap ene’gerlimu a’ge ’balonobogulom o,” oluk mo’gulentesi wene
1At Abram ebe umur 99 tahun pam, Nenaik ’gain Onuk Logo a’ge orogolema inagarik e, disogo mo’gulesi.
“An Allah en di a’ge yu a’ge elit tu nak ano re, anat o. An niak hologo welat, nogola nagai epasu a’ge aiyat tago modok wolomup o. 2An en wene wusogo wokhebiselat, hat en dogo’gwe a’ge modok a’bik wokheselat, tik o,” oluk mo’gulesi. 3Asogo mo’gulesimu, at Abram odogorlu pam huragarik Allah erliktegeimu, at Allah en e, disogo mo’gulesi,
4-5 #
Rom. 4:17
“An en wene yu werakhebaik.
An en e, hat aphwami ena’gul onuk esanat ene’ba takhebaik ai en e, honuk Abram ogu lema erlak o. We, Abraham ogu lema o. 6An en e, hat he’balak enebe a’bik dagagalat, is a’ge logon ’gain emagoluk wokhegis o. Hat en dogo’gwe a’ge asogo enebe modok a’bik agalat, pobuk ena’gul onuk lo’bok a’bik ema o.
7 #
Luk. 1:55
An en hat hebe emin, hat en dogo’gwe a’ge en dagetil laga lema a’ge emin, asogo wokhentaik, oluk wene werakhenebegi a’ge ai niak dagan ho erlakma en modok ebesigat wokhentasu modok weleik o. Hat haik Allah anat o. Ye, hat en dogo’gwe a’ge enaik Allah anat o.
8 #
Per. 7:5
An en e, ’gwiang hat hebe ap ’bok ’gela’ge welegenma yema, hat emin, hat en dogo’gwe a’ge emin, wokhentaik o. ’Gwiang ’berlegat o Kanaan yema hat en dogo’gwe a’ge eiye oroguntik modok oruakhwe, an Allah is enaigat eiktik weleik o,” oluk wene werak pesi.
9Asogo mo’gulesirik mesik disogoat mo’gulesi,
“Hat hebe emin, hat en dogo’gwe a’ge dagetil laga lema a’ge emin, wene werakhenebegi a’ge ai, his en modok logap poluk hologo togu lomup o. 10#Per. 7:8; Rom. 4:11Hologo togulat, hat hebe emin, hat en dogo’gwe a’ge ap ’berlek emin, enagap ene’gerlimu a’ge ’balonobogulom o. 11-12O yogodak ya hwerli en e, malik ap dagagai holuk e, enebe lo’bok umur agauwa siragen wolomtik en, 8 pam enagap ene’gerlimu a’ge ’balonobogu lomup o. Asogo ’balonobogulat, heragam a’ge eneiyagai howi pam en dagonobogwi holuk emin, o’go ’balonoboguntik holuk emin, asogoat ’balonobogu lomup o. Enagap ene’gerlimu a’ge asogo ’balonobogup ai pam, an en his wene wusogo wokhenebegis a’ge ai enede we’gerlema o. 13Ap enebe lo’bok e, enagap ene’gerlimu a’ge ’balonobogulom o. An en wene wusogo wokhenebegis a’ge ai modok welema, oluk enede we’gerlogo ap enebe lo’bok enagap enebe pamat asogo ’balonobogulom o. 14Ap enebe lo’bok an en wene wusogo wokhenebegis a’ge ai hwelak poluk enagap ene’gerlimu a’ge ’balonobogwi erlak holuk, wene an en wusogo wokhenebegis a’ge ai sagalogo ukpesi oluk, is enebe an neiyagai wolom mia o,” oluk mo’gulesi.
15Asogo mo’gulesirik, pobuk disogo mo’gulesi,
“Hat hugwe onuk Sarai, oso lorogun erlak o. Hwerli yogodak en e, onuk Sara oso lomup, oluk onuk tualegis. 16An en pobuk obap pasuam, at emalik an en hat wokheik a’ge dorua o. An en at Sara ai obap pasuam, at ebe aphwami ena’gul onuk esanat ene’bia ema o. Ye, at en dogo’gwe a’ge logon ’gainat welema o,” oluk mo’gulesi.
17Asogo mo’gulesimu, at Abraham en odogorlu pam huragarik erliktegei a’geat de, eida tagalat ogola en disogo epesi,
“An nebe narlue umur 100 tahun a’geat de, nemalik elirat doru no? Ye, Sara ogo ebe arlueat umur 90 tahun a’ge re, emalik elit dakhorlo no? Mia o,” oluk epesi. 18Asogo epesirik, Allah disogo mo’gulesi,
“At Ismael en an nemining a’ge horlouwak o,” oluk mo’gulesi.
19Asogo mo’gulesi a’geat de, at Allah en e,
“Erlak o. Hugwe Sara emalik ap dorua a’ge ano hat en onuk Ishak tualip o. Malik ai ebe emin, at en dogo’gwe a’ge emin, enemin an en wene wusogo wokhenebise legi a’ge ai, memerak honobo erlakma en eberak modok weleik o. 20Asogo a’geat de, hat en Ismael paget ’gonu mo’gulnosokhwe hiak nesa’go hwelegis ai en, an en at Ismael obap pasulat, at en dogo’gwe a’ge a’bigat dagetil louwagoluk wogeselat, tik o. Asogo tisoam, at en dogoma a’ge logon, ap ’gain enebe 12 en dagonobogulat, ye, an en enebe ’berlegat esanap pasulat ena’gul lok logap pasulat, tik o. 21Asogo a’geat de, wene wusogo wokhenebise legi a’ge ai ebe at homlogo Ishak, hwe Sara en tahun pobuk a’ge ogo emin hegit agoam dorua a’ge ai pam en, edip at ebam ema o,” oluk mo’gulesi. 22Asogo arat mo’gulotluk, Allah at Abraham ukpoluk laga.
23Asogo lagama, o ai erligeat Abraham en Allah iak hologo, omlogo Ismael agap e’gerlimu a’ge ’baliselat, ap ’berlegat, owi pam welegesa a’ge emin, eragam a’ge owi pam en dagegesa a’ge emin, o’go ’balenebegei a’ge emin, enagap ene’gerlimu a’ge ’balenebiselat, tegei. 24At Abraham ebe umur 99 tahun pam, agap e’gerlimu a’ge ’baligisa. 25Ye, omlogo Ismael e, ebe umur 13 tahun pam agap e’gerlimu a’ge asogoat ’baligisa. 26-27O agauwa mesik erligeat is enebe asogo enagap ene’gerlimu a’ge ’balonobogulat, Abraham eragam a’ge ’berlegat, owi pam dagegesa a’ge emin, o’go ’balenebegei a’ge emin, enagap ene’gerlimu a’ge ’balenebigisa ai o.
Zvasarudzwa nguva ino
Kejadian 17: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda