Luka 7
7
1AKASILE yeve malizu ŵake ŵonse mmatu mwa ŵantu ŵala eloŵa mKapernaumi.
2Lomba mlumbwana wa kenturiyo ngana wotemweka naye enzolwala pafupi kufwa. 3Naye akamvwe zya Yesu emtumira akuru a Ayuda nomsenga kuti azampuzumusye mlumbwana wake. 4Naŵo akamzile Yesu empapatirisya echiti, Uyo owamila kuti mumchitire ichi: 5pakuti otemwa mtundu wasu, na mwine etimangisyira sunagoge lasu. 6Nipo Yesu echiya naŵo pamo. Naye peenze lomba pafupi na ng'anda yake kenturiyo emtumira viuza vikamuuzye, Asikuru, msalitamanya: panisawamila neo kuti muloŵe mnyansi mwa mtenje wangu: 7ni paniliyolichisya neka kuwamila kumzilani: lomba nenani lizu, na mlumbwana wangu apoleshewe. 8Pakuti nane nne muntu numvwila nsaka, nina manjolinjoli onimvwila neo; nane nunena kuli ili, Nkoya, nalo likuya; na ku liyake, Iza, nalo likuza; na ku mlumbwana wangu, Chita ichi, naye ochichita. 9Nipo Yesu akamvwe ivi ezizwa naye, echeuka elinenera liumba lumkonka, Numuuzyani, Niliyofwanga mvwano ukuru woteti, yai, chukanga mwa Israeli. 10Naŵo ŵotumiwa akawerereko ku ng'anda ila emfwanga mlumbwana wapola.
11Nipo yenzepo kansita katonto kuti echiya ku munzi zina lake Naine; na asambili ŵake kumo echiya naye, na liumba likuru. 12Lomba pechifwikila ku chilyango cha munzi, ŵonani, enzouliwa kunja muntu wakufwa, mwana mwanalume yeka wa anyina, naye enze wofwilwa: na ŵantu anyinji a ku munzi enze naye pamo. 13Nipo Asikuru pechimuŵona emchitira chifundo emnenera, Usalila. 14Naye ezapo eukumya mtembo: naŵo ŵotwala epanama. Echiti, Mlumbwanawe, nukuuzya, Uka. 15Nipo uyo wakufwa euka enkala eyambolaŵira. Naye empa anyina. 16Lomba mwezo wiŵakata ŵonse: emchinzika Mlungu kuti, Muŵirizi mkuru wauka pali seo: na kuti, Mlungu wasondera ŵantu ŵake. 17Nipo mbiri yake iyi iŵirikila mu Yudaya monse na mchitwa chonse chozunguluka.
18Lomba asambili a Yohana emuuzya ivi vyonse. 19Naye Yohana eliitira aŵiri a asambili ŵake noŵatuma kwa Asikuru kuti, Kansi nimwe uyo akuza, kano tulolera muyake? 20Ŵantu ŵala akamzile echiti, Yohana Mbatizi etituma kuli mweo kuti, Kansi nimwe uyo akuza, kano tulolera muyake? 21Pa nsita ila epozya anyinji matenda na vimumpe na mizimu iipa; na anyinji enze mpofu eŵalolesya soti. 22Naye eyasuka eŵauzya, Nkoyani, mkamuuzye Yohana vimwaŵona novimvwa; mpofu zulola soti, ŵotendeŵala oyenda, amanzonzo osukiwa, ŵotulika matu akumvwa, akufwa ozyushiwa, akavu ana makani aweme oŵirizyiwa kwaŵo. 23Ana shuko uyo wamene ati akanopilingishiwa pali neo.
24Lomba zikafumepo ntumi zya Yohana etatikolinenera liumba zya Yohana, Nga mwifuma na kuya mmalambo kuyoŵonanji? tete losung'unzika na mpepo? 25Lomba mwifuma kuyoŵonanji? muntu ovwala zya limpinti? Ŵonani, aŵo ovwalila nolyera viweme ali mmang'anda ofumu. 26Lomba mwifuma kuyoŵonanji? muŵirizi? Inde, numuuzyani, ni opula muŵirizi kwene kantu. 27Uyu ni ula wizilembewera zyake,
Ŵona, nuitanguzya nkalamba yangu pantanzi pa menso pako,
Yamene iti ize iwamizyetu njira yako kuntanzi kwako.
