Romans 11
11
Ha Kachegun Apudyus Kan Cha Judio
1Ked awed chi imusok, ha lan-awichen Apudyus cha sigud un tagula? Lai! Mismuʼn Israelitaak, un galak Benjamin un galak bo Abraham. 2Chakampun un lan-awichen Apudyus cha taguʼn chilutukala si awi. Achipunyu ammu kalan chi liigiliʼn ugud Apudyus si lalliliyan Elijah kan Apudyus mipanggop kan cha taguʼd Israel? 3Kalala, “Apu, pilatoycha cha propetam ked liyam-ancha bo cha chachattulan. Ked os-ossaalak un labun-an ya singsingtoncha mamatoyancha kan sakon.”#11:3 v. 3-4 1 Kings 10:10, 14, 18 4Ngim himma insongbyat Apudyus kan siya? Kalala, “Chakampun un abuska, ti awed cha pitullibuʼn illalasinku un achipun lanchayaw kan Baal un silan-apudyus.” 5Ked siya bo isula si salaʼn timpu un chakampun un losan cha Judio achipun mamati, awed cha akit un labun-an un chilutukan Apudyus gapu si kachegula. 6Ha lanchutukala kan chicha, chakampun un gapu si killingwacha un bibiɏu ngim gapu si kachegun Apudyus. Ta lu gapu si kilabiɏun chi killingwacha manchutukala, chakampun un maibilang un tuttuwaʼn kachegun Apudyus.
7Ked himma man-aawat taku lù? Achipun cha Israelitas laochesan chi singsingtoncha. Ti akkiyut cha langchas un chilutukan Apudyus. Ked cha kaachuwan kan chicha, achipuncha lanchongeɏ si imbyegan Apudyus. 8Ked kalan chi liigiliʼn ugud Apudyus,
“Pilatangkin Apudyus chi somsomokcha un achipun makaawat,
ked inggala si sala, alla atacha ngim achipuncha makatullong ya
alla ingacha ngim achipuncha makadngeɏ.”#11:8 Deut. 29:4, Isaiah 29:10
9Ked kalan bo David,
“Sapay otyan ta cha pin-acha mangganggalasan siya masallutancha ya
bitu un maodchagenchaʼn machusaancha!
10Ya sapay otyan ta isucha lakuɏap ta achipuncha makailasin si katuttuwaan,
ya sapay otyan ta mabukutcha si ligatcha ing-inggala.”#11:10 v. 9-10 Psalm 69:22-23 Ha ibyegala si Greek, makuɏapcha otyan ta achipuncha makatullong ya ituɏuycha mabukud.
11Ked awed imusok, ha lisabyangtu pun cha Judio achipuncha bummangon? Ha laodchegcha si mayam-alancha? Chakampun! Ti ha achipuncha lamatiyan, hachi bo malaguwan Apudyus kan cha Gentil ta umapos cha Judio ked mamaticha. 12Ha lambyasuɏan cha Judio un kilakuɏang chi pammaticha lambyalin un bummaɏuwan cha losan un tagu si lubung, ked sinchumadlu un bumaɏuwan lu mibilang losan cha Judio un tagun Apudyus.
Ha Mataguwan Cha Gentil
(Eph. 2:11-22)
13Si sala, awed bo ibyegak kan chikayuʼn Gentil. Chilutukan Apudyus sakon un man-apostolesla kan cha Gentil, ked amod chi mampopotogku si kawachik, 14ta umapos otyan cha kailiyak un Judio ta mamaticha ta matagu cha uchum si ing-inggala. 15Ti ilanyu, gapu si langiwalilan Apudyus kan cha Judio, hachi wayan cha uchum un taguʼn lambyalin gagayyom Apudyus. Ked simbumaɏu lu awaton Apudyus cha Judio kasin, ti kaiyaligela latoy un latagu kasin.
16Isun chi tilapay un michatun kan Apudyus, un lu michatun chi ummulaʼn lautu, mipati losan un chogala. Ya isun chi osaʼn kayu, ta lu laichatun kan Apudyus chi lamutla, kapilitan un uwala bo pangala.
