Luu 15
15
Jusu po̍ mǎ-a blawɛ̌-a nɛnǎ
(Matio 18.12-14)
1Ɛ̍ nu̍ ti̍ due, wɛ̀ taa̍sìh sà nyɔ̍ ke gblɛ̍n sɔ̀ɛ̀n nyɔ̍ dɔu ji̍ Jusu-a wlu̍ wɔ̌n la̍-a. 2Wɛ̀ Fɛlesii nyɔ̍ ke telě nǎ poe nyɔ̍-a wlu̍ i̍ wɔ̍ɔ̍n i̍. U̍h la̍a̍, “Jɔ̍gbau la ɔ̍ ke gblɛ̍n sɔ̀ɛ̀n nyɔ̍-a nɛ̍aɛ we̍, wɛ̀ ɔ̍ ke u̍h-a di̍-i dɛ̍ tàdùè wa.” 3Wɛ̀ Jusu po̍ nɛnǎ la dě u̍h we̍.
4Ɔ̍ la̍a̍, “Pò mɔ̀-a nyɔ̍ due blě blawɛ̌ᵻá kmɛ wɛ̀ i̍h-a due iě mǎ-ɛ, nɛ̀ ɔ̍ se̍ kwela mɛ̀nyìɛ̍ jɔ̌ mɛ̀nyìɛ̍ laa̍ dě pibǐ di̍i̍ sie mu̍ ɔ̍ iě jɛ laa̍ i̍ pɔ̀n te̍e̍ wɛ̀ ɔ̍ iě ɛ̍ jě ae? 5Pò ɔ̍ jě ɛ̍-ɛ, nɛ̀ ɔ̍ se̍ ɛ̍ wlè i̍ po̍ mu̍ ɔ̍ iě nmɔ ae? 6Pò ɔ̍ ji̍ wlɔ̀-ɛ, nɛ̀ ɔ̍ mu̍ ɔ̍ ba̍ᵻ ke nyɔ̍ nɛ-a dǒ gbò wɔ̍ɔ̍n-ɛ dǎ. Nɛ̀ ɔ̍ la̍a̍ dě u̍h we̍, ‘Mɔ̀ gbǎ ǐn we̍ à iě nmɔ, dɛ̍nu̍ɛ, ǎn blawɛ̌ ɛ̀ mǎ-a de-ɛ, ǐn jě ɛ̍ wɛ̀.’ 7Ǎn sèàɛ̍ mɔ̀ wlùh, kǎ ɛ̍ mu̍ nɛ ke. Pò gblɛ̍n sɔ̀ɛ̀n nyɔ̍ due bǐi i̍-ɛ, nɛ̀ mɔna̍-a mu̍ nui-ɛ dɛ̍blɔ dě ja̍i̍wlɔ̀ ɛ̍ iě i̍ slɛ̌-nyɔ̍-a kwela mɛ̀nyìɛ̍ jɔ̌ mɛ̀nyìɛ̍ ùh la̍ ùh se̍-a i̍ bǐi nyɔ̍-ɛ sìì.
Jusu po̍ sebla̍ wliɛ̍ ɛ̀ mǎ-aɛ nɛnǎ
8“Nynɔ̌ ɔ̀ blě-a sebla̍ wlǐ-a jɔ̌ pùè-ɛ, pò i̍h-a due mǎ-ɛ, nɛ̀ dɛ̍ ɔ̍ mu̍ nu̍ ɛ? Nɛ̀ ɔ̍ mu̍ nape̍ tba̍ ɔ̍ iě dě gbò i̍ wo̍lo, ɔ̍ iě i̍ gbèɛ̀ɛ̍n te̍e̍, wɛ̀ ɔ̍ iě ɛ̍ jě-ɛ dǔ. 9Pò ɔ̍ jě ɛ̍-ɛ, nɛ̀ ɔ̍ mu̍ ɔ̍ ba̍ᵻ ke nyɔ̍ nɛ-a dǒ gbò wɔ̍ɔ̍n-ɛ dǎ. Nɛ̀ ɔ̍ mu̍ ka dǎ dě u̍h we̍, ‘Mɔ̀ gbǎ ǐn we̍ à iě nmɔ, dɛ̍nu̍ɛ, ǎn sebla̍ wliɛ̍ ɛ̀ mǎ-a de-ɛ, ǐn jě ɛ̍ wɛ̀.’ 10Ǎn sèàɛ̍ mɔ̀ wlùh, kǎ ɛ̍ nɛ ke. Nyɔsoa-a ǐnchɔ̀-a nu̍ mɔna̍ dɛ̍blɔ dǒ gblɛ̍n sɔ̀ɛ̀n nyɔ̍ due ɔ̀ bǐi-a i̍-ɛ we̍.”
