Luu 16
16
Jusu po̍ pòi̍ju ɔ̀ se̍-a i̍ slɛ̌-ɛ nɛnǎ
1Jusu la̍a̍ dě ɔ̍ kòà we̍, “Pàn-jɔ̍gbau due bo ɔ̀ blě ɔ̍ pòi̍ju ɔ̀ gbɛ̀n-a dǒ ɔ̍ kɔn-dɛ̍ᵻ we̍ i̍-ɛ. Wɛ̀ nyɔ̍ po̍ ɔ̍ kunǎ ka ɔ̍ pòi̍ju-a gbɔ̀lɔ-a ɔ̍ kɔn-dɛ̍ᵻɛ́. 2Wɛ̀ ɔ̍ dǎ ɔ̍, iě ɔ̍ la̍a̍ dě ɔ̍ we̍, ‘Ka ɛ̍ nu̍ wɛ̀ ǎn wɔ̌n ìh kaɛn la dǒ ìn pùn ɛ? Ìn se̍ dǒ ǎn kɔn-dɛ̍ᵻ we̍ i̍ gbɛ̀n mu̍ dɛ. Ɛ̍ tìh-ɛ, sà ǎn kɔn-dɛ̍ᵻ kli̍hgbɛ̍-a dǐfluhᵻ ìn blě-aɛ kwlǎ.’ 3Wɛ̀ pòi̍ju la̍a̍ dě ɔ̍ chɛ̀ we̍, ‘Ka ǎn dlǔtu-a sà-a la̍ ǐn dbo̍ la kɛ̍n-ɛ, nɛ̀ ka iě nu̍-ɛ wèè? Mɔ̍ɔ wɔ̍ ǐn se̍ kmu wɛ̀ iě blǔ-u dbo̍ nu̍, iě mɔ̍ɔ ǎn ple̍ tɛ̀n ke iě nyɔ̍ we̍ slɔ̀. 4Bɔ̌, ǐn juo dɛ̍ ǎn mu̍-a nu̍-ɛ, wɛ̀ pò ǐn sà-ɛ dbo̍ kɛ̍n-ɛ, wɛ̀ nyɔ̍ɔ iě ǐn gbò we̍ gba̍.’ 5Wɛ̀ ɔ̍ nyɔ̍ ùh blě-a ɔ̍ dlǔtu-a gba̍ᵻɛ́, iě ɔ̍ dǎ u̍h-a due due. Ɔ̍ la̍a̍ dě sàǐtòò nyɔ̍ ɔ̍ dǎ-aɛ we̍, ‘Dɛ̍ tìèwe̍-a gba̍ ìn blě dǒ ǎn dlǔtu we̍ ɛ?’ 6Ɔ̍ la̍a̍, ‘Chlǎn bi̍ᵻá kmɛ mɛ̀ta̍a̍n (800) bo ǐn blě.’ Wɛ̀ pòi̍ju la̍a̍ dě ɔ̍ we̍, ‘Dǔ àn gba̍-a dǐfluh. Tè i̍ iě kmɛ nyìɛ̍ (400) chlǐh suei̍ dǒ ɛ̍ kɛ̍n.’ 7Wɛ̀ ɔ̍ dǎ dɔɔ, ɔ̍ la̍a̍ dě ɔ̍ we̍, ‘Dɛ̍ tìèwe̍-a gba̍ ìn blě ɛ?’ Ɔ̍ la̍a̍, ‘Kwǐ kɛnɛ̌ᵻá bɔlɔᵻá kmɛ ta̍a̍n (300).’ Wɛ̀ pòi̍ju la̍a̍ dě ɔ̍ we̍, ‘Dǔ àn gba̍-a dǐfluh ìè kmɛ sɔɔ̌n kwela nyìɛ̍ (240) chlǐh dǒ ɛ̍ kɛ̍n.’ 8Dlǔtu po̍ se̍ i̍ slɛ̌ pòi̍ju la tìhwe̍ dǒ ɔ̍ flɔ̍nwlùh chɛ̀ la we̍. Dɛ̍nu̍ɛ, kmɔ̌ we̍ nyɔ̍ blě flɔ̍nwlùh chɛ̀ dǒ u̍h-a chɛ̀-a dɛ̍ we̍ ɛ̍ sìì nyɔ̍ ùh kɔn-a dǒ sɔ̀npli we̍-ɛ.
