San Lucas 21
21
Khoopaa ʉʉi ofrenda
(Mt. 12:41-44)
1Mag jaau dichwia ich Jesuu Ẽwandamag jeeujem deg jup oo simua eerpa oo sĩejim aajem, riknaan bee thʉnʉm khʉʉnau jũrram khʉʉnau amach ofrenda chi phatkhon phiejem ee pʉapʉpʉikham. 2Mag jũrram khʉʉnau amach ofrenda deeche thʉnʉm ee, ĩchab khoopaa ʉʉi ãb aphʉʉ khitʉm beejim aajem. Mag ʉʉirau phatkhon chi dau daídam dau numpai wai sĩerr warre mag numwe ag ee pʉapʉijim anaabá. 3Mag oobaawaita Jesuu, —Mʉg khoopaa ʉʉi aphʉʉ khitʉmuata chadcha thumaam khʉʉn khãaijã ʉ̃rʉʉcha deebarmgui ajim anʉm. 4Riknaanaun Ẽwandamag amach den chi sobbarm eemta ofrenda deejerram. Mamʉ mʉg khoopaa ʉʉiraun ich den ãbmiecha agua ich thach khoju arrdamta thum Ẽwandamag deebarmgui ajim anʉm.
Aai i jeeujem di õrau pogueupʉiju Jesuu jaautarr
(Mt. 24:1-28; Mr. 13:1-2)
5Ãaur aig narr khʉʉnau Aai i jeeujem di ooimʉ õrau nem deematarr dʉi mokdau ajaphamua joothʉthʉʉd eu dʉnʉm oowia iyʉʉ naajim aajem. Makhʉʉnag Jesuu magjim aajem:
6—Ar mokdau sĩi ajapha joothʉthʉʉd jãg thʉnʉm pãrau oo naabá. Jãg thʉnʉm chan mokpor ãbjã ãbam ʉ̃r ich jãg ajapha joothʉthʉʉd sĩerrabam. Jãg thʉnʉmʉn sĩi thumaa õrau pogueupʉijuuta jãg dʉnʉmgui ajim anʉm.
7Magbaawai i khapeenau irig, —Maestro, pʉ iek mag jãg mokdau joothʉthʉʉd thʉnʉm thum õrau pogueupʉiju anʉm, ma ¿jãagwaichata magjuma? ¿Khan jãg nʉm gaaimua Ẽwandamau ijaaurjo oopijuma ajim anʉm, mag Aai i jeeujem di pogueupʉimʉʉ pam?
8Magbaawai jaaubaademua ichdeu amag magjim aajem:
—Keena, khĩir khaphʉ wenʉrrat; oob chikhamnag sĩi ʉdʉraa pãach khũgur aupimiet ajim anʉm. Nau mʉg atag paawai õor khapankham khʉʉnau amach iekpaita mʉ iek gaai thʉwia, “Mʉʉta ag Cristoou” ajurau, “Ẽwandamau pʉiju aajerr. Ĩsta mʉ barbaichem thumaam khʉʉn Porkhaag” a iekhamajugui ajim anʉm. Mamʉ amau pãachig maagwaijã oob am iek ʉkhamiet ajim anʉm. 9Mʉg atag paawaijã pãrau juurhi theega thʉnʉnʉmkham ũrjurau, durrpierr. Mag thʉnʉm dʉi ĩchab õor wir aig amach pornaan dʉipai meeukhawia sĩi phogdʉ thʉnʉm anʉmjã ũrjugui ajim anʉm. Mamʉ maagwai oob pãrau, “Ĩsin chad Ẽwandamau warreta maach opʉyaagpam” amiet ajim anʉm. Chadcha magʉm nem thum ich jãg didichagmaju; mamʉ magbaademua warag ag bʉrre chan Ẽwandamau õor thum ʉʉrppʉibamgui ajim anʉm.
10Maimua ĩchab mʉg durr thum i agkhaju ed gayaa pamamjã khap amkhĩir jajawagmamua magjim aajem: —Mag thʉnʉisim dʉi ĩchab durr mʉg wejom eepai durr chaauram khʉʉn dʉi werbʉphoo aadejugui ajim anʉm, amachta jũrr chikhamnaan khãyau ʉ̃rpai am khõchgau. 11Mag nʉm dʉi ĩchab durrpierr ʉʉur theega duuimajugui ajim anʉm. Agjo durrpierr jãdau theega burrnaa khamor machagjã khĩir pogkhe ompamamua õor pom thuphãphãau ajugui ajim anʉm. Magbaadeewai edjã eejã ĩchab nem dau chigaa ag na ooba aajempata oomam gaaimua õor jãphierrju jaaumajim anʉm.
