Luka 6
6
1LOMBA yenzepo pa sabata kuti enzopita yeve pa minda ya mapira, naŵo asambili ŵake enzochera visanku vya mapira na kulya, kuvifikinya mmanja mwaŵo. 2Sembe ŵambi Afarisayo echiti, Muchitiranji icho chosazomerekochita pa siku la sabata? 3Naye Yesu eŵayasuka echiti, Mwati mnapende chukanga icho chechichita Davide peenze na njala, yeve na aŵo ŵenze naye pamo; 4chakuti eloŵa mng'anda ya Mlungu noula nolyamo mitanda ila yolangizyiwa, noŵapa soti aŵo ŵenze naye pamo, yamene ichisazomereka kuilya, sembe ku ansembe ŵeka? 5Naye eŵauzya, Mwana wa muntu ni asikuru wa sabata.
6Lomba yenzepo pa sabata limbi kuti eloŵa msunagoge mula nosambizya: enzemo mwamene mula muntu enze na kwanja kwake kwendi kofota. 7Alembi ŵala na Afarisayo enzomlolesya kati apozye pa sabata, kuti afwange mompera mlandu. 8Sembe yeve eziŵa malingililo ŵaŵo; emuuzya muntu wa kwanja kofota, Ima, panama apo pakati. Naye eima epanama padera. 9Yesu enena naŵo, Numkonshani mweo, Kansi ni chozomereka pa sabata kuchita viweme, kano kuchita viipa? kusunga moyo, kano kuucheneka? 10Nipo eŵalazya pa ŵonse ŵala nomuuzya, Tambikizya kwanja kwako. Naye echita teti, na kwanja kwake kwipola. 11Sembe ŵeve egamukisya, eyeruzyana umo na muyake mwati amchitire Yesu.
12Lomba yenzepo mmasiku ŵala kuti echiya ku lupiri ulo kuyolomba; echesya nomlomba Mlungu usiku wonse. 13Kukache eita asambili ŵake, ŵechisalulapo pali ŵeve kumi na aŵiri, ŵechiita soti apostolo; 14Simoni wechiita soti Petro, na Andreya mkwaŵo, na Yakobo na Yohana, na Filipo na Bartolomayo, 15na Mattayo na Tomaso, na Yakobo mwana wa Alifayo, na Simoni woitiwa Zelote, 16na Yuda mwana wa Yakobo, na Yuda Iskariote wamene enze chivumbula. 17Naye esika naŵo pamo nopanama pa mselense, na liumba likuru la asambili ŵake na fwingo la ŵantu ŵofuma mu Yudaya monse na mu Yerusalemi na mchinsinsi cha chimana cha pa Turo na Sidoni, amene echiza kummvwa nopoleshewa matenda ŵaŵo; 18na ŵala ŵozuzika na mizimu iipa epoleshewa. 19Nalo liumba lonse lisakomkumya: pakuti mpamvu ifuma muli yeve noŵapozya ŵonse.
20Lomba eŵinusya menso pa asambili ŵake echiti, Mwina shuko mwakavu: pakuti wanu ni ufumu wa Mlungu. 21Mwina shuko mwe mkumvwa njala lomba: pakuti mze mkute. Mwina shuko mwe mulila lomba: pakuti mze mseke. 22Mwina shuko mweo, akampatani ŵantu, akampatulani nomtuzulani nolitaya zina lanu nga ni liipa, pa mutu wa Mwana wa muntu. 23Sekelelani pa siku lila nolumpa na chimwemwe: pakuti ŵonani, chilambu chanu ni chikuru kumulu: pakuti amausu waŵo eŵachitira tetila aŵirizi. 24Sembe malilo kwanu mwaŵosambazya! pakuti mulupoke mapuzisyo ŵanu. 25Malilo kwanu, mwe mulukute lomba! pakuti mze mumvwe njala. Malilo, mwe museka lomba! pakuti mze mndandaule nolila misozi. 26Malilo, akamnenelani ŵantu ŵonse viweme! pakuti amausu waŵo eŵachitira tetila aŵirizi achipazyo.