17Miyalig cha Judio kayu un olibo un immuɏan Apudyus ya ilayyuwalala. Ngim lasopɏak cha uchum un pangala. Ot inyutupla pangan chi atap un olibo un miyalig chikayuʼn Gentil. Ked si sala, mipati kayu kan cha losan un kilabiɏun chi hachiʼn kayu un limuɏa. 18Ngim chikayuʼn liyutup un Gentil, achiyu am-amsiwon cha lasopɏak un panga, ti panga kayu abus chakampun un chikayu mamangchon si lamut, ti ha lamut siya mamangchon kan chikayu. 19Ngim achiyu kalan un, “Istay man chiyoy lasopɏakcha ta awed liyutupanmi.” 20Tuttuwaʼn lasopɏakcha ti achipuncha lamati. Ngim ha liyutupanyu, gapu si lamatiyanyu. Ked achiyu isayaw cha hachi, ngim man-alled kayu. 21Ti lu achipun Apudyus gilagaan un lalopɏak kan cha Judio un sigud un panga, ha magaga kamman bo un malopɏak kan chikayu?
22Ked kamatchi mangitullongan taku si kilachegun Apudyus ya kilalukila. Liɏuki kan cha achipun mamati. Ngim amod chi chegula kan chitaku lu ituɏutuɏuy taku pammati taku ya achipun taku man-awichen chi kachegula. Ta lu man-awichen taku, sopɏakon chitaku. 23Ked isula bo kan cha uchum un Judio un lu mamaticha, iyulin Apudyus chicha si lasopɏakancha, ti alla kilabyelin Apudyus un mangiyutup kasin kan chicha. 24Ta lu makwa un iyutup chikayu un isun chi pangan chi atap un kayu, ked inyutupla si ustuʼn muɏala, sillumasu mangiyutupala kan cha Judio ti sigud un pangala chicha.
Kumachegu Si Apudyus Kan Cha Losan Un Tagu
(Eph. 3:1-13)
25Chikayuʼn susulud un Gentil, alla piok un maammuwanyu ta achiyu kalan un lalaing kayu. Allaya litataɏu un piok un maawatanyu otyan, chakampun un michagas chi kilatangkin chi somsomok cha galak Israel gapu si achipuncha mamatiyan, ti inggala maamin maaɏa bilang cha Gentil un mamati. 26Ked hachi timpuʼn mamatiyan cha losan un galak Israel ta matagucha. Ti kalan chi liigiliʼn ugud Apudyus,
“Mampeɏpuʼd Zion chi Malagu kan chitaku, ked chuɏsala cha losan un
kilalawwing cha Judio un galak Jacob.
27Allaya intuɏegku kan chicha, un pakawalok cha byasuɏcha.”#11:27 v. 26-27, Isaiah 59:20-21; Jeremiah 31:31, 34
28Gapu ta achipun mamati cha Judio si bibiɏuʼn chameg, kabusuɏn Apudyus chicha ked bumaɏuwanyuʼn Gentil. Ngim gapu ta chilutukan Apudyus chicha, ay-ayaton Apudyus chicha gapu si ingkarila kan cha aappucha. 29Ti achipun makwa un byaliwan Apudyus chi somsomokla mipanggop kan cha chilutukala ya binchisyulala. 30Ked chikayuʼn Gentil, achipun kayu lamati kan Apudyus si awi. Ngim si sala, kilacheguwan Apudyus chikayu gapu ta achipun cha Judio lamati. 31Ked isun cha Judio, achipuncha mamati si sala. Ngim gapu ta kilacheguwan Apudyus chikayu, kacheguwala bo chicha. 32Ti lambyalilon Apudyus cha losan un tagu isun chi byaɏud ti achipuncha lamati taplu ipailala kachegula kan cha losan.
Ha Machayawan Apudyus
33Lappun miyisuwan chi kilabyaklang Apudyus ya kilalaingla ya ammula! Lappun makaibyega si simsimmokla! Ya lappun bo makaawat si ugalila! 34Isun chi liigiliʼn ugud Apudyus un kalala,
“Ti awed kamman mangagammu si somsomok Apudyus?
Ya awed kamman makatudtuchu kan siya?
35Ha awed kamman langatod kan siya taplu subyalitala?”#11:35 v. 34-35 Isaiah 40:13; Job 41:11; 1 Corinthians 2:16
36Ti siya langwa kan cha losan ya siya bo mangituray si losan, ya lakwa losan si machayawala. Ked machaychayaw otyan si Apudyus ing-inggala! Amen.
Zvasarudzwa nguva ino
Romans 11: HUA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, Wycliffe Bible Translators, Inc. in cooperation with Translators Association of the Philippines