12’Mamʉ mag Aai i jeeujem di õrau pogueupʉiwi, pãar oju nawe chikhamnau pãar ẽudee ẽkhawia, pãar pʉrnaa, amach ãba biirdʉwia, Ẽwandam i jaaujem deg pãar arrwia, cárcel degjã pãar arrmajugui ajim anʉm. Mag pãrau mʉ iek ʉkha durrum atheepai amau pãar gobernadornaan aar arrwi reinaan aarjã arrjugui ajim anʉm, pãar khaibag waumkhĩir. 13Mamʉ magʉm aar mag pãar arrwaita ante pãrau amag mʉ iek jaauwímʉcha jaaujugui ajim anʉm. 14Mag thethem khʉʉn na pãach arrwai oob pãrau pãachdeupai pãach kõit iekhaju khĩirjuwia ag nawe, “¿Mʉ khan ata iekhajuwa?” a khĩirjumiet ajim anʉm. 15Mua pãrag mag chirʉmʉn, iekhamkhĩir mʉchdeuta khĩirjug deeju aawaita mag chirʉm. Mag mʉchdeu iekhapi chiraawai ãbmuajã pãar ichaaur iek thierr khaba, ni pãrau iekha nʉmʉn seukhaawaiujã abajugui ajim anʉm. 16Ich mag jaran mʉ iek ʉkha nʉm gaaimua pãach dennaanaupaijã pãar pʉr deemajugui ajim anʉm, chi thethem khʉʉnag. Wa magbam khai, pãach khod ãbam khʉʉnaupai, sĩi thʉ̃r khodpaim khʉʉnau, wa pãach khapkhʉʉn ajaphamua khãijã pãar pʉr deemaju. Mag pʉr deemaawai ãaur khʉʉn khechpʉinaa 17maimua ar juau thõoba abarm khʉʉn jũrr thumaam khʉʉnau oomappha ajugui ajim anʉm, mʉ iek ʉkha durrum gaaimua. 18Mamʉ mʉg jẽb gaai õrau mag pãar oomapha awiajã mua pãar thʉa wai chitajugui ajim anʉm. Amau mag pãar oomapha ajup mamʉ, pãar porbʉdam chan ãbjã Ẽwandamau chig apibajugui ajim anaabá. 19Õrau mag pãach dʉi khaigba awiajã pãarta warag Ẽwandam dʉi ubʉ wenʉrrʉmʉn, pãar akharan i aar oberjugui ajim anʉm.
20Mag jajawagmamua jũrr Jerusalén phobor igwiajã magjim aajem: —Mamʉ ya ar pãachdeu oowai Jerusalén phoborta soldaaunau phʉʉr thuurbaadem oobaawai khap abat ajim anʉm, chadchata ya Jerusalenpienan warm khʉʉnau khechpʉiwia sĩi di khierr appaita jʉjʉrʉʉ sĩwaagpam. 21Magbaawai chi Judea durr nʉm khʉʉn, durr dapag ee dʉrbat ajim anʉm; maimua chi Jerusalén phobor ee nʉm khʉʉn, oberdʉtkhawia ereupetat ajim anʉm. Maagwai ar phobor chaaur amach phidkhaajem aar khãijã nʉm khʉʉn, oob tag ag phobor ee beemiet. 22Magbaademʉn, juau ich Ẽwandamau am dʉi magju arr aawai, ich iek phã sim gaai thumaa ichdeu jaautarrjo israelnaan amach khaigba nʉm paar am chachwia am dau aphʉʉ apiegau ajim anʉm. 23Mamʉ ¡eh, apdurr ajim anʉm, magbaadem jaar ar ʉʉin jõor khitheem khʉʉn, maimua ĩchab ʉʉin ar chaaindam daumeraa wai durrum khʉʉn! Mag járata mʉg Israel durr õor dau aphʉʉta nʉisijupa ajim anʉm. Mua mag chirʉmʉn, õor mʉg thʉnʉm khʉʉn gaaita Ẽwandam khĩir machag burrju aawaita mag chirʉmgui ajim anʉm ich Jesuucha. 24Ãaur khʉʉn juurhi ee warm khʉʉn garmua juau khechmaju; maagwai tagam khʉʉn mag juurhi ee chi ganbarm khʉʉnau pʉrkhanaa amach dʉi amach durr phe arrmajugui ajim anʉm, durrpierr. Mag deeum durram khʉʉnau Jerusalenpien dʉi mag nʉm, ich Ẽwandamau jaautarr thumaa abam aig chan Jerusalén phoboron warm khʉʉnauta ich mag por obeerpiba wai nʉisijugui ajim anʉm.
