San Lucas 22
22
Jesús pʉr awaag ibeptarr
(Mt. 26:1-5,14-16; Mr. 14:1-2,10-11; Jn. 11:45-53)
1Mag ãbmiecha Jesús ich khapeen dʉi Jerusalén phobor ee nʉm jaar, pan levadura chukhu wauwia khoojem phiesta burrju khãai khapan khaba waaur sĩejim aajem. Ich mag phiestapai ĩchab Pascua a thʉ̃ʉrjem. 2Maagwai ĩchab phadnaan ee chi porkha nʉm khʉʉnau agjo judionaan Ẽwandam iek athee chi machnaan dʉimua amach eepai, “Jãgata akhiin bʉ̃ʉrjã õrag khaugpiba jãg Jesús pʉrnaa thõobpʉikhamgui” anaajim anʉm. “Magba mʉg khapanag eewe pʉr athaawai eeu õor pom mʉg thʉnʉm maach dʉita meeukhadukham” a khĩirju naajim aajem. 3-4Amau mag khĩirju nʉm ee, woun ãb Judas a thʉ̃r sim sĩejim aajem, ibʉʉr wauwia ĩchab Iscariote a thʉ̃ʉrjerr. Mag woun ĩchab ich Jesús dʉi i bʉ ogdʉba wenʉrraajerr khʉʉn eem ajim aajem. Mag Jesús dʉi ãba nʉrraajerrta meperau por meubaadeewai phadnaan chi porkha nʉm khʉʉn dʉi ĩchab guardianaanjã chi porkha nʉm khʉʉnpa ãba nʉm aar majim anaabá, jãgata ichdeu amag i pʉr deeju khap jawaan. 5Maimua barimawia jaaubaawai, amachdeu chi Judas iek amach jʉ̃gaagaa ũrbaawai, oneeu phobaadewia warag irig phatkhonjã deeju a iekhajierram aajem. 6Ichig magbaawai chará warag, —Ich magau magan maach iekhabarm; murua chadcha pãrag i pʉr deejugui ajim anʉm.
Magtarr aigmua ãba i pʉr deeju khĩirjugta wai sĩsijim aajem, chi phoborpienagjã ich khaugpiba.
Ãbmiecha Jesús ich khapeen dʉi thach khotarr
(Mt. 26:17-29; Mr. 14:12-25; Jn. 13:21-30; 1 Co. 11:23-26)
7Judaau Jesús eugar mamagkham ee, pan levadura chukhu wauwia khoojem ed ãspa eebaadejim aajem. Mag ed judionaanau nemkhoo edam athee ovejadam wai narr thõowia edau kheubaadeewai khoojeejim aajem. 8Ich mag edcha Jesuu Pedro dʉi Juan thʉ̃rkhanaa amag magjim anʉm:
—Pãar maar na ereubaadet. Maimua ovejadam per auwia agdamta maar na phiejãb waubaimat ajim anʉm, maach thum ãba khoimaag.
9Magbaawai amachdeu, —¿Jampaita marau pʉ na phiejãb wauwimaju aai nʉma? a jeeujierram aajem Jesuug.
10Magbaa chi Jesuu amag, —Chamʉg Jerusalenag khʉd ma sim ee ereubaadet ajim anʉm. Nau chi phobor dub nʉm aigcha woun ãb do joi authurwia dothũr dʉi degag mam pãrau ooimaju. Magbaawai i dʉi ereuwia i dubbaimam deg dʉi dubbaimat ajim anʉm. 11Mag dubwia chi dikhʉʉg, mʉch chi maestroouta pãar pʉijim abat, jampaita nau kheeurag maach thum ãba thach khoju aai nʉ a khap jeeumkhĩir. 12Magbaawai mag wounau pãrag oopien majugui ajim anʉm, ʉ̃gthaa dijã pom sim ya sĩi chi khĩir khaugam. Maigta nem thum khĩir khaugwia maar nʉbat ajim aajem.
