Kejadian 16
16
Hwe Hagar omlogo Ismael emin en tigisa wene
1Hwe Sarai Abram ugwe ano emalik deriso erlak a’ge welaga. Asogo oruakma re, at eragam a’ge hwele salesik mesik op a’ge owi Mesir a’ge onuk Hagar welaga. 2Asogo oruakma, at hwe Sarai en Abram disogo mo’gulesi,
“Nenaik ’gain Onuk Logo a’ge en an nemalik mesik dakhorlo a’ge ede epasu erlak ai en e, hat hwele an neragam a’ge yu en malik mesik an nebaget doruagoluk e, hemin nogwip o,” oluk mo’gulesimu, Abram en,
“Op o,” egei. 3Asogo egesa ai, Abram ebe o Kanaan wagarik 10 tahun welagarik en, at hwe Sarai en, eragam a’ge hwele Hagar Abram ugwe welemagoluk wogesi. 4Asogo wogesirik, Abram hwele Hagar ano emin nogogisema re, emalik ogola aga. Asogo a’geat de, at hwele Hagar emalik ogola aga a’ge aluk agarik, erlikhwerlasulat e,
“Hwe Sarai mia o,” oluk epesi.
5Asogo epasu lagama, at hwe Sarai en Abram disogo mo’gulesi,
“Hwe Hagar e, an neragam a’ge de, hat wokhegis a’ge en de, at emalik ogola aga a’ge aluk agarik e, an ogola en mi-miarak nebasu o. Asogo taknebasu ai re, edip hat wiak pam o. Holuk e, wene yu paget at Allah en hwalnontouwak o,” oluk wene yagesi.
6Asogo wene yagesimu, at Abram en e,
“Op o, at ebaget e, hat heragam a’geatma re, hu’gwarek enat umu re, hat hede epegen hegitsogoat hu’gwarek en tip o,” oluk mo’gulesimu, at hwe Sarai en e, hwe Hagar wik-wiaksogo wene yagesimu hweiye lebaga.
7Asogo hweiye lebagarik, o leimu aphwami erlakma onuk Syur lagaimu eba ik elaruk liplau wagoma lagarik oruakma, at Nenaik ’gain Onuk Logo a’ge malaikat a’ge mesik e’bek ’bu aga. 8Asogo ’bu agarik, disogo mo’gulesi,
“Hwe Hagar Sarai eragam a’ge yu, nerei o. Hat hebe o ’geba en ’geba laigoluk o,” oluk mo’gulesimu at hwe Hagar en e,
“An e, hwe nebap Sarai owi pam en hweiye wegi o,” oluk mo’gulesi.
9Asogo mo’gulesimu, at malaikat ano en e,
“Togolik hwe Sarai e’bek laguntik, at lethasu lomup o,” oluk mo’gulesi. 10Asogo mo’gulesirik, mesik disogoat mo’gulesi,
“An en e, hat en dogo’gwe a’ge enebe modok a’bik, aphwami en ene’gik wenagonobu modok mia ’gela’geat wokheik o. 11Hat hemalik hogola ai, ebe ap dakhwerlagun o. Dakhwerlaguntik, hat nge tisokhwe haik ’gain Onuk Logo a’ge esa’go hwelegei ai en e, onuk Ismael tualip o. 12Asogo dakhwerlagun a’geat de, hemalik ai ebabut e, wam keledai seiye ebabut wiak a’ge ’gela’ge welema o. At e, arilak orokhwi ’berlegat emin modok hektak oruakma, aphwami enebe lo’bok en at woruogoluk togulat, at en ogo is enebe lo’bok warenebiogoluk tiselat, enemin modok wiak welema o,” oluk mo’gulesi.
13Asogo mo’gulesimu, at hwe Hagar ogola en e,
“Allah senniarok welago a’ge demat nil hegi o,” oluk epesirik, disogo egei,
“Naik ’gain Onuk Logo a’ge Allah en demat senniarok a’ge,” oluk onuk tualegei. 14Asogo egei ai en, ik omugwema o Kadesh Bered ho’gorlak ai paget aphwami en e, onuk disogo ogwi,
“At elaluk modok welat an senniarok welago a’ge egeik omugwe o,” oluk ogwi.
15 #
Gal. 4:22
At hwe Hagar asogo tegeirik, emalik ap deregeimu, aik Abram en onuk Ismael tualegei. 16Eria hegit e, Abram ebe umur 86 tahun welaga.
Zvasarudzwa nguva ino
Kejadian 16: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda