Kuungudza KwaJeremiya 4
4
Kutambudzika kwavanhu nokuda kwezvivi
1Haiwa, ndarama yasviba sei!
Ndarama yakaisvo‐naka yashanduka sei!
Mabwe enzvimbo tsvene arashirwa
pamharadzano dzenzira dzomuguta.
2Vanakomana vanodikanwa veZioni
vakafanana nendarama yakaisvo‐naka,
haiwa vakanzi vakaita sezvirongo zvevhu sei,
iro basa romuumbi wehari!
3Kunyange namakava anobudisa mazamu,
achiyamwisa vana vawo;
mukunda wavanhu vangu
wava nehasha semhou murenje.
4Rurimi rwomwana unomwa runonamatira
mumukanwa womuromo wake nenyota;
vanana vanokumbira chingwa,
asi hakuna munhu anovamedurira.
5Avo vaisidya zvinozipa,
varaswa munzira dzomuguta;
vairerwa vakafuka micheka mitsvuku,
zvino votsivama pamaturunhuru.
6Nokuti zvakaipa zvomukunda wavanhu
vangu zvinopfuura zvivi zveSodhoma,
iro rakaparadzwa kamwe‐kamwe
kusina maoko akaribata.
7Machinda aro akanga akapfuura chando nokunaka,
akanga akachena kupfuura mukaka,
akanga akatsvuka pamuviri kupfuura makorari,
pakuonekwa akanga akaita sesafaya.
8Zviso zvavo zvasviba kupfuura mazimbe,
havazikanwi munzira dzomuguta;
ganda ravo rinonamatira mapfupa avo,
raoma, rafanana nedanda.
9Vakaurawa nomunondo vakaita nani
kuna vakaurawa nenzara;
nokuti ava vaonda,
vabayiwa nokushayiwa zvibereko zveminda.
10Maoko avakadzi vaiva nomwoyo munyoro
akabika vana vavo,
zvikava zvokudya zvavo pakuparadzwa
kwomukunda wavanhu vangu.
11Jehovha akaita zvaakanga achida nokutsamwa kwake,
akadurura hasha dzake huru;
akabatidza moto paZioni,
akapedza nheyo dzaro.
12Madzimambo enyika haana kutenda,
kunyange navose vagere panyika yose,
kuti mudzivisi nomuvengi vachapinda
pamasuo eJerusaremu.
13Zvakaitwa nokuda kwezvivi zvavaporofita varo,
nezvakaipa zvavapristi varo,
vakateura ropa ravakarurama mukati maro.
14Vanodzungaira samapofu munzira dzomuguta,
vakasvibiswa neropa,
naizvozvo vanhu havagoni kubata nguo dzavo.
15Vakadanidzira kwavari vachiti,
“Ibvai, makan’ora!
Ibvai, ibvai, regai kutibata!”
Panguva yokutiza nokudzungaira kwavo,
vanhu vakati pakati pamarudzi;
“Havangazogarizve pano vari vatorwa.”
16Kutsamwa kwaJehovha kwakavaparadzira;
haachavi nehanya navo;
havana kurangarira vapristi,
havana kukudza vakuru.
17Meso edu anongopera nazvino achitarira
rubatsiro rwedu pasina;
pakutarira kwedu takatarira
rudzi rusingagoni kutiponesa.
18Vanoronda makwara edu,
naizvozvo hatigoni kufamba munzira
dzomuguta redu;
kuguma kwedu kwava pedyo,
mazuva edu asvika,
nokuti kuguma kwedu kwasvika.
19Avo vakadzingana nesu,
vakamhanyisa kupfuura makondo okudenga;
vakadzingana nesu pamakomo,
vakatigarira murenje.
20Mweya wemhino dzedu,
iye muzodzwa waJehovha,
wakabatwa muhunza dzavo;
iye watakati,
“Pamumvuri wake ndipo patichararama
pakati pamarudzi.”
21Farisisa, uve nomufaro,
iwe mukunda weEdhomu, ugere panyika yeUzi;
mukombe uchasvika kwauriwo;
uchabatwa newaini ukazvifukura.
22Kurohwa kwezvakaipa zvako kwapera,
iwe mukunda weZioni;
haachazokutapisizve;
iye achakurova pamusoro pezvakaipa zvako,
iwe mukunda weEdhomu;
iye achafukura zvivi zvako.
Zvasarudzwa nguva ino
Kuungudza KwaJeremiya 4: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002