13Magbaawai chadcha i ipierraa ereubaadeeu thum ichdeu jaaumarrjoo ooimajierram anaabá. Maig, ich na mag ovejadam waupitarr chadcha tagam nempa thum khĩir khaugwia sĩi tagam khʉʉn dʉi i baraata oo nʉisijim aajem, ãba khoog. 14Maimua kheubaadem ee Jesús barchejim aajem, tagam khʉʉn ich khapeen dʉi, Pedro Juan dʉi narr aig. Mag ichdeu jʉr auwia i dʉi ogdʉba wenʉrraajerr khʉʉn deeu thumaa nʉisim ee, ya chi phiejãb wau wai narrjã thoikha sĩsiewai ãba khoog paaukhabaadejim aajem. 15Mag kho nʉmua magjim aajem ich khapeenag:
—Keena, chadcha chikhamnaanau juau mʉch thõoju nawe pãar dʉi mʉg nemkhoo edam ovejadam khom khõchaaga chirajimgui ajim anʉm. 16Mʉ chan mʉg khobarm aigmua tag khoba, ãba Ẽwandamta ʉ̃gthar thumaam khʉʉn Porkha sĩsim edta ũmaai pãar dʉi ãba tagam khʉʉn ichdeu peerdʉ autarr khʉʉnpa deeu maach thum ãba khojugui ajim anʉm. Mag edta thumaam khʉʉnau warrgar nemkhoo edam oveja thõowai Ẽwandamau amach peerdʉ auju a khĩirjuajerrjo, chadcha amach peerdʉ nʉisim khaphʉ ajugui ajim anʉm.
17Maimua vino jarrdam jua ee auwia Ẽwandamag ʉu ajim anaa, —Ya pʉr athat ajim anʉm. Maimua, Donaa jũrr ʉapʉipetat ajim anʉm, agdaujo do aumamkhĩir. 18Mʉʉn ãbmieta ĩs pãar dʉi mʉg vinodam do chirʉmgui ajim anʉm. Mʉg dobarm aigmua tag doba, ãba Ẽwandamta thumaam khʉʉn Porkha sĩsim edta deeu dojugui ajim aajem.
19Maimua agjo panjã jua ee auwia, Ẽwandamag ʉu ajim anaa, thorreuwia, amag deenaa, —Mʉg panan mua mʉch morta pãrag dee chirʉm; mʉg atagjã mʉ khĩirjunaa ich mʉgta khabat a jaaujim aajem.
20Maimua ya kho aaipagkhabaadem ee, deeu chi vino jarrdam jua ee auwia ĩchab, —Mʉg jarr eem vinodam dobarmta warrgarwe Ẽwandamau õor dʉi iek deeju aajerrau; mamʉ mʉg iekhan iek iiuriugui ajim anʉm. Mʉ bag mʉg vinojo ãrbarmuata Ẽwandamau, ĩsmua atagan chadau pãar peerdʉ wenʉrraju aai nʉm a jaau simgui ajim anʉm. 21Pãrag khap amkhĩir warre jaau chirʉmgui ajim anʉm: Mag mʉ bag ãrmkhĩran, maach eem mʉig maach dʉi ãba thach kho simuapaita ich paarmua mʉ pʉr deeju, mʉ oomapham khʉʉnag. 22Mʉʉn chadcha Emkhooi Iewaau, mamʉ magʉm ãba chadcha amau mʉ thõojugui ajim anʉm. Mamʉ Ẽwandamau ich magpiju arr aawai thum ichdeu jaautarrjoo obebergmam. Mamʉ ¡Eh, apkhiitʉ ajim anʉm, mag mʉ thõomkhĩir mʉ pʉr dee chirʉm woun!
23Jesús mag iekhabarm ũrwia i khapeenau amach eepai jũrr chikham ipeer ahaukhamua, —¿Chijãguataa wir aigpai mag meer i pʉr deeju khai? anaajim anaabá.