28Numuuzyani, Mwa ŵala ovyalikwa na anakazi muliye umo mkuru kumpula Yohana: sembe uyo ali mtonto mpera mu ufumu wa Mlungu ni mkuru kumpula yeve. 29Naŵo ŵantu ŵonse akamvwe, na amsonko, emchisya Mlungu ni wolungama, pobatiziwa nobatizo wa Yohana. 30Sembe Afarisayo na asambizi a dango ekana nzeru ya Mlungu, paliyobatiziwa na yeve. 31Nga teti neo niŵapalanye na chinji ŵantu a luko luno? opalana na chinji? 32Opalana na ŵana alinkezi pa walo wa makweo noitana umo na muyake na kuti, Tamlizizyani vinonje, namwe muliyovina; tambuma, namwe muliyolila misozi. 33Pakuti Yohana Mbatizi echiza wosalya mtanda kano kumwa mvinyu; namwe mkuti, Ana chiŵanda. 34Mwana wa muntu echiza wakulya na kumwa; namwe mkuti, Ŵonani, nyakulya uyo na chikungu, chiuza cha amsonko na ŵoponta! 35Lomba nzeru yuŵoneka yolungama na ŵana ŵonse a ine.
36Nipo umo wa Afarisayo emuita kuti alye naye pamo. Naye eloŵa mng'anda ya Mfarisayo uyo nonkala pakulya. 37Lomba ŵonani, mwanakazi wamene enze mmunzi, muŵipa; akaziŵe kuti yeve alinkezi pakulya mng'anda ya Mfarisayo uyo echiza nako kansuŵilo ka alabastero ka mafuta ŵonunkila, 38epanama kuvuli pa mendo ŵake nolila; etatikonasya mendo ŵake na misozi yake, noŵapukuta na sisi la mmutu wake, nofyontesya mendo ŵake, noŵazoleka mafuta ŵala. 39Lomba Mfarisayo emuita akaŵone enena yeka kuti, Muntu uyu angati ni muŵirizi sembe waziŵa kuti mwanakazi uyu omkumya ni ŵani, ni wotyani, kuti ni muŵipa. 40Nipo Yesu eyasuka emuuzya, Simoni, nina malizu okuuzya. Echiti, Asambizi, laŵirani. 41Chiyapuzisya chite enze naŵo amangaŵa aŵiri: umo eyapulako makobiri myanda isano, muyake makumi asano. 42Pechisoŵa vyowezizya eŵalekelera ŵonse aŵiri. Nga ni ŵani wa ŵala ati amtemwe kopula? 43Simoni eyasuka echiti, Nulinga ni ula wechilekelera kopula. Emuuzya, Wapingula wino. 44Naye pomcheukira mwanakazi enena na Simoni, Uŵona uyu mwanakazi? Niloŵa mng'anda mwako, uliyonipa manzi a mmendo ŵangu: sembe yeve wanasya mendo ŵangu na misozi yake noŵapukuta na sisi lake. 45Uliyonifyonta weo: sembe yeve chitatikile panaloŵamo aliyolekofyontesya mendo ŵangu. 46Mutu wangu uliyouzoleka mafuta: sembe yeve wazoleka mendo ŵangu mafuta ŵonunkila. 47Ni panukuuzya, Viipa vyake vinyinji vyalekelewa, pakuti watemwesya kwene kantu: sembe uyo ukulekelewa patonto kwake wamene otemwa patonto. 48Naye emuuzya mwanakazi, Viipa vyako vyalekelewa. 49Naŵo enzenkezi na kulya pamo naye etatikonena ŵeka na ŵeka, Ni ŵani uyu olekelera na viipa? 50Nipo emuuzya mwanakazi, Mvwano wako wakupuzumusya; nkoya pa mtendere.
Currently Selected:
Luka 7: MA23
Označeno
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.