Mǎ-a jǔ wlǔh tà
11Wɛ̀ Jusu la̍a̍, “Jɔ̍gbau due bo ɔ̀ blě jɔ̍gbauᵻ nynuu̍ sɔɔ̌n. 12Iě juwɛ naɛ la̍a̍ dě ɔ̍ we̍, ‘Ǐn baa, àn kɔn-dɛ̍ᵻá fɔ̌ ìh kɔn-a dǒ ǐn we̍-ɛ, sà i̍h-o ìè i̍h ǐn nyǐ.’ Wɛ̀ ɔ̍ gblè i̍h u̍h jii̍. 13Ɛ̍ se̍-o wlè, iě wɛ naɛ laa̍ ɔ̍ ple̍ dɛ̍ᵻ kli̍hgbɛ̍ ɔ̍ baa nyǐ-a ɔ̍-ɛ. Iě ɔ̍ mu̍ dakɔ̍ de̍e̍. Dě ɔ̍ nyni-i i̍h-a wlǐ jii̍ dě sàwlùh-ɛ di̍i̍. 14Ɔ̍ wɔ̀-a ɔ̍ dɛ̍ᵻ kli̍hgbɛ̍ ple̍-ɛ, wɛ̀ mɔ̌ dɔu gbǎ dě blǔh laa̍ kɛ̍n. Sɔ ɔ̍ se̍ dɛ̍-a sà la̍ kɔn dɛ. 15Wɛ̀ ɔ̍ mu̍ iě ɔ̍ gbǎ blǔh laa̍ ɛ̍ jɔ̍gbau due we̍. Iě ɔ̍ dbo̍ ɔ̍ dě ɔ̍ blǐ klè ɔ̍ iě ɔ̍ be̍e̍ᵻ di̍-dɛ̍ᵻ nyǐ. 16Mɔ̌-a nu̍-a ɔ̍-ɛ, sɔ ɔ̍ pɔ̀n ɔ̍ iě be̍e̍ᵻá di̍-dɛ̍ᵻ di̍ de. Jɛ nyɔ̍ se̍ ɔ̍ i̍h-a dɛ̍ nyǐ. 17Jɛ ti̍ ɔ̍ ji̍-a ɔ̍ chɛ̀ we̍-ɛ, iě ɔ̍ la̍a̍, ‘Ǐn baa-a dbo̍ nu̍ nyɔ̍ blě di̍-dɛ̍ᵻ dɔu i̍h sie kɛ̍n i̍, wɛ̀ ǎn ji̍ mɔ̌ i̍ mɛ̌ la̍ da̍a. 18Ǎn mu̍ da̍a sɔ iě dě ǐn baa we̍ mu̍ dode̍. Nɛ̀ ǎn mu̍ ka dǎ dě ɔ̍ we̍, “Ǐn baa, ǐn nu̍ dɛ̍ sɔ̀n dǒ ìn ke Nyɔsoa we̍. 19Ǐn se̍ i̍ blaɛ dɛ nyɔ̍ iě ǐn àn jǔ dǎɛ. Dǔ m̌ la̍ sǔh ka àn dbo̍ nu̍ nyɔ̍-a due-ɛ.” ’ 20Wɛ̀ ɔ̍ sɔ bloɔ̍, iě ɔ̍ dǔ ɔ̍ baa we̍ wìè-e.
