Ekisodho 20
20
Mirairo ine gumi
1Zvino Mwari akataura mashoko awa ose, akati,
2“Ndini Jehovha, Mwari wako, akakubvisa munyika yeIjipiti, muimba youranda.
3“Usava navamwe vamwari kunze kwangu.
4“Usazviitira mufananidzo wakavezwa, kana uri mufananidzo wechinhu chiri kudenga kumusoro, kana wechiri panyika pasi, kana wechiri mumvura pasi penyika. 5Usapfugamira izvozvo, kana kuzvishumira; nokuti ini Jehovha, Mwari wako, ndiri Mwari ane godo; ndinorova vana nokuda kwezvivi zvamadzibaba avo, kusvikira kurudzi rwechitatu norwechina rwavanondivenga; 6ndichaitira nyasha vane zviuru zvamazana vanondida, vanochengeta mirairo yangu.
7“Usareva zita raJehovha Mwari wako pasina; nokuti Jehovha haangaregi kupa mhosva anoreva zita rake pasina.
8“Rangarira zuva reSabata, kuti urichengete rive dzvene. 9Ubate mazuva matanhatu, uite mabasa ako ose; 10asi zuva rechinomwe iSabata raJehovha Mwari wako; usatongobata mabasa naro, iwe, kana mwanakomana wako, kana mwanasikana wako, kana muranda wako, kana murandakadzi wako, kana zvipfuwo zvako, kana mweni wako ari mukati mamasuo ako, 11nokuti namazuva matanhatu Jehovha akaita denga napasi, negungwa, nezvose zviri mukati mazvo, akazorora nezuva rechinomwe; naizvozvo Jehovha akaropafadza zuva reSabata akariita dzvene.
12“Kudza baba vako namai vako, kuti mazuva ako ave mazhinji panyika yaunopiwa naJehovha Mwari wako.
13“Usauraya munhu
14“Usaita upombwe
15“Usaba.
16“Usapupurira wokwako nhema.
17“Usachiva imba yowokwako, usachiva mukadzi wowokwako, kana muranda wake, kana murandakadzi wake, kana nzombe yake, kana mbongoro yake, kana chimwe chowokwako.”
18Vanhu vose vakaona kutinhira, nemheni, nezwi rehwamanda, negomo rinopfungaira, zvino vanhu vakati vachiona izvozvo, vakadedera vakamira kure. 19Vakati kuna Mosesi, “Imi chitaurai henyu nesu, tinzwe; asi Mwari ngaarege kutaura nesu, tirege kufa.” 20Mosesi akati kuvanhu, “Musatya henyu, nokuti Mwari akauya kuzokuidzai, kuti mugare muchimutya, murege kutadza.” 21Vanhu vakamira kure, Mosesi akaswedera kurima guru kwakanga kuna Mwari.
22Jehovha akati kuna Mosesi, “Iti kuvana vaIsiraeri, ‘Imi makaona mumene kuti ndakataura nemi ndiri kudenga. 23Musaita vamwe vamwari pamwechete neni; musazviitira vamwari vesirivha kana vamwari vendarama.’ 24Undiitire atari yevhu, ubayire pamusoro payo zvipiriso zvako zvinopiswa nezvipiriso zvako zvokuyananisa, namakwai ako nenzombe dzako; panzvimbo imwe neimwe pandicharangaridza zita rangu, ndichauyapo kwauri, ndichikuropafadza. 25Zvino kana uchindivakira atari yamabwe, urege kuivaka namabwe akavezwa, nokuti kana ukasimudzira mbezo yako pamusoro pebwe, warisvibisa. 26Rega kukwirawo kuatari yangu nezvikwiriso, kuti kunyasi kwako kurege kufukurwa kwairi.”
Zvasarudzwa nguva ino
Ekisodho 20: SNA2002
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Shona Union Version 2002