Mithumo 8
8
Sawule a ngu sanisa libandla la Jerusalema
1Sawule nuye a di tsakiswa khu gufa gwa Sitefane. Litshigu lolo va di gira liphulo nya gugimbile va molela vakhodwa vatshavbo va Jerusalema. Vatshavbo va di thava va phalalega ni litigo la Judheya ni Samariya, va tshala Vapostoli basi. 2Gikhati gyogyo, vathu nya githawo ni Nungungulu va di dzinga Sitefane va gira gililo nya gikhongolo. 3Gasi Sawule, khu gu zondra libandla, a di gimbila khu ndranga ni ndranga a molela vama ni vanyamayi a va khothela pasoni.
Vasamariya va ngu vbindrugedza mavbanyelo khu gutiviswa Ivhangeli
4Avo va nga phalalega va di gimbila khu talala ni talala va gu hevbudza Mahungu nya Yadi. 5Filipi a di relela aya dhoropani ga Samariya, aya tivisa Kristo vathu va tigoni mule. 6Khu monyo moyo, vathu va di hakha gwadi sihevbudzo sa Filipi, kholu va dipwa ndruma nya siliwugiso a nga bani a gu gira, ni gu si wona khu maho. 7Khu lisine, vathu nya vangi va nga bani vari ni maphuvbo nya guvivbe, va di vbanyiswa, ma duga na ma gu womba dzihuwa. Ni va nya gufa sivbango, ni sigoha va di hawulugiswa. 8Gu di manega gutsaka nya gukhongolo dhoropani mule. 9A di gu vbanya khu gale dhoropani mule mwama moyo nya gupwani khu Simoni a nga bani a gu thumisa wun'yanga a pemba vathu vatshavbo va Samariya, a dzi randra muthu khongolo. 10Vathu vatshavbo, vakhongolo ni sanana, va di gu mu yingisa khu githawo, va ganela, khavo: “Muthu yoyu khuye tshivba ya Nungungulu, yi ranwago pwani ‘Tshivba yikhongolo.’ ” 11Va di mu yingisa khu githawo, kholu a diri matshigu ya gale va nga bani va gu samadziswa khu siliwugiso nya wun'yanga waye. 12Aholu gikhati va nga tshumayedwa khu Filipi Mahungu nya Yadi nya Mufumo wa Nungungulu ni gu hevbudzwa khu Lina la Jesu Kristo, vama ni vanyamayi va di khodwa, va gu bhapatiswa. 13Simoni nuye a di khodwa, na bhapatisidwe a di bela tsawani wa Filipi. A di liwuga ngudzu khu gu wona siwonegiso ni siliwugiso si nga bani si gu girwa khu Filipi.
Pedro ni Johane va ngu rumedwa Samariya
14Vapostoli va nga bani va romo Jerusalema, na va tivisidwe gupwani Samariya va hakhide magana ya Nungungulu, va di rumela iyoyo Pedro ni Johane. 15Na va vbohide, va di ya va lombelela gasi va hakhe Liphuvbo nya Guage. 16Kholu li di si gu tshigeli ni moyo wawe. Va di bhapatisidwe basi linani ga Pfhumu Jesu. 17Khavbo avbo, va di va handzega mandza va gu hakha Liphuvbo nya Guage. 18Simoni, na wonide nya gukhuye Liphuvbo nya Guage la gu hakhwa gikhati Vapostoli handzegago mandza vathu, a di va ninga dzitsapawu, na gukhuye: 19“Nyi ningeni neni tshivba yoyo, gasi oyu nyi na mu handzegago mandza a hakhe nuye Liphuvbo nya Guage.” 20Aholu, Pedro a di mu kawuka khuye; “Indra ni dzitsapawu dzago gumbembani kholu u alakanyide gurenga khu dzitsapawu giningwa gya Nungungulu. 21Uwe u mwalo wulanga nya gu hengele nago thumoni momu, kholu monyo wago kha wa lulama mahoni gwa Nungungulu. 22Dzi laye u vbindrugedze guvivbani gwago u lombe ga Pfhumu mwendro a na gu divalela mahingigedzo nya monyo wago, 23khaguva nyi ngu wona gukheni u tade khu nyongwe nya guvave ni manyala.” 24Simoni a di hakha, khuye: “Nyi lombeleleni enu ga Pfhumu gasi si si nyi dugeleli esi mu ngarigu gu ganela.” 25Avo, hwane nya gu na va ningide wufakazi wawe ni gutivisa mahungu ya Pfhumu, va di bwelela Jerusalema na va gu tshumayela Ivhangeli mitalalani ya Samariya.