Ẽwandam dau na khaita ʉ̃rʉʉcha sim khai
24Maimua nʉʉpai awia ĩchab amach eepai, “¿Chijãata magan mʉig maach ee ʉ̃rʉʉcha sĩ?” a chikham ipeer ahau khaphobaadejim aajem. 25Mamʉ magbaawai Jesuu amag magjim anʉm:
—Mʉg durr gaai reinaan thʉnʉm khʉʉnan amachta ʉ̃rʉʉcha nʉm awia õor dʉi athuucha sĩerrjeem. Mamʉ mag nʉmta amachta chi thierrnaan awia jũrr õrag amach igwia, “Jãguan chadau maar athee nem ajaphamta waaujem” a iekhapimjã khõsi aajemgui ajim anʉm. 26Mamʉ pãar ee magju aai khaba nʉmgui ajim anʉm. Mag khãyau chadcha thethem awia khãijã warag serbiibamjota aju aai sim; maagwai chi porkha simta jũrr ich chogjota aju aai simgui ajim anʉm. 27Magnaa amag, Pãrau khĩirjuawai, ¿chijã chi thethem agá ajim anʉm: sĩi mes gaai thoikha sĩsiewai khoogpai jupcheejem, wa mes gaai chi thep paajem? Magnaa ichdeupai, Chi ʉ̃rʉʉcha simʉn ya sĩi thoikha sĩsim abaawai khoogpai jupcheejemʉugui ajim anʉm. Magnaa amag, Mʉʉn chadcha pãar Porougui ajim anʉm. Mamʉ pãrau oo nʉm, sĩi mʉig mʉ pãar chogkha chitʉmjoo chirʉm. 28Mamʉ mua ĩchab khaphʉ chirʉmgui ajim anʉm, chadcha pãarta mʉ dʉi ogdʉba ich jãg wenʉrraajem mʉ chitʉmpierr, pãach dau aphʉʉ ajujã khĩirjuba. 29Pãach jãg wenʉrrʉm gaaimua, mua pãrag ĩchab mʉch dʉi õor porkhapijugui ajim anʉm, mʉ Ayau mʉchta thumaam khʉʉn reikhapibarm dʉi. 30Mag mʉchta thumaam khʉʉn Porkha chirsim edta deeu maach ãba onee aju. Maimua rey juupjemjom sie gaai jupkhawia pãachta mʉ dʉi jooi Jacob khararr chaain doce narr khʉʉn ag chaain ewagam khʉʉn porkhajugui ajim anʉm.
Jesuu jaauwai Pedroou bʉ̃ʉrjã i khaugbam aju jaautarr
(Mt. 26:31-35; Mr. 14:27-31; Jn. 13:36-38)
31Maimua ĩchab magjim aajem maach Por Jesuu Simonag:
—Simón, dosãtau Ẽwandamag jeeu wai simgui ajim anʉm, pʉ dʉi ichdeu ampierr awia pʉ dau aug waupieg. 32Mamʉ mua jũrr pʉ kõit Ẽwandamag jeeu chirʉmgui ajim anʉm, pʉch khũgurcheewai warre burrm iek burrm ugua. Maagwai ũmaai deeu mʉ thʉ̃r gaai khĩirju chirsiewai pʉchdeupaita jũrr pʉch khapeenag jaauju aai chirʉmgui ajim anʉm, amjã agjo ubʉ nʉisimkhĩir.
33Magbaawai chi Simonau irig, —Señor, mʉʉn pʉ dʉi cárcel deg mawia pʉ thõbarm aar thõimaju akhiinjã maju chirʉm; magʉmjã mʉ gaai mas khabamgui ajim anʉm.
34Magbaawai Jesuu jũrr irig, —Pedro ajim anʉm, pʉ mag iekha chirʉm ãba, nau õrau pʉchig jeeuwai, ãthãrr bĩeju nawe biek thãrjup purua amag bʉ̃ʉrjã mʉ khaugba chitʉm a jaaujugui ajim anʉm.