Emkhooi Iewaa beeju jaautarr
(Mt. 24:29-35,42-44; Mr. 13:24-32)
25Maimua ich Jesuu ichpai jaaumamua magjim aajem ĩchab: —Magbaawai mʉch chi Emkhooi Iewaa beeimʉʉ aademjã khaphʉ ajugui ajim anʉm, ãsdawam edau gaai, edau arg gaai, maimua ĩchab phĩdag gaai. Mag oobaawai õor jãphierrwia warag nem waujujã khaugba aadem dʉi, gaai machag okhĩirjug pooma aphobaadejugui ajim anʉm. Maimua phũas dau dapag thʉnʉm iek sĩi edjã ee pũu wejompa ũrphobaadeewai 26õor sĩi chi meemjo iek chukjã aadep ajugui ajim anʉm, warag Ẽwandamau amach dau aphʉʉ apiju khĩirjuwia. Mag jaran edjã eem nem sĩsidʉmpata sĩi parhooba amach nʉnʉid arr chaaur aaidʉ jorrjee thʉnʉisijugui ajim anʉm. 27Magbaawaita thumaam khʉʉnau mʉch chi Emkhooi Iewaa chadcha edjã baug ee dau daau urum oojugui ajim anaabá. Ya maig mʉg jẽb gayam khʉʉn thum chachbaadeewai mʉchta nem jua theeg thumaam khʉʉn Porkha beejugui ajim anʉm. 28Mamʉ pãachdeu mamagkham oophobaadeewai warag onee abat. Magbaadeewai ya pãrau khaphʉ nʉmgui ajim anʉm, chikham jua ee pãach dau aphʉʉ wenʉrrʉm ee Ẽwandamau ya pãach peerdʉ auwimʉʉ pam.
29Mag Jesuu deeu ich beeju jaau simua ĩchab amag mʉg ejemplo jaaujim aajem: —¿Pãrau ooba aajẽ ajim anʉm, ar higo kher khukhuur aadem, wa magbam khai deeum pabʉ parhoobam khãijã kher khukhuur aadem? 30Pãrau khaphʉ nʉm, mʉig Israel durr higo kher khukhuur aademʉn thumaam khʉʉnau ya chadcha dochʉumie dakpapakham aajem. 31Ich agjota ajugui ajim anʉm, ĩchab mʉ beeju gayaa paawaijã. Ya pãachdeu nem thum mʉchdeu jaau chirʉmjo ohoo khabaadeewai khaphʉ abat ajim anʉm, ya mʉ beeimʉʉ pam; muan mʉg durr mʉchdeuta jʉ̃a auchewia mʉchta thumaam khʉʉn porkhaan urum. 32Mua pãrag mag Aai i jeeujem di õrau pogueupʉiju a jaau chirʉmʉn, cha õor thʉnʉm khʉʉn khechju nawe cha mʉchdeu jaau chirʉmjo thumaa chadcha ajuuta jaau chirʉmgui ajim anʉm. 33Edaujãjã mʉg jẽb dʉi thum chukhu aadeju, mamʉ cha mua pãrag jaau chirʉm chan seukhaawai khabam, jãan thumaa ich ag ee oberjugui ajim anʉm. 34Khĩir khaphʉ nʉisit ajim anʉm, mʉ beewai sĩi doo gaaipai nʉm dʉi warag pãach nem ig nʉmta khĩirju nʉm gaaimua mʉ iek ʉkhaba, warag thãar theeg sĩi mʉ beejujã khaugba, okhoppha nʉm pãach oochepim ugua. 35Mag mʉ beem edan, ar atarraayau ãwarr baarwai sĩi khoodʉ aaujemjota, mʉg durr gaai õor thʉnʉm khʉʉn thum ãba degolp chachaan beejugui ajim anʉm. 36Mamʉ warag Ẽwandamag jeeunaa ajap khĩir khaug nʉisit. Pãrau ich mag pʉaba irig jeeu wenʉrrʉmʉn, nem thumaamua mag õor chachmawiajã bʉ̃ʉrjã pãar chig abajugui ajim anʉm. Maagwai ya mʉch pierrum edjã bʉ̃ʉrjã chigag chukhu pãar mʉ aig mʉ khĩirphee bee thʉnʉisijugui ajim anʉm.
37Mag jaau simua ãsdaaupain sĩi Jesuu Aai i jeeujem deg õrag jaaujeejim aajem, Ẽwandam iek. Maimua edaar paawaita jũrr durrsĩ Olivo anʉm gaai mawia ich mam eejeejim aajem. 38Ãspa thʉnʉisiewai edaupherre õor pooma i nʉan weetjeejim anaabá, Aai i jeeujem deg, irua nem jaau sim ũraag.
Zvasarudzwa nguva ino
San Lucas 21: noaA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2011, Wycliffe Bible Translators, Inc. All rights reserved.