Mapisarema 22
22
Kuchema kwomunhu akasiyiwa naMwari
Kumutungamiriri wokuimba; nomuimbirwo weAjereti Hashishahari. Pisarema raDhavhidhi.
1Mwari wangu, Mwari wangu, mandisiyireiko?
Munomirireiko kure pakundibatsira,
napamashoko okugomba kwangu?
2Mwari wangu, ndinodana masikati, asi hamupinduri;
Nousiku, asi handiwani zororo.
3Asi imi muri mutsvene,
Imi mugere parumbidzo dzaIsiraeri.
4Madzibaba edu akavimba nemi;
Vakavimba, imi mukavarwira.
5Vakachema kwamuri, vakarwirwa;
Vakavimba nemi, vakasanyadziswa.
6Asi ini ndiri honye, handizi munhu;
Ndiri chinhu chinozvidzwa navanhu,
chinoshorwa navanhu vose.
7Vose, vanondiona vanondiseka;
Vanoshamisa muromo, vanodzungudza misoro, vachiti,
8“Chizviisai kuna Jehovha; iye ngaamurwire;
Ngamurwire, zvaanomufarira iye.”
9Asi ndimi makandibudisa pachizvaro;
Makandivimbisa nemi ndichiri pamazamu amai vangu.
10Ndakaiswa kwamuri kubva pachizvaro;
Imi muri Mwari wangu kubva padumbu ramai vangu.
11Regai kuva kure neni; nokuti njodzi iri pedyo;
Nokuti hapana angabatsira.
12Hondo zhinji dzakandikomba;
Hondo dzine simba dzaBhashani dzakandipoteredza.
13Dzinondishamisira miromo yadzo,
Seshumba inoparadza ichiomba.
14Ndakadururwa semvura,
Mapfupa angu ose akasvodogoka;
Mwoyo wangu wakafanana nenamo;
Wakanyauka mukati mohura hwangu.
15Simba rangu rakaoma sechaenga;
Rurimi rwangu rwakanamatira pashana dzangu;
Makandiisa paguruva rorufu.
16Nokuti imbwa dzakandikomberedza;
Ungano yavanoita zvakaipa yakandipoteredza;
Vakaboora maoko angu namakumbo angu;
17Ndingaverenga mapfupa angu ose;
Vanonditarira nokundinanganidza;
18Vanogovana nguo dzangu pakati pavo,
Vanokanda mijenya pamusoro pehanzu yangu.
19Asi imi Jehovha, regai kuva kure neni;
Imi simba rangu, kurumidzai kundibatsira.
20Rwirai mweya wangu pamunondo;
Mudikanwa wangu pasimba rembwa.
21Ndiponesei pamuromo weshumba;
Zvirokwazvo, makandipindura ndiri
pakati penyanga dzenyati.
22Ndichadudzira zita renyu kuhama dzangu;
Ndichakurumbidzai pakati peungano.
23Imi munotya Jehovha, murumbidzei;
Imi mose vana vaJakobho, mukudzei;
Mumutyei, imi mose vana vaIsiraeri.
24Nokuti haana kuzvidza kana kusema
dambudziko raanotambudzwa;
Kana kumuvanzira chiso chake;
Asi panguva yaakachema kwaari akamunzwa.
25Kurumbidza kwangu paungano huru
kunobva kwamuri;
Ndicharipa mhiko dzangu pamberi pavanomutya.
26Vanyoro vachadya vakaguta;
Vanotsvaka Jehovha ndivo vachamurumbidza;
Mwoyo yenyu ngairarame nokusingaperi.
27Migumo yose yenyika icharangarira
nokudzokera kuna Jehovha;
Marudzi ose avahedheni achanamata kwamuri.
28Nokuti ushe ndohwaJehovha;
Ndiye mubati wavahedheni.
29Vakuru vose venyika vachadya nokunamata;
Vose vanoburukira kuguruva
vachapfugama pamberi pake,
Naiye asingagoni kuraramisa mweya wake.
30Vana vake vachanamata kwaari;
Rudzi runotevera ruchaudzwa zvaJehovha.
31Vachauya vachidudzira kururama kwake
Kuvanhu vachazozvarwa, kuti ndiye wakazviita.
Zvasarudzwa nguva ino
Mapisarema 22: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002