Espaar numí
35Maimua warm khʉʉnagjã magjim aajem:
—Ar mua Ẽwandam iek jawamkhĩir pãar putjã chukhu phatkhonjã chukhu sĩi ich jãg zapat theg jũajujã chukhu pʉijim ed, ¿nem inag athee pãar augchejierrá? ajim anʉm.
Magbaawai chi khapeenau, —Ʉ̃hʉ̃, bʉ̃ʉrjã maar augchebajimgui ajierram aajem.
36Magbaawai deeu ichdeupai amag, —Magtarr ĩsin chadau put wai nʉm khai, athaadet; ĩchab phatkhon khãijã wai nʉm khai, athaadet; maimua ãb khãijã espaar chukhu sim khai, ich khajũa perbapʉi ajim anʉm, agua awaag. 37Mua pãrag mag chirʉmʉn, Ẽwandam iek phã sim gaai jaau simjo ya mʉch thõimʉʉ paawaita mag chirʉmgui ajim anʉm. Ẽwandam iek phã sim gaai mʉ igwia jaauwai, “Iin, õor thõomiejota wai naaju” a sim. Mʉ igwia ich mag phã sim aawai chadcha thum ichdeu jaau sim eyaa obeberg maju a jaaumajim aajem.
38Magbaawai amachdeu irig oopinaa, —Señor, ya marau mʉig espaar numí wai nʉmgui ajierram anʉm.
Magbaawai ichdeu, —Tag mʉ iekhabam, ideu ich magpai sĩujugui ajim.
Nemjĩirdo Getsemaní anʉm ee Jesús oraatarr
(Mt. 26:36-46; Mr. 14:32-42)
39Maigmua oberdʉtkhaau Jesús Olivo durrsĩig petajim aajem, kheeupierr mawia mag durrsĩ gaaimua ich Ayag jeeujerr aawai. Mag i mam dʉi ĩchab i khapeenjã i dʉi wetjim aajem. 40Mag wetwia ich Ayag jeeujem aig bardʉtkhabaimaawai ich khapeenag, —Ẽwandamag jeeubat ajim anʉm, dosãtag ʉdʉraa pãach phũrreu aupiba mʉ dʉita ubʉ wenʉrraag.
41Mag jaauwia, ichin am aigmua mawia, juau mokdau barbapäaiwai burrjem ag warphagjopai sĩeimajim aajem, am bigaau. Maig jẽkhʉt jĩeporou phõbkhanaa, ʉ̃gthaag eerpanaa, ich Ayag jeeubaadejim aajem. 42Mag jeeumamua, —Tata ajim anʉm, pua khõs akhiin, atcha mʉ dau aphʉʉ apibakham. Deeum nem waubarmuajã agjo õor peerdʉ auju ayaa akhiin, mʉ gaai machag mʉgcha ãwatbakhamgui aajeejim anʉm. Mamʉ pʉchdeuta khap chirʉm; mʉchdeu khõsi chirʉmjo khaba, pʉchdeu khõchagpierrta mʉ dʉi abá a iekhamajim aajem.
43[Ich Ayag jeeuwai mamagkhamua kha theeg chukhu thʉnʉm ee, ʉ̃gtharmua Ẽwandam chog beewia irig juapá deechejim aajem, mag ich dau aphʉʉ aju ãwatamkhĩir. 44Mag ich dau aphʉʉ aju khĩirjuwia gaai machag thʉnʉmua warag oraa nʉmta, khajapham nemjo thet phʉreu ahau aajeejim anʉm. Mamagkhamua jʉache thʉnʉm oowain sĩi jʉa gaai bagpata ober thʉnʉm theutkha thʉnaajim anaabá.] 45Mag ʉ̃gthaag ich Ayag jeeu sĩi awia, phiidʉwia, ich khapeen oon beewai sĩi warag okhĩirjug machgau khãidʉtkha thʉnʉmta oochejim anʉm. 46Magbaawai amag, —Phiidʉtkhabathʉ̃ keena ajim anʉm. ¿Khantheeta pãar khãi nʉma? Khãiju khãai Ẽwandamagta jeeubathʉ̃ ajim anʉm, dosãtag ʉdʉraa pãach thʉ aupim ugua.