Filipi a ngu bhapatisa ndruna ya Etiyopiya
26Ngilozi ya Pfhumu yi di embela Filipi, khiyo: “Khuga. Indra kha guya Marandzi, u landra ndzila yi relelago khu Jerusalema yi gu hongola Gaza.” Gikhati gegi mwalo muthu a gimbilago khu ndzila yoyo. 27Filipi a di khuga a phara ndzila a hongola. Khavbo avbo, moyo nya thenwa nya Muetiyopi, ndruna nya guthavisege ya Kandasi, mufumeli nya nyamayi wa Etiyopiya, a diri muthangeli nya thomba yatshavbo ya mufumeli. A di endrede Jerusalema guta khozela Nungungulu. 28A di gu bwelela gaya, na khade karetani na gu hevbula libhuku la Muprofeti Isaya. 29Liphuvbo li di embela Filipi, khilo: “Gimbidzisa u longoloka ni kareta yoyo.” 30Na hidzimede, Filipi a dipwa Muetiyopi na gu hevbula libhuku la muprofeti Isaya, a di mu wudzisa, khuye: “Ina u ngu si mana esi u hevbulago, gani?” 31Muetiyopi a di phindrula, khuye: “Nyi na si mana kharini nyamba mana wangu nya gu nyi tshamusele.” Khavbo avbo, a di rana Filipi a khilela kareta va khala gumogo. 32Ndrima nya Milowo a nga bani a gu hevbula kheyi yi gu, khiyo:
“Kha nga nvuta a di yiswa gusongwatunu,
kha nga nvuta yi degulago mandzani ga oyu a yi gayago mawoya,
kharato nuye kha nga tula likana laye.
33 # Wona gambe: Isa 53:7-8. Gusaniswani gwaye kha lamudwa khu gululama.
Mwalo a na gu dzi kodzago gu saya melego waye
kholu womi waye wu fuvisidwe mafuni.”
34Ndruna yi di wudzisa Filipi, khiyo: “Nyi ngu gu lomba u nyi embele. Muprofeti a gu ganela silo sesi na gu thula mani? A gu dzi thula uye mune, mwendro a gu thula mumbe muthu?” 35Khavbo avbo, Filipi a di phara khu tshoka yile nya Milowo a gu phela gu mu sasamedzela mahungu nya yadi ya Jesu. 36Na va gimbide va di mana wulanga nya mati, Muetiyopi a di embela Filipi, khuye: “Mati aya. Ginani gi nyi himbedzago gubhapatiswa?” 37[Filipi a di mu hakha, khuye: “Wa gu bani wu gu khodwa khu monyo wago watshavbo, gi mwalo gi gu himbedzelago.” Muetiyopi a di hakha, khuye: “Nyi ngu khodwa nya gukheni Jesu Kristo Gyanana gya Nungungulu.”] 38Khavbo avbo, a di emisa kareta va gu tshiga va vavili va bela matini, Filipi a bhapatisa Muetiyopi. 39Na va dugide khu matini, Liphuvbo la Pfhumu li di mwalalegisa Filipi, Muetiyopi gima kha nga mu wona gambe, ambari ulo a di gimbila ndzila yaye yatshavbo na tade khu gunengela. 40Filipi a di gu manega dhoropani ga Azotu, a khuga khiyo a gimbila a hevbudza mahungu nya yadi khu talala ni talala kala gu vboha Sezareya.
Zvasarudzwa nguva ino
Mithumo 8: BGE2014
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
A Bíblia em Gitonga © Bible Society in Mozambique, 2014.