27Lomba numuuzyani mweo mkumvwa, Temwani tupondo twanu, chitirani viweme ŵala omtinkani, 28shukisyani ŵala omshamikani, lomberani ŵala omchitirani kaŵikiŵiki. 29Uyo okunyata mbovu imo umpe iyake soti; na uyo okulonda chovwinikila usamtana mwinjira wako soti. 30Umpe ali wonse okusenga; na uyo okulonda viya vyako usamtopa soti. 31Nga ni umo mmupangwila kuti ŵantu amchitireni mweo, mwachitire mweo soti ŵeve tetila. 32Kati mkatemwa ŵala omtemwani mweo, myamikiwe tyani? pakuti chukanga ŵoponta oŵatemwa ŵala oŵatemwa ŵeve. 33Namwe kati mkachitira viweme ŵala omchitirani mweo viweme, myamikiwe tyani? pakuti chukanga ŵoponta ochita tetila. 34Namwe kati mkayapuzisya ŵala amugomezya kupoka kwaŵo, myamikiwe tyani? chukanga ŵoponta oŵayapuzisya ŵoponta ayaŵo, apoke soti vyamene. 35Lomba temwani tupondo twanu notuchitira viweme, noyapuzisya kogomezya mperampera; na chilambu chanu chiŵe chikuru, namwe mwakuŵa ŵana a Ula wa Kumulu ngako: pakuti yeve ni wowama mtima kuli ŵosayamika na aipa. 36Iŵani na chifundo, nga ni umo Ausu wanu mwalili na chifundo. 37Msapingula, namwe muŵe ŵosapinguliwa: msakonwesya, namwe muŵe ŵosakonweshewa: mangululani, namwe muŵe ŵomanguluka: 38ipani, ninga mpewe; mlingo ukuru wosindiliwa nosung'unizya nozula tololo azampeni mmanja mwanu. Pakuti mlingo umulinga nawo ni wati aŵomlingiramoni.
39Lomba eŵasimikira linganizyo soti, Nga mpofu zingatanguzyane? kansi sizingawe zyonse ziŵiri mchisengu? 40Msambili ntopula msambizi wake: lomba ali wonse akaliwamya mtima azaŵe nga ni msambizi wake. 41Ulolanji kambandu kali mliso la mkwanu, lomba suchilinga chimuti chiri mliso lako wamwine? 42Kano umneneranji mkwanu, Mkwasu, leka nifumye kambandu kali mliso lako, pausachiŵona wamwine chimuti chiri mliso lako wamwine? We wolipazya, tangofumye chimuti mliso lako wamwine, ningoŵone wino kufumya kambandu kali mliso la mkwanu. 43Pakuti palive chimuti chiweme chutwala vyotwala vyatyala, soti na chimuti chatyala sichutwala vyotwala viweme. 44Pakuti chimuti chiri chonse chuziŵikwa na vyotwala vya chine. Chikomo mminga ŵantu ntocheramo chiku, kano mchitungwi kucheramo mipesya. 45Muntu muweme ofumya ivyo viri viweme mchuma chiweme cha mu mtima mwake; na muŵipa ofumya ivyo viri viipa mchuma chiipa: pakuti pa mapakilo a mtima ni papoingolaŵira pakanwa pake.
46Namwe muniitiranji neo, Asikuru, Asikuru, nosachita vununena? 47Ali wonse onizila na kumvwa malizu ŵangu noŵachita nimlangizyeni opalana na ŵani: 48opalana na muntu omanga ng'anda, ekumbisya noliula, nozika vya pansi pa luŵambe: nipo pelileta zamba kamana kekuntila pa ng'anda ilaya, lomba kwikakanga kuisung'unzya, pakuti imangiwa wino. 49Sembe uyo akumvwa nosachita opalana na muntu emanga ng'anda pamsili paliye makumbililo, ikekuntila kamana, na lomba pano apa ichiwa; na kunyenyeka kwa ng'anda ilaya kwenze kukuru.
Currently Selected:
Luka 6: MA23
Označeno
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.