Jesús pʉr arrtarr
(Mt. 26:47-56; Mr. 14:43-50; Jn. 18:2-11)
47Mamʉ agtha Jesús mag iekha dʉnʉm ee, degolp am aig õor khapan pos aichejim anaabá. Mag khapanag ee oowai ich Jesús dʉi doce ogdʉba wenʉrraajerr eem ãb Judas a thʉ̃r sĩerrta am na urajim anʉm. Mag beewia, Jesús dʉi ãba dʉnʉʉuchejim anaabá, sĩi khajapha saludaa nʉmjo i khĩir ʉ̃ʉg. 48Magbaawai Jesuu irig magjim anʉm:
—Judas, mʉch chi Emkhooi Iewaa mʉ oomapham khʉʉnag pʉr deeg mʉ khĩir ʉ̃ʉ chirʉmta pʉchigan sĩi saludaa chirʉm a chirabma ajim anʉm.
49Magbaawai ich Jesús khapeenau amach Por dau aphʉʉ aju khaug athaawai, —Kake, ¿marau pʉ kõit esparau am dʉi jãauju jãg nʉ? ajierram anʉm irig.
50Mag irig jeeu nʉm ee, ãbmua bis abarmʉn, phadnaan por ag chog kach juachaar garmta warre oorthubapʉijim anaabá. 51Magbaawai Jesuu ich khapeenag, —Oob jãgmiet; ideu mʉ dʉi amachdeu ampierr apibat ajim anʉm.
Magnaa chi kach deeu ich sĩerrjoo khaarpi sĩujim anaabá.
52Maimua Jesuu oowai aig naajim aajem: phadnaan chi porkha nʉm khʉʉn, judionaan Asamblea eem pornaan, maimua Ẽwandam i jeeujem di thʉajem khʉʉn chi pornaanpa thʉnaajim aajem, i pʉr awaan beetarr khʉʉn. Magbaawai chi Jesuu amag magjim aajem:
—¿Pãrau oowain mʉʉn sĩi õor nem jĩgkhanaa õor thõomiejota chirabama ajim anʉm, jãg sĩi mʉ aig jua ee jierrnempan appai beeg? 53Ẽwandamag jeeujem deg ed eepierr pãar dʉi mʉ chiraawai, bʉ̃ʉrjã pãrau mʉ chig aba aajerrta, ĩsta Ẽwandamau pãrag ʉdʉraa mʉ pʉr aupiju ed ajim. Maagwai ĩsta ĩchab chi dosãtjã pãar ʉ̃rpaju ed ajimgui ajim anʉm, mʉ pʉr aumkhĩir.
Pedroou Jesús khaugba chitʉm atarr
(Mt. 26:57-58,69-75; Mr. 14:53-54,66-72; Jn. 18:12-18,25-27)
54Maimua Jesús pʉrphobaadewia, arrwia, phadnaan por deg wai dubphobaadejim aajem. Maagwai Pedroou warppaimuata i ẽudee oopʉpʉig warrmaa ajim anaabá. 55Mag chi phadnaan por aar deethurwia chi Jesús ierr wai nʉmich, jũrr di ũjãrr õt orwia ag bigaau ohood aphobaadejim aajem. Magbaawai Pedrojã ĩchab am bigaau oo sĩsijim anʉm. 56Mamʉ i mag oo simta, aiguim ʉʉi ĩchab chi phadnaan por chogkha sim beewia, i khĩir eerpanaa, warm khʉʉnag, —Chamʉg wounjã ĩchab i dʉi nʉrraajemʉu aichejim anʉm.
57Magbaawai Pedroou, —Mua magʉm wounaan ooba chitʉmgui ajim anʉm.
58Maimua ag khur nʉʉpai awia jũrr emkhooi ãbmua irig, —Pʉjã am eem khabahab aichejim anʉm.