9“Ǎn sèàɛ̍ mɔ̀ wlùh, kmɔ̌ we̍ pàn-dɛ̍ᵻ mɔ̀ blě-aɛ, mɔ̀ gbɛ̍n-ɛ i̍h ba̍ᵻ dǒ mɔ̀-a chɛ̀ we̍. Wɛ̀ pò i̍h wɛ̀ i̍-ɛ, iě Nyɔsoa iě mɔ̀-a tìh i̍ gbɛ̍n ke dě ɔ̍ kmɔ̌ sie tèla̍ di̍i̍. 10Nyɔ̍ jɔ gbɛ̍n-a gba̍n dǒ dɛ̍ juwɛ we̍-ɛ, nɛ̀ ɔ̍ mu̍ gba̍n gbɛ̍n ke dǒ dɛ̍ᵻ dɔu we̍. Nyɔ̍ jɔ se̍-a gba̍n gbɛ̍n dǒ dɛ̍ juwɛ we̍-ɛ, nɛ̀ ɔ̍ se̍ gba̍n gbɛ̍n mu̍ ke dǒ dɛ̍ᵻ dɔu we̍. 11Pò mɔ̀ se̍ gba̍n gbɛ̍n dǒ kmɔ̌-a pàn-dɛ̍ᵻ we̍-ɛ, nɛ̀ ka nyɔ̍-a mu̍ mɔ̀ pàn-dɛ̍ᵻá chɛ̀ naɛ kwa̍ tèè-ɛ nu̍ ɛ? 12Nɛ̀ pò mɔ̀ se̍ gba̍n gbɛ̍n dǒ nyɔ̍ dɔɔ-a dɛ̍ we̍-ɛ, nɛ̀ nyɔ̍we̍-a mu̍ mɔ̀ dɛ̍ nyǐ mɔ̀-a chɛ̀ iě kɔn ɛ?
13“Pòi̍ju due se̍ dlǔtuᵻ sɔɔ̌n jǔ dbee-ɛ bɛ̌ɛ. Nɛ̀ ɔ̍ mu̍ due faɛn, wɛ̀ ɔ̍ iě due-e jbɛɛ. Nɛ̀ ɔ̍ mu̍ due we̍ fòè wɛ̀ ɔ̍ iě-o due i̍ si̍e̍. Kǎ ɛ̍ nɛ, mɔ̀ se̍ wlǐ-i jbɛɛ ke Nyɔsoa wɛɛ sà-a tàdùè nui-ɛ bɛ̌ɛ.”
Jusu po̍ dɛ̍ᵻ diih-a nǎ
(Matio 11.12-13; 5.31-32; Maɛ 10.11-12)
14 Fɛlesii nyɔ̍ ùh jbɛɛ-a wlǐ-iɛ, u̍h wɔ̌n ìh kli̍hgbɛ̍ la, wɛ̀ u̍h-a po̍ Jusu pàwe̍i̍. 15Jɛ Jusu la̍a̍ dě u̍h we̍, “Mɔ̀ɔ̍ bo ùh-a dǎɛ mɔ̀-a chɛ̀ i̍ slɛ̌-nyɔ̍ dǒ nyɔ̍ɔ jlǐhwai. Jɛ Nyɔsoa juo mɔ̀-a wlùh. Dɛ̍nu̍ɛ, dɛ̍ ɛ̀ gbǎ-a dɛ̍kɛ̍n kaa̍ dě nyɔ̍ jlǐh-ɛ, ɛ̍ se̍ dɛ̍wɛ-a chɛ̀ wɔ̀ dě Nyɔsoa nɔ̀ɔ̍ jlǐh.