“Jɛ ɔ̍ nɛ dě wìè nya̍ sǔh wɛ̀ ɔ̍ baa jě ɔ̍. Sɔ ɛ̍ po̍ ɔ̍ baa wɔɛ. Wɛ̀ ɔ̍ gba̍ ple̍-ɛ iě ɔ̍ gblèè ɔ̍, iě ɔ̍ tù ɔ̍ wlì. 21Wɛ̀ ɔ̍ jǔ la̍a̍ dě ɔ̍ we̍, ‘Ǐn baa, ǐn nu̍ dɛ̍ sɔ̀n dǒ ìn ke Nyɔsoa we̍. Ǐn se̍ i̍ blaɛ dɛ nyɔ̍ iě ǐn àn jǔ dǎɛ.’ 22Jɛ ɔ̍ baa la̍a̍ dě ɔ̍ pòi̍nynuu̍ we̍, ‘Mɔ̀ ja dɛ̍wlo̍o̍ ɛ̀ nmɔ-a jii̍-ɛ suei̍ mɔ̀ iě ɛ̍ ɔ̍-ɔ pa̍-ɛ. Mɔ̀ po̍ ɔ̍ bɔ̌ chèɛ̀-ɛ, mɔ̀ iě ɔ̍ bu̍hdih bu̍h-u po̍. 23Nɛ̀ mɔ̀ ja ǎn chlǎn bli plɔ̀ mɔ̀ iě ɛ̍ dbǎ, à iě dɛ̍ di̍ à iě mɔna̍ nu̍. 24Dɛ̍nu̍ɛ, ǎn jǔ la ɔ̍ mɛ̌-ɛ de, wɛ̀ ɔ̍ wlǔh-e. Ɔ̍ mǎ-ɛ de, wɛ̀ ɔ̍ jě-ɛ wɛ̀.’ Wɛ̀ u̍h tè mɔna̍ nu̍-ɛ gbɔ̀.
25“Nɛ̀ ɔ̍ jǔ jɔ̍gbau klaa naɛ nɛ dě klè. Ɔ̍ ji̍-a la̍ wlɔ̀-ɛ, ɔ̍ kɔǎɛn-a la̍ u̍h-a gbò i̍-ɛ, iě ɔ̍ wɔ̌n de̍le-ɛ ke ble̍-e slɛ̀. 26Wɛ̀ ɔ̍ dǎ pòi̍ju due iě ɔ̍ tèle ɔ̍ i̍. Ɔ̍ la̍a̍, ‘Dɛ̍ gbǎ ɛ?’ 27Iě pòi̍ju la̍a̍ dě ɔ̍ we̍, ‘Ìn deǐ ji̍-i, wɛ̀ mɔ̀ baa dbǎ-ɛ ɔ̍ chlǎn bli plɔ̀. Dɛ̍nu̍ɛ, ɔ̍ jǔ ji̍ de̍ pɛlɛpɛ dɛ̍ se̍ ɔ̍ nu̍.’ 28Wɛ̀ ɔ̍ gbǎ jlu̍h-u, iě ɔ̍ la̍ nɛ̀ ɔ̍ se̍-e gbò pa̍ mu̍. Wɛ̀ u̍h baa sǐ sɔ̀n, iě ɔ̍ ba̍le ɔ̍. 29Jɛ ɔ̍ sà ɔ̍ baa-a wlu̍ pɔ̀n we̍, ɔ̍ la̍a̍, ‘Gbɛ̀n-e, sɔ̀nᵻ dɔu la ǐn nui-a àn dbo̍-ɛ, wɛ̀ nɛ̌ se̍a àn wlu̍ wɔ̍n blaɛ. Jɛ nɛ̀ se̍a ǐn gbàdɔ̍ jǔ-a chɛ̀ nyǐ wɛ̀ ǐn ke ǐn ba̍ᵻ ke à iě mɔna̍ nu̍. 30Jɛ àn jǔ la ɔ̀ gbɔ̀lɔ-a àn kɔn-dɛ̍ᵻ i̍ dǒ kàìà nynɔ̌gbaɔᵻ we̍-ɛ, ɔ̍ ji̍-aɛ, iě ìn dbǎ-ɛ ɔ̍ chlǎn bli plɔ̀.’ 31Wɛ̀ u̍h baa la̍a̍ dě ɔ̍ we̍, ‘Ǎn jǔ, ìn nɛ da̍a ǐn we̍ ti̍ kli̍hgbɛ̍ we̍. Dɛ̍ kli̍hgbɛ̍ ǐn blě-aɛ, mɔ̀ kɔn ɛ̍. 32À kɔn à iě mɔna̍ nu̍ à iě de̍le. Dɛ̍nu̍ɛ, ìn deǐ la ɔ̍ mɛ̌-ɛ de, wɛ̀ ɔ̍ wlǔh-e. Ɔ̍ mǎ-ɛ de, wɛ̀ ɔ̍ jě-ɛ wɛ̀.’ ”
Zvasarudzwa nguva ino
Luu 15: KDNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
The New Testament in Western Krahn published as KU̍O̍ DELEE © The Bible Society in Liberia, 1999.