Magbaawai Pedroou, —Kake, mʉ chan am eem khabam perá ajim anʉm.
59Maimua deeu ag khur ora ãbjonaa deeum beewia maguajã agjo irig, —Chadcha mʉg wounjã i dʉi nʉrraajem khabahab ajim anʉm; jãan Galileapierrauwai ajim anʉm.
60Magbaawaita Pedroou, —Kake, mua bʉ̃ʉrjã khaugbam, khan ata pʉ iekha chirʉm khai ajim anʉm.
Magbarm bʉrre agtha thumjã Pedro iekha oba nʉm ee, ãthãrrta kekerekee ahbar. 61Mag ãthãrr bĩebaawai maach Por Jesucristoou ewag phʉʉrba oo nʉʉ ajim aajem, Pedroog. Maigta Pedroou khĩir eyaa aadejim anaabá, maach Porou ichig, “Pedro, ãthãrr bĩeju nawe õrau pʉchig jeeuwai biek thãrjup pua bʉ̃ʉrjã mʉ khaugba chitʉm a iekhaju” a jaautarr. 62Mag khĩir ee dʉnʉisim abarmʉn chadau, gaai machaaga aademua dawag oberwia, warre o jãsenag aademua bĩe sĩi ajim anaabá.
Jesús dau aphʉʉ wai narr
(Mt. 26:67-68; Mr. 14:65)
63Maagwai Jesús pʉr wai nʉm aig oopaar thʉnarr khʉʉnaujã i wau iekhanaa ĩchab moketaupa phãr wai nʉmua i gaai mas waumaajeejim aajem. 64Magnaa putiu i dau phãarjʉ̃naa jũrram khʉʉnau khĩidadcha juajãau phot anaa irig, —Magan khaug athá, khaíuta pʉ phãrjĩ aajeejim anʉm.
65Ich mag pʉamjã igba, i wau wai nʉmua warag irig parhoobajã iekhamaajeejim aajem.
Jesús judionaan Asamblea ee wai narr
(Mt. 26:59-66; Mr. 14:55-64; Jn. 18:19-24)
66Maimua ya ãspabaadeewai ãba biirdʉjierram aajem: Asamblea eem chi pornaan phadnaan porkha nʉm khʉʉn dʉi Ẽwandam i jawaag chi machnaanpa. Mag biirdʉwia amach Asamblea ee chi Jesús aibeewia irig, 67—¿Pʉchta chadcha warrgarwe Ẽwandamau õor peerdʉ aumkhĩir jʉr auwia pʉiju aajerrá? Warre marag jaaubá ajierram anʉm, marau khap aag.
Magbaawai Jesuu, —Mua pãrag jaaukhiinjã, pãrau mʉ iek ʉkhabajugui ajim anʉm. 68Maimua mʉch garmua jũrr pãrag jeeumakhiinjã, pãrau mʉ iek jʉ̃ʉjã aba ni mʉ pʉapʉijã pʉapʉibajugui ajim anʉm. 69Mamʉ nau mʉg atag jopcha mʉg woun Emkhooi Iewaa Ẽwandam chi jua thierr bigaau i juachaar gar jupimajugui ajim anʉm, Ẽwandam dʉi ãba thumaam khʉʉn Porkhaag.
70Magbaawai thumaam khʉʉnau irig, —¿Ãa, magan pʉʉn Ẽwandam Iewaapama? ajierram anʉm.
Magbaawai jũrr ichdeu amag, —Pãachdeupa khabá pãrau khaphʉ mʉ aruu a jaau nʉmgui ajim anʉm.
71Magbaawaita amachdeu, —¿Khan atcha maadeu deeum khʉʉnau jaau nʉmta ũrm ig nʉma? Ya maadeu ũrbarmgui ajierram anʉm, ich iiucha jaaubarm.
Zvasarudzwa nguva ino
San Lucas 22: noaA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2011, Wycliffe Bible Translators, Inc. All rights reserved.