16“Mose-a telě ke Nyɔsoa-a tu̍owli po̍ nyɔ̍-a chlǐh-dɛ̍ᵻ nɛ-ɛ se̍e̍, wɛ̀ Chɔɔn ɔ̀ po̍-a nyɔ̍ nǐ dlǔ-ɛ dǔ wlǔh-ɛ. Sɔ dǒ ti̍ laa̍ di̍i̍-ɛ, pɔ̀n chɛ̀ ɛ̀ kɔn-a dǒ Nyɔsoa-a kmɔ̌ wlu̍ i̍ kɔn-ɛ we̍-ɛ, ɛ̍ dǔ-a bla̍-ɛɛ bo ɛ̍ blě-a. Wɛ̀ nyɔ̍ kli̍hgbɛ̍-a fɔ̀n dɛ̍ we̍ u̍h iě dě ɛ̍ di̍i̍ gbǎ. 17Jɛ blǔh ke ja̍u̍n-a tìh-a i̍ sì-ɛ se̍ i̍ kma mu̍ ɛ̍ se̍ telě-a dɛ̍ juwɛ-a chɛ̀-a dǒ wìè-i sà-a sìì mu̍.
18“Nyɔ̍ ɔ̀ sà-a ɔ̍ nynɔ̌ kwlǎ iě ɔ̍ dǔ-a nynɔ̌ dɔɔ-ɛ, nɛ̀ nynɛ̌à bo ɔ̍ nu̍. Nɛ̀ nyɔ̍ ɔ̀ dǔ-a nynɔ̌ jɔ ɔ̍ kɔan sà-a kwlǎ ke-ɛ, nɛ̀ nynɛ̌à bo ɔ̍ nu̍.
Jusu po̍ pàn-nyɔ̍ ke Laaslɔɛ-a nɛnǎ
19“Jɔ̍gbau due bo ɔ̀ pàn, sɔ jlii̍ chɛ̀ ìh kɔn pɛlǔh bɛ̌-a i̍-ɛ bo ɔ̍ pa̍-a iě ɔ̍ nu̍ kmɔ̌ wlù ke sɔ̀n. 20Dǒ ɔ̍ gbò-a gbàɛ̍gbà-a wɔ̍n we̍ bo jɔ̍gbau due ɔ̀ pa̍-a nyɔ̍gbà-ɛ pɛ̌n i̍. Ɔ̍ nynɛ̌ nu̍ Laaslɔɛ. Ɔ̍ ku̍ nu̍ chìèᵻá sǔh. 21Nɛ̀ di̍-dɛ̍ᵻ ìh-a blu̍-a dǒ pàn-nyɔ̍-a teble̍ kɛ̍n-ɛ, i̍h bo ɔ̍ pɔ̀n di̍-ɛ i̍. Nɛ̀ kǎ gbèᵻá ji̍ wɛ̀ i̍h-a bɛ̍ ɔ̍ chìèᵻ jlǐh i̍. 22Nyɔ̍gbà nyɔ̍ laa̍ wɛ̀ ɔ̍ mɛ̌, iě Nyɔsoa-a ǐnchɔ̀ gba̍ ɔ̍ sùù dě Eblaɛɛn we̍ ɛ̍ iě i̍ tè. Pàn-nyɔ̍ laa̍ ɔ̍ mɛ̌-a ke-ɛ, iě u̍h tè ɔ̍ i̍. 23Wɛ̀ ɔ̍ mu̍ dě kàn nɛ̍ di̍i̍, tà nyɔ̍-a jě-ea tìh-ɛ. Ɔ̍ dǔ-a dlǔ ja̍i̍-ɛ, iě ɔ̍ jě Eblaɛɛn dě nya̍, nɛ̀ Laaslɔɛ tè ɔ̍ pùn. 24Wɛ̀ ɔ̍ we̍le, ɔ̍ la̍a̍, ‘Baa Eblaɛɛn, jě ǐn wɔɛ lě. Dbo̍ Laaslɔɛ ɔ̍ iě ɔ̍ chèɛ̀-a mlǎ dě nǐ we̍ gba̍, wɛ̀ ɔ̍ iě ɛ̍ dǒ ǎn mɛɔ kɛ̍n tǒ-e wɛ̀ iě flɛ̀n i̍ wlǎ. Dɛ̍nu̍ɛ, ǎn sàɛ̀ jua̍i̍ kaa̍ nɔ̌ nɛ̍ la di̍i̍.’ 