Mithumo 9
9
Gu vbindrugedza ga Sawule
(Mithumo 22:6-16; 26:12-18)
1Sawule a di gu vila khu likhulo na guvbweta lipindru nya gusonge vapizane va Pfhumu a diya ga khongolo nya vaphasi nya mhamba, 2aya mu lomba malangalila nya guhongole khayo dzinyumbani nya nombelo dzi guromo dhoropani ga Dhamasiko. A gimbila a molela vakhodwa nya vama ni vanyamayi va landrago ndzila yeyi a va hunga dzitshinga a va resa Jerusalema. 3Na gimbide, nari vbakari nya ndzila, vbafuvbi ni gu vboha Dhamasiko, a di fenengedzwa khu gulasa nya gukhongolo nya gute khu Ndzadzini. 4A di thega vbavbatshi a pwa lito na li gukhilo “Sawule, Sawule, khu ginani u nyi sanisago?” 5Uye a di hakha, khuye: “Nuri uwe mani, Pfhumu?” A di hakhwa pwani: “Kheni Jesu wule u mu sanisago, 6ambari ulo khuga u bele dhoropani, va na gu embela esi u fanedego gu gira.” 7Avo a nga bani ari navo Sawule va di thuruga kholu va di pwa lito, aholu va si woni muthu. 8Sawule a di khuga a ema a zama gu wona aholu a di si woni gilo. Va diya khu gu mu phara kunga va mu bedza Dhamasiko. 9Khade gipimo nya matshigu mararu nyamba wona, nyamba hodza, nyamba sela. 10Dhamasiko a di gu vbanya mupizane nya gupwani khu Ananiya, a di embedwa khu Pfhumu khu ndroroni, pwani: “Ananiya!” Uye a hakha, khuye: “Ganela Pfhumu, nyi ngu pwa.” 11Pfhumu a di engedza gambe, khuye: “Khuga u hongola ndrangani ga Judha yi manegago ndzilani yi ranwago pwani ‘Gululama’ u ya wudzisa khu lina la mwama moyo nya gupwani khu Sawule nya givelegwa gya Tarisu, kholu womo vbakari nya gulombelele.” 12Khu gikhati gyogyo, Sawule a di woniswa mwama nya gupwani khu Ananiya na gu bela, a mu handzega mandza gasi a wona. 13Ananiya a di hakha, khuye: “Pfhumu, nyi pwide vathu nya vangi na va gu amba muthu yoyu khu guvivba gwatshavbo a girelago sihathwa Sago Jerusalema. 14Olu dzude eno khu gu rumedwa khu khongolo nya vaphasi nya mhamba ni lidangalila gasi guta molela vatshavbo avo va khodwago linani gwago.” 15Aholu, Pfhumu a di mu embela, khuye: “Indra, kholu muthu yoyo nyi mu hathide gasi a vbohisa Lina langu ga mayigo, ga vafumeli ni ga sanana sa Israyeli. 16Aholu, eni nyi na mu nonedza tshanisa a na gu yi wonago khu kotani nya lina langu.” 17Khavbo avbo, Ananiya a di khuga a hongola, na vbohide a di bela nyumbani a gu handzega mandza Sawule a mu embela khuye: “Sawule ndriyangu, Pfhumu Jesu, wule a nga gu tumbulugela ndzilani, gikhati u nga bani u guta, khuye a nga nyi ruma guta gu tula maho ni gu gu ninga Liphuvbo nya Guage.” 18Gikhati gyogyo gu di thega khu mahoni gwaye silo nya nga magwaru. Khavbo avbo, a di wona, a gu bhapatiswa.
Sawule a ngu hengela ni vapizane va Dhamasiko
19Hwane nya gu bani a hodzile, Sawule a di mana tshivba a gu khala matshigwana ni vapizane, dhoropani ga Dhamasiko. 20Khavbo avbo, a di phela gu hevbudza dzinyumbani nya nombelo khuye Jesu. Mwamana wa Nungungulu. 21Avo va nga bani va gu mupwa va di liwuga, khavo: “Ina khandruye oyu a nga bani a gu sanisa avo va nga bani va gu ganela khu Lina la Jesu dhoropani ga Jerusalema, gani? Gasi khandri a dita eno gufela guta va molela a va hunga dzitshinga aya va ningela ga vakhongolo nya vaphasi, gani?” 22Aholu, tshivba nya gutshumayele ga Sawule yi diya na yi gu tadzisega, a hambanisa mapimo nya Vajudha va Dhamasiko khu edzi a nga bani a gu fakaza khidzo khuye Jesu khuye Muvbanyisi a nga tumbiswago. 23Na ma vbindride matshigwana, Vajudha va di hunga gikungo nya gu mu songe. 24Aholu Sawule a di tiviswa. Ni malimba nya lidhoropa ma di ghadhwa wutshigu ni mihani, vafela gu mu songa. 25Khavbo avbo, vapizane vaye va di mu dzega va duga naye ni wutshigu, va mu thela gitundruni va mu ndragisa libhiyo.
