Mika 6
6
III: ISIRAERI INOPINZWAZVE MUDARE
Dare raTenzi navanhu vake
1Chinzwai zviri kutaura Tenzi.
Imimi Mwari simukai
mutaure mhosva yenyu pamberi pamakomo,
zvikomowo zvinzwe izwi renyu.
2Teererai, imi makomo,
nhuna dzaTenzi
nemi ugaro hwenyika hwokugara nokugara
nokuti Tenzi ane nhuna navanhu vake
nezvo achaita dare neIsiraeri.
3“Nhai vanhu vangu,
chii chandakakuitirai chaizvo?
Ndakakunetsai neiko?
Ndipindurei!
4Nokuti ini
ndakakuburitsaika munyika yeIjipiti,
ndikakununurai mumba youranda.
Ndakakutumirai
Mosesi naAroni naMiriamu
kuzokutungamirirai.
5Vanhu vangu,
rangarirai zviya zvakanga zvarongwa
naBharuki mambo weMoabhu
nemhinduro iya yaakapiwa
naBhiriamu mwanakomana waBheori.
Rangarirai zviya zvakaitika
kubvira kuShitimu kusvikira kuGirigari
kuitira kuti muzive
mabasa akarurama aTenzi.”
Zvinodiwa naTenzi kuti munhu aite
6Ndouya neiko chaizvo
kuna Tenzi ndichizopfugamira
iye Mwari wokumusoro?
Ndouya here kwaari
ndiine mipiro yokupisa
yemhuru dzegore rimwechete?
7Ko iye Tenzi angafadzwe here
nezviuru nezviuru zvehondohwe
kana kuti gumi rezviuru
zvehova dzamafuta?
Ndopirira here kukanganisa kwangu
dangwe rangu romukomana,
ura hwangu ndichihupirira
chitadzo changu ini?
8Inga wakaudzwa wani, nhai munhu
kuti zvakanaka ndezvipi;
uye kuti Tenzi anoda kuti uitei,
zvaanoda dzezvizvi zvokuti:
uite zvine ruenzaniso,
uye zvomwoyochena zvikupinde muropa
nokufambawo naMwari wako wakazvirereka.
Chirango chevanobiridzira
9Izwi raTenzi rinodaidzira
kuguta rino,
zvino ungwaru chaihwo
zvokutya zita renyu,
“Chinzwai, imi dzinza negungano
romuguta muno.#6:9 Pamazwi aya chiHebheru chinoti ndiani ati ari sarudza.
10Ndingakanganwe here,
zviereso zvokubiridzira
nezvikero zvisiri pamwero
zviri mudzimba dzavakaipa?
Zvisingambodiwa zvazvo naMwari.
11Ndoti haana mhosva here
munhu ane zvikero zvokubiridzira nazvo
nesaga rizere nezvokueresa zvinobiridzira?
12Vapfumi veguta rino vane utsinye
vagari vemo varevi venhema
zvinobva pamuromo pavo
ndezvounyengedzi.
13Ndokusaka iniwo
ndava kukurwadzisai nokukurovai#6:13 Nokukurova: ChiHebheru chinoti, “Ndakuita kuti urware.”
ndichikuita dongo reguta
pamusana pezvitadzo zvenyu.
14Imi muchadya
asi kuguta musingaguti,
muchabata paura nenzara.
Muchapfundiridza zvinhu
asi zvisingachengeteki.
Zvamunenge makwanisa kuchengetedza
ndichazviparadzisa nehondo yebakatwa.
15Kudyara muchadyara zvenyu
asi pasina chamunokohwa.
Kusvina maorivhi muchasvina zvenyu
asi mafuta acho hamuazori.
Magirepisi muchasvina zvenyu
asi waini yacho, hamuinwi.
16Makachengeta imi
mirao yamambo Omuri
namaitiro ose evemba yamambo Ahabhu
uye makatevedza imi tsika dzavo.
Ndokusaka ini ndave kuita guta rino dongo
uye vagari varo ndichivaita chiseko,
saka nhamo yavanhu vangu yokusekwa
ndiro richaberekana nayo.”
Zvasarudzwa nguva ino
Mika 6: SCLB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Common Language Bible © Bible Society of Zimbabwe, 2008.