25Jɛ Eblaɛɛn la̍a̍, ‘Ǎn jǔ, nu̍ wlùh, ti̍ ìn tè-a kmɔ̌ i̍-ɛ, nɛ̀ àn jě dɛ̍ᵻ chɛ̀ chɛ̀, wɛ̀ Laaslɔɛ-a jě sɔ̀ɛ̀n. Jɛ ɔ̍ nu̍ la̍ kmɔ̌ nɔ̍ɔ̀ iě àn sàɛ̀ ka jua̍i̍. 26Ɛ̍ se̍-o siee tɔ̀ùn dlǔ sùbi̍i̍ nɛ dǒ mɔ̀ ke àɔ̀ nynɛ̌. Wɛ̀ nyɔ̍-ɔ je̍e nɔ̌ àɔ̀ we̍ sɔ u̍h-u je̍e dě mɔ̀ we̍ gbǎ, wɛ̀ nyɔ̍ wɔ̍-ɔ je̍e dě mɔ̀ we̍ sɔ ke u̍h-u je̍e nɔ̌ àɔ̀ we̍ gbǎ.’ 27Wɛ̀ ɔ̍ la̍a̍, ‘Nɛ̀ɛ̍, ǎn ba̍le m̀ baa Eblaɛɛn, ìè ɔ̍ dě ǐn baa blǐ gbò dbo̍. 28Dɛ̍nu̍ɛ, ǐn blě de̍di̍i̍ᵻ m̀m̌, wɛ̀ ɔ̍ iě u̍h wɔ̍i̍n gbɛ̍n-ɛ u̍h-u je̍e nɔ̍ɔ̀ la ǎn jě-ea ka tìh-ɛ ji̍ ke.’ 29Jɛ Eblaɛɛn la̍a̍, ‘U̍h blě Mose ke Nyɔsoa-a tu̍owli po̍ nyɔ̍ dě u̍h we̍. U̍h kɔn wlu̍ bo u̍h iě dounᵻ tù.’ 30Wɛ̀ pàn-nyɔ̍ laa̍ ɔ̍ la̍a̍, ‘Iěe, baa Eblaɛɛn, pò ɛ̍ tù nyɔ̍ wlǔh-e wɛ̀ ɔ̍ iě dě u̍h we̍ mu̍-ɛ, nɛ̀ u̍h-a mu̍ u̍h-a gblɛ̍n sɔ̀ɛ̀n kɛ̍n i̍ poe.’ 31Eblaɛɛn la̍a̍ dě ɔ̍ we̍, ‘Pò u̍h se̍ Mose ke Nyɔsoa-a tu̍owli po̍ nyɔ̍-a wlu̍ dounᵻ tù-ɛ, nɛ̀ pò nyɔ̍-a jɛ wlǔh-eɛ, ɛ̍ se̍ u̍h-a dlǔ jli̍-i mu̍ ke sǔh.’ ”
Zvasarudzwa nguva ino
Luu 16: KDNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
The New Testament in Western Krahn published as KU̍O̍ DELEE © The Bible Society in Liberia, 1999.