Sawule a ngu hengela ni vapizane va Jerusalema
26Na vbohide Jerusalema, Sawule a di vbweta gu bela tsawani nya vapizane, aholu, vatshavbo va di khala hwanga, va si khodwi gukhavo uye nuye mukhodwa. 27Khavbo avbo, Bharinabha a di mu dzega a mu yisa ga Vapostoli aya va tshamusela idzo a nga wonago khidzo Pfhumu ndzilani a ganela naye, ni tshivba a nga ganelago khiyo khu lina la Jesu, dhoropani ga Dhamasiko. 28Gukhugela litshigu lolo a di khala navo Jerusalema, a gimbilagimbila navo a hevbudza khu lina la Jesu na si thavi gilo. 29A di bhula ni gu ganedzisana ni Vajudha nya guganele Gigereki, gasi avo va di gu luga mano nya gu mu songe. 30Na va dzitide, vandruye va di mu rumela Sezareya va mu khiledza a gu hongola Tarisu. 31Libandla li di gu vbanya khu gu rula Judheya gwatshavbo, ni Galileya ni Samariya; Li diya na li gu dandra ni githawo ga Nungungulu, na li gu tiyiswa khu tshivba nya Liphuvbo nya Guage.
Pedro a ngu hawulugisa Eneya
32Pedro na gu gimbila a holela vakhodwa malangani yatshavbo, a di vboha ga sihathwa si vbanyago Lidha. 33Iyo a ngaya mana mwama moyo nya gupwani Eneya, nya gigoha, a nga bani ari ni livbandre na miraru myaga na ladzisidwe vbadawutunu. 34Pedro a di mu embela, khuye: “Eneya, Jesu Kristo a ngu gu hawulugisa; khuga u peta lidawu lago.” Uye a di dzegela gu khuga. 35Vathu vatshavbo va Lidha ni va panini ga Saromi, na va mu wone, va di vbindrugedza va khodwa ga Pfhumu. 36Tigoni ga Jope a di romo, vbakari nya vapizane, nyamayi moyo nya gupwani Tabhita, gu tshamusago gupwani “Yisya!” Adiri muthu nya mithumo ya yadi, a di phasedzela sisiwana. 37Khu matshigu yale, a di dwala, a gu fa. Khavbo avbo, va di mu dzega vaya mu vega nyumbani ga vbatshani. 38Lidha gu di gu, khala vbafuvbi ni Jope, vapizane na va pwide nya gupwani, Pedro womo iyoyo, va di rumela vama vavili gasi guya mu lomba, khavo: “U nga hweli guta eno gwathu.” 39Pedro a di dzegela gu khuga a gu hongola navo. Na vbohide, va di mu yisa nyumbani ga vbatshani; dzinoni dzatshavbo dzi di hidzimela vbafuvbi gwaye, dzi mu yeyedza dzingandzu ni myendra a nga sonago Tabhita, na nga gu vbanya navo. 40Aholu, Pedro, na rumide vathu vatshavbo gu duga vbavbandze, a di khidzima a gira nombelo. Na thendregedzide a khedza girumbi, a di khuye: “Tabhita, wuga!” Uye a di hapfhula; na wonide Pedro, a di khala khu giwunu. 41Pedro a di mu phara khu mandza, a mu phasa gu khuga a ema. Khavbo avbo, a di rana sihathwa ni dzinoni a va ninga muthu wawe na gu vbanya. 42Mahungu nya giliwugiso gile ma di pwala dhoropani gatshavbo ga Jope, vathu nya vangi va di khodwa ga Pfhumu. 43Pedro a di khala Jope matshigu nya gulaphe, ndrangani ga moyo nya gupwani khu Simoni a nga bani ari meseri nya malowo.
Zvasarudzwa nguva ino
Mithumo 9: BGE2014
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
A Bíblia em Gitonga © Bible Society in